(1)

Tháinig an Coinbhinsiún um Eitlíocht Shibhialta Idirnáisiúnta (“Coinbhinsiún Chicago”) i bhfeidhm an 4 Aibreán 1947. Bunaíodh an Eagraíocht Eitlíochta Sibhialta Idirnáisiúnta (ICAO) leis agus is é is aidhm dó aeriompar idirnáisiúnta a rialú.

(2)

Is Stáit chonarthacha i gCoinbhinsiún Chicago iad Ballstáit uile an Aontais agus is comhaltaí de ICAO iad uile, cé go bhfuil stádas breathnóra ag an Aontas i gcomhlachtaí áirithe de chuid ICAO.

(3)

I mí na Nollag 2015, ghlac an 21ú Comhdháil de na Páirtithe i gCreat-Choinbhinsiún na Náisiún Aontaithe maidir leis an Athrú Aeráide Comhaontú Pháras (1). Áirítear ar chuspóirí Chomhaontú Pháras an méadú ar an meánteocht dhomhanda a choimeád go mór faoi bhun 2 °C os cionn na leibhéal réamhthionsclaíoch agus iarrachtaí a dhéanamh an méadú ar an teocht a theorannú go 1,5 °C os cionn na leibhéal réamhthionsclaíoch. Ba cheart do gach earnáil den gheilleagar rannchuidiú leis na laghduithe astaíochtaí a bhaint amach, lena n-áirítear earnáil na heitlíochta idirnáisiúnta.

(4)

In 2016, trí bhíthin Rún A39-3, chinn 39ú Tionól ICAO scéim beart margadhbhunaithe domhanda a chur chun feidhme i bhfoirm na Scéime Fritháirithe agus Laghdaithe Carbóin don Eitlíocht Idirnáisiúnta (CORSIA) chun astaíochtaí gás ceaptha teasa ó eitlíocht idirnáisiúnta a theorannú do na leibhéil ag a bhfuil siad in 2020. Bunaíodh seasamh an Aontais i leith mionsaothrú agus glacadh na scéime sin agus a eilimintí mionsonraithe éagsúla le Cinneadh (AE) 2016/915 ón gComhairle (2).

(5)

An 27 Meitheamh 2018, ag an deichiú cruinniú dá 214ú seisiún, ghlac Comhairle ICAO an chéad eagrán d’Iarscríbhinn 16, Imleabhar IV a ghabhann le Coinbhinsiún Chicago: an Scéim Fritháirithe agus Laghdaithe Carbóin don Eitlíocht Idirnáisiúnta (CORSIA) (“Iarscríbhinn 16, Imleabhar IV”).

(6)

In 2017, rinne Rialachán (AE) 2017/2392 ó Pharlaimint na hEorpa agus ón gComhairle (3), leasú ar Threoir 2003/87/CE ó Pharlaimint na hEorpa agus ón gComhairle (4). Ba é ceann de chuspóirí an Rialacháin sin cur chun feidhme CORSIA ó 2021 a ullmhú, ceanglais a leagan síos faoi dhlí an Aontais le haghaidh faireachán, tuairisciú agus fíorú chun críoch CORSIA, agus tuairisciú ar chur chun feidhme CORSIA agus athbhreithniú a dhéanamh air.

(7)

Tá na rialacha in Iarscríbhinn 16, Imleabhar IV le teacht chun bheith ceangailteach i gcomhréir le Coinbhinsiún Chicago, agus laistigh de na teorainneacha leagtar amach ann. Tá na rialacha sin le teacht chun bheith ina gceangal ar an Aontas agus ar na Ballstáit, faoi chomhaontuithe aeriompair idirnáisiúnta atá ann faoi láthair.

(8)

Ionas gur féidir le ICAO aird iomlán a thabhairt ar an gcreat dlíthiúil ar leibhéal an Aontais faoi láthair, tá fógra tugtha ag na Ballstáit faoi dhifríochtaí i gcomhréir le Cinneadh (AE) 2018/2027 ón gComhairle (5). Faoi Chinneadh (AE) 2018/2027, tá feidhm le Treoir 2003/87/CE, mar atá faoi láthair, gan beann ar náisiúntacht an oibreora aerárthaí agus i bprionsabal, cumhdaítear léi eitiltí a imíonn ó aeradróm nó a thagann isteach in aeradróm atá i gcríoch Ballstáit lena mbaineann an Conradh ar Fheidhmiú an Aontais Eorpaigh (“CFAE”). Tá feidhm ag Treoir 2003/87/CE gan idirdhealú maidir le heitiltí laistigh de na Ballstáit agus/nó tíortha an Limistéir Eorpaigh Eacnamaíoch agus eatarthu sin. Ag an gcéim seo, tá feidhm ag na rialacha sin maidir le ceanglais faireacháin, tuairiscithe agus fíoraithe (MRV) agus maidir le ceanglais fritháirithe ar aon.

(9)

Faoi réir na ndifríochtaí ar tugadh fógra ina leith i gcomhréir le Cinneadh (AE) 2018/2027, ionchorpraíodh ceanglais MRV a leagtar amach in Iarscríbhinn 16, Imleabhar IV agus is infheidhme amhail ón 1 Eanáir 2019 i ndlí an Aontais trí bhithín Rialacháin Cur Chun Feidhme (AE) 2018/2066 (6) agus (AE) 2018/2067 (7) ón gCoimisiún agus Rialachán Tarmligthe (AE) 2019/1603 (8) ón gCoimisiún. Faoi na Rialacháin sin, déanfar sonraí maidir le hastaíochtaí a bhailiú agus a tharchur chuig Ardrúnaíocht ICAO i leith astaíochtaí le linn na céime píolótaí.

(10)

De bhun mhíreanna 3.1.3 agus 3.2.1 de Chaibidil 3 de Chuid II agus Fhoscríbhinn 1 d’Iarscríbhinn 16, Imleabhar IV, ceanglaítear ar na Stáit chonarthacha fógra a thabhairt do ICAO maidir lena gcinneadh a bheith rannpháirteach go saorálach in CORSIA, nó gan a bheith rannpháirteach go saorálach a thuilleadh in CORSIA ón 1 Eanáir 2021. Tá ceangal ar na Stáit chonarthacha freisin fógra a thabhairt do ICAO maidir leis an rogha a roghnaigh siad chun ceanglais fritháirithe ar oibreoirí aerárthaí a ríomh le linn na tréimhse 2021-2023. Tá ceangal orthu na fógraí sin a thíolacadh faoin 30 Meitheamh 2020.

(11)

Is é a thagann as na forálacha sin, go bhfuil éifeachtaí dlíthiúla áirithe Iarscríbhinn 16, Imleabhar IV coinníollach ar fhógraí ábhartha a thíolacadh chuig ICAO agus ar théarmaí na bhfógraí sin. Dá bhrí sin, tagann an tAontas do ghlacadh seasamh i leith na bhfógraí sin faoi raon feidhme Airteagal 218(9) CFAE.

(12)

I ndáil leis sin, is iomchuí an seasamh atá le glacadh thar ceann an Aontais laistigh de ICAO a bhunú, ag féachaint do na ceanglais faoi Iarscríbhinn 16, Imleabhar IV maidir le fógra a thabhairt, go háirithe mar go bhféadfadh rannpháirtíocht shaorálach in CORSIA agus an rogha a roghnaítear faoi mhír 3.2.1 d’Iarscríbhinn 16, Imleabhar IV tionchar cinntitheach a imirt ar chearta agus oibleagáidí i réimse a chumhdaítear le dlí an Aontais, go háirithe Treoir 2003/87/CE agus, go pointe áirithe, Treoir (AE) 2018/2001 ó Pharlaimint na hEorpa agus ón gComhairle (9).

(13)

Dhearbhaigh an tAontas agus na Ballstáit arís is arís eile (10) go bhfuil siad toilteanach páirt a ghlacadh in CORSIA ón 1 Eanáir 2021.

(14)

Tugtar le tuiscint le rannpháirtíocht shaorálach in CORSIA nach mór, i gcomhréir le mír 3.2.1 d’Iarscríbhinn 16, Imleabhar IV, rogha a roghnú chun ceanglais fritháirithe ar oibreoirí aerárthaí a ríomh le linn na tréimhse 2021-2023. I ndáil leis sin, is iomchuí na ríomhanna a bhunú ar na hastaíochtaí le linn 2021, 2022, agus 2023, faoi seach. Is dócha go mbeidh an rogha sin chun sochair níos mó ó thaobh comhshaoil agus iompair idirnáisiúnta de ná an rogha eile atá ar fáil, is é sin na ríomhanna a bhunú ar na hastaíochtaí le linn 2020, ós rud é go meastar go mbeidh na hastaíochtaí ó eitlíocht idirnáisiúnta níos airde le linn 2021, 2022 agus 2023 ná le linn 2020 agus dá bhrí sin leanfaidh ceanglais fritháirithe níos airde as sin. D’áiritheofaí leis sin freisin leanúnachas níos mó, agus é á thabhairt ar aird, le haghaidh na mblianta ó 2024, go ndéantar foráil i mír 3.2.2 d’Iarscríbhinn 16, Imleabhar IV maidir le ríomh bunaithe ar an mbliain féin.

(15)

I dtaca le roghnú astaíochtaí le linn 2021, 2022 agus 2023, faoi seach, chun ceanglais fritháirithe oibreoirí aerárthaí a ríomh, bheadh feidhm aige sin le linn na tréimhse 2021-2023 maidir leis na hoibreoirí aerárthaí uile a sannadh don Bhallstát lena mbaineann i gcomhréir leis an eagrán is déanaí de dhoiciméad ICAO dar teideal ‘CORSIA Aeroplane Operator to State Attributions’ [Oibreoirí Aerárthaí arna Sannadh do Stáit faoi chuimsiú CORSIA] (11).

(16)

Tá difríochtaí áirithe ann idir chreat Threoir 2003/87/CE agus Iarscríbhinn 16, Imleabhar IV faoi láthair. Faoi Airteagal 28b(2) de Threoir 2003/87/CE, faoi cheann 12 mhí ón dáta a nglacfaidh ICAO na hionstraimí ábhartha, agus sula mbeidh CORSIA oibríochtúil, tá an Coimisiún le tuarascáil a thíolacadh chuig Parlaimint na hEorpa agus chuig an gComhairle ina bhfuil sé le breithniú a dhéanamh ar na bealaí chun na hionstraimí sin a chur chun feidhme i ndlí an Aontais trí athbhreithniú a dhéanamh ar Threoir 2003/87/CE agus ina bhfuil sé le scrúdú a dhéanamh, i measc rudaí eile, ar uaillmhian agus sláine fhoriomlán comhshaoil CORSIA, lena n-áirítear an uaillmhian ghinearálta a bhaineann leis i ndáil leis na spriocanna faoi Chomhaontú Pháras, i ndáil le leibhéal na rannpháirtíochta, lena infhorghníomhaitheacht, leis an trédhearcacht, leis na pionóis mar gheall ar neamhchomhlíonadh, leis na próisis chun ionchur a fháil ón bpobal, le cáilíocht na creidmheasanna fritháirimh, leis an bhfaireachán, tuairisciú agus fíorú a dhéantar ar astaíochtaí, cláir, agus cuntasacht mar aon le rialacha maidir le bithbhreoslaí a úsáid. Faoi Airteagal 28b(3) de Threoir 2003/87/CE, i gcás inarb iomchuí, tá an Coimisiún le togra ó Pharlaimint na hEorpa agus ón gComhairle a chur ag gabháil leis an tuarascáil, ar togra é chun na maoluithe dá bhforáiltear in Airteagal 28a den Treoir sin a leasú, a scriosadh, a leathnú nó a athchur, atá i gcomhréir le gealltanas uile-gheilleagair laghdaithe ghás ceaptha teasa an Aontais do 2030, leis an sprioc go gcaomhnófar sláine chomhshaoil agus éifeachtacht ghníomhaíocht aeráide an Aontais.

(17)

Níor thíolaic an Coimisiún an tuarascáil go fóill. Dá bhrí sin, ní mór don Choimisiún an tuarascáil dá dtagraítear in Airteagal 28b(2) de Threoir 2003/87/CE a thíolacadh mar ábhar práinne, agus an togra comhfhreagrach do Pharlaimint na hEorpa agus don Chomhairle ag gabháil léi, a luaithe is féidir agus roimh dheireadh 2020.

(18)

Sa chomhthéacs seo, tá sé riachtanach a áirithiú go gcuirtear san áireamh go héifeachtach difríochtaí atá ann faoi láthair idir dlí an Aontais agus Iarscríbhinn 16, Imleabhar IV, chomh maith leis na difríochtaí a d’fhéadfadh a bheith ann amach anseo, d’fhonn creat dlíthiúil an Aontais a chaomhnú de réir mar is gá, lena n-áirítear saoirse an reachtóra cinneadh a dhéanamh maidir le scéim an Aontais amach anseo is infheidhme maidir leis an réimse lena mbaineann.

(19)

Dá bhrí sin, agus na fógraí ábhartha á dtabhairt do ICAO, ba cheart tagairt don difríocht ar tugadh fógra ina leith i gcomhréir le Cinneadh (AE) 2018/2027, a bhfuil feidhm aige maidir leis na hábhair a chumhdaítear leis an rannpháirtíocht shaorálach. Ós rud é nach mbaineann an difríocht sin, a mhéid a bhfuil sí fós ábhartha, ach le sannadh inniúlachta Stát vis-à-vis na n-oibreoirí éagsúla, ba cheart, an fhéidearthacht a fhorchoimeád, agus fógraí ábhartha á dtabhairt do ICAO, fógra a thabhairt faoi dhifríochtaí breise.

(20)

Ba cheart go gcuirfeadh gach Ballstát den Aontas ar ball é de ICAO na seasaimh atá le glacadh thar ceann an Aontais laistigh den ICAO in iúl,