Bia mear-reoite

 

ACHOIMRE AR:

Treoir 89/108/CEE maidir le hearraí bia mear-reoite mar bhia don duine

CAD IS AIDHM LEIS AN TREOIR?

Leagtar síos léi rialacha AE maidir le mear-reo, pacáistiú, lipéadú agus iniúchadh earraí bia mear-reoite.

PRÍOMHPHOINTÍ

An próiseas reo

• Is ionann earraí bia mear-reoite agus na cinn a chuirtear tríd an bpróiseas “mear-reoite”, ina ndéantar crios teochta an chriostalaithe uasta a réisiú chomh gasta agus is féidir agus coinnítear an táirge ansin (i ndiaidh cobhsaíocht theirmeach) ag teocht – 18 °C nó níos ísle.
• Ní mór mear-reo a dhéanamh go pras, ag baint úsáid as trealamh teicniúil cuí, ar amhábhair de cháilíocht shlán, fhíor agus indíolta. Ní féidir ach aer, nítrigin, agus dí-ocsaíd charbóin lena gcomhlíontar critéir shonracha íonacht a úsáid mar mheáin chrióigineacha (i.e. ag teochtaí an-íseal). Socraíonn an Coimisiún Eorpach na critéir íonachta.
• Ceadaítear diallta ón teocht – 18 °C maidir le hearraí mear-reoite le linn iompair agus dáileadh áitiúil i gcaibinéid taispeánta miondíola. Ní sháróidh an teocht i gcásanna dá leithéid 3 °C.

Pacáistiú táirgí

• Ní mór earraí mear-reoite a phacáistiú i réamh-phacáistiú lena gcosnaítear iad ar éilliú seachtrach agus ar thriomú.
• Ní mór an t–ainm díola, an comhartha “mear-reoite” agus aitheantas an bhirt a chur ar lipéadú earraí mear-reoite. Bíonn an fhaisnéis éigeantach eile éagsúil de réir thomhaltóir beartaithe an táirge sin.
  • Tomhaltóirí deiridh, bialanna, ospidéil, ceaintíní: dáta na híosmharthanachta, an tréimhse ar féidir leis an gceannaitheoir an táirge a stóráil lena linn, teocht na stórála agus an trealamh stórála a theastaíonn.
  • Eile: an ghlanchainníocht agus aitheantas an mhonaróra, an phacálaí nó an díoltóra.

Seiceálacha oifigiúla

Ní mór do thíortha AE a áirithiú go gcomhlíonann an trealamh a úsáidtear le haghaidh earraí mear-reoite an treoir agus ní mór dóibh seiceálacha randamacha a dhéanamh ar theocht na dtáirgí.

Tá cumhachtaí tugtha don Choimisiún rialacha mionsonraithe a ghlacadh maidir le sampláil agus maidir le monatóireacht a dhéanamh ar theocht sna modhanna iompair, sa stórais agus sa stóráil.

CÉN UAIR ATÁ TOSACH FEIDHME NA TREORACH?

Tá feidhm léi ón 10 Eanáir 1989 agus b’éigean dlí a dhéanamh di i dtíortha AE faoin 10 Iúil 1990 maidir le trádáil táirgí a chomhlíon an treoir seo. B’éigean do thíortha AE cosc a chur ar thrádáil earraí nár chomhlíon an treoir seo faoin 10 Eanáir 1991.

PRÍOMHDHOICIMÉAD

Treoir 89/108/CEE ón gComhairle an 21 Nollaig 1988 maidir le comhfhogasú dhlíthe na mBallstát a bhaineann le hearraí bia mear-reoite mar bhia don duine (IO L 40, 11.2.1989, lgh. 34-37)

Rinneadh leasuithe comhleanúnacha ar Threoir 89/108/CEE a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

DOICIMÉID GHAOLMHARA

Rialachán (CE) Uimh. 37/2005 ón gCoimisiún an 12 Eanáir 2005 maidir le monatóireacht a dhéanamh ar theochtaí i modhanna iompair, stórais agus ar stóráil earraí bia mear-reoite atá beartaithe mar bhia don duine (IO L 10, 13.1.2005, lgh. 18-19)

Treoir 92/2/CEE ón gCoimisiún an 13 Eanáir 1992 lena leagtar síos an nós imeachta samplála agus modh anailíse an Chomhphobail maidir le rialú oifigiúil teochtaí earraí bia mear-reoite atá beartaithe mar bhia don duine (IO L 34, 11.2.1992, lgh. 30-33)

Nuashonraithe 28.08.2019