(1)

Cuireann an Banc Ceannais Eorpach (BCE) a chúraimí i gcrích i gcomhréir leis na Conarthaí.

(2)

I gcomhréir le hAirteagal 45(3) de Rialachán (AE) 2018/1725, leagtar amach i gCinneadh (AE) 2020/655 ón mBanc Ceannais Eorpach (BCE/2020/28) (2) na rialacha ginearálta lena gcuirtear Rialachán (AE) 2018/1725 chun feidhme a mhéid a bhaineann le BCE. Sonraítear ann go háirithe na rialacha a bhaineann le ceapachán agus ról oifigeach cosanta sonraí an BCE (OCS), lena n-áirítear cúraimí, dualgais agus cumhachtaí an OCS.

(3)

Agus na cúraimí a thugtar do BCE á bhfeidhmiú aige, gníomhaíonn BCE, agus go háirithe an t-aonad eagraíochtúil lena mbaineann, mar rialaitheoir sonraí a mhéid a chinneann sé, ina aonar nó go comhpháirteach, críocha agus modhanna na próiseála sonraí pearsanta.

(4)

I dtaca le feidhmiú inmheánach BCE, cuirtear cúraimí ar réimsí éagsúla gnó BCE (lena n-áirítear an Ard-Stiúrthóireacht um Acmhainní Daonna (DG/HR), an Oifig um Chomhlíonadh agus Rialachas (CGO), an Stiúrthóireacht um Iniúchóireacht Inmheánach (D/IA) agus Ard-Stiúrthóireacht na Seirbhísí Dlí (DG/L)) laistigh den chreat dlíthiúil lena rialaítear fostaíocht in BCE lena mbaineann próiseáil sonraí pearsanta. D’fhéadfaí a áireamh i gcúraimí den sórt sin, mar shampla, gníomhaíochtaí arna nglacadh i ndáil le sáruithe féideartha ar dhualgais ghairmiúla (lena n-áirítear imscrúduithe ar iompar míchuí de bhun chreat an BCE maidir leis an dínit san ionad oibre agus an obair leantach ar thuairisciú aon ghníomhaíochta mídhleathaí nó aon sáraithe ar dhualgais ghairmiúla a cuirtear isteach trí aon chainéal, lena n-áirítear inter alia, trí uirlis sceithireachta an BCE); tascanna a bhaineann le nósanna imeachta roghnúcháin; cúraimí arna ngabháil de láimh ag DG/HR i gcomhlíonadh a feidhmeanna a bhaineann le bainistíocht feidhmíochta, ardú céime, ceapadh pearsanra BCE go díreach, forbairt ghairmiúil lena n-áirítear calabrú tallainne laistigh de réimsí gnó agus tharstu, méaduithe tuarastail agus bónais agus cinntí maidir le soghluaisteacht agus saoire; scrúdú a dhéanamh ar achomhairc inmheánacha arna dtionscnamh ag pearsanra BCE (lena n-áirítear trí athbhreithniú riaracháin, nósanna imeachta casaoide, nósanna imeachta achomhairc speisialta nó coistí leighis) agus an obair leantach ina leith; cúraimí comhairleacha CGO faoi Chreat Eitice BCE (a leagtar amach i gCuid 0 de Rialacha Foirne BCE) agus, chun críocha comhlíonta, cúraimí CGO a bhaineann le faireachán ar ghníomhaíochtaí airgeadais príobháideacha (lena n-áirítear comhar le haon soláthraí seirbhíse seachtrach arna cheapadh de bhun Airteagal 0.4.3.3 de Rialacha Foirne BCE); agus iniúchtaí arna ndéanamh ag an D/IA agus na cúraimí a dhéantar i gcomhthéacs Chiorclán Riaracháin Uimh. 1/2006 maidir le fiosrúcháin inmheánacha riaracháin le linn gníomhaíochtaí imscrúdaithe agus fiosrúcháin riaracháin (3) a sheoladh i gcásanna a bhféadfadh gné araíonachta a bheith acu a bhaineann le pearsanra BCE (lena n-áirítear cúraimí na ndaoine a sheolann an fiosrúchán nó comhaltaí an phainéil fiosrúcháin i gcás ina gceanglaítear orthu fianaise a bhailiú agus na fíricí ábhartha a shuíomh).

(5)

De bhun Chinneadh (AE) 2016/456 ón mBanc Ceannais Eorpach (BCE/2016/3) (4) ní mór do BCE faisnéis atá i seilbh BCE as a n-eascraíonn amhras go bhfuil cásanna féideartha calaoise, éillithe nó aon ghníomhaíochta neamhdhleathaí eile ann a dhéanann difear do leas airgeadais an Aontais a tharchur chuig an Oifig Eorpach Frith-Chalaoise, arna iarraidh sin di nó ar thionscnamh BCE féin. Foráiltear le Cinneadh BCE/2016/456 (BCE/2016/3) i gcás den sórt sin go gcuirtear páirtithe leasmhara ar an eolas go tapa, mura mbeidh sé sin díobhálach don imscrúdú, agus, i gcás ar bith, nach bhféadfar teacht ar aon chonclúidí ina ndéantar tagairt, faoina n-ainmithe, do pháirtithe leasmhara gan deis a thabhairt do pháirtithe leasmhara a dtuairimí a chur in iúl maidir leis na fíorais uile a bhaineann leo, lena n-áirítear aon fhianaise atá ann ina n-aghaidh.

(6)

De bhun phointe (b) d’Airteagal 4 de Chinneadh (AE) 2020/655 (BCE/2020/28), ní mór don OCS imscrúdú a dhéanamh ar ábhair agus ar theagmhais a bhaineann le cosaint sonraí ar a thionscnamh féin nó ar iarraidh ó BCE.

(7)

Tá an Rannán um Shlándáil agus um Shábháilteacht, atá laistigh den Stiúrthóireacht um Riarachán, freagrach as imscrúduithe a dhéanamh chun cosaint na slándála fisiciúla do dhaoine, d’áitreabh agus do mhaoin a áirithiú sa BCE, as fhaisnéis faoi bhagairtí a bhailiú agus as anailís a dhéanamh ar theagmhais slándála.

(8)

Tá sé de dhualgas ar BCE comhar dílis a dhéanamh leis na húdaráis náisiúnta, lena n-áirítear údaráis náisiúnta i gcomhair ionchúisimh choiriúil. Go háirithe, de bhun Chinneadh (AE) 2016/1162 ón mBanc Ceannais Eorpach (BCE/2016/19) (5), féadfaidh BCE, arna iarraidh sin d’údarás náisiúnta um imscrúdú coiriúil, faisnéis rúnda atá ina sheilbh agus a bhaineann leis na cúraimí a thugtar do BCE le Rialachán (AE) Uimh. 1024/2013 ón gComhairle (6) nó le cúraimí CEBC/Eurochórais eile faoi seach a sholáthar do ÚIN nó do BCN faoi seach lena nochtadh faoi choinníollacha áirithe don údarás náisiúnta um imscrúdú coiriúil atá i gceist.

(9)

De bhun Rialachán (AE) 2017/1939 ón gComhairle (7), ní mór do BCE aon fhaisnéis a sholáthar gan mhoill d’Oifig an Ionchúisitheora Phoiblí Eorpaigh (OIPE) i gcás ina sainaithnítear amhras faoi chion atá laistigh dá inniúlacht.

(10)

Ní mór do BCE comhoibriú le comhlachtaí AE a fheidhmíonn feidhm mhaoirseachta, formhaoirseachta nó iniúchóireachta a bhfuil BCE faoina réir, amhail an Maoirseoir Eorpach um Chosaint Sonraí, Cúirt Iniúchóirí na hEorpa agus an tOmbudsman Eorpach, agus a gcúraimí faoi seach á gcomhlíonadh acu. Sa chomhthéacs sin, féadfaidh BCE sonraí pearsanta a phróiseáil chun go mbeidh sé in ann iarrataí a fhreagairt, dul i gcomhairle leis na comhlachtaí sin agus faisnéis a sholáthar dóibh.

(11)

De bhun an chreata inmheánaigh um réiteach díospóidí ag BCE, féadfaidh pearsanra BCE dul i dteagmháil le hidirghabhálaí tráth ar bith agus ar bhealach ar bith chun tacaíocht a iarraidh ar an idirghabhálaí chun díospóid a bhaineann leis an obair a réiteach nó a chosc. Foráiltear leis an gcreat sin go mbeidh gach cumarsáid leis an idirghabhálaí faoi chosaint rúndachta. Meastar aon ní a luaitear le linn an phróisis idirghabhála a bheith faoi phribhléid agus ní mór do gach páirtí atá páirteach san idirghabháil an fhaisnéis sin a úsáid chun críche an phróisis idirghabhála agus chun na críche sin amháin, gan dochar d’aon imeachtaí dlí. Ar bhonn eisceachtúil, féadfaidh an t-idirghabhálaí faisnéis a nochtadh nuair is dealraitheach gur gá í a nochtadh chun gar-riosca díobhála tromchúisí d’iomláine choirp nó mheabhrach duine a chosc.

(12)

Déanann BCE a dhícheall dálaí oibre a áirithiú lena gcosnaítear sláinte agus sábháilteacht a phearsanra agus lena n-urramaítear a ndínit san ionad oibre trí sheirbhísí comhairleoireachta a sholáthar chun tacú leo. Féadfaidh pearsanra BCE seirbhísí comhairleora shóisialta a lorg i ndáil le haon saincheisteanna lena n-áirítear saincheisteanna mothúchánacha, pearsanta agus oibre. Ní fhéadfaidh rochtain a bheith ag an gcomhairleoir sóisialta ar chomhad pearsanta phearsanra BCE, mura rud é go bhfuil sé údaraithe go sainráite acu. Ní fhéadfar aon fhaisnéis a fuair duine aonair ná aon ráitis a dhéanann duine aonair leis an gcomhairleoir sóisialta a nochtadh, mura rud é go n-údaraíonn an duine aonair sin go sainráite í nó go n-éilítear amhlaidh leis an dlí.

(13)

I dtaca lena fheidhmiú inmheánach, próiseálann BCE roinnt catagóirí sonraí a d’fhéadfadh a bheith bainteach le duine nádúrtha sainaitheanta nó in-sainaitheanta. Tá liostaí neamh-uileghabhálacha de na catagóirí sonraí pearsanta sin a phróiseálann BCE i dtaca lena fheidhmiú inmheánach sna hIarscríbhinní a ghabhann leis an gCinneadh seo. D’fhéadfadh sonraí pearsanta a bheith mar chuid de mheasúnú lena n-áirítear measúnú arna dhéanamh ag an réimse gnó freagrach a bhaineann leis an ábhar atá á scrúdú, lena n-áirítear, mar shampla, measúnú ag DG/HR, DG/L, D/IA nó ag coiste araíonachta nó ag painéal fiosrúcháin ar shárú ar dhualgais ghairmiúla.

(14)

I gcomhthéacs aithrisí 4 go 13, is iomchuí na forais a shonrú ar a bhféadfaidh BCE srian a chur ar chearta na n-ábhar sonraí.

(15)

Is é is aidhm do BCE agus a chúraimí á gcomhlíonadh aige, cuspóirí tábhachtacha a bhaineann le leas ginearálta phobal an Aontais a shaothrú. Dá bhrí sin, ba cheart comhlíonadh na gcúraimí sin a choimirciú mar a bheartaítear le Rialachán (AE) 2018/1725, go háirithe pointí (b), (c), (d), (f), (g) agus (h) d’Airteagal 25(1).

(16)

I gcomhréir le hAirteagal 25(1) de Rialachán (AE) 2018/1725, ba cheart na srianta ar chur i bhfeidhm Airteagail 14 go 22, 35 agus 36 agus, fad agus a thagann a fhorálacha leis na cearta agus na hoiblieagáidí dá bhforáiltear in Airtegail 14 go 22, Airteagal 4 den Rialachán sin a leagan amach i rialacha inmheánacha nó i ngníomhartha dlí arna nglacadh ar bhonn na gConarthaí. Dá réir sin, ba cheart do BCE na rialacha faoina bhféadfaidh sé srian a chur le cearta na n-ábhar sonraí i gcomhlíonadh a chúraimí a leagan amach.

(17)

Ba cheart do BCE údar a thabhairt leis an bhfáth a bhfuil srianta den sórt sin ar chearta na n-ábhar sonraí fíor-riachtanach agus comhréireach i sochaí dhaonlathach chun na cuspóirí atá á saothrú i bhfeidhmiú a údaráis oifigiúil agus na feidhmeanna a bhaineann leis a choimirciú, agus maidir leis an gcaoi a n-urramaíonn BCE bunéirim na gceart bunúsach agus na saoirsí bunúsacha agus aon srian den sórt sin á fhorchur ag an am céanna.

(18)

Laistigh den chreat sin, tá sé de cheangal ar BCE urraim a thabhairt, a mhéid is féidir, do chearta bunúsacha na n-ábhar sonraí, go háirithe na cearta sin a bhaineann leis an gceart chun faisnéis a sholáthar, rochtain agus ceartúchán, an ceart go ndéanfaí léirscriosadh, srianadh ar phróiseáil, ceart cumarsáide maidir le sárú i ndáil le sonraí pearsanta don ábhar sonraí nó rúndacht cumarsáide dá bhforáiltear i Rialachán (AE) 2018/1725.

(19)

Mar sin féin, d’fhéadfadh sé go mbeadh sé d’oibleagáid ar BCE srian a chur leis an bhfaisnéis arna soláthar d’ábhair sonraí agus le cearta ábhar sonraí eile chun comhlíonadh a chúraimí a chosaint, go háirithe a imscrúduithe agus a nósanna imeachta féin, imscrúduithe agus nósanna imeachta údarás poiblí eile agus cearta agus saoirsí bunúsacha daoine eile a bhaineann lena imscrúduithe nó lena nósanna imeachta eile.

(20)

Ba cheart do BCE deireadh a chur le srian atá curtha i bhfeidhm cheana a mhéid nach bhfuil gá leis a thuilleadh.

(21)

Ba cheart do OCS athbhreithniú a dhéanamh ar chur i bhfeidhm srianta d’fhonn comhlíonadh an Chinnidh seo agus Rialachán (AE) 2018/1725 a áirithiú.

(22)

Leagtar amach leis an gCinneadh seo na rialacha faoina bhféadfaidh BCE srian a chur le cearta na n-ábhar sonraí agus sonraí pearsanta á bpróiseáil ag BCE i dtaca lena fheidhmiú inmheánach, agus an tráth céanna tá cinneadh ar leithligh glactha ag an mBord Feidhmiúcháin lena nglactar rialacha inmheánacha maidir le srian a chur ar chearta i gcomhlíonadh a chúraimí maoirseachta.

(23)

Féadfaidh BCE a bheith in ann eisceacht a chur i bhfeidhm i gcomhréir le Rialachán (AE) 2018/1725 a fhágann nach gá srian a mheas, lena n-áirítear go háirithe iad siúd a leagtar amach in Airteagail 15(4), 16(5), 19(3) agus 35(3) den Rialachán sin.

(24)

Féadfar foráil a dhéanamh do mhaoluithe ó chearta na n-ábhar sonraí dá dtagraítear in Airteagail 17, 18, 20, 21, 22 agus 23 de Rialachán (AE) 2018/1725 chun críocha cartlannú a dhéanamh ar mhaithe le leas an phobail i rialacha inmheánacha nó i ngníomhartha dlí arna nglacadh ag BCE ar bhonn na gConarthaí i ndáil lena chartlannú faoi réir na gcoinníollacha agus na gcoimircí is gá i gcomhréir le hAirteagal 25(4) de Rialachán (AE) 2018/1725.

(25)

Chuathas i gcomhairle leis an Maoirseoir Eorpach um Chosaint Sonraí i gcomhréir le hAirteagal 41(2) de Rialachán (AE) 2018/1725 agus thug sé tuairim uaidh an 12 Márta 2021.

(26)

Chuathas i gcomhairle leis an gCoiste Foirne,

(1)

ciallaíonn “próiseáil” próiseáil mar a shainmhínítear i bpointe (3) d’Airteagal 3 de Rialachán (AE) 2018/1725;

(2)

ciallaíonn “sonraí pearsanta” sonraí pearsanta mar a shainmhínítear i bpointe (1) d’Airteagal 3 de Rialachán (AE) 2018/1725;

(3)

ciallaíonn “ábhar sonraí” duine nádúrtha aitheanta nó inaitheanta; is duine inaitheanta é duine ar féidir a aithint, go díreach nó go hindíreach, go háirithe trí thagairt aitheantóir amhail ainm, uimhir aitheantais, sonraí suímh, aitheantóir ar líne nó fachtóir amháin nó níos mó a bhaineann go sonrach leis an céannacht fhisiciúil, fhiseolaíoch, ghéiniteach, mheabhrach, eacnamaíoch, chultúrtha nó shóisialta an duine nádúrtha sin.

(4)

ciallaíonn “clár lárnach” stór lárnach na ngníomhaíochtaí próiseála sonraí pearsanta uile a dhéantar in BCE a choinníonn OCS agus dá dtagraítear in Airteagal 9 de Chinneadh (AE) 2020/655 (BCE/2020/28);

(5)

ciallaíonn “rialaitheoir” an BCE, agus go háirithe aonad eagrúcháin inniúil BCE, a chinneann, leis féin nó i gcomhpháirt le daoine eile, críocha agus modhanna próiseála sonraí pearsanta agus atá freagrach as an oibríocht phróiseála;

(6)

ciallaíonn “institiúidí agus comhlachtaí an Aontais” institiúidí agus comhlachtaí an Aontais mar a shainmhínítear i bpointe (10) d’Airteagal 3 de Rialachán (AE) 2018/1725;

(a)

sonróidh an rialaitheoir na cearta a bhféadfar srian a chur leo, na cúiseanna leis an srian agus an fad is féidir a mhairfidh sé

(b)

cuirfidh an rialaitheoir an fhaisnéis dá dtagraítear i bpointe (a) san áireamh ina fhógraí cosanta sonraí, ina ráitis phríobháideachais agus ina thaifid ar ghníomhaíochtaí próiseála dá dtagraítear in Airteagal 31 de Rialachán (AE) 2018/1725.