(1)

Tá iarmhairtí phaindéim COVID-19 tar éis dul i bhfeidhm ar na Ballstáit ar bhealach nach bhfacthas riamh roimhe seo. Tá difear déanta ag paindéim COVID-19 don imirce, don tslándáil agus do bhainistiú teorainneacha sna Ballstáit agus, mar thoradh air sin, tá na ganntanais thromchúiseacha leachtachta ar a bhfuil aghaidh á dtabhairt ag na Ballstáit tar éis dul in olcas, ganntanais arb é is cúis leo an t‐ardú tobann suntasach atá tagtha ar na hinfheistíochtaí poiblí atá ag teastáil in a lán earnálacha. Tháinig as sin staid eisceachtúil ar cheart aghaidh a thabhairt uirthi le bearta sonracha.

(2)

Is gá solúbthacht bhreise a sholáthar do na Ballstáit chun é a chur ar a gcumas aghaidh a thabhairt ar an ngéarchéim seo, géarchéim nach bhfacthas a leithéid riamh roimhe seo, trí chur leis an deis lánúsáid a bhaint as an tréimhse cur chun feidhme a bheidh ar fáil do chláir náisiúnta dá dtagraítear i Rialachán (AE) Uimh. 514/2014 ó Pharlaimint na hEorpa agus ón gComhairle (2) go dtí go ndúnfar na cláir sin faoin 31 Nollaig 2023. Chun aghaidh a thabhairt ar ghá den sórt sin, ba cheart an spriocdháta céanna a bheith i gceist leis na spriodhátaí maidir le saoradh agus maidir le cur isteach na n‐iarratas ar an iarmhéid bliantúil a íoc. Is é an 15 Feabhra den bhliain tar éis na bliana airgeadais ábhartha, dáta is féidir leis an gCoimisiún a shíneadh, ar bhonn eisceachtúil, go dtí an 1 Márta den bhliain sin, an spriocdháta rialála maidir le hiarratais ar an iarmhéid bliantúil a íoc, cé gurbh é an 31 Nollaig den dara bliain tar éis bhliain an ghealltanais bhuiséadaigh an spriocdháta a socraíodh don saoradh ar dtús. Tríd an spriocdháta maidir leis an saoradh a ailíniú leis an spriocdháta ábhartha maidir le cur isteach na n‐iarratas ar an iarmhéid bliantúil a íoc, beidh an Coimisiún in ann an t‐iarratas ar an iarmhéid bliantúil a íoc arna chur isteach ag na Ballstáit an 15 Feabhra nó an 1 Márta, de réir mar is iomchuí, a chur san áireamh chun críche an tsaortha.

(3)

Chun a áirithiú gur féidir leis na Ballstáit lánúsáid a bhaint as na leithdháiltí breise a deonaíodh in 2018 agus 2019, ba cheart an bhliain ina gcuirtear an gealltanas buiséadach i bhfeidhm a choigeartú. Cuireadh na leithdháiltí breise sin san áireamh i mbuiséad ginearálta an Aontais Eorpaigh le haghaidh na mblianta airgeadais 2018 agus 2019 agus ina dhiaidh sin gealladh iad do na cláir náisiúnta.

(4)

I bhfianaise na práinne a bhaineann leis na cúinsí eisceachtúla arbh í paindéim COVID-19 ba chúis leo, meastar gurb iomchuí foráil a dhéanamh maidir le heisceacht ón tréimhse ocht seachtaine dá dtagraítear in Airteagal 4 de Phrótacal Uimh. 1 maidir le ról na bParlaimintí náisiúnta san Aontas Eorpach, atá i gceangal leis an gConradh ar an Aontas Eorpach (CAE), leis an gConradh ar Fheidhmiú an Aontais Eorpaigh agus leis an gConradh ag bunú an Chomhphobail Eorpaigh do Fhuinneamh Adamhach.

(5)

Ós rud é nach féidir leis na Ballstáit cuspóir an Rialacháin seo, eadhon an leas is fearr a bhaint as an gCiste um Thearmann, Imirce agus Lánpháirtíocht, a bunaíodh le Rialachán (AE) Uimh. 516/2014 ó Pharlaimint na hEorpa agus ón gComhairle (3), agus an Ciste Slándála Inmheánaí, a bunaíodh le Rialacháin (AE) Uimh. 513/2014 (4) agus (AE) Uimh. 515/2014 (5) ó Pharlaimint na hEorpa agus ón gComhairle, chun aghaidh a thabhairt ar na héifeachtaí díreacha agus indíreacha a eascraíonn as an ngéarchéim sláinte poiblí i gcomhthéacs phaindéim COVID-19, géarchéim nach bhfacthas a leithéid riamh roimhe seo, a ghnóthú go leordhóthanach agus, de bharr fhairsinge nó éifeachtaí na gníomhaíochta arna beartú, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 CAE. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(6)

Ba cheart, dá bhrí sin, Rialachán (AE) Uimh. 514/2014 a leasú dá réir.

(7)

Chun deimhneacht dhlíthiúil a thabhairt do na Ballstáit maidir leis an spriocdháta maidir leis an saoradh, ba cheart don Rialachán seo teacht i bhfeidhm mar ábhar práinne an lá tar éis lá a fhoilsithe in Iris Oifigiúil an Aontais Eorpaigh,