Clár nascachta slán an Aontais (2023–2027)

 

ACHOIMRE AR:

Rialachán (AE) 2023/588 lena mbunaítear clár nascachta slán an Aontais Eorpaigh don tréimhse 2023-2027

CAD IS AIDHM LEIS AN RIALACHÁN?

Tá dhá phríomhaidhm ag an rialachán:

• rochtain ar fud an domhain ar sheirbhísí cumarsáide satailíte rialtasacha slána a áirithiú chun bonneagair chriticiúla, faireachas, gníomhaíochtaí seachtracha agus bainistiú géarchéime a chosaint;
• a chur ar chumas na hearnála príobháidí seirbhísí tráchtála a sholáthar, amhail leathanbhanda ardluais agus nascacht gan uaim a chur ar fáil ar fud an AontaisEorpaigh (AE), agus ar an gcaoi sin deireadh a chur le “criosanna marbha” — ceann de spriocanna na ndeich mbliana digiteacha atá beartaithe do 2030.

PRÍOMHPHOINTÍ

• Leagtar síos spriocanna i gclár nascachta slán an Aontais maidir leis an gcaoi a n-úsáidfidh sé réaltbhuíon satailíte de chuid an Aontais ar a dtugtar IRIS² (bonneagar le haghaidh athléimneacht, idirnascthacht agus slándáil satailíte). Cuirfidh IRIS² seirbhísí cumarsáide fíor-thapa (íseal-folaithe) agus an-slán ar fáil faoi 2027.
• Is é príomhchuspóir IRIS² rochtain ráthaithe a thabhairt do Bhallstáit an AE ar sheirbhísí nascachta atá an-slán, ceannasach agus domhanda a oireann dá riachtanais oibríochtúla, amhail bonneagar criticiúil a chosaint, faireachas agus tacaíocht do ghníomhaíocht sheachtrach nó do bhainistiú géarchéime, mar aon le feidhmeanna míleata. Beidh slándáil na cumarsáide seo bunaithe ar ardteicneolaíochtaí criptithe, lena n-áirítear cripteagrafaíocht chandamach.
• Rannchuideoidh IRIS² freisin le straitéis an Aontais maidir leis an aistriú digiteach agus leis an Tairseach Dhomhanda agus is céim ollmhór í d’athléimneacht agus do cheannasacht theicneolaíoch an Aontais. Is é is aidhm dó soláthar bonneagair tráchtála a chumasú chun leathanbhanda ardluais agus nascacht gan uaim a sholáthar san Aontas agus sna limistéir gheografacha lena mbaineann leas straitéiseach lasmuigh de theorainneacha na hEorpa, amhail an réigiún Artach agus an Afraic.

Cuspóirí

Tá roinnt cuspóirí sonracha ag an gclár, lena n-áirítear:

• córas nascachta ilfhithiseach spásbhunaithe úrscothach a fhorbairt, a thógáil agus a oibriú, arna oiriúnú go leanúnach d’éabhlóid éilimh na cumarsáide satailíte rialtasaí, agus sócmhainní na mBallstát atá ann cheana agus a bheidh ann amach anseo á gcur san áireamh;
• acmhainneachtaí chomhpháirt an Aontais Eorpaigh um Chumarsáid Satailíte Rialtasach (GOVSATCOM) a chomhlánú agus a chomhtháthú sa chóras nascachta slán;
• seirbhísí cumarsáide an Aontais agus a Bhallstát a dhéanamh níos athléimní, níos sláine agus níos uathrialaitheach;
• struchtúr cumarsáide candamach na hEorpaa fhorbairt tuilleadh agus a chomhtháthú de réir a chéile sa chóras nascachta slán;
• cumais agus seirbhísí comhpháirteanna eile de chlár spáis an Aontais a fheabhsú agus a leathnú;
• sábháilteacht agus inbhuanaitheacht gníomhaíochtaí lasmuigh den spás a fheabhsú, lena n-áirítear trí iarracht a dhéanamh leathadh smionagar spáis a chosc;
• timpeallacht a chruthú atá fabhrach d’fhorbairt bhreise leathanbhanda ardluais agus nascacht gan uaim ar fud na hEorpa.

Príomhúsáidí

• Tacóidh na seirbhísí rialtais le bonneagair chriticiúla, feasacht staide, gníomhaíochtaí seachtracha, bainistiú géarchéime agus feidhmchláir atá ríthábhachtach don gheilleagar a chosaint
• Áireofar leis na seirbhísí tráchtála leathanbhanda ardluais ar fud an domhain agus nascacht gan uaim agus déanfaidh an earnáil phríobháideach iad a shainiú go mion agus a sholáthar.

Amlíne

Áiritheofar soláthar seirbhísí rialtais sna gníomhaíochtaí céimnithe seo a leanas, lena gcomhlánófar agus lena gcomhtháthófar comhpháirt Cumarsáide Satailíte Rialtais an Aontais Eorpaigh sa chóras nascachta slán:

• 1.

  sainmhíniú, dearadh, forbairt, bailíochtú agus gníomhaíochtaí imlonnaithe gaolmhara chun an bonneagar spáis agus talún a thógáil is gá chun na chéad seirbhísí rialtais a sholáthar faoi 2024;

• 2.

  gníomhaíochtaí imlonnaithe de réir a chéile chun an bonneagar spáis agus talún is gá chun ardseirbhísí rialtais a sholáthar a chur i gcrích, chun freastal ar riachtanais úsáideoirí atá údaraithe ag an rialtas a luaithe is féidir, agus é mar aidhm leo lánacmhainneacht oibríochtúil a bhaint amach faoi 2027.

Buiséad agus maoiniú

Is ionann ranníocaíocht an Aontais le cur chun feidhme an chláir ó 2023 go dtí 2027 agus €2.4 billiún i bpraghsanna reatha.

CÉN UAIR ATÁ TOSACH FEIDHME AN RIALACHÁIN?

Tá sé i bhfeidhm ón 20 Márta 2023.

CÚLRA

Moladh an rialachán i mí Feabhra 2022 mar aon le teachtaireacht chomhpháirteach maidir le cur chuige an Aontais maidir le bainistiú tráchta spáis.

Le haghaidh tuilleadh faisnéise, féach:

• Clár nascachta slán spásbhunaithe: Formheas deiridh tugtha ag an gComhairle — preaseisiúint (Comhairle an Aontais Eorpaigh)

PRÍOMHDHOICIMÉAD

Rialachán (AE) 2023/588 ó Pharlaimint na hEorpa agus ón gComhairle an 15 Márta 2023 lena mbunaítear Clár an Aontais um Nascacht Shlán le haghaidh na tréimhse 2023-2027 (IO L 79, 17.3.2023, lgh. 1-39)

DOICIMÉID GHAOLMHARA

Rialachán (AE) 2021/1153 ó Pharlaimint na hEorpa agus ón gComhairle an 7 Iúil 2021 lena mbunaítear an tSaoráid um Chónascadh na hEorpa agus lena n-aisghairtear Rialachán (AE) Uimh. 1316/2013 agus Rialachán (AE) Uimh. 283/2014 (Téacs atá ábhartha maidir le LEE) (IO L 249, 14.7.2021, lgh. 38-81)

Rialachán (AE) 2021/947 ó Pharlaimint na hEorpa agus ón gComhairle an 9 Meitheamh 2021 lena mbunaítear an Ionstraim um Chomharsanacht, Forbairt agus Comhar Idirnáisiúnta — An Eoraip Dhomhanda, lena leasaítear agus lena n-aisghairtear Cinneadh Uimh. 466/2014/AE ó Pharlaimint na hEorpa agus ón gComhairle agus lena n-aisghairtear Rialachán (AE) 2017/1601 ó Pharlaimint na hEorpa agus ón gComhairle agus Rialachán (CE, Euratom) Uimh. 480/2009 ón gComhairle (IO L 209, 14.6.2021, lgh. 1–78).

Ionchorpraíodh sa bhuntéacs ceartúcháin i ndiaidh a chéile ar Rialachán (AE) 2021/947. Níl ach luach doiciméadach ag an leagan comhdhlúite.

Cinneadh (AE) 2021/764 ón gComhairle an 10 Bealtaine 2021 lena mbunaítear an Clár Sonrach lena gcuirtear chun feidhme Fís Eorpach - an Clár Réime um Thaighde agus um Nuálaíocht, agus lena n-aisghairtear Cinneadh 2013/743/AE (OJ L 167I, 12.5.2021, lgh. 1–80)

Cinneadh (CBES) 2021/698 ón gComhairle an 30 Aibreán 2021 maidir le slándáil na gcóras agus na seirbhísí a imscartar, a oibrítear agus a úsáidtear faoi Chlár Spáis an Aontais agus a d’fhéadfadh difear a dhéanamh do shlándáil an Aontais, agus lena n–aisghairtear Cinneadh 2014/496/CBES (IO L 170, 12.5.2021, lgh. 178–182).

Féach an leagan comhdhlúite.

Rialachán (AE) 2021/695 ó Pharlaimint na hEorpa agus ón gComhairle an 28 Aibreán 2021 lena mbunaítear Fís Eorpach — an Clár Réime um Thaighde agus um Nuálaíocht, lena leagtar síos a rialacha rannpháirtíochta agus scaipthe, agus lena n–aisghairtear Rialachán (AE) Uimh. 1290/2013 agus Rialachán (AE) Uimh. 1291/2013 (IO L 170, 12.5.2021, lgh. 1–68).

Rialachán (AE) 2021/694 ó Pharlaimint na hEorpa agus ón gComhairle an 29 Aibreán 2021 lena mbunaítear an Clár don Eoraip Dhigiteach agus lena n-aisghairtear Cinneadh (AE) 2015/2240 (IO L 166, 11.5.2021, lgh. 1–34)

Rialachán (AE, Euratom) 2018/1046 ó Pharlaimint na hEorpa agus ón gComhairle an 18 Iúil 2018 maidir leis na rialacha airgeadais is infheidhme maidir le buiséad ginearálta an Aontais, lena leasaítear Rialacháin (AE) Uimh. 1296/2013, (AE) Uimh. 1301/2013, (AE) Uimh. 1303/2013, (AE) Uimh. 1304/2013, (AE) Uimh. 1309/2013, (AE) Uimh. 1316/2013, (AE) Uimh. 223/2014, (AE) Uimh. 283/2014, agus Cinneadh Uimh. 541/2014/AE agus lena n-aisghairtear Rialachán (AE, Euratom) Uimh. 966/2012 (IO L 193, 30.7.2018, lgh. 1–222).

Féach an leagan comhdhlúite.

Nuashonraithe 24.04.2023