(1)

Foráiltear le hAirteagal 42(b) de Rialachán (CE) Uimh. 889/2008 ón gCoimisiún (2) gur féidir eireoga nach sine ná 18 seachtaine d’aois a tógadh go neamhorgánach le haghaidh táirgeadh uibheacha a thabhairt isteach in aonad beostoic orgánaigh faoi choinníollacha áirithe go dtí an 31 Nollaig 2020, mura bhfuil eireoga a tógadh go horgánach ar fáil.

(2)

Níor leor líon ná cáilíocht na n-eireog a tógadh go horgánach le haghaidh táirgeadh uibheacha ar mhargadh an Aontais chun freastal ar riachtanais feirmeoirí béaróga. Idir an dá linn, rinneadh dáta chur i bhfeidhm Rialachán (AE) 2018/848 ó Pharlaimint na hEorpa agus ón gComhairle (3), mar aon le dátaí gaolmhara eile dá dtagraítear i Rialachán (AE) 2018/848, a chur siar go ceann 1 bhliain amháin le Rialachán (AE) 2020/1693 ó Pharlaimint na hEorpa agus ón gComhairle (4), de dheasca ráig phaindéim COVID-19 agus na géarchéime sláinte poiblí a bhaineann léi. Dá bhrí sin, déanfar cur i bhfeidhm Rialachán Cur Chun Feidhme (AE) 2020/464 ón gCoimisiún (5), lena leagtar síos inter alia forálacha níos mionsonraithe i ndáil le táirgeadh orgánach eireog, a chur siar go dtí an 1 Eanáir 2022 freisin. Mar gheall air sin, d’fhonn tuilleadh ama a thabhairt chun forbairt a dhéanamh ar tháirgeadh eireog orgánach ar le haghaidh táirgeadh uibheacha iad agus chun a áirithiú go leanfar de tháirgeadh na n-uibheacha orgánacha go dtí na dátaí nua ar a dtiocfaidh Rialachán (AE) 2018/848 agus Rialachán Cur Chun Feidhme (AE) 2020/464 i bhfeidhm, ba cheart síneadh a chur go dtí an 31 Nollaig 2021 le tréimhse cur i bhfeidhm na rialach eisceachtúla táirgthe lena gceadaítear úsáid eireog nach sine ná 18 seachtaine d’aois a tógadh go neamhorgánach le haghaidh táirgeadh uibheacha.

(3)

Faoi Airteagal 43 de Rialachán (CE) Uimh. 889/2008, féadfar uasmhéid 5 % de bheatha neamhorgánach phróitéine a úsáid le haghaidh muc-ainmhithe agus éanlaith chlóis le haghaidh thréimhse 12 mhí ar feadh bhlianta féilire 2018, 2019 agus 2020, i gcás nach leor an táirgeadh orgánach as féin chun beatha phróitéine a chur ar fáil do na feirmeoirí.

(4)

Níor leor líon ná cáilíocht na beatha orgánaí próitéine ar mhargadh an Aontais chun freastal ar riachtanais chothaithe muc-ainmhithe agus éanlaithe clóis a tógadh ar fheirmeacha orgánacha. Ní tháirgitear dóthain barra orgánacha próitéine le haghaidh beatha fós chun freastal ar an éileamh. Dá bhrí sin, is iomchuí deis a thabhairt céatadán teoranta de bheatha neamhorgánach phróitéine a úsáid ar feadh bliain féilire eile go dtí dáta nua cur i bhfeidhm Rialachán (AE) 2018/848, go háirithe chun críocha na bhforálacha maidir le cothú muc-ainmhithe agus éanlaithe clóis i bpointí 1.9.3.1.(c) agus 1.9.4.2.(c) de Chuid II d’Iarscríbhinn II a ghabhann leis an Rialachán sin.

(5)

I gcomhréir le hAirteagal 16(3)(b) de Rialachán (CE) Uimh. 834/2007, chuir roinnt Ballstát sainchomhaid maidir le substaintí áirithe faoi bhráid an Choimisiúin agus na mBallstát eile, d’fhonn na substaintí sin a údarú agus a áireamh in Iarscríbhinní V agus VIII a ghabhann le Rialachán (CE) Uimh. 889/2008. Rinne an Sainghrúpa um Chomhairle Theicniúil maidir le Táirgeacht Orgánach (EGTOP) agus an Coimisiún na sainchomhaid sin a scrúdú.

(6)

Is é conclúid a bhí ag EGTOP ina chuid moltaí maidir le hábhair bheatha agus le breiseáin bheatha (6) go gcomhlíonann an “fosfáit aon-amóiniam (déhidriginortafhosfáit amóiniam)” a úsáidtear mar bheatha mhianrach na cuspóirí agus na prionsabail atá leis an dobharshaothrú orgánach. Dá bhrí sin, ba cheart an tsubstaint sin a áireamh i Roinn 1 d’Iarscríbhinn V a ghabhann le Rialachán (CE) Uimh. 889/2008, ach amháin le haghaidh an dobharshaothraithe. Ar mhaithe le soiléireacht, ba cheart an tábla sa Roinn sin a ionadú ina iomláine.

(7)

Is é conclúid a bhí ag EGTOP ina chuid moltaí maidir le breiseáin bheatha agus le háiseanna próiseála bia (7) go gcomhlíonann an “ailgionáit sóidiam” a úsáidtear mar bhreiseán le haghaidh cruthú craicinn ispíní bunaithe ar fheoil, an “chlóiríd chailciam” a úsáidtear mar áis phróiseála le haghaidh cruthú craicinn ispíní bunaithe ar fheoil, agus an “carbón gníomhachtaithe” a úsáidtear mar áis phróiseála le haghaidh táirgí bia de thionscamh ainmhíoch na cuspóirí agus na prionsabail atá leis an táirgeadh orgánach. Dá bhrí sin, ba cheart na substaintí sin a áireamh in Iarscríbhinn VIII a ghabhann le Rialachán (CE) Uimh. 889/2008.

(8)

Dá bhrí sin, ba cheart Rialachán (CE) Uimh. 889/2008 a leasú dá réir sin.

(9)

Ar mhaithe le soiléireacht agus le deimhneacht dhlíthiúil, ba cheart go dtiocfadh an Rialachán seo i bhfeidhm lá a fhoilsithe in Iris Oifigiúil an Aontais Eorpaigh agus ba cheart go mbeadh feidhm aige ón 1 Eanáir 2021 go dtí an 31 Nollaig 2021.

(10)

Na bearta dá bhforáiltear sa Rialachán seo, is bearta iad atá i gcomhréir le tuairim an Choiste um Tháirgeadh Orgánach,