(1)

An 22 Eanáir 2015, fuair an Coimisiún iarratas ón gcuideachta Greenprotech ar fhormheas “súlach an chompair” mar shubstaint bhunúsach a úsáidfear ina éarthach feithidí agus ina spreagaire plandaí i gcrann torthaí, i bhféar agus i nglasraí. Bhí an fhaisnéis arna ceangal faoin dara fomhír d’Airteagal 23(3) de Rialachán (CE) Uimh. 1107/2009 ag gabháil leis an iarratas sin.

(2)

D’iarr an Coimisiún cúnamh eolaíoch ar an Údarás Eorpach um Shábháilteacht Bia (“an tÚdarás”). Chuir an tÚdarás tuarascáil theicniúil ar fáil don Choimisiún maidir le “súlach an chompair” an 28 Samhain 2019 (2). Ar bhonn na tuarascála teicniúla sin agus ar bhonn na doiciméadachta a sholáthair an t-iarratasóir, is iomchuí a shainiú go gcumhdaíonn scóip an iarratais an tsubstaint ghníomhach “úsc coipthe ó dhuilliúr Symphytum officinale L. (meacan compar)”.

(3)

An fhaisnéis a rinne an t-iarratasóir a sholáthar ar an úsc coipthe ó dhuilliúr Symphytum officinale L. (meacan compair), níor leor í mar fhaisnéis lena léiriú go gcomhlíonann sé na critéir a bhaineann le hearra bia faoi mar a shainmhínítear iad in Airteagal 2 de Rialachán (CE) Uimh. 178/2002 ó Pharlaimint na hEorpa agus ón gComhairle (3).

(4)

Is é conclúid ar tháinig an tÚdarás air nach maith an sainmhíniú atá ann ar shonraíocht an úisc choipthe ó dhuilliúr Symphytum officinale L. (meacan compair). Chuir an tÚdarás i dtásc freisin gur fios comhábhair ghéineatocsaineacha agus charcanaigineacha a bheith i meacan compair, agus nach raibh faisnéis ar fáil faoi thiúchan na gcomhdhúl géineatocsaineach agus carcanaigineach san úsc coipthe ó dhuilliúr Symphytum officinale L. Dá bhrí sin, níorbh inmheasta i leith Symphytum officinale L. nach substaint é ar údar imní an t-úsc ón duilliúr atá air faoi mar a fhoráiltear in Airteagal 23(1)(a) de Rialachán (CE) Uimh. 1107/2009.

(5)

Thairis sin, leis an bhfaisnéis a bhí ar fáil maidir leis an úsc coipthe ó dhuilliúr Symphytum officinale L., níorbh fhéidir leis an Údarás measúnú riosca a thabhairt i gcrích i leith nochtadh neamhchothaitheach ná an measúnú ar an riosca don tomhaltóir. Thairis sin fós, ní raibh faisnéis leordhóthanach ann maidir le nochtadh an chomhshaoil agus na rioscaí d’orgánaigh nach spriocorgánaigh iad.

(6)

Ní raibh aon mheastóireacht ábhartha ar fáil agus í déanta i gcomhréir le reachtaíocht eile de chuid an Aontais dá dtagraítear in Airteagal 23(2) de Rialachán (CE) Uimh. 1107/2009.

(7)

Chuir an Coimisiún an tuarascáil athbhreithnithe (4) agus dréacht-Rialachán faoi bhráid an Bhuanchoiste um Plandaí, Ainmhithe, Bia agus Beatha an 19 Bealtaine 2020 agus an 26 Eanáir 2021 faoi seach, agus chuir sé bailchríoch orthu le haghaidh chruinniú an Choiste sin an 24 Márta 2021.

(8)

D’iarr an Coimisiún ar an iarratasóir a bharúil féin a chur isteach i leith thuarascáil theicniúil an Údaráis agus i leith dhréacht-tuarascáil athbhreithnithe an Choimisiúin. Chuir an t-iarratasóir a bharúil isteach, agus scrúdaíodh go cúramach í.

(9)

Mar sin féin, ainneoin na n-argóintí a rinne an t-iarratasóir, ní féidir an t-ábhar imní a bhaineann leis an tsubstaint a chur as an áireamh.

(10)

Dá thoradh sin, ní rud é a suíodh go bhfuil na coinníollacha a leagtar síos in Airteagal 23 de Rialachán (CE) Uimh. 1107/2009 comhlíonta. Dá bhrí sin, is iomchuí gan a fhormheas gur substaint bhunúsach atá san úsc coipthe ó dhuilliúr Symphytum officinale L. (meacan compair).

(11)

Ní chuireann an Rialachán seo cosc ar iarratas eile a chur isteach ar úsc coipthe ó dhuilliúr Symphytum officinale L. (meacan compair) a fhormheas mar shubstaint bhunúsach i gcomhréir le hAirteagal 23(3) de Rialachán (CE) Uimh. 1107/2009 ná ar iarratas ar a fhormheas mar shubstaint ghníomhach i gcomhréir le hAirteagal 7 den Rialachán sin.

(12)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón mBuanchoiste um Plandaí, Ainmhithe, Bia agus Beatha,