(1)

Le haghaidh fheidhmiú cuí an mhargaidh inmheánaigh, agus go háirithe chun an imghabháil cánach a chosc, déantar foráil le Treoir 95/60/CE maidir le córas coiteann marcála chun gás-olaí a thagann faoin gcód 2710 00 69 den Ainmníocht Chomhcheangailte (AC), agus ceirisín, a thagann faoin gcód AC 2710 00 55, a shainaithint, táirgí fuinnimh a scaoiltear saor lena dtomhailt agus atá díolmhaithe ó dhleacht mháil, nó atá faoi réir ráta laghdaithe dleachta máil. Roinneadh Cód AC 2710 00 69 ina chóid AC 2710 19 43, 2710 19 46, 2710 19 47, 2710 19 48, 2710 20 11, 2710 20 16 agus 2710 20 19, chun an méid sulfair sa ghás-ola a chur san áireamh agus chun a chur san áireamh go bhfuil bithdhíosal i ngás-ola, agus trasuíodh cód AC 2710 00 55 mar chód AC 2710 19 25 (2).

(2)

Le Cinneadh Cur Chun Feidhme (AE) 2017/74 (3) ón gComhairle, deimhníodh an táirge a shainaithnítear leis an ainm eolaíoch N-eitil-N-[2-(1-iseabútocsatocs)eitil]-4-(feiniolasai)anailín (Solvent Yellow 124), táirge a leagadh síos le Cinneadh Cur Chun Feidhme 2011/544/AE ón gCoimisiún (4), deimhníodh mar an marcóir coiteann fioscach é dá bhforáiltear i dTreoir 95/60/CE, chun gás-olaí agus ceirisín a mharcáil, gás-olaí agus ceirisín nár gearradh dleacht orthu ag an ráta iomlán is infheidhme maidir le táirgí fuinnimh den sórt sin a úsáidtear mar thiomántán.

(3)

Le hAirteagal 2 de Chinneadh Cur Chun Feidhme (AE) 2017/74, ceanglaítear go n-athbhreithneofar an Cinneadh Cur Chun Feidhme sin faoin 31 Nollaig 2021 ar a dhéanaí, i bhfianaise na bhforbairtí teicniúla i réimse na gcóras marcála agus i bhfianaise gur gá gníomhú in aghaidh úsáid chalaoiseach táirgí fuinnimh a dhíolmhaítear ó dhleacht mháil nó atá faoi réir ráta laghdaithe dleachta máil.

(4)

Mar chuid den phróiseas athbhreithnithe, sheol an Coimisiún glao ar léiriú spéise in 2015 chun táirgí a thíolacadh a bheadh oiriúnach lena n-úsáid mar mharcóir fioscach i ngás-olaí agus i gceirisín (5). D’fhéach an Coimisiún le substaint mharcála a shainaithint a fheidhmíonn níos fearr ná an tsubstaint atá in úsáid faoi láthair maidir le tacar critéar réamhshainithe. Maidir leis na marcóirí is iarrthóirí uile, d’iarr an Coimisiún an praghas uasta díola le haghaidh na marcóirí agus a modhanna innéacsaithe bhliantúil ar na soláthróirí agus fuair an Coimisiún ó na soláthróirí iad.

(5)

Rinneadh imscrúdú grinn ar na marcóirí is iarrthóirí a mhol na soláthróirí ón taobh teicniúil de le cúnamh ón Airmheán Comhpháirteach Taighde chun a n-athléimneacht maidir leis na teicnící bainte neamhdhleathaí is coitianta a sheiceáil. Leis an anailís (6), sainaithníodh an táirge ar a bhfuil an t-ainm tráchtála ACCUTRACE™ PLUS ina bhfuil bútocsaibeinséin mar an marcóir is fearr.

(6)

In athbhreithniú ar Threoir 95/60/CE in 2019 (7), deimhníodh le meastóireacht an Choimisiúin a úsáidí atá rialacha coiteanna maidir le breoslaí atá faoi réir rátaí laghdaithe dleachta máil a mharcáil ach sainaithníodh laigí Solvent Yellow 124 i dtéarmaí a easpa athléimneachta i leith modhanna coitianta bainte. Deimhníodh leis an meastóireacht gur gá marcóir níos láidre nach féidir a bhaint a chur in ionad Solvent Yellow 124.

(7)

Chomhthacaigh an Mheitheal um Chomhar Custaim de chuid na Comhairle (8) leis na torthaí sin, Meitheal a fuair amach go raibh truailliú tromchúiseach comhshaoil ann mar thoradh ar an sciúradh breosla mar gheall ar an úsáid a bhaintear as ceimiceáin amhail aigéad sulfarach, aigéad clórach agus ithir tuartha agus mar gheall ar dhumpáil neamhdhleathach dramhtháirgí agus ola draoibe faoin tuath, ar thailte talmhaíochta nó ar bhóithre poiblí.

(8)

Dá bhrí sin, ba cheart ACCUTRACE™ PLUS a leagan síos mar an marcóir coiteann fioscach in ionad Solvent Yellow 124 de réir bhrí Threoir 95/60/CE faoi réir na gcoinníollacha a leagtar amach sa Treoir sin. Ba cheart an leibhéal marcála a shocrú ag raon comhchuibhithe chun an cur chun feidhme agus rialú na comhlíontachta ar fud an Aontais a éascú.

(9)

Ar mhaithe le cur chun feidhme réidh an mharcóra nua agus chun go mbeidh na Ballstáit in ann stoic atá acu den mharcóir reatha Solvent Yellow 124 a úsáid, ba cheart idirthréimhse 24 mhí a cheadú. Le linn na hidirthréimhse sin, ba cheart a cheadú do na Ballstáit Solvent Yellow 124 nó ACCUTRACE™ PLUS a úsáid mar an marcóir coiteann fioscach de réir bhrí Threoir 95/60/CE.

(10)

D’ainneoin ACCUTRACE™ PLUS a bheith faoi chumhdach paitinne san Aontas, ba cheart infhaighteacht air a dhaingniú, i gcás inarb iomchuí, trí chomhaontuithe ceadúnúcháin.

(11)

Leis an gCinneadh seo, ní scaoiltear aon ghnóthas óna oibleagáidí faoi Airteagal 102 den Chonradh ar Fheidhmiú an Aontais Eorpaigh.

(12)

Na deiseanna a bheidh ann mar thoradh ar fhorbairtí a dhéanfar amach anseo san eolaíocht, ba cheart na deiseanna sin a chur san áireamh trí theorainn ama a shocrú maidir leis an gCinneadh seo a athbhreithniú.

(13)

Ba cheart athbhreithniú a dhéanamh ar an gCinneadh seo tráth ar bith roimh an teorainn ama sin má fhaightear amach go bhfuil imghabháil cánach ann mar thoradh ar ACCUTRACE™ PLUS a úsáid nó má fhaightear amach gurb é is cionsiocair le damáiste don tsláinte nó don chomhshaol.

(14)

Dá bhrí sin, ba cheart Cinneadh Cur Chun Feidhme (AE) 2017/74 a aisghairm.

(15)

Tá na bearta dá bhforáiltear sa Chinneadh seo i gcomhréir le tuairim an Choiste um Dhleacht Mháil,