(1)

Maidir leis an gComhaontú Eatramhach lena mbunaítear creat le haghaidh Comhaontú Comhpháirtíochta Eacnamaíche idir Stáit Oirthear agus Dheisceart na hAfraice (ODA), de pháirt, agus an Comhphobal Eorpach agus a Bhallstáit, den pháirt eile (1), (“an CCE eatramhach”), tá feidhm shealadach aige ón 14 Bealtaine 2012 idir an tAontas agus Poblacht Mhadagascar, Poblacht Oileán Mhuirís, Poblacht na Séiséal, agus Poblacht na Siombáibe. Tá feidhm shealadach ag an CCE eatramhach idir an tAontas agus Aontas Oileáin Chomóra ón 7 Feabhra 2019.

(2)

Tá na rialacha tionscnaimh maidir le táirgí de thionscnamh Stáit ODA a onnmhairiú isteach san Aontas ar fáil i bPrótacal 1 (2), a ghabhann leis an CCE eatramhach, maidir le sainmhíniú an choincheapa “táirgí tionscnaimh” agus modhanna comhair riaracháin.

(3)

I gcomhréir le hAirteagal 44(8) de Phrótacal 1 a ghabhann leis an CCE eatramhach, déantar maoluithe ar na rialacha tionscnaimh sin a dheonú go huathoibríoch laistigh de chuóta bliantúil 8 000 tonna i gcás tuinníní stánaithe agus 2 000 tonna i gcás luanta tuinníní.

(4)

An 2 deireadh Fómhair 2017 ghlac an Coiste um Chomhar Custaim ODA-AE Cinneadh Uimh. 1/2017 (3), lena ndeonaítear maolú uathoibríoch ar na rialacha tionscnaimh maidir le tuinníní leasaithe agus luanta tuinníní a allmhairítear isteach san Aontas i gcomhréir le Prótacal 1 a ghabhann leis an CCE eatramhach ón 1 Eanáir 2018 go dtí an 31 Nollaig 2022.

(5)

An 10 Meitheamh 2022, fuair an Coimisiún Eorpach ó Phoblacht na Séiséal iarraidh thar ceann Stáit ODA ar mhaolú uathoibríoch nua ón 1 Eanáir 2023 i gcomhréir le hAirteagal 44(8) de Phrótacal 1 a ghabhann leis an CCE eatramhach, ar maolú é atá le bheith bailí go dtí go dtabharfar i gcrích agus go gcuirtear i bhfeidhm Prótacal nua.

(6)

Rachaidh an maolú uathoibríoch atá i bhfeidhm faoi láthair in éag an 31 Nollaig 2022. I gcomhréir le hAirteagal 44(8) de Phrótacal 1 a ghabhann leis an CCE eatramhach, ba cheart don Choiste um Chomhar Custaim ODA-AE maolú den sórt sin a dheonú go huathoibríoch do Stáit ODA.

(7)

An tagairt do “tuinníní stánaithe” atá in Airteagal 44(8) de Phrótacal 1 a ghabhann leis an CCE eatramhach, is é a thuigfear as go gcumhdaítear leis tuinníní atá leasaithe in ola glasraí nó ar bhealaí eile. Maidir leis na cineálacha sin tuinníní, in Iarscríbhinn I do Rialachán (CEE) Uimh. 2658/87 ón gComhairle (4) (“Ainmníocht Chomhcheangailte”) déantar tagairt don téarma “leasaithe”. Leis an téarma “tuinníní leasaithe” áirítear tuinníní stánaithe, ach tuinníní folúsphacáilte i málaí plaisteacha nó i gcoimeádáin eile freisin. Dá bhrí sin is iomchuí an téarma “tuinníní leasaithe” a úsáid.

(8)

Ar mhaithe le soiléireacht, is iomchuí a leagan amach go sainráite maidir leis na tuinníní neamhthionscnaimh atá le húsáid chun na tuinníní leasaithe faoi chóid AC 1604 14 21, 31 agus 41, 1604 14 28, 38 agus 48, ex 1604 20 70 a dhéanamh, agus chun luanta tuinníní faoi chóid AC 1604 14 26, 36 agus 46 a dhéanamh, gur cheart gurb iad na tuinníní a thagann faoi Cheannteidil CC 0302 nó 0303 a úsáidtear, chun go tairbheoidh na tuinníní leasaithe agus na luanta tuinníní den mhaolú.

(9)

Le Rialachán Cur Chun Feidhme (AE) 2015/2447 ón gCoimisiún (5) leagtar síos na rialacha maidir le bainistiú taraif-chuótaí. Ba cheart na rialacha sin a chur i bhfeidhm maidir le bainistiú na cainníochta ar ina leith a dheonaítear an maolú leis an gcinneadh sin.

(10)

Ba cheart don Choiste um Chomhar Custaim ODA-AE an maolú uathoibríoch arna iarradh a dheonú le haghaidh na tréimhse ar lena linn a bheidh Airteagal 44(8) de Phrótacal 1 fós i bhfeidhm.

(11)

Chun go mbeifear in ann faireachán éifeachtúil a dhéanamh ar oibriú an mhaolaithe, ba cheart d’údaráis Stáit ODA mionsonraí na ndeimhnithe gluaiseachta EUR.1 a eisítear nó mionsonraí na ndearbhuithe sonraisc a dhéantar amach a chur in iúl go rialta don Choimisiún Eorpach, de bhun an Chinnidh seo.

—

“Derogation - Decision No 1/2022 of the ESA-EU Customs Cooperation Committee of 19 October 2022.”,

—

“Dérogation - Décision n° 1/2022 du Comité de Coopération Douanière AfOA-UE du 19 octobre 2022.”,