(1)

De bharr na rioscaí tromchúiseacha don tsláinte phoiblí agus bacainní eile arb í paindéim COVID-19 is cúis leo, agus de bharr na mbeart dianghlasála a chuir na Ballstáit i bhfeidhm chun féachaint leis an bpaindéim a shrianadh, táthar ag cur as go mór d'acmhainneacht gnólachtaí agus d'údaráis chánacha na mBallstát a gcuid oibleagáidí de bhun Threoir 2011/16/AE ón gComhairle (3) a chur i gcrích.

(2)

D'iarr roinnt de na Ballstáit agus roinnt daoine atá faoi dhliteanas faisnéis a thuairisciú d'údaráis inniúla na mBallstát faoi Threoir 2011/16/AE go gcuirfí siar teorainneacha ama áirithe a leagtar síos sa Treoir sin. Baineann na teorainneacha ama sin le huathmhalartú faisnéise faoi chuntais airgeadais a bhfuil a dtairbhithe ina gcónaí i mBallstát eile chun críoch cánach agus le socruithe intuairiscithe trasteorann ina sonraítear ceann amháin, ar a laghad, de na sainmharcanna a leagtar amach in Iarscríbhinn IV a ghabhann le Treoir 2011/16/AE (“socruithe intuairiscithe trasteorann”).

(3)

Tá an mórshuaitheadh sna ghníomhaíochtaí a dhéanann cuid mhór institiúidí airgeadais agus daoine atá faoi dhliteanas socruithe trasteorann a thuairisciú, agus arb í paindéim COVID-19 is cúis leis, ag cur bac ar chomhlíonadh tráthúil a n-oibleagáidí tuairiscithe de bhun Threoir 2011/16/AE. I láthair na huaire, ní mór do na hinstitiúidí airgeadais aghaidh a thabhairt ar thascanna práinneacha a bhaineann le paindéim COVID-19.

(4)

Ina theannta sin, i gcás institiúidí airgeadais agus daoine atá faoi dhliteanas tuairisciú tá suaití móra ina gcuid dálaí oibre, go príomha mar gheall ar an teilea-obair arb í an dianghlasáil i bhformhór na mBallstát is cúis léi. Ar an gcaoi chéanna, tá tionchar diúltach ag an méid sin ar acmhainneacht chórais riaracháin cánach na mBallstát i mbailiú agus i bpróiseáil na sonraí.

(5)

I ngeall air sin, teastaíonn freagairt phráinneach agus, a mhéid is féidir, comhordaithe laistigh den Aontas. Chuige sin, is gá an rogha a thabhairt do na Ballstáit an teorainn ama, faoi nach mór faisnéis a mhalartú faoi chuntais airgeadais a bhfuil a dtairbhithe ina gcónaí chun críoch cánach i mBallstát eile, a chur siar chun gur féidir leis na Ballstáit na teorainneacha ama sin dá gcuid, faoi nach mór do na hInstitiúidí Airgeadais Tuairiscithe an fhaisnéis a chomhadú, a choigeartú. Ina theannta sin, ba cheart an rogha a sholáthar do na Ballstáit go gcuirfí siar na teorainneacha ama faoi nach mór faisnéis a chomhdú agus a mhalartú i ndáil le socruithe intuairiscithe trasteorann.

(6)

Is é is aidhm do chur siar na dteorainneacha ama (“cur siar”) aghaidh a thabhairt ar chás eisceachtúil agus níor cheart don chur siar sin cur isteach ar an struchtúr bunaithe ná ar fheidhmiú Threoir 2011/16/AE. Dá réir sin, is gá teorainn a chur leis an gcur siar agus go leanfadh sé de bheith comhréireach leis na deacrachtaí praiticiúla a ghabhann le comhdú agus malartú faisnéise, arb í paindéim COVID-19 is cúis leo.

(7)

Ag féachaint don éiginnteacht atá ann i láthair na huaire maidir lena bhfuil i ndán don phaindéim COVID-19, agus os rud é go bhféadfadh na himthosca is údar le glacadh na Treorach seo a leanúint ar aghaidh gan athrú, is iomchuí foráil a dhéanamh maidir leis an bhféidearthacht síneadh roghnach amháin eile a chur leis an gcur siar sin. Níor cheart síneadh ama den chineál sin a bheith ann ach sa chás ina gcomhlíontar na coinníollacha a leagtar síos sa Treoir seo.

(8)

I bhfianaise an tionchair shuntasaigh a d'imir an suaitheadh eacnamaíoch, arb í paindéim COVID-19 is cúis leis, ar bhuiséid, acmhainní daonna agus feidhmiú údaráis chánacha na mBallstát, ba cheart an chumhacht a thabhairt don Chomhairle cinneadh a dhéanamh d'aon toil, ar thogra ón gCoimisiún, chun tréimhse an chur siar a shíneadh a thuilleadh.

(9)

Níor cheart d'aon chur siar difear a dhéanamh do na gnéithe bunriachtanacha a ghabhann leis an oibleagáid faisnéis a thuairisciú agus a mhalartú faoi Treoir 2011/16/AE agus ba cheart é a áirithiú nach bhfágtar gan tuairisciú gan mhalartú aon fhaisnéis den sórt sin a thiocfaidh chun bheith intuairiscithe i rith thréimhse an chur siar.

(10)

I bhfianaise na práinne a bhaineann leis na cúinsí eisceachtúla, arb í paindéim COVID-19 is cúis leo, i bhfianaise na práinne atá i gceist le haghaidh a thabhairt ar an ngéarchéim sláinte phoiblí a bhaineann léi, agus i bhfianaise a hiarmhairtí sóisialta agus eacnamaíocha, measadh gurb iomchuí foráil a dhéanamh maidir le heisceacht ar an tréimhse ocht seachtaine dá dtagraítear in Airteagal 4 de Phrótacal Uimh. 1 maidir le ról na bParlaimintí náisiúnta san Aontas Eorpach, atá i gceangal le Conradh an Aontais Eorpaigh, leis an gConradh ar Fheidhmiú an Aontais Eorpaigh agus leis an gConradh ag bunú an Chomhphobail Eorpaigh do Fhuinneamh Adamhach.

(11)

Ba cheart, dá bhrí sin, Treoir 2011/16/AE a leasú dá réir sin.

(12)

Os rud é gur gá do na Ballstáit gníomhú laistigh de thréimhse an-ghearr, chun teorainneacha ama a chur siar, ar teorainneacha ama iad a thiocfadh chun bheith infheidhme de bhun Threoir 2011/16/AE murach sin, ba cheart an Treoir seo a thabhairt i bhfeidhm mar ábhar práinne,