(1)

Le Rialachán (CE) Uimh. 1881/2006 ón gCoimisiún (2) socraítear uasleibhéil le haghaidh éilleáin áirithe, lena n-áirítear alcalóidigh thrópáin, in earraí bia.

(2)

Faightear síolta poipín ón gcodlaidín (Papaver somniferum L.). Tá alcalóidigh óipiam amhail moirfín agus cóidín sa chodlaidín. Níl na halcalóidigh óipiam sna síolta poipín, nó má tá níl ach leibhéal an-íseal díobh iontu, ach is féidir leo a bheith éillithe le halcalóidigh de thoradh damáiste feithidí, nó má dhéantar éilliú seachtrach ar na síolta le linn buana, nuair a ghreamaíonn cáithníní deannaigh ón tuí (lena n-áirítear balla an chochaill) de na síolta.

(3)

In 2018, ghlac an tÚdarás Eorpach um Shábháilteacht Bia (“an tÚdarás”) nuashonrú ar an tuairim eolaíoch maidir le halcalóidigh óipiam i síolta poipín (3). Dheimhnigh an tÚdarás an ghéardháileog thagartha (ARfD) ina bhfuil 10 μg moirfín/kg de mheáchan coirp (bw) agus chinn sé gur cheart tiúchan an chóidín sna samplaí de shíolta poipín a chur san áireamh trí chóidín a thiontú ina gcoibhéisí moirfín, trí úsáid a bhaint as fachtóir 0,2. Dá bhrí sin, is grúpa ARfD le haghaidh moirfín agus cóidín an ARfD, arna shloinneadh i gcoibhéisí moirfín. Léirítear sna meastacháin nochta gur dóiche go sárófar an grúpa ARfD, go háirithe i gcás ina n-itear sciartha móra, nó má itear bia ina bhfuil síolta poipín neamhphróiseáilte.

(4)

Ba cheart, dá bhrí sin, uasleibhéil le haghaidh moirfín agus cóidín, arna sloinneadh i gcoibhéisí moirfín, a leagan síos le haghaidh síolta poipín a chuirtear ar an margadh don tomhaltóir deiridh agus do tháirgí bácúis ina bhfuil síolta poipín nó táirgí a dhíorthaítear uathu. Ba cheart na leibhéil sin a leagan síos agus é á chur san áireamh go bhféadfadh an phróiseáil bia tiúchan na n-alcalóideach sna síolta poipín amha a laghdú 25-100 % sa táirge deiridh. Ós iomchuí do tháirgeoir na dtáirgí bácúis faisnéis mionsonraithe a bheith aige ar na síolta poipín a úsáidtear mar chomhábhair i dtáirgí bácúis, lena n-áirítear tiúchan an ábhair choibhéisigh mhoirfín, ba cheart do sholáthraí na síolta poipín an fhaisnéis sin a chur ar fáil do tháirgeoir na dtáirgí bácúis.

(5)

Dá bhrí sin, ba cheart Rialachán (CE) Uimh. 1881/2006 a leasú dá réir sin.

(6)

Chun é a chur ar a gcumas d’oibreoirí eacnamaíocha ullmhú do na rialacha nua arna dtabhairt isteach leis an Rialachán seo, is iomchuí foráil a dhéanamh maidir le tréimhse réasúnach go dtí go mbeidh na huasleibhéil i bhfeidhm. Is iomchuí freisin foráil a dhéanamh maidir le hidirthréimhse le haghaidh earraí bia a chuirtear ar an margadh go dleathach roimh dháta chur i bhfeidhm an Rialacháin seo.

(7)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,