(1)

Foráiltear leis an gcéad fhomhír d’Airteagal 12(1) de Rialacha Nós Imeachta na Comhairle (1) go bhféadfar gníomhartha de chuid na Comhairle a bhaineann le hábhar práinne a ghlacadh trí vóta i scríbhinn i gcás ina gcinnfidh an Chomhairle nó Coiste Bhuanionadaithe Rialtais na mBallstát (Coreper) d’aon toil an nós imeachta sin a úsáid.

(2)

D’fhonn leanúnachas cinnteoireachta na Comhairle a áirithiú sna himthosca eisceachtúla arb í paindéim COVID-19 is cúis leo, ar dá réir nach bhféadfaí cruinnithe rialta na Comhairle a thionól, ghlac an Chomhairle Cinneadh 2020/430 (2) lenar tugadh isteach maolú ar an gcéad fhomhír d’Airteagal 12(1) de Rialacha Nós Imeachta na Comhairle a mhéid a bhaineann le cinntí chun an gnáthnós imeachta i scríbhinn a úsáid, i gcás ina ndéanfaidh Coreper na cinntí sin. Le linn thréimhse chur i bhfeidhm Chinneadh 2020/430, bhí cinneadh ó Coreper an gnáthnós imeachta i scríbhinn a úsáid le déanamh i gcomhréir leis an riail vótála is infheidhme chun an gníomh ón gComhairle lena mbaineann a ghlacadh. Chuir an Chomhairle síneadh leis an maolú sin dhá uair déag, a raibh bonn cirt leo de bharr leanúint de na himthosca eisceachtúla arbh í paindéim COVID-19 ba chúis leo. Chuaigh an síneadh is déanaí, a tugadh isteach le Cinneadh 2022/321 ón gComhairle (3), in éag an 30 Meitheamh 2022.

(3)

D’ainneoin gur tháinig feabhas ar an staid fhoriomlán i ndáil le paindéim COVID-19, is léir ón úsáid a baineadh as an maolú ón gcéad fhomhír d’Airteagal 12(1) de Rialacha Nós Imeachta na Comhairle le 2 bhliain anuas, agus na himeachtaí idirnáisiúnta a tharla le déanaí a raibh gá le gníomhaíocht phráinneach ina leith, go bhfuil sé tábhachtach go mbeadh an Chomhairle in ann leanúint d’úsáid a bhaint as an uirlis den sórt sin amach anseo.

(4)

Dá bhrí sin, ag tógáil ar an taithí a fuarthas agus leanúnachas cinnteoireachta na Comhairle á áirithiú go rathúil le linn phaindéim COVID-19 ar bhealach éifeachtúil, i bhfianaise a dhóchúla is atá sé go mbeidh cásanna ann amach anseo ina n-éileofar gníomhaíocht phráinneach, agus i gcomhréir le ról Coreper atá ag ullmhú na hoibre sa Chomhairle agus chun comhsheasmhacht bheartais agus ghníomhaíochtaí an Aontais a áirithiú, is iomchuí a fhoráil gur cheart cinntí a dhéanamh chun an gnáthnós imeachta i scríbhinn a úsáid, i gcás ina ndéanfaidh Coreper na cinntí sin, i gcomhréir leis an riail vótála is infheidhme maidir le glacadh an ghnímh lena mbaineann ón gComhairle.

(5)

Níor cheart an gnáthnós imeachta i scríbhinn arna chinneadh ag Coreper a úsáid ach amháin in imthosca inar gá gníomhaíocht phráinneach agus ba cheart, roimh ré i gcónaí, ullmhúchán críochnúil a dhéanamh in Coreper, chun a áirithiú a mhéid is féidir, i measc nithe eile, gurb ann do chomhordú náisiúnta, trédhearcacht phoiblí, agus rannpháirtíocht na bparlaimintí náisiúnta i gcomhréir le cleachtais na mBallstát.

(6)

Ba cheart, dá bhrí sin, na Rialacha Nós Imeachta na Comhairle a leasú, i gcomhréir le hAirteagal 240(3) den Chonradh ar Fheidhmiú an Aontais Eorpaigh (CFAE).

(7)

I gcomhréir le hAirteagal 106a den Chonradh ag bunú an Chomhphobail Eorpaigh do Fhuinneamh Adamhach, tá feidhm ag Airteagal 240 CFAE maidir leis an gComhphobal Eorpach do Fhuinneamh Adamhach,