(1)

Le Cinneadh Uimh. 2/2022 ón gComhchoiste a bunaíodh leis an gComhaontú maidir le hiompar lasta de bhóthar idir an tAontas Eorpach agus Poblacht na Moldóive (‘an Comhaontú’), cuireadh síneadh leis an gComhaontú go dtí an 30 Meitheamh 2024. Le Cinneadh Uimh. 1/2024 ón gComhchoiste, cuireadh síneadh eile leis an gComhaontú go dtí an 31 Nollaig 2025.

(2)

De bhun Airteagal 6(2) den Chomhaontú, táthar leis an gComhchoiste a thionól 3 mhí ar a dhéanaí roimh dhul in éag an Chomhaontaithe chun measúnú a dhéanamh ar an ngá atá ann le leanúint leis an gComhaontú agus cinneadh a dhéanamh ina leith sin.

(3)

Léirigh an faireachán ar an gComhaontú freisin gur thug sé tacaíocht do Phoblacht na Moldóive faoi imthosca uafásacha chogadh foghach na Rúise i gcoinne na hÚcráine. Léirigh an faireachán a rinneadh ar an gComhaontú go bhfuil an tAontas Eorpach agus Poblacht na Moldóive araon tar éis tairbhí a bhaint as ó thaobh na trádála de, agus go bhfuil oibreoirí iompair de bhóthar an dá pháirtí tar éis tairbhe a bhaint as an méadú ar sheirbhísí iompair de bhóthar freisin.

(4)

In éineacht le comhaontú comhchosúil maidir le hiompar de bhóthar a síníodh leis an Úcráin, chuir an Comhaontú go mór freisin le honnmhairiú earraí na hÚcráine chuig an Aontas trí na Lánaí Dlúthpháirtíochta.

(5)

Ba cheart leanúint leis an gComhaontú a thuiscint mar bheart a rannchuidíonn freisin le hatógáil na hÚcráine tar éis chogadh foghach na Rúise ar an Úcráin.

(6)

Is iomchuí, dá bhrí sin, leanúint leis an gComhaontú go dtí an 31 Márta 2027,