Sonraí leictreachais — giniúint, iompar agus ídiú

 

ACHOIMRE AR:

Rialachán (AE) Uimh. 543/2013 maidir le sonraí i margaí leictreachais a chur isteach agus a fhoilsiú

CAD IS AIDHM LEIS AN RIALACHÁN?

• Tá sé mar aidhm leis feabhas a chur ar thrédhearcacht na margaí leictreachais.
• Foráiltear leis i leith sonraí maidir le giniúint, iompar agus ídiú leictreachais a fhoilsiú.

PRÍOMHPHOINTÍ

• Ceanglaítear leis an rialachán ar an Líonra Eorpach d’Oibreoirí Córais Tharchurtha Leictreachais (ENTSO le haghaidh Leictreachais nó ENTSO-E) ardán lárnach faisnéise a bhunú. Ba chóir go mbeadh an t–ardán ar fáil saor in aisce don phobal.
• Ní mór do chomhlachtaí atá freagrach as sonraí a chur isteach na sonraí a chur isteach in am agus iad a bheith den chaighdeán riachtanach ionas go mbeidh oibreoirí córais tarchurtha (OCTanna) nó soláthraithe sonraí eile ábalta na sonraí a phróiseáil agus a sholáthar in am chuig an ENTSO-E, chun go mbeidh sé ábalta a oibleagáidí a chomhlíonadh maidir leis an bhfaisnéis a fhoilsiú.
• Coinníonn an ENTSO-E lámhleabhar ina sonraítear an dóigh a gcaithfear sonraí a chaighdeánú agus a chomhroinnt, chomh maith le critéir theicniúla agus aicmiú cuí na gcineálacha táirgthe leictreachais.
• Tagann na sonraí atá le bailiú agus le foilsiú faoi na catagóirí seo a leanas:
  • lód iomlán, i.e. an leictreachas ar fad a ghintear nó a iompórtáiltear, i ndiaidh easpórtálacha agus cumhacht ar bith a cailleadh trí stóráil fuinnimh a asbhaint
  • do-úsáidteacht aonaid ídithe (acmhainn a ghlacann fuinneamh leictreach dá húsáid féin, gan oibreoirí leictreachais iad féin san áireamh) de 100 MW nó níos mó
  • réamhaisnéis chorrlaigh na bliana dár gcionn, i.e. an difríocht idir réamhaisnéis bhliantúil na hacmhainne giniúna atá ar fáil agus réamhaisnéis bhliantúil an uaslóid iomláin
  • bonneagar tarchurtha, go sonrach sonraí maidir le hathruithe amach anseo ar an líonra agus tionscadail idirnascaire lena n–áirítear méadú nó díchóimeáil na n–eangach tarchurtha laistigh de na 3 bliana le teacht, má bhíonn tionchar de 100 MW ar a laghad acu ar an acmhainn idir criosanna tairisceana*
  • do-úsáidteacht bonneagair tarchurtha ag a bhfuil tionchar 100 MW ar a laghad ar an acmhainn, seachas suíomh an bhonneagair chriticiúil íogair a chosaint arna chumhdach in Airteagal 2 de Threoir 2008/114/CE ón gComhairle
  • meastachán agus tairiscint acmhainní traslimistéir. i.e. cumas an chórais idirnasctha aistriú fuinnimh idir criosanna tairisceana a éascú
  • úsáid acmhainní traslimistéir, amhail an acmhainn (in MW) a iarrann an margadh nó a leithdháiltear ar an margadh, a praghas agus an t–ioncam ceant in aghaidh na teorann idir criosanna tairisceana, i gcomhréir le sceideal úr lena n–áirítear an bhféidearthacht go ndéanfaí tuairisciú i bhfíor-am
  • bearta bainistíochta plódaithe lena n–áirítear athsheoladh, fritrádáil agus na costais lena mbaineann
  • réamhaisnéis a dhéanamh ar ghiniúint, lena n–áirítear an acmhainn ghiniúna maidir le gach aonad táirgthe reatha de 1 MW nó níos mó agus faisnéis faoi na haonaid táirgthe (cinn atá ann cheana agus cinn atá beartaithe) lena bhfuil acmhainn 100 MW nó níos mó
  • do-úsáideacht aonad giniúna agus táirgthe de 100 MW nó níos mó
  • aschur giniúna iarbhír (MW) maidir le gach aonad giniúna 100 MW nó níos mó d’acmhainn ghiniúna suiteáilte, lena n–áirítear giniúint chumhachta gaoithe nó gréine iarbhír nó measta (MW) agus meánrátaí seachtainiúla líonta gach taiscumair uisce agus gléasra stórála hidrileictreachais (MWh)
  • cothromú, lena n–áirítear na rialacha a chuirtear i bhfeidhm, na próisis soláthair le haghaidh cineálacha éagsúla taiscí cothromaithe agus fuinnimh chothromaithe, agus méid na dtaiscí cothromaithe faoi chonradh (MW) ag oibreoirí.

CÉN UAIR ATÁ TOSACH FEIDHME AN RIALACHÁIN?

Tá feidhm leis ón 5 Iúil 2013 seachas Airteagal 4.1 (maidir le foilsiú) a bhfuil feidhm leis ón 5 Eanáir 2015.

CÚLRA

Féach freisin:

• Forléargas maidir le táirgeadh, ídiú agus an margadh leictreachais (Eurostat).

PRÍOMHTHÉARMAÍ

PRÍOMHDHOICIMÉAD

Rialachán (AE) Uimh. 543/2013 ón gCoimisiún an 14 Meitheamh 2013 maidir le sonraí i margaí leictreachais a chur isteach agus a fhoilsiú agus lena leasaítear Iarscríbhinn I a ghabhann le Rialachán (CE) Uimh. 714/2009 ó Pharlaimint na hEorpa agus ón gComhairle (IO L 163, 15.6.2013, lgh. 1-12)

DOICIMÉID GHAOLMHARA

Rialachán (AE) Uimh. 1227/2011 ó Pharlaimint na hEorpa agus ón gComhairle an 25 Deireadh Fómhair 2011 maidir le sláine agus trédhearcacht an mhargaidh mórdhíola fuinnimh (IO L 326, 8.12.2011, lgh. 1-16)

Rialachán (AE) Uimh. 714/2009 ó Pharlaimint na hEorpa agus ón gComhairle an 13 Iúil 2009 ar choinníollacha chun rochtain a fháil ar an líonra le haghaidh malartuithe trasteorann leictreachais agus lena n–aisghairtear Rialachán (AE) Uimh. 1228/2003 (IO L 211, 14.8.2009, lgh. 15-35)

Rinneadh leasuithe ina dhiaidh sin ar Rialachán (CE) Uimh. 714/2009 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

Treoir 2008/114/CE ón gComhairle an 8 Nollaig 2008 maidir le bonneagair ríthábhachtacha Eorpacha a shainaithint agus a ainmniú agus maidir le measúnú a dhéanamh ar an ngá atá le cosaint na mbonneagar sin a fheabhsú (IO L 345, 23.12.2008, lgh. 75-82)

Nuashonraithe 05.03.2019