Plean um poist agus um fhás don Ghréig: cistí AE faoi réim

ACHOIMRE AR:

Tús nua le haghaidh post agus fáis sa Ghréig – COM(2015) 400 final

ACHOIMRE

CÉARD A DHÉANANN AN TEACHTAIREACHT SEO?

—	Tugtar an Plean um Poist agus um Fhás don Ghréig ar an teachtaireacht seo agus tugtar achoimre inti ar chur chuige a chabhróidh leis an nGréig a mhór a dhéanamh de chistí an Aontais Eorpaigh (AE) suas go dtí 2020.

—	Tá sé beartaithe ag an gCoimisiún Eorpach oibriú le húdaráis na Gréige sa tréimhse ama sin chun leas a bhaint as €35 billiún ar a mhéad a chabhróidh le hinfheistíocht agus le gníomhaíocht eacnamaíoch a mhaoiniú, rud atá ríthábhachtach chun ligean don Ghréig fás eacnamaíoch a bhaint amach arís.

PRÍOMHPHOINTÍ

—

Gheofar an €35 billiún a chuirfear ar fáil don Ghréig suas go dtí 2020 ó na foinsí seo a leanas: — Ciste Forbraíochtaí Réigiúnaí na hEorpa (€8.4 billiún); — an Ciste Comhtháthaithe (€3.25 billiún); — Ciste Sóisialta na hEorpa (€3.7 billiún); — an Tionscnamh Fostaíochta don Ógra (€172 mhilliún); — Ciste um Chabhair Eorpach do na Daoine is Díothaí (€281 mhilliún); — an Ciste Eorpach um Ráthaíocht Talmhaíochta (€15.1 billiún); — an Ciste Talmhaíochta um Fhorbairt Tuaithe (€4.7 billiún); agus — an Ciste Eorpach Muirí agus Iascaigh (€389 milliún).

—	Ina theannta sin, bainfidh an Ghréig leas go fóill as cláir AE amhail Fís 2020, óna bhfuair tionscail nuálaíochta Ghréagacha maoiniú de thimpeall €160 milliún le linn na chéad bliana den tréimhse ama 2014-20 .

—	Mar bheart eisceachtúil agus de bharr staid uathúil na Gréige, tá sé molta ag an gCoimisiún leachtacht láithreach ó chistí AE a fheabhsú ionas gur féidir infheistíochtaí a dhéanamh anois, infheistíochtaí a chuirfidh le fás agus le cruthú post.

—

Úsáidfear an €35 billiún chun na gcríoch seo a leanas: — infheistíochtaí le haghaidh raon leathan earnálacha i ngeilleagar na Gréige; — dífhostaíocht agus bochtaineacht a chomhrac agus coinníollacha sóisialta a fheabhsú; — taighde, nuálaíocht agus oideachas a fheabhsú; — talmhaíocht agus iascaigh a thacú; agus — tionscadail fuinnimh, iompair agus chomhshaoil.

—	Cuirfidh Seirbhís Tacaíochta um Athchóiriú Struchtúrtha de chuid an Choimisiúin Eorpaigh tacaíocht theicniúil ar fáil le haghaidh athchóirithe agus cuir i bhfeidhm. Cruthaíodh an tseirbhís sin chun tacaíocht shaincheaptha theicniúil a chur ar fáil do na tíortha AE.

CÚLRA

D’imigh géarchéim fiachais náisiúnta na Gréige, a thosaigh i ndeireadh na bliana 2009, go han-chrua ar phobal na Gréige. Tá iomaíochas agus táirgiúlacht na Gréige an-lag anois de bharr na géarchéime (toisc ráta dífhostaíochta an-ard) agus tá easnamh an-mhór poiblí ag an tír. Tá tacaíocht AE de dhíth chun cabhrú le hathchóirithe a chur i gcrích go hiomlán sa Ghréig, amhail riarachán poiblí a fheabhsú; éilliú, sciúradh airgid agus calaois a chomhrac; agus cúram sláinte a fheabhsú. Táthar ag súil leis go gcabhróidh na hathchóirithe sin, agus infheistíochtaí nua, le rathúnas eacnamaíoch a athbhunú sa Ghréig.

—	Preaseisiúint;

—	Ráiteas ón gCoimisiún Eorpach.

GNÍOMH

Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún: Tús nua maidir le poist agus fás sa Ghréig (COM(2015) 400 final an 15.7.2015)

Nuashonraithe 23.11.2015