Staidreamh gearrthréimhseach

 

ACHOIMRE AR:

Rialachán (CE) Uimh. 1165/98 maidir le táscairí gearrthréimhseacha

CAD IS AIDHM LEIS AN RIALACHÁN?

Leagtar amach na rialacha ann maidir le táscairí gearrthréimhseacha gníomhaíochtaí eacnamaíocha a sholáthar agus a tharchur i gcomhréir le haicmiú NACE Rev. 2. Leis an staidreamh sin is féidir anailís a dhéanamh ar fhorbairtí gearrthréimhseacha maidir le soláthar agus éileamh, tosca táirgthe agus praghsanna. Cuirtear ar chumas úsáideoirí leo monatóireacht a dhéanamh ar iomaíochas agus ar fheidhmíocht ghnó ar fud AE.

Aisghairtear leis Treoir 72/211/CEE agus Treoir 78/166/CEE chun forbairtí eacnamaíocha agus teicniúla a chur san áireamh.

PRÍOMHPHOINTÍ

Faoi láthair, cumhdaítear 4 phríomhréimse faoi innéacsanna staidrimh ghearrthréimhsigh:

• Tionscal — ranna NACE B go E, ina gcuimsítear:
  • mianadóireacht,
  • cairéalú,
  • soláthar fuinnimh agus uisce, agus
  • bainistíocht dramhaíola agus gníomhaíochtaí feabhsúcháin;
• Tógáil — NACE Roinn F agus táscairí tógála agus innealtóireachta sibhialta bunaithe ar aicmiú cineálacha tógálacha;
• Trádáil mhórdhíola agus mhiondíola — NACE Roinn G (cumhdaítear faoi trádáil mhórdhíola agus mhiondíola agus deisiú mótarfheithiclí agus gluaisrothar);
• Seirbhísí — NACE Ranna H, I, J, M agus N faoina gcumhdaítear:
  • iompar agus stóráil,
  • cóiríocht agus seirbhísí bia,
  • faisnéis agus cumarsáid,
  • gníomhaíochtaí gairmiúla, eolaíocha agus teicniúla, agus
  • gníomhaíochtaí riaracháin agus seirbhísí tacaíochta.

Tá cur síos déanta ar na ceanglais shonracha maidir le gach sonra a bhaileofar (e.g. méid na táirgeachta, láimhdeachas, praghsanna, ionchur saothair) in iarscríbhinní an rialacháin, mar atá iad seo a leanas chomh maith:

• na tréimhsí tagartha,
• minicíocht an bhailiúcháin sonraí agus
• na spriocdhátaí chun sonraí a tharchur chuig an gCoimisiún Eorpach (Eurostat).

Ní mór do gach tír AE údarás náisiúnta amháin a bheith acu a bheidh freagrach as an méid seo a leanas a chomhordú:

• tarchur sonraí agus faisnéise ábhartha eile chuig Eurostat;
• cáilíocht sonraí a thomhas.

Féadfaidh tíortha AE na sonraí a fháil ag baint úsáid as teaglaim foinsí ach ba cheart dóibh a áirithiú i gcónaí go gcuirfear prionsabal an tsimpliúcháin riaracháin i bhfeidhm (i.e. an t-ualach is lú agus is féidir a chur ar ghnólachtaí, go háirithe gnólachtaí beaga). Áirítear ar na foinsí sin:

• suirbhéanna éigeantacha a bhaineann leis na haonaid dhlíthiúla arna sainiú i Rialachán (CEE) Uimh. 696/93 (maidir le córas um tháirgeadh AE — aonaid staidrimh); ní húsáidtear na suirbhéanna sin ach amháin chun faisnéis a fháil nach bhfuil ar fáil cheana ó fhoinsí eile, amhail cláir ghnó;
• foinsí eile amhail sonraí riaracháin;
• nósanna imeachta cuí um meastachán staidrimh;
• scéimeanna samplála Eorpacha arna gcomhordú ag Eurostat.

Ní mór do thíortha AE a áirithiú go gcomhlíonann a sonraí na caighdeáin um cháilíocht atá leagtha síos ag Eurostat. Déanann tíortha AE agus Eurostat cáilíocht sonraí a thástáil trína gcur i gcomparáid le faisnéis staidrimh eile agus déanann siad seiceáil i gcomhair comhsheasmhacht inmheánach.

Gach 3 bliana, ullmhaíonn an Coimisiún Eorpach tuarascáil do Pharlaimint na hEorpa agus don Chomhairle ina ndírítear ar ábharthacht agus ar cháilíocht an staidrimh agus ar athbhreithniú a dhéanamh ar na táscairí.

I ndiaidh do Eurostat dul i gcomhairle leis an gCoiste um an gCóras Staidrimh Eorpach, d’fhoilsigh sé lámhleabhar comhairleach modheolaíochta.

Féadfaidh an Coimisiún reachtaíocht bhreise a ghlacadh chun an rialachán maidir le staidreamh gearrthréimhseach a chur chun feidhme. Maidir leis sin, faigheann sé treoir ón gCoiste um an gCóras Staidrimh Eorpach.

CÉN UAIR ATÁ TOSACH FEIDHME AN RIALACHÁIN?

Tá feidhm leis ón 26 Meitheamh 1998.

CÚLRA

Le haghaidh tuilleadh faisnéise, féach:

• Staidreamh gearrthréimhseach gnó (Eurostat).

PRÍOMHDHOICIMÉAD

Rialachán (CE) Uimh. 1165/98 ón gComhairle an 19 Bealtaine 1998 maidir le staidreamh gearrthréimhseach (IO L 162, 5.6.1998, lgh. 1-15)

Rinneadh leasuithe comhleanúnacha ar Rialachán (CE) Uimh. 1165/98 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

DOICIMÉID GHAOLMHARA

Rialachán (CE) Uimh. 177/2008 ó Pharlaimint na hEorpa agus ón gComhairle an 20 Feabhra 2008 lena mbunaítear creat coiteann do chláir ghnó chun críocha staidrimh agus lena n–aisghairtear Rialachán (CEE) Uimh. 2186/93 ón gComhairle (IO L 61, 5.3.2008, lgh. 6-16)

Rialachán (CEE) Uimh. 696/93 ón gComhairle an 15 Márta 1993 maidir leis na haonaid staidrimh chun breathnú ar an gcóras táirgthe sa Chomhphobal agus chun anailís a dhéanamh air (IO L 76, 30.3.1993, lgh. 1-11)

Féach an leagan comhdhlúite.

Nuashonraithe 18.04.2018