(1)

Bunaítear Fís Eorpach – An Clár Réime um Thaighde agus um Nuálaíocht le Rialachán (AE) 2021/695 ó Pharlaimint na hEorpa agus ón gComhairle (3). Féadfar codanna de Fís Eorpach a chur chun feidhme trí Chomhpháirtíochtaí Eorpacha, le comhpháirtithe ón earnáil phríobháideach agus/nó phoiblí, d’fhonn an tionchar is mó is féidir a bhaint amach ar chistiú ón Aontas agus rannchuidiú ar an mbealach is éifeachtaí le cuspóirí beartais an Aontais.

(2)

I gcomhréir le Rialachán (AE) 2021/695, féadfar tacaíocht a sholáthar do Chomhghnóthais a bhunaítear faoi chuimsiú Fís Eorpach. Níor cheart comhpháirtíochtaí den sórt sin a chur chun feidhme ach amháin nuair nach n-éireodh le codanna eile de Fís Eorpach, lena n-áirítear foirmeacha eile de Chomhpháirtíochtaí Eorpacha, a chuspóirí a bhaint amach nó nuair nach nginfidís na tionchair ionchais is gá, agus dá mbeadh údar leo trí dhearcadh fadtéarmach agus leibhéal ard comhtháthaithe. Sonraítear na coinníollacha faoina gcruthaítear comhpháirtíochtaí den sórt sin sa Rialachán sin.

(3)

Bunaítear an Clár don Eoraip Dhigiteach le Rialachán (AE) 2021/694 ó Pharlaimint na hEorpa agus ón gComhairle (4). Tacaíonn an Clár don Eoraip Dhigiteach le cur chun feidhme na dtionscadal leasa choitinn a bhfuil sé d’aidhm acu bonneagar sár-ríomhaireachta, candamach agus sonraí den chéad scoth a fháil, a chur chun úsáide agus a oibriú, le cónascadh agus idirnascadh, agus leathnú na húsáide a bhaintear as seirbhísí sár-ríomhaireachta agus le príomhscileanna a fhorbairt.

(4)

Bunaítear an tSaoráid um Chónascadh na hEorpa le Rialachán (AE) 2021/1153 ó Pharlaimint na hEorpa agus ón gComhairle (5). Leis an tSaoráid um Chónascadh na hEorpa, is féidir tionscadail leasa choitinn a ullmhú agus a chur chun feidhme faoi chuimsiú an bheartais líonraí tras-Eorpacha in earnálacha an iompair, na teileachumarsáide agus an fhuinnimh. Go háirithe, tacaíonn an tSaoráid um Chónascadh na hEorpa le cur chun feidhme na dtionscadal leasa choitinn sin a bhfuil sé d’aidhm acu bonneagair agus seirbhísí nua a fhorbairt agus a thógáil, nó bonneagair agus seirbhísí atá ann cheana a uasghrádú, sna hearnálacha iompair, teileachumarsáide agus fuinnimh. Cuidíonn an tSaoráid um Chónascadh na hEorpa le tacú le bonneagair nascachta digití a bhfuil leas coiteann iontu, rud a chruthaíonn buntáistí suntasacha dá bharr sin don tsochaí.

(5)

Cuirtear in iúl sa Teachtaireacht ón gCoimisiún an 19 Feabhra 2020 dar teideal A European Strategy for Data [Straitéis Eorpach maidir le Sonraí] straitéis na hEorpa maidir le bearta beartais agus infheistíochtaí chun an geilleagar sonraí a chumasú go ceann cúig bliana. Tá béim sa straitéis ar spásanna coiteanna sonraí poiblí Eorpacha a chruthú, rud a chuirfidh dlús faoi fhás agus a chruthóidh luach. Ach tacaíocht a thabhairt do chruthú spásanna coiteanna sonraí Eorpach den sórt sin agus bonneagair néil chónasctha agus shlána d’áiritheofaí go mbeadh níos mó sonraí ar fáil le húsáid sa gheilleagar agus sa tsochaí, ach go mbeadh an smacht fós ag na cuideachtaí agus ag na daoine aonair a ghineann na sonraí sin. Is comhpháirteanna riachtanacha de sholáthar rianúil acmhainní ríomhaireachta iad Ríomhaireacht Ardfheidhmíochta agus ríomhaireacht chandamach a bhfuil saintréithe feidhmíochta difriúla acu atá riachtanach chun fás agus saothrú spásanna coiteanna sonraí poiblí Eorpacha agus bonneagair néil chónasctha agus shlána d’fheidhmchláir phoiblí, thionsclaíocha agus eolaíocha a uasmhéadú.

(6)

Sa Teachtaireacht ón gCoimisiún an 19 Feabhra 2020 dar teideal Shaping Europe’s digital future [Todhchaí Dhigiteach na hEorpa a Mhúnlú], cuirtear straitéis dhigiteach na hEorpa i láthair, agus dírítear ar phríomhchuspóirí lena áirithiú go gcuideoidh réitigh dhigiteacha leis an Eoraip dul a bealach féin i dtreo claochlú digiteach a théann chun tairbhe na ndaoine. I measc na bpríomhghníomhaíochtaí atá á mholadh aige tá infheistíocht i dtógáil agus cur chun úsáide inniúlachtaí digiteacha comhpháirteacha ar thús cadhnaíochta, lena n-áirítear i dteicneolaíochtaí sár-ríomhaireachta agus i dteicneolaíochtaí candamacha, agus acmhainneacht shár-ríomhaireachta na hEorpa a leathnú chun réitigh nuálacha a fhorbairt le haghaidh leighis, iompair agus an chomhshaoil.

(7)

Sa Teachtaireacht ón gCoimisiún an 10 Márta 2020 dar teideal A new Industrial Strategy for Europe [Straitéis Nua Tionsclaíochta don Eoraip], léirítear straitéis uaillmhianach tionsclaíochta don Eoraip chun na haistrithe dúbailte i dtreo na haeráid-neodrachta agus na ceannaireachta digití a stiúradh. Cuirtear béim sa Teachtaireacht ar an tacaíocht, i measc nithe eile, d’fhorbairt príomhtheicneolaíochtaí cumasúcháin atá tábhachtach ar bhonn straitéiseach do thodhchaí thionsclaíoch na hEorpa, lena n-áirítear Ríomhaireacht Ardfheidhmíochta agus teicneolaíochtaí candamacha.

(8)

Sa Teachtaireacht ón gCoimisiún an 27 Bealtaine 2020 dar teideal Europe’s moment: Repair and Prepare for the Next Generation [Seo í uain na hEorpa: Deisiú agus Ullmhú don Chéad Ghlúin Eile] sainaithníodh roinnt acmhainneachtaí agus cumais dhigiteacha straitéiseacha inar áiríodh Ríomhairí Ardfheidhmíochta agus teicneolaíochtaí candamacha mar thosaíocht sa tSaoráid Téarnaimh agus Athléimneacha, InvestEU agus sa tSaoráid Infheistíochta Straitéisí.

(9)

Tá an ról ceannasach atá ag an Eoraip sa gheilleagar sonraí, a sármhaitheas san eolaíocht, agus a neart tionsclaíoch ag brath níos mó agus níos mó ar a hábaltacht príomhtheicneolaíochtaí sa Ríomhaireacht Ardfheidhmíochta a fhorbairt, rochtain a sholáthar ar bhonneagair sár-ríomhaireachta agus sonraí den chéad scoth, agus a ceannaireacht reatha i bhfeidhmchláir Ríomhaireachta Ardfheidhmíochta a chothú. Is teicneolaíocht phríomhshrutha í an Ríomhaireacht Ardfheidhmíochta le haghaidh chlaochlú digiteach gheilleagar na hEorpa, rud a chuireann ar chumas go leor earnálacha tionsclaíochta traidisiúnta dul i mbun nuálaíochta le táirgí agus seirbhísí a bhfuil luach níos airde acu. I gcomhar le hardteicneolaíochtaí digiteacha eile mar an intleacht shaorga, olltiomsú sonraí agus teicneolaíochtaí néil, tá an Ríomhaireacht Ardfheidhmíochta ag leagan amach an bealach i dtreo feidhmchláir nuálacha don tsochaí agus don tionscal i réimsí criticiúla don Eoraip amhail leigheas pearsantaithe, réamhaisnéis na haimsire agus athrú aeráide, forbairt agus iompar cliste agus glas, ábhair nua le haghaidh fuinneamh glas, dearadh drugaí agus tástáil fhíorúil, an talmhaíocht inbhuanaithe, nó an innealtóireacht agus an déantúsaíocht.

(10)

Is acmhainn straitéiseach í an Ríomhaireacht Ardfheidhmíochta i gcomhair ceapadh beartas, ag cumhachtú feidhmchlár a sholáthraíonn an modh chun réitigh éifeachtúla a thuiscint agus a cheapadh chun dul i ngleic le mórán dúshlán domhanda agus i gcomhair bainistiú géarchéimeanna. Rannchuidíonn Ríomhaireacht Ardfheidhmíochta le príomhbheartais amhail an Comhaontú Glas don Eoraip ina bhfuil samhlacha agus uirlisí chun an líon méadaithe dúshláin chomhshaoil chasta a chlaochlú agus deiseanna a dhéanamh díobh i gcomhair na nuálaíochta sóisialta agus an fháis eacnamaíoch. Sampla de sin is ea an tionscnamh Destination Earth [Ceann Scríbe an Domhain], tionscnamh a fógraíodh sa Teachtaireacht ón gCoimisiún an 11 Nollaig 2019 dar teideal The European Green Deal [An Comhaontú Glas don Eoraip], agus sna Teachtaireachtaí ón gCoimisiún an 19 Feabhra 2020 dar teideal A European strategy for data [Straitéis Eorpach maidir le sonraí] agus Shaping Europe’s digital future [Todhchaí dhigiteach na hEorpa a mhúnlú].

(11)

Is léir ó imeachtaí domhanda ar nós phaindéim COVID-19 an tábhacht atá le hinfheistiú i Ríomhaireacht Ardfheidhmíochta agus in ardáin agus uirlisí samhaltaithe a bhaineann leis an tsláinte, toisc go bhfuil ról lárnach á imirt acu sa troid i gcoinne na paindéime, go minic i gcomhar le teicneolaíochtaí digiteacha eile amhail olltiomsú sonraí agus intleacht shaorga. Táthar ag úsáid na Ríomhaireachta Ardfheidhmíochta chun dlús a chur le sainaithint agus táirgeadh cóireálacha, lena n-áirítear vacsaíní, chun leathadh víreas a thuar, chun cabhrú le leithdháileadh soláthairtí agus acmhainní leighis a phleanáil, agus chun ionsamhlú a dhéanamh ar bhearta scoir iar-phaindéime d’fhonn cásanna difriúla a mheas. Is uirlisí criticiúla ardáin agus uirlisí samhaltaithe na Ríomhaireachta Ardfheidhmíochta le haghaidh na paindéime reatha agus le haghaidh cinn sa todhchaí, agus beidh ról tábhachtach acu i sláinte agus i leigheas pearsantaithe.

(12)

Bunaíodh an Comhghnóthas Ríomhaireachta Ardfheidhmíochta Eorpach le Rialachán (AE) 2018/1488 (6) (“Comhghnóthas EuroHPC”) agus é mar mhisean aige bonneagar sár-ríomhaireachta agus sonraí comhtháite den chéad scoth a fhorbairt, a chur chun úsáide, a leathnú agus a chothú san Aontas agus éiceachóras Ríomhaireachta Ardfheidhmíochta atá thar a bheith iomaíoch agus nuálach a fhorbairt agus tacú leis.

(13)

I bhfianaise forbairtí sa Ríomhaireacht Ardfheidhmíochta, is gá athbhreithniú a dhéanamh ar Rialachán (AE) 2018/1488 lena áirithiú go leanfar den tionscnamh d’fhonn misean agus cuspóirí nua a shainiú don Chomhghnóthas EuroHPC, ag cur san áireamh an anailís ar phríomhspreagthóirí socheacnamaíocha agus teicneolaíochta a dhéanann difear d’éabhlóid na Ríomhaireachta Ardfheidhmíochta agus na mbonneagar sonraí, na dteicneolaíochtaí agus na bhfeidhmchlár sa todhchaí, san Aontas agus ar fud an domhain, chomh maith leis na ceachtanna a foghlaimíodh ó ghníomhaíochtaí reatha an Chomhghnóthais EuroHPC. D’fhágfadh an athbhreithniú go bhféadfaí rialacha an Chomhghnóthais EuroHPC a ailíniú leis an gcreat dlíthiúil nua, go háirithe Rialachán (AE) 2021/695, chomh maith le Rialacháin (AE) 2021/694 agus (AE) 2021/1153.

(14)

D’fhonn an fheidhmíocht ríomhaireachta is gá a chur ar fáil don Aontas chun a acmhainneachtaí taighde agus tionsclaíochta a chothú go ceannródaíoch, ba cheart d’infheistíocht na mBallstát i Ríomhaireacht Ardfheidhmíochta agus i ríomhaireacht chandamach a bheith comhordaithe agus ba cheart an glacadh tionsclaíoch agus margaidh a bheadh le teicneolaíochtaí Ríomhaireachta Ardfheidhmíochta agus ríomhaireachta candamaí a atreisiú sna hearnálacha poiblí agus príobháideacha araon. Ba cheart don Aontas a chuid éifeachtachta a mhéadú ionas go bhféadfar córais Ríomhaireachta Ardfheidhmíochta agus ríomhaireachta candamaí Eorpacha atá dírithe ar éileamh agus bunaithe ar fheidhmchláir a dhéanamh de na forbairtí teicneolaíochta, rud a bhunódh nasc éifeachtach idir soláthar teicneolaíochta, comhdhearcadh le húsáideoirí, agus soláthar comhpháirteach ar chórais den chéad scoth, agus a chruthódh éiceachóras den chéad scoth i dteicneolaíochtaí agus i bhfeidhmchláir Ríomhaireachta Ardfheidhmíochta agus ríomhaireachta candamaí ar fud na hEorpa. Ag an am céanna, ba cheart don Aontas deis a thabhairt dá earnáil tionsclaíochta soláthair giaráil ar infheistíochtaí den sórt sin, agus as sin ghlacfaí leo i réimsí feidhmchláir mórscála atá ag teacht chun cinn amhail leigheas pearsantaithe, an t-athrú aeráide, tiomáint nasctha agus uathoibrithe nó i bpríomh-mhargaí eile a bhfuil an intleacht shaorga, teicneolaíochtaí blocshlabhra, imeall-ríomhaireacht mar bhonn taca fúthu nó ar bhonn níos leithne trí dhigiteáil earnáil tionsclaíochta na hEorpa.

(15)

Ionas go bhféadfaidh an tAontas agus a Bhallstáit ceannaireacht a bhaint amach i bpríomhtheicneolaíochtaí digiteacha amhail Ríomhaireacht Ardfheidhmíochta agus ríomhaireacht chandamach, ba cheart dóibh infheistiú i dteicneolaíochtaí sár-ríomhaireachta ísealchumhachta agus fuinnneamhéifeachtúla don chéad ghlúin eile, i mbogearraí nuálacha agus in ardchórais sár-ríomhaireachta le haghaidh ríomhaireacht eicsea-scála agus iar-eicsea-scála agus le haghaidh ríomhaireacht chandamach, agus le haghaidh feidhmchláir nuálacha sár-ríomhaireachta agus sonraí. Ba cheart dá réir go dtiocfadh bláth ar thionscal soláthair na hEorpa i raon leathan príomhréimsí teicneolaíochta agus feidhmchlár a théann níos faide ná Ríomhaireacht Ardfheidhmíochta agus ríomhaireacht chandamach agus a chothaíonn margaí TFC níos leithne go fadtéarmach le teicneolaíochtaí den sórt sin. Thacódh a leithéid de rud freisin le tionscal eolaíochta agus úsáideoirí na Ríomhaireachta Ardfheidhmíochta agus na ríomhaireachta candamaí dul faoi chlaochlú digiteach agus dlús a chur faoina bpoitéinseal nuálaíochta.

(16)

Is rud riachtanach é fís straitéiseach chomhchoiteann a lorg don Aontas i Ríomhaireacht Ardfheidhmíochta agus i ríomhaireacht chandamach chun uaillmhian an Aontais agus a chuid Ballstát a chur i gcrích lena áirithiú go mbeidh ról ceannasach acu sa gheilleagar digiteach. Bheadh sé de chuspóir éiceachóras de sheirbhísí agus de bhonneagar sonraí Ríomhaireachta Ardfheidhmíochta agus ríomhaireachta candamaí hipearnasctha, cónasctha, slán a bhunú san Eoraip, éiceachóras a mbeadh forlámhas aige ar fud na cruinne, agus a bheadh in ann córais Ríomhaireachta Ardfheidhmíochta agus ríomhaireachta candamaí nuálacha agus iomaíocha a tháirgeadh bunaithe ar shlabhra soláthair atá níos athléimní agus a áiritheoidh fáil a bheith ar chomhpháirteanna, ar theicneolaíochtaí agus ar eolas, lena gcuirfear teorainn leis an mbaol go gcuirfidh briseadh isteach orthu.

(17)

Is é an Comhghnóthas an ionstraim is fearr a fhéadfaidh an fhís straitéiseach don Aontas i Ríomhaireacht Ardfheidhmíochta agus i ríomhaireacht chandamach a chur chun feidhme, sa dóigh go n-áiritheofar go mbainfidh an tAontas tairbhe as cumais sár-ríomhaireachta, ríomhaireachta candamaí agus sonraí den chéad scoth de réir a phoitéinseal eacnamaíoch, ag freastail ar riachtanais úsáideoirí na hEorpa. Is é an Comhghnóthas an ionstraim ab fhearr chun an ceann is fearr a fháil ar na teorainneacha reatha agus a thairgeann an tionchar is airde don gheilleagar, don tsochaí, agus don chomhshaol agus is é is fearr a fhéadfaidh cosaint a thabhairt do leasanna an Aontais sa Ríomhaireacht Ardfheidhmíochta agus sa ríomhaireacht chandamach. Is féidir leis acmhainní a chomhthiomsú ón Aontas, ó na Ballstáit agus ó na tríú tíortha atá comhlachaithe le Fís Eorpach, leis an gClár don Eoraip Dhigiteach nó leis an tSaoráid um Chónascadh na hEorpa agus an earnáil phríobháideach. Is féidir leis creat soláthair a chur chun feidhme agus córais Ríomhaireachta Ardfheidhmíochta agus córais ríomhaireachta candamaí den chéad scoth a oibriú. Is féidir leis cláir thaighde agus nuálaíochta a sheoladh chun teicneolaíochtaí Eorpacha a fhorbairt agus iad a chomhtháthú ina dhiaidh sin i gcórais sár-ríomhaireachta den chéad scoth.

(18)

Is cuid den phunann Comhpháirtíochtaí Institiúidithe a bheidh sa Chomhghnóthas faoi Fís Eorpach lenar cheart iarracht a dhéanamh acmhainneachtaí eolaíochta an Aontais a neartú chun bagairtí atá ag teacht chun cinn agus dúshláin sa todhchaí a láimhseáil i Limistéar Eorpach Taighde atreisithe, slabhraí luacha an Aontais atá á stiúradh ag an inbhuaine agus uathriail straitéiseach an Aontais a bhaint amach, agus feabhas a chur ar an nglacadh a bheidh le réitigh nuálacha ina ngabhfar i ngleic le dúshláin aeráide, chomhshaoil, sláinte agus le dúshláin dhomhanda sochaí eile ag teacht le tosaíochtaí straitéiseacha an Aontais, lena n-áirítear aeráid-neodracht a bhaint amach san Aontas faoi 2050.

(19)

Ba cheart an Comhghnóthas a mhaoiniú trí chláir an Aontais faoin gcreat airgeadais ilbhliantúil do na blianta 2021 go 2027 (“CAI 2021-2027”). Ba cheart é a bhunú le linn 2021 agus ba cheart go mbeadh sé ag feidhmiú go dtí an 31 Nollaig 2033 chun bonneagar sár-ríomhaireachta cónasctha, slán agus hipearnasctha den chéad scoth a chur ar fáil don Aontas, agus na teicneolaíochtaí, feidhmchláir agus na scileanna riachtanacha a fhorbairt chun cumais eacsascálaithe a bhaint amach thart ar 2022-2024, agus iar-eicseascálaithe thart ar 2025-2027, agus éiceachóras nuálaíochta Eorpach den chéad scoth a chur chun cinn sa Ríomhaireacht Ardfheidhmíochta agus sa ríomhaireacht chandamach. I gcomhréir le hAirteagal 10(2)(c) de Rialachán (AE) 2021/695, tá Comhghnóthais le cur chuige saolré soiléir a bheith acu. Chun leasanna airgeadais an Aontais a chosaint go leordhóthanach, ba cheart Comhghnóthas a bhunú go ceann tréimhse dar críoch an 31 Nollaig 2033 chun go bhféadfaidh sé a fhreagrachtaí a fheidhmiú maidir le cur chun feidhme deontas go dtí go mbeidh na gníomhaíochtaí indíreacha deireanacha a seoladh curtha i gcrích agus maidir leis na gníomhaíochtaí a bhaineann le hoibriú na sár-ríomhairí EuroHPC a thabhairt chun críche.

(20)

Ba cheart don chomhpháirtíocht phoiblí-phríobháideach i bhfoirm Comhghnóthais na hacmhainní airgeadais agus teicniúla atá riachtanach a thabhairt le chéile chun máistreacht a fháil ar an scéal casta a bhaineann le luas síor-mhéadaithe na nuálaíochta sa réimse seo. Dá bhrí sin, ba cheart gurbh iad an tAontas, na Ballstáit agus na tríú tíortha atá comhlachaithe le Fís Eorpach, an Clár don Eoraip Dhigiteach nó an tSaoráid um Chónascadh na hEorpa comhaltaí an Chomhghnóthais agus iad aontaithe ar thionscnamh comhpháirteach Eorpach sa Ríomhaireacht Ardfheidhmíochta agus sa ríomhaireacht chandamach, agus cumainn a dhéanann ionadaíocht ar a gcomheintitis agus eagraíochtaí eile atá meáite go sainráite agus go gníomhach ar thorthaí taighde agus nuálaíochta a tháirgeadh, ar chumais Ríomhaireachta Ardfheidhmíochta nó ríomhaireachta candamaí a fhorbairt agus a chur chun úsáide, nó rannchuidiú chun dul i ngleic leis an mbearna scileanna agus an fios gnó a choimeád i réimse na Ríomhaireachta Ardfheidhmíochta agus na ríomhaireachta candamaí san Eoraip. Ba cheart go mbeadh comhaltaí nua in ann páirt a ghlacadh sa Chomhghnóthas.

(21)

I gcomhréir le hIarscríbhinn III a ghabhann le Rialachán (AE) 2021/695, ba cheart na ranníocaíochtaí airgeadais ó chomhaltaí eile seachas an tAontas a bheith comhionann le 50 %, ar a laghad, de ghealltanais bhuiséadacha chomhiomlánaithe an Chomhghnóthais agus ba cheart go bhféadfaidís a bheith chomh hard le 75 %. Os a choinne sin, níor cheart an ranníocaíocht ón Aontas, lena n-áirítear aon chistí breise ó thríú thíortha atá comhlachaithe le Fís Eorpach, an Clár don Eoraip Dhigiteach nó an tSaoráid um Chónascadh na hEorpa, a dhul thar 50 % de ghealltanais bhuiséadacha chomhiomlánaithe an Chomhghnóthais.

(22)

Ba cheart costais riaracháin an Chomhghnóthais a chumhdach le ranníocaíocht ón Aontais.

(23)

I gcomhréir le pointe (c) d’Airteagal 10(1) de Rialachán (AE) 2021/695, tá an Comhghnóthas chun bainistíocht lárnach ar na ranníocaíochtaí airgeadais go léir a chur chun feidhme trí chur chuige comhordaithe. Ba cheart, dá réir sin, do gach Stát Rannpháirteach ceann amháin nó níos mó de na comhaontuithe riaracháin a thabhairt i gcrích leis an gComhghnóthas lena leagtar síos an sásra comhordúcháin chun ranníocaíochtaí a íoc le hiarratasóirí atá bunaithe sa Stát Rannpháirteach sin agus chun tuairisc a thabhairt ina leith. Chun comhleanúnachas lena dtosaíochtaí straitéiseacha náisiúnta a áirithiú, ba cheart ceart crosta a thabhairt do na Stáit Rannpháirteacha maidir lena ranníocaíochtaí airgeadais náisiúnta a úsáid d’iarratasóirí atá bunaithe sna Stáit Rannpháirteacha sin. D’fhonn an t-ualach riaracháin ar thairbhithe a íoslaghdú, simpliú a bhaint amach agus cur chun feidhme níos éifeachtúla a áirithiú, ba cheart do gach Stát Rannpháirteach iarracht a dhéanamh a sceideal íocaíochta, tuairisciú agus iniúchtaí a shioncrónú le sceideal íocaíochta, tuairisciú agus iniúchtaí an chomhghnóthais agus a incháilitheacht costais a chóineasú le rialacha Fís Eorpach. Na tairbhithe atá bunaithe i Stáit Rannpháirteacha a chuireann na gníomhaíochtaí íocaíochta de chúram ar an gComhghnóthas, ba cheart dóibh comhaontú deontais amháin a shíniú leis an gComhghnóthas de réir rialacha Fís Eorpach.

(24)

D’fhonn seasamh ceannasach a fháil ar ais i dteicneolaíochtaí Ríomhaireachta Ardfheidhmíochta, agus éiceachóras iomlán Ríomhaireachta Ardfheidhmíochta agus ríomhaireachta candamaí a fhorbairt don Aontas, in 2014, bhunaigh geallsealbhóirí tionsclaíochta agus taighde sa chomhlachais An tArdán Teicneolaíochta Eorpach um Ríomhaireacht Ardfheidhmíochta (ETP4HPC) comhpháirtíocht phoiblí phríobháideach ar bhonn conartha leis an Aontas. Is é an misean atá aige slabhra luacha den chéad scoth de theicneolaíocht Ríomhaireachta Ardfheidhmíochta a thógáil san Eoraip, a bheadh iomaíoch ar bhonn domhanda, agus sineirgí a chothú idir na trí phríomh-chomhpháirt den éiceachóras Ríomhaireachta Ardfheidhmíochta, eadhon forbairt teicneolaíochta, feidhmchláir agus bonneagar sár-ríomhaireachta. Nuair a bhreithnítear a shaineolas, agus an ról atá aige maidir leis na geallsealbhóirí príobháideacha ábhartha sa Ríomhaireacht Ardfheidhmíochta a thabhairt le chéile, ba cheart go mbeadh an tArdán Teicneolaíochta Eorpaigh um Ríomhaireacht Ardfheidhmíochta i dteideal bheith ina chomhalta den Chomhghnóthas.

(25)

D’fhonn an slabhra luacha sonraí a neartú, tógáil pobail a fheabhsú maidir le sonraí agus na forais a leagan síos le haghaidh geilleagar bríomhar sonraí-bhunaithe san Aontas, in 2014 bhunaigh na geallsealbhóirí tionsclaíochta agus taighde sa Big Data Value Association (BDVA) comhpháirtíocht phoiblí phríobháideach ar bhonn conartha leis an Aontas. In 2020, athraíodh an t-aimn BDVA go Data, AI and Robotics (DAIRO). Nuair a bhreithnítear a shaineolas, agus an ról atá aige maidir leis na geallsealbhóirí príobháideacha olltiomsú sonraí ábhartha a thabhairt le chéile, ba cheart do DAIRO a bheith incháilithe i gcomhair ballraíochta sa Chomhghnóthas.

(26)

Léirigh na cumainn phríobháideacha, an tArdán Teicneolaíochta Eorpach um Ríomhaireacht Ardfheidhmíochta agus DAIRO, i scríbhinn, go bhfuil siad toilteanach rannchuidiú le clár straitéiseach ilbhliantúil an Chomhghnóthais agus a gcuid saineolais a chur ag obair chun cuspóirí an Chomhghnóthais a chur i gcrích. Is iomchuí go nglacfadh na cumainn phríobháideacha sin leis na Reachtanna a leagtar amach san iarscríbhinn a ghabhann leis an Rialachán seo trí litir fhormhuinithe.

(27)

Ba cheart don Chomhghnóthas dul i ngleic go soiléir le topaicí sainithe a chuirfeadh ar chumas na dtionscal acadúil agus Eorpach i gcoitinne na teicneolaíochtaí is nuálaí i Ríomhaireacht Ardfheidhmíochta agus i ríomhaireacht chandamach a dhearadh, a fhorbairt agus a úsáid, agus bonneagar líonraithe slán, comhtháite agus cónasctha a bhunú ar fud an Aontais ag a mbeadh cumas den chéad scoth sa Ríomhaireacht Ardfheidhmíochta agus sa ríomhaireacht chandamach, nascacht ardluais agus feidhmchláir ceannródaíocha agus seirbhísí sonraí agus bogearraí dá eolaithe agus do phríomh-úsáideoirí eile ón earnáil tionsclaíochta, lena n-áirítear fiontair bheaga agus mheánmhéide (FBManna) agus an earnáil phoiblí. Ba cheart é a bheith mar aidhm ag an gComhghnóthas teicneolaíochtaí agus bonneagair den chéad scoth a fhorbairt agus a úsáid, dhá rud a rachaidh i ngleic leis na riachtanais mhóra a bhíonn ag úsáideoirí eolaíochta, tionsclaíochta agus ag úsáideoirí na hearnála poiblí san Eoraip.

(28)

Ba cheart misean an Chomhghnóthais a struchtúrú i gcolún riaracháin amháin agus i sé cholún theicniúla lena dtugtar aghaidh, faoi seach, ar ghníomhaíochtaí bonneagair, ar na gníomhaíochtaí lena gcruthaítear na seirbhísí sár-ríomhaireachta, ar na gníomhaíochtaí a bhaineann le teicneolaíocht, ar na gníomhaíochtaí sár-ríomhaireachta a bhaineann le feidhmchláir, ar na gníomhaíochtaí chun úsáid agus scileanna a leathnú, agus ar na gníomhaíochtaí comhair idirnáisiúnta. Ba cheart an Clár don Eoraip Dhigiteach a úsáid chun cistiú a dhéanamh ar an gcolún bonneagair, ar chuid de cholún cónasctha na seirbhísí sár-ríomhaireachta agus den cholún maidir le húsáid agus scileanna a leathnú. Ba cheart an tSaoráid um Chónascadh na hEorpa a úsáid chun cistiú a dhéanamh ar na gníomhaíochtaí atá fágtha de cholún chónasctha na seirbhísí sár-ríomhaireachta, i.e. an Ríomhaireacht Ardfheidhmíochta, an ríomhaireacht chandamach agus acmhainní sonraí a idirnascadh, chomh maith leis an idirnascadh le spásanna coiteanna sonraí Eorpacha agus le bonneagair néalríomhaireachta slána an Aontais. Ba cheart Fís Eorpach a úsáid chun an colún teicneolaíochta, an colún iarratais agus an colún um chomhar idirnáisiúnta a chistiú.

(29)

Ba cheart don Chomhghnóthas a bheith in ann comhoibriú leis an gComhpháirtíocht le haghaidh na Ríomhaireachta Sárfhorbartha san Eoraip (PRACE) chun rochtain ar bhonneagar sár-ríomhaireachta agus sonraí cónasctha idirnasctha agus ar a sheirbhísí a sholáthar agus a bhainistiú, agus le haghaidh saoráidí oiliúna agus deiseanna forbartha scileanna. Ba cheart dó a bheith in ann comhoibriú le líonra GÉANT chomh maith le haghaidh na nascachta idir sár-ríomhairí an Chomhghnóthais, agus le bonneagair Eorpacha sár-ríomhaireachta agus sonraí eile.

(30)

Ba cheart don Chomhghnóthas cúnamh a thabhairt chun an bhearna shonrach scileanna ar fud an Aontais a laghdú trí bheith ag gabháil do bhearta ardaithe feasachta agus cuidiú le heolas nua agus caipiteal daonna a thógáil. Áirítear leis sin dearadh agus tacaíocht gníomhaíochtaí sonracha oideachais agus oiliúna i ndlúthchomhar leis na gníomhaithe ábhartha poiblí agus príobháideacha.

(31)

Ag teacht leis na cuspóirí beartais sheachtraigh agus le gealltanais idirnáisiúnta an Aontais, ba cheart don Chomhghnóthas comhar a éascú idir an tAontas agus gníomhairí idirnáisiúnta trí straitéis comhair a shainiú, lena n-áirítear réimsí comhair i dtaighde agus forbairt agus forbairt scileanna a shainaithint agus a chur chun cinn agus gníomhaíochtaí a chur chun feidhme i gcás ina bhfuil tairbhe ann don dá thaobh, chomh maith lena áirithiú go mbeidh beartas rochtana ann maidir le cumais agus feidhmchláir Ríomhaireachta Ardfheidhmíochta agus ríomhaireachta candamaí faoi seach a bheidh bunaithe go príomha ar chómhalartacht.

(32)

Ba cheart é a bheith mar aidhm ag an gComhghnóthas saothrú gach teicneolaíochtaí Ríomhaireachta Ardfheidhmíochta a chruthófar dá bharr san Aontas a chur chun cinn. Ba cheart dó díriú freisin ar na hinfheistíochtaí a fhaigheann sé sna sár-ríomhairí a chosaint. Agus sin á dhéanamh, ba cheart dó bearta iomchuí a ghlacadh chun slándáil an tslabhra soláthair de theicneolaíochtaí a fhaightear a áirithiú, inar cheart saolré iomlán na sár-ríomhairí sin a chumhdach.

(33)

Ba cheart don Chomhghnóthas an bealach a réiteach le haghaidh fís níos fadtéarmaí agus an chéad bhonneagar hibrideach den Ríomhaireacht Ardfheidhmíochta a thógáil san Eoraip, ag comhtháthú ailtireachtaí ríomhaireachta clasaicí le fearais ríomhaireachta candamaí. Tá tacaíocht airgeadais struchtúrach agus chomhordaithe ar leibhéal Eorpach riachtanach chun cabhrú le foirne taighde agus le tionscail na hEorpa torthaí den chéad scoth a tháirgeadh lena áirithiú go saothraítear taighde agus teicneolaíocht Eorpach go gasta agus go forleathan ar fud an Aontais, agus as sin go gcruthófar torthaí tábhachtacha don tsochaí, d’fhonn na rioscaí a ghlacfar a roinnt amach agus dul i mbun oibre le chéile trí straitéisí agus infheistíochtaí a ailíniú i dtreo an leasa choitinn san Eoraip.

(34)

D’fhonn a chuid cuspóirí maidir leis na teicneolaíochtaí is nuálaí a dhearadh, a fhorbairt agus a úsáid i Ríomhaireacht Ardfheidhmíochta agus i ríomhaireacht chandamach a bhaint amach, ba cheart don Chomhghnóthas tacaíocht airgeadais a sholáthar go háirithe i bhfoirm deontas agus soláthair tar éis glao oscailte agus iomaíoch ar thograí agus glao ar thairiscintí bunaithe ar chláir oibre bhliantúla. Ba cheart an tacaíocht airgeadais sin a dhíriú go háirithe ar chlistí cruthaithe sa mhargadh a chuireann cosc ar fhorbairt an chláir lena mbaineann, níor cheart di infheistíochtaí príobháideacha a phlódú agus ba cheart di éifeacht dreasachta a bheith aici sa mhéid agus go n-athraíonn sé iompar an fhaighteora.

(35)

D’fhonn a chuspóir a bhaint amach maidir le poitéinseal nuálaíochta na hearnála tionsclaíochta a mhéadú, agus go háirithe poitéinseal nuálaíochta na bhfiontar beag agus meánmhéide, in iarracht cuidiú chun an bhearna shonrach scileanna a laghdú, chun tacú leis an méadú ar eolas agus ar chaipiteal daonna agus chun cumais na Ríomhaireachta Ardfheidhmíochta agus na ríomhaireachta candamaí a chur in airde, ba cheart don Chomhghnóthas tacaíocht a thabhairt do Lárionaid náisiúnta Inniúlachta um Ríomhaireacht Ardfheidhmíochta a chruthú, agus go háirithe iad a líonrú agus a chomhordú, ar fud na Stát Rannpháirteach. Ba cheart do na lárionaid inniúlachta sin seirbhísí Ríomhaireachta Ardfheidhmíochta agus ríomhaireachta candamaí a sholáthar don earnáil tionsclaíochta, don saol acadúil agus do riaracháin phoiblí nuair a éilíonn siad iad. Ba cheart dóibh go príomha rochtain ar éiceachóras nuálaíochta sa Ríomhaireacht Ardfheidhmíochta a chur chun cinn agus a chumasú, rochtain ar na sár-ríomhairí agus ar ríomhairí candamacha a éascú, dul i ngleic leis na ganntanais shuntasacha maidir le saineolaithe teicniúla oilte trí thabhairt faoi ghníomhaíochtaí ardaithe feasachta, oiliúna agus for-rochtana, agus tabhairt faoi ghníomhaíochtaí líonraithe le geallsealbhóirí agus le Lárionad náisiúnta Inniúlachta um Ríomhaireacht Ardfheidhmíochta eile chun nuálaíochtaí níos leithne a chothú, mar shampla trí chásanna ina n-úsáidtear an dea-chleachtas nó eispéiris cur i bhfeidhm a mhalartú agus a chur chun cinn, trína gcuid saoráidí agus eispéiris oiliúna a chomhroinnt, trí chomhfhorbairt agus malartú cód comhthreomhar, nó trí thacaíocht a thabhairt do chomhroinnt feidhmchlár agus uirlisí nuálacha le haghaidh úsáideoirí poiblí agus príobháideacha, go háirithe FBManna.

(36)

Ba cheart don Chomhghnóthas creat a bheadh dírithe ar éileamh agus spreagtha ag an úsáideoir a sholáthar agus cur chuige comhdheartha a chumasú chun seirbhís chomhtháite, chónasctha den chéad scoth de shár-ríomhaireacht agus ríomhaireacht chandamach agus bonneagar sonraí a fháil san Aontas, chun an acmhainn ríomhaireachta straitéisí a theastaíonn uathu a thabhairt d’úsáideoirí ionas go bhféadfaidh siad réitigh nuálacha, nua a fhorbairt agus dúshláin a bhaineann leis an tsochaí, leis an gcomhshaol, leis an ngeilleagar agus le slándáil a réiteach. Chun na críche sin, ba cheart don Chomhghnóthas rannchuidiú chun sár-ríomhairí den chéad scoth a fháil. Ba cheart sár-ríomhairí an Chomhghnóthais, lena n-áirítear ríomhairí candamacha, a shuiteáil i Stát Rannpháirteach ar Ballstát é.

(37)

Chun go gcuirfear misean an Chomhghnóthais chun feidhme ar bhealach costéifeachtach maidir le héiceachóras sár-ríomhaireachta den chéad scoth a fhorbairt, a chur chun úsáide, a leathnú agus a chothabháil san Aontas, ba cheart don Chomhghnóthas an deis a thapú chun uasghrádú a dhéanamh ar na sár-ríomhairí ar leis í, i gcás inarb iomchuí. Dá bhrí sin, ba cheart saolré na sár-ríomhairí a shíneadh mar thoradh ar na huasghráduithe, ba cheart an fheidhmíocht oibríochtúil a mhéadú, nó feidhmiúlachtaí nua a chur ar fáil chun aghaidh a thabhairt ar éabhlóid riachtanais na n-úsáideoirí. Chun a shár-ríomhairí a uasghrádú, ba cheart don Chomhghnóthas a bheith in ann glao ar léirithe spéise a sheoladh mar chuid den cholún bonneagair. Ba cheart na coinníollacha incháilitheachta sonracha ar cheart feidhm a bheith acu maidir le heintiteas óstach, a bhfuil sár-ríomhaire EuroHPC á óstáil aige cheana féin, a shainiú sna glaonna ar thograí.

(38)

Ba cheart don Chomhghnóthas na sár-ríomhairí agus na bonneagair sonraí go léir a bhfuil sé mar úinéir nó mar chomh-úinéir orthu a hipearnascadh le teicneolaíochtaí líonraithe úrscothacha, agus iad a chur ar fáil go forleathan ar fud an Aontais, agus ba cheart dó a bhonneagar sonraí sár-ríomhaireachta agus ríomhaireachta candamaí a idirnascadh agus a chónascadh, chomh maith le bonneagair náisiúnta, réigiúnacha agus bonneagair ríomhaireachta eile le hardán comhchoiteann. Ba cheart don Chomhghnóthas a áirithiú freisin go ndéanfar idirnascadh ar an tseirbhís chónasctha, shlán sár-ríomhaireachta agus ríomhaireachta candamaí agus ar na bonneagair sonraí leis na spásanna coiteanna sonraí Eorpacha, lena n-áirítear an Néal Eorpach maidir leis an Eolaíocht Oscailte, agus na bonneagair néil chónasctha, shlána a fógraíodh sa Teachtaireacht ón gCoimisiún an 19 Feabhra 2020 dar teideal A European Strategy for Data [Straitéis Eorpach maidir le Sonraí], le haghaidh soláthar rianúil seirbhíse do raon leathan úsáideoirí poiblí agus príobháideacha ar fud na hEorpa.

(39)

Ba cheart do Fís Eorpach agus don Chlár don Eoraip Dhigiteach faoi seach rannchuidiú chun deireadh a chur leis an deighilt taighde agus nuálaíochta san Aontas, agus le cumais sár-ríomhaireachta leathana a chur chun úsáide trí shineirgí a chur chun cinn le Ciste Forbraíochta Réigiúnaí na hEorpa (CFRE), le Ciste Sóisialta na hEorpa+ (CSE+), leis an gCiste Eorpach Muirí, Iascaigh agus Dobharshaothraithe (CEMID) agus leis an gCiste Eorpach Talmhaíochta um Fhorbairt Tuaithe (CETFT), chomh maith leis an tSaoráid Téarnaimh agus Athléimneachta. Dá bhrí sin, ba cheart don Chomhghnóthas, féachaint le hidirghníomhaíochtaí dlúithe a fhorbairt leis na cistí sin, lena bhféadfar cuidiú a thabhairt go sonrach chun cumais taighde agus nuálaíochta áitiúla, réigiúnacha agus náisiúnta a neartú.

(40)

Ba cheart don Chomhghnóthas creat fabhrach a sholáthar do Stáit Rannpháirteacha ar Ballstáit iad chun ranníocaíochtaí airgeadais faoi na cláir atá á gcómhaoiniú ag CFRE, CSE+, CEMID agus CETFT a úsáid chun bonneagair Ríomhaireachta Ardfheidhmíochta agus ríomhaireachta candamaí agus sonraí a fháil agus iad a idirnascadh. Tá sé riachtanach úsáid a bhaint as na ranníocaíochtaí airgeadais sin sa Chomhghnóthas chun seirbhís Ríomhaireachta Ardfheidhmíochta, ríomhaireachta candamaí agus bonneagar sonraí den chéad scoth a bheidh comhtháite, cónasctha, slán agus hipearnasctha a fhorbairt san Aontas, toisc go dtéann na tairbhí a bhaineann le bonneagar den sórt sin i bhfad níos faide ná úsáideoirí na mBallstát. Má chinneann na Ballstáit úsáid a bhaint as na ranníocaíochtaí airgeadais sin le haghaidh ghníomhaíochtaí an Chomhghnóthais, ba cheart na ranníocaíochtaí sin a mheas mar ranníocaíochtaí náisiúnta na Stát Rannpháirteach ar Ballstáit iad le buiséad an Chomhghnóthais, ar choinníoll go gcomhlíontar Airteagal 106 agus forálacha infheidhme eile de Rialachán (AE) 2021/1060 ó Pharlaimint na hEorpa agus ón gComhairle (7) agus de na rialacháin a bhaineann go sonrach le cistí.

(41)

Is féidir leis an gComhghnóthas úsáid chistí na Saoráide Téarnaimh agus Athléimneachta ag Ballstáit Rannpháirteacha ar Ballstáit iad a éascú. Is féidir le cistí na Saoráide Téarnaimh agus Athléimneachta na gníomhaíochtaí arna maoiniú ag an gComhghnóthas a chomhlánú, ar choinníoll go mbeidh an tacaíocht faoin tSaoráid Téarnaimh agus Athléimneacht sa bhreis ar an tacaíocht arna soláthar ag cistí Aontais an Chomhghnóthais agus nach gcumhdaíonn sí an costas céanna. Níor cheart úsáid na Saoráide Téarnaimh agus Athléimneachta a chur san áireamh mar ranníocaíocht náisiúnta le buiséad an Chomhghnóthais, go háirithe maidir le seirbhís agus bonneagair sonraí Ríomhaireachta Ardfheidhmíochta agus ríomhaireachta candamaí, agus maidir le teicneolaíocht, feidhmchláir agus tionscadail forbartha scileanna.

(42)

Ba cheart do ranníocaíocht an Aontais ó chistí an Chláir don Eoraip Dhigiteach costais fála sár-ríomhairí ardleibhéil, ríomhairí candamacha, sár-ríomhairí de ghrád tionsclaíoch agus sár-ríomhairí lár-raoin a chumhdach i bpáirt chun ailíniú le cuspóir an Chomhghnóthais maidir le rannchuidiú le comhthiomsú acmhainní chun an tAontas a fheistiú le sár-ríomhairí agus le ríomhairí candamacha den chéad scoth. Ba cheart do na Stáit Rannpháirteacha nó na Comhaltaí Príobháideacha nó cuibhreannais comhpháirtithe príobháideacha costais chomhlántacha na sár-ríomhairí agus na ríomhairí candamacha sin a chumhdach. Ba cheart don sciar d’aga rochtana an Aontais ar na sár-ríomhairí nó ar na ríomhairí candamacha sin a bheith i gcomhréir dhíreach leis an ranníocaíocht airgeadais ón Aontas chun na sár-ríomhairí agus na ríomhairí candamacha sin a fháil, agus níor cheart níos mó ná 50 % d’aga rochtana iomlán na sár-ríomhairí nó na ríomhairí candamacha sin a bheith ann.

(43)

Ba cheart an Comhghnóthas a bheith ina úinéir ar na sár-ríomhairí ardleibhéil agus ar na ríomhairí candamacha atá faighte aige. Ba cheart oibriú gach sár-ríomhaire ardleibhéil nó gach ríomhaire chandamaigh a chur ar iontaoibh eintitis óstaigh. Ba cheart don eintiteas óstach a bheith in ann ionadaíocht a dhéanamh ar Stát Rannpháirteach amháin ar Ballstát é nó cuibhreannas óstach de Stáit Rannpháirteacha. Ba cheart don eintiteas óstach a bheith in ann meastachán cruinn a thabhairt agus costais oibriúcháin an tsár-ríomhaire a fhíorú, trína áirithiú, mar shampla, go ndéanfar deighilt idir na feidhmeanna, agus a mhéid is féidir, deighilt fhisiceach ar shár-ríomhairí ardleibhéil nó ar ríomhairí candamacha an Chomhghnóthais agus aon chórais ríomhaireachta náisiúnta nó réigiúnacha a bhíonn á oibriú aige. Ba cheart do Bhord Rialaithe an Chomhghnóthais (“an Bord Rialaithe”) an t-eintiteas óstach a roghnú tar éis glao ar léiriú spéise a mheasfaidh saineolaithe neamhspleácha. A luaithe a roghnaítear eintiteas óstach, ba cheart don Stát Rannpháirteach ina bhfuil an t-eintiteas óstach bunaithe nó an cuibhreannas óstach a bheith in ann cinneadh a dhéanamh éileamh ar Stáit Rannpháirteacha eile a bheith páirteach agus rannchuidiú le cistiú an tsár-ríomhaire ardleibhéil nó an ríomhaire chandamaigh a bheidh le suiteáil san eintiteas óstach a roghnófar. Má théann tuilleadh Stát Rannpháirteach isteach sa chuibhreannas óstach a roghnaíodh, ba cheart sin a bheith gan dochar d’aga rochtana an Aontais ar na sár-ríomhairí. Ba cheart an rannchuidiú a dhéanann na Stáit Rannpháirteacha i gcuibhreannas óstach leis an sár-ríomhaire nó leis an ríomhaire candamach a aistriú ina sciartha d’aga rochtana ar an sár-ríomhaire nó ar an ríomhaire candamach sin. Ba cheart do na Stáit Rannpháirteacha aontú eatarthu féin ar dháileadh dá sciar den aga rochtana don sár-ríomhaire nó don ríomhaire candamach.

(44)

Ba cheart don Chomhghnóthas a bheith fós mar úinéir ar na sár-ríomhairí nó na ríomhairí candamacha a fhaigheann sé go dtí go dtiocfaidh laghdú ar a luach. Ba cheart don Chomhghnóthas a bheith in ann an úinéireacht sin a aistriú chuig an eintiteas óstach le haghaidh a díchoimisiúnaithe, nó a diúscartha nó aon úsáid eile. Nuair a aistrítear an úinéireacht chuig an eintiteas óstach nó nuair atá an Comhghnóthas á fhoirceannadh, ba cheart don eintiteas óstach luach iarmharach an tsár-ríomhaire nó an ríomhaire chandamaigh a aisíoc leis an gComhghnóthas.

(45)

Ba cheart don Chomhghnóthas na sár-ríomhairí lár-raoin a fháil i gcomhpháirt leis na Stáit Rannpháirteacha. Ba cheart oibriú gach sár-ríomhaire lár-raoin a chur ar iontaoibh eintitis óstaigh. Ba cheart don eintiteas óstach a bheith in ann ionadaíocht a dhéanamh ar Stát Rannpháirteach amháin ar Ballstát é nó cuibhreannas óstach de Stáit Rannpháirteacha. Ba cheart don Chomhghnóthas a bheith mar úinéir na coda sin a chomhfhreagraíonn don sciar ranníocaíochta airgeadais ón Aontas leis na costais fála ó chistí an Chláir don Eoraip Dhigiteach. Ba cheart don Bhord Rialaithe an t-eintiteas óstach a roghnú tar éis glao ar léiriú spéise a mheasfaidh saineolaithe neamhspleácha. Ba cheart do sciar d’aga rochtana an Aontais ar gach sár-ríomhaire lár-raoin a bheith i gcomhréir dhíreach leis an ranníocaíocht airgeadais ón Aontas ó chistí an Chláir don Eoraip Dhigiteach agus costais fála an tsár-ríomhaire lár-raoin sin. Ba cheart don Chomhghnóthas a bheith in ann úinéireacht a aistriú chuig an eintiteas óstach cúig bliana, ar a luaithe, tar éis tástáil inghlacthachta rathúil an Chomhghnóthais nó nuair a dhéantar é a fhoirceannadh. Ba cheart don eintiteas óstach luach iarmharach an tsár-ríomhaire a aisíoc leis an gComhghnóthas.

(46)

Chun dáileadh cothrom cothromasach na sár-ríomhairí EuroHPC a chur chun cinn ar fud an Aontais agus chun teacht i láthair chur chuige cónasctha i ndáil le héiceachóras bonneagair a chur chun cinn, ba cheart a shainiú sna glaonna ar léiriú spéise i sár-ríomhaire EuroHPC na coinníollacha incháilitheachta ar cheart feidhm a bheith acu maidir le Stát Rannpháirteach a bhfuil sár-ríomhaire EuroHPC á óstáil aige cheana.

(47)

Ba cheart don Chomhghnóthas a bheith in ann sár-ríomhairí de ghrád tionsclaíoch a fháil in éineacht le cuibhreannas comhpháirtithe príobháideacha. Ba cheart oibriú gach sár-ríomhaire den sórt sin a chur ar iontaoibh eintitis óstaigh reatha. Ba cheart don eintiteas óstach a bheith ina ann dul i gcomhlachas leis an gcuibhreannas comhpháirtithe príobháideacha chun sár-ríomhaire den sórt sin a fháil agus a oibriú. Ba cheart don Chomhghnóthas a bheith mar úinéir na coda sin a chomhfhreagraíonn don sciar ranníocaíochta airgeadais ón Aontas leis na costais fála ó chistí an Chláir don Eoraip Dhigiteach. Ba cheart don Bhord Rialaithe an t-eintiteas óstach agus a chuibhreannas comhpháirtithe príobháideacha a roghnú tar éis glao ar léiriú spéise a mheasfaidh saineolaithe neamhspleácha. Ba cheart don sciar d’aga rochtana an Aontais ar shár-ríomhaire mar sin a bheith i gcomhréir dhíreach leis an ranníocaíocht airgeadais ón Aontas ó chistí an Chláir don Eoraip Dhigiteach le costais fála an tsár-ríomhaire sin den ghrád tionsclaíoch. Ba cheart don Chomhghnóthas a bheith ina ann teacht ar chomhaontú leis an gcuibhreannas comhpháirtithe príobháideacha chun sár-ríomhaire mar sin a dhíol le heintiteas eile nó chun é a dhíchoimisiúnú. Nó de rogha air sin, ba cheart don Chomhghnóthas a bheith in ann úinéireacht sár-ríomhaire mar sin a aistriú chuig an gcuibhreannas comhpháirtithe príobháideacha. Sa chás sin nó ar fhoirceannadh an Chomhghnóthais, ba cheart don chuibhreannas comhpháirtithe príobháideacha luach iarmharach de sciar an Aontais den sár-ríomhaire a aisíoc leis an gComhghnóthas. Sa chás ina gcinneann an Comhghnóthas agus an cuibhreannas comhpháirtithe príobháideacha leanúint ar aghaidh le díchoimisiúnú an tsár-ríomhaire tar éis dímheas iomlán a oibrithe, ba cheart don chuibhreannas comhpháirtithe príobháideacha na costais sin a chlúdach.

(48)

I gcás sár-ríomhairí de ghrád tionsclaíoch, ba cheart don Chomhghnóthas riachtanais shonracha na n-úsáideoirí tionsclaíocha a chur san áireamh, mar shampla na nósanna imeachta rochtana, cáilíocht agus cineál seirbhísí, cosaint sonraí, cosaint na nuálaíochta tionsclaíche, agus maoin intleachtúil, inúsáidteacht, iontaoibh, agus ceanglais eile a bhaineann le rúndacht agus le slándáil.

(49)

Ba cheart éifeachtúlacht fuinnimh agus inbhuanaitheacht an chomhshaoil a chur san áireamh i ndearadh agus in oibriú na sár-ríomhairí a fhaigheann tacaíocht ón gComhghnóthas, ag baint úsáid mar shampla as teicneolaíocht ísealchumhachta, teicnící dinimiciúla coigilte cumhachta agus teicnící athúsáide amhail fuarú forbartha agus athchúrsáil teasa.

(50)

Ba cheart an úsáid a bhaintear as sár-ríomhairí an Chomhghnóthais a dhíriú ar fheidhmchláir saoránach le haghaidh úsáideoirí poiblí agus príobháideacha atá ina gcónaí, bunaithe nó lonnaithe i mBallstát nó i dtríú tír atá comhlachaithe leis an gClár don Eoraip Dhigiteach nó le Fís Eorpach, lena n-áirítear feidhmchláir sa cibearshlándáil a bhféadfaí a úsáid faoi dhó. Ba cheart an sciar d’aga rochtana an Aontais a dheonú d’úsáideoirí de réir rialacha an bheartais rochtana arna sainiú ag an mBord Rialaithe. Ba cheart urraim do chomhaontuithe idirnáisiúnta arna dtabhairt i gcrích ag an Aontas a léiriú san úsáid a bhaintear as na sár-ríomhairí seo freisin.

(51)

Ba cheart don leithdháileadh aga rochtana a fhaigheann úsáideoirí ar shár-ríomhairí an Chomhghnóthais a bheith saor in aisce d’úsáideoirí poiblí. Ba cheart dó a bheith saor in aisce freisin d’úsáideoirí príobháideacha dá gcuid feidhmchlár a bhaineann le gníomhaíochtaí taighde agus nuálaíochta arna gcistiú ag Fís Eorpach nó ag an gClár don Eoraip Chruthaitheach, chomh maith le gníomhaíochtaí nuálacha príobháideacha FBManna, i gcás inarb iomchuí. Is ar ghlaonna oscailte ar léiriú spéise a sheolfaidh an Comhghnóthas agus a mheasfaidh saineolaithe neamhspleácha ba cheart leithdháileadh ar aga rochtana den sórt sin a bhunú go príomha. Cé is moite d’úsáideoirí FBM a bhíonn ag gabháil do ghníomhaíochtaí nuálaíochta príobháideacha, ba cheart do gach úsáideoir a bhaineann tairbhe as aga rochtana saor in aisce ar shár-ríomhairí an Chomhghnóthais cur chuige oscailte maidir leis an eolaíocht a ghlacadh agus an t-eolas a fhaightear tríd an rochtain sin a scaipeadh, i gcomhréir le Rialachán (AE) 2021/695. Ba cheart an leithdháileadh aga rochtana a fhaigheann úsáideoirí le haghaidh gníomhaíochtaí eacnamaíocha seachas gníomhaíochtaí nuálaíochta FBManna (a mbíonn clistí ar leith sa mhargadh le sárú acu), a dheonú ar bhonn íoc de réir úsáide, bunaithe ar phraghsanna an mhargaidh. Ba cheart leithdháileadh aga rochtana le haghaidh gníomhaíochtaí eacnamaíocha den sórt sin a cheadú ach é a theorannú agus ba cheart don Bhord Rialaithe leibhéal na táille a bheidh le híoc a leagan síos. Ba cheart na cearta rochtana a leithdháileadh ar bhealach trédhearcach. Ba cheart don Bhord Rialaithe rialacha sonracha a shainiú maidir le haga rochtana a dheonú saor in aisce, i gcás inarb iomchuí, agus gan glao ar léiriú spéise maidir le tionscnaimh a mheasann an tAontas gur tionscnaimh straitéiseacha iad. Áirítear iad seo a leanas le samplaí ionadaíocha de thionscnaimh straitéiseacha an Aontais: Destination Earth, an Tionscadal Suaitheanta d’Inchinn an Duine, an tionscnamh “1+ Milliún Géanóim”, na spásanna coiteanna sonraí Eorpacha atá ag feidhmiú i bhfearainn leasa phoiblí, agus go háirithe an spás sonraí sláinte, na hIonaid Barr Feabhais sa Ríomhaireacht Ardfheidhmíochta agus Lárionaid náisiúnta Inniúlachta um Ríomhaireacht Ardfheidhmíochta agus na Moil Nuálaíochta Digití.

Ar iarraidh ón Aontas, ba cheart don Chomhghnóthas aga rochtana díreach a dheonú ar bhonn sealadach nó buan do thionscnaimh straitéiseacha agus ardáin feidhmchlár reatha nó sa todhchaí dar leis atá riachtanach chun seirbhísí tacaíochta éigeandála a bhaineann le sláinte nó seirbhísí eile atá ríthábhachtach a sholáthar chun leasa an phobail, do chásanna éigeandála agus bainistiú géarchéime nó do chásanna is dóigh leis an Aontas a bheith riachtanach dá shlándáil agus dá chosaint. Ba cheart cead a thabhairt don Chomhghnóthas roinnt gníomhaíochtaí eacnamaíocha teoranta a chur i gcrích chun críocha tráchtála. Ba cheart rochtain a dheonú d’úsáideoirí a bhfuil cónaí orthu, atá bunaithe nó atá lonnaithe i mBallstát nó i dtríú tír atá comhlachaithe leis an gClár don Eoraip Dhigiteach nó le Fís Eorpach. Ba cheart do na cearta rochtana a bheith cothrom d’aon úsáideoir agus ba cheart iad a leithroinnt ar bhealach trédhearcach. Ba cheart don Bhord Rialaithe na cearta rochtana ar sciar an Aontais d’aga rochtana ar gach sár-ríomhaire a shainiú agus faireachán a dhéanamh air.

(52)

Leanfar ag deonú rochtana ar sciar an Aontais d’aga rochtana ar réamhtheachtaithe na sár-ríomhairí eicseascálaithe agus peiteascála a fuair an Comhghnóthas EuroHPC a bunaíodh faoi Rialachán (AE) 2018/1488 ón gComhairle d’úsáideoirí atá bunaithe san Aontas i dtríú tír atá comhlachaithe le Fís 2020.

(53)

Ba cheart sár-ríomhairí an Chomhghnóthais a oibriú agus a úsáid i gcomhréir le Rialachán (AE) 2016/679 ó Pharlaimint na hEorpa agus ón gComhairle (8) agus Treoracha 2002/58/CE (9) agus (AE) 2016/943 (10) ó Pharlaimint na hEorpa agus ón gComhairle.

(54)

Ba cheart do dhá chomhlacht rialachas an Chomhghnóthais a fhorchinntiú: Bord Rialaithe agus Bord Comhairleach Tionsclaíochta agus Eolaíochta. Ba cheart d’ionadaithe ón Aontas agus ó na Stáit Rannpháirteacha a bheith ar an mBord Rialaithe. Ba cheart an Bord Rialaithe a bheith freagrach as déanamh beartais straitéisigh agus as cinntí cistiúcháin a bhaineann le gníomhaíochtaí an Chomhghnóthais, lena n-áirítear na gníomhaíochtaí soláthair phoiblí uile. Ba cheart d’ionadaithe ón saol acadúil agus ón earnáil tionsclaíochta a bheith ar an mBord Comhairleach Tionsclaíochta agus Eolaíochta mar úsáideoirí agus mar sholáthróirí teicneolaíochta. Ba cheart dó comhairle neamhspleách a thabhairt don Bhord Rialaithe maidir leis an gClár Oibre Straitéiseach i gcomhair Taighde agus Nuálaíochta, maidir le fáil agus oibriú na sár-ríomhairí faoi úinéireacht an Chomhghnóthais, maidir leis an gclár forbartha cumais agus leathnaithe gníomhaíochtaí agus an clár gníomhaíochtaí maidir le cónascadh, nascacht agus comhar idirnáisiúnta.

(55)

I gcás ghnáthchúraimí riaracháin an Chomhghnóthais, ba cheart cearta vótála na Stát Rannpháirteach a dháileadh go cothrom orthu. I gcás na gcúraimí a chomhfhreagraíonn do bhunú cuid den chlár oibre a bhaineann leis na sár-ríomhairí agus na ríomhairí candamacha a fháil, roghnú an eintitis óstaigh, gníomhaíochtaí cónasctha agus nascachta agus gníomhaíochtaí taighde agus nuálaíochta an Chomhghnóthais, ba cheart cearta vótála na Stát Rannpháirteach ar Ballstáit iad a bheith bunaithe ar phrionsabal an tromlaigh cháilithe. Na Stáit Rannpháirteacha ar tríú tíortha iad atá comhlachaithe le Fís Eorpach, an Clár don Eoraip Dhigiteach nó leis an tSaoráid um Chónascadh na hEorpa, ba cheart dóibh cearta vótála a bheith acu freisin le haghaidh na ngníomhaíochtaí faoi seach a fhaigheann tacaíocht agus ba cheart dóibh imchlúdaigh bhuiséadacha a fháil ó gach ceann de na cláir sin. I gcás na gcúraimí a chomhfhreagraíonn d’fháil agus d’oibriú na sár-ríomhairí agus na ríomhairí candamacha, níor cheart cearta vótála a bheith ach ag na Stáit Rannpháirteacha agus ag an Aontas a thugann acmhainní ar son na gcúraimí sin.

(56)

Ba cheart an ranníocaíocht airgeadais ón Aontas a bhainistiú i gcomhréir leis an bprionsabal maidir le bainistíocht fónta airgeadais agus leis na rialacha ábhartha maidir le bainistíocht indíreach a leagtar amach i Rialachán (AE, Euratom) 2018/1046 ó Pharlaimint na hEorpa agus ón gComhairle (11). Ba cheart na rialacha is infheidhme don Chomhghnóthas le tabhairt faoi nósanna imeachta soláthair phoiblí a leagan síos ina chuid rialacha airgeadais.

(57)

D’fhonn éiceachóras Ríomhaireachta Ardfheidhmíochta agus ríomhaireachta candamaí atá nuálach agus iomaíoch agus lena mbaineann sármhaitheas aitheanta a chothú ar fud an Aontais, ba cheart don Chomhghnóthas úsáid iomchuí a bhaint as na hionstraimí soláthair agus deontais, lena n-áirítear soláthar comhpháirteach, soláthar réamhthráchtála agus soláthar poiblí ar réitigh nuálacha. Is é is aidhm dó sin naisc a chruthú idir teicneolaíochtaí a fhorbraítear go príomha san Aontas, comhdhearadh le húsáideoirí agus córais sár-ríomhaireachta agus ríomhaireachta candamaí den chéad scoth a fháil.

(58)

Agus measúnú á dhéanamh ar thionchar foriomlán an Chomhghnóthais, ba cheart infheistíochtaí i ngníomhaíochtaí indíreacha ó na Comhaltaí Príobháideacha a chur san áireamh, mar ranníocaíochtaí comhchineáil ina gcuimsítear na costais incháilithe a thabhaigh siad le linn dóibh gníomhaíochtaí a chur chun feidhme, lúide ranníocaíochtaí an Chomhghnóthais, na Stát Rannpháirteach nó aon ranníocaíocht eile ón Aontas maidir leis na costais sin. Agus measúnú á dhéanamh ar thionchar foriomlán an Chomhghnóthais, ba cheart infheistíochtaí i ngníomhaíochtaí eile ó na Comhaltaí Príobháideacha a chur san áireamh, mar ranníocaíochtaí comhchineáil ina gcuimsítear na costais incháilithe a thabhaigh siad le linn dóibh na gníomhaíochtaí a chur chun feidhme, lúide ranníocaíochtaí an Chomhghnóthais, na Stát Rannpháirteach nó aon ranníocaíocht eile ón Aontas maidir leis na costais sin.

(59)

Chun cothrom na Féinne a choimeád do gach gnóthas atá gníomhach sa mhargadh inmheánach, ba cheart cistiú a fhaightear ó chláir de chuid an Aontais a bheith i gcomhréir le prionsabail státchabhrach chun éifeachtacht caiteachais phoiblí a áirithiú agus chun saobhadh ar an margadh a chosc, amhail cistiú príobháideach a bhrú amach, cuir i gcás struchtúir neamhéifeachtacha margaidh a chruthú agus gnólachtaí neamhéifeachtúla a chaomhnú, nó cultúr a chruthú ina mbítear ag brath rómhór ar fhóirdheontais.

(60)

Ba cheart do rannpháirtíocht i ngníomhaíochtaí indíreacha a chistíonn an Comhghnóthas an Rialachán (AE) 2021/695 a chomhlíonadh. Ba cheart don Chomhghnóthas, ina theannta sin, a áirithiú go gcuirfear na rialacha sin i bhfeidhm go seasmhach bunaithe ar bhearta ábhartha arna nglacadh ag an gCoimisiún. D’fhonn cómhaoiniú iomchuí ghníomhaíochtaí indíreacha na Stát Rannpháirteach a áirithiú, i gcomhréir le Rialachán (AE) 2021/695, ba cheart do na Stáit Rannpháirteacha rannchuidiú a thabhairt de mhéid atá cothrom ar a laghad leis an aisíocaíocht arna soláthar ag an gComhghnóthas maidir leis na costais incháilithe a thabhaigh tairbhithe le linn chur chun feidhme na gníomhaíochtaí. Chuige sin, ba cheart don Bhord Rialaithe na rátaí cistiúcháin uasta a leagtar amach i gclár oibre bliantúil an Chomhghnóthais a shocrú i gcomhréir le hAirteagal 34 de Rialachán (AE) 2021/695.

(61)

Chun an chothromaíocht cheart a áirithiú maidir le rannpháirtíocht na ngeallsealbhóirí sna gníomhaíochtaí arna gcistiú ag an gComhghnóthas, is gá maolú ar Airteagal 34 de Rialachán (AE) 2021/695 chun go bhféadfar rátaí aisíocaíochta a dhifreáil ag brath ar an gcineál rannpháirtí, eadhon FBManna, agus ar an gcineál gníomhaíochta, a bheidh le cur i bhfeidhm i gcónaí i ndáil leis na tairbhithe ó gach Stát Rannpháirteach. Maidir le gníomhaíochtaí arna gcistiú faoin gClár don Eoraip Dhigiteach, ba cheart don Chomhghnóthas rátaí aisíocaíochta a cheadú a bhraitheann ar an gcineál rannpháirtí, eadhon FBManna, agus ar an gcineál gníomhaíochta, a bheidh le cur i bhfeidhm i gcónaí i ndáil leis na tairbhithe ó gach Stát Rannpháirteach.

(62)

Ba cheart don soláthar tacaíochta airgeadais do ghníomhaíochtaí ón gClár don Eoraip Dhigiteach Rialachán (AE) 2021/694 a chomhlíonadh. Go háirithe, maidir le faisnéis rúnaicmithe, ba cheart do ghníomhaíochtaí a chistítear faoin gClár don Eoraip Dhigiteach Airteagal 12(1) den Rialachán sin a chomhlíonadh.

(63)

Ba cheart don soláthar tacaíochta airgeadais do ghníomhaíochtaí ón tSaoráid um Chónascadh na hEorpa Rialachán (AE) 2021/1153 a chomhlíonadh.

(64)

Níor cheart do thairbhithe ó thíortha comhlachaithe le Fís Eorpach, an Clár don Eoraip Dhigiteach nó an tSaoráid um Chónascadh na hEorpa, ar Stáit Rannpháirteacha iad, a bheith incháilithe chun páirt a ghlacadh i ngníomhaíochtaí ach amháin i gcás inar tríú tír chomhlachaithe le clár amháin nó níos mó a bhaineann leis an ngníomhaíocht sin é Stát Rannpháirteach.

(65)

Ba cheart leasanna airgeadais an Aontais agus chomhaltaí eile an Chomhghnóthais a chosaint trí bhearta comhréireacha feadh an timthrialla caiteachais, lena n-áirítear neamhrialtachtaí a chosc, a bhrath agus a fhiosrú, cistí a cailleadh, a íocadh go mícheart nó a úsáideadh go mícheart a ghnóthú agus, i gcás inarb iomchuí, pionóis airgeadais agus riaracháin a ghearradh i gcomhréir le Rialachán (AE, Euratom) 2018/1046.

(66)

Ba cheart don Chomhghnóthas feidhmiú ar bhealach oscailte agus trédhearcach agus an fhaisnéis ábhartha go léir a sholáthar ar bhonn caoithiúil chomh maith lena chuid gníomhaíochtaí a chur chun cinn, lena n-áirítear gníomhaíochtaí faisnéise agus scaipthe, le haghaidh an phobail i gcoitinne. Ba cheart rialacha nós imeachta chomhlachtaí an Chomhghnóthais a chur ar fáil go poiblí.

(67)

Chun críche an tsimplithe, ba cheart an t-ualach riaracháin a laghdú do na páirtithe uile. Ba cheart iniúchtaí dúbailte agus méideanna díréireacha doiciméad agus tuairiscithe a sheachaint.

(68)

Ba cheart d’iniúchóir inmheánach an Choimisiúin na cumhachtaí céanna a fheidhmiú maidir leis an gComhghnóthas leis na cinn sin a fheidhmítear maidir leis an gCoimisiún.

(69)

Ba cheart don Choimisiún, don Chomhghnóthas, don Chúirt Iniúchóirí agus don Oifig Eorpach Frith-Chalaoise (OLAF) agus d’Oifig an Ionchúisitheora Phoiblí Eorpaigh (EPPO) rochtain a bheith acu ar an bhfaisnéis riachtanach go léir agus ar an áitreabh chun iniúchadh agus imscrúduithe a dhéanamh maidir leis na deontais, na conarthaí agus na comhaontuithe atá sínithe ag an gComhghnóthas.

(70)

Ba cheart do gach glao ar thograí agus gach glao ar thairiscintí faoin Rialachán seo ré Fís Eorpach, an Chláir don Eoraip Dhigiteach agus na Saoráide um Chónascadh na hEorpa a chur san áireamh, mar is iomchuí, ach amháin i gcásanna a bhfuil údar cuí leo. Ba cheart na nósanna imeachta soláthair maidir le sár-ríomhairí agus ríomhairí candamacha an Chomhghnóthais a fháil forálacha infheidhme an Chláir don Eoraip Dhigiteach a chomhlíonadh. I gcásanna a bhfuil údar cuí leo agus a bhaineann le hinfhaighteacht an bhuiséid atá fágtha arna eascairt as CAI 2021-2027, ba cheart an Comhghnóthas a bheith in ann glaonna ar thograí nó glaonna ar thairiscintí a sheoladh faoin 31 Nollaig 2028.

(71)

Ba cheart don Choimisiún meastóireacht eatramhach agus an mheastóireacht deiridh a dhéanamh ar an gComhghnóthas agus cúnamh aige ó shaineolaithe neamhspleácha. De ghrá na trédhearcachta, ba cheart tuarascáil na saineolaithe neamhspleácha ábhartha a chur ar fáil go poiblí, i gcomhréir leis na rialacha is infheidhme.

(72)

Ós rud é nach féidir leis na Ballstáit cuspóirí an Rialacháin seo, eadhon na cumais taighde agus nuálaíocht a neartú, forbairt acmhainneachta na sár-ríomhaireachta agus gníomhaíochtaí leathnaithe, cónascadh, nascacht agus comhar idirnáisiúnta agus sár-ríomhairí den chéad scoth a fháil, agus rochtain ar sheirbhís Ríomhaireachta Ardfheidhmíochta, ríomhaireachta candamaí agus ar bhonneagar sonraí ar fud an Aontais trí bhíthin Comhghnóthais, a ghnóthú go leordhóthanach, agus gur fearr is féidir dá bhrí sin, d’fhonn dúbláil gan ghá a sheachaint, mais chriticiúil a chothú agus a áirithiú go n-úsáidfear airgeadas poiblí ar bhealach barrmhaith, iad a bhaint amach ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta mar a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta mar a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú,