Catagóirí Státchabhrach atá díolmhaithe ó fhógra a thabhairt ina leith
ACHOIMRE AR:
Rialachán (AE) 2015/1588 — cur i bhfeidhm Airteagal 107 agus Airteagal 108 den Chonradh ar Fheidhmiú an Aontais Eorpaigh ar chineálacha áirithe státchabhrach
CAD IS AIDHM LEIS AN RIALACHÁN?
- Cuirtear ar chumas an Choimisiúin Eorpaigh leis rialacháin a ghlacadh chun díolúine a thabhairt maidir le catagóirí áirithe státchabhrach ó na hoibleagáidí ginearálta fógra a thabhairt ar an gcéad dul síos don Choimisiún lena cheadú.
- Tagann sé in ionad — ón 14 Deireadh Fómhair 2015 — Rialachán (CE) Uimh. 994/98 ón gComhairle maidir le cur i bhfeidhm Airteagal 107 agus Airteagal 108 den Chonradh ar Fheidhmiú an Aontais Eorpaigh (CFAE) ar chatagóirí áirithe Státchabhrach cothrománaí (i.e. státchabhair a bhfuil feidhm léi maidir le gach tionscal seachas ceann amháin roghnaithe).
PRÍOMHPHOINTÍ
- Go ginearálta, ní mór fógra a thabhairt don Choimisiún maidir le haon bhearta i dtaca le státchabhair arna ndeonú ag tíortha AE do chuideachtaí lena gceadú roimh ré.
- Leis an rialachán seo féadfaidh an Coimisiún rialacháin a ghlacadh — ar a dtugtar rialacháin blocdhíolúine — ina ndearbhaítear go bhfuil catagóirí áirithe cabhrach comhoiriúnach le hAirteagal 107 agus le hAirteagal 108 de CFAE agus tá siad díolmhaithe dá bhrí sin ón gceanglas reachtúil fógra a thabhairt.
- Áirítear ar na catagóirí cabhrach díolmhaithe maoiniú a sholáthraítear le hionstraimí airgeadais AE a bhainistítear go lárnach agus tionscadail atá tacaithe ag cláir um Chomhar Críochach AE.
- Maidir le gach catagóir cabhrach díolmhaithe, ní mór faisnéis bhunúsach ar leith a bheith sa rialachán lena n–áirítear aidhm na cabhrach agus na tairbhithe.
- Féadfar cineálacha áirithe cabhrach a dhíolmhú freisin ó na gnáthcheanglais ó thaobh fógra a thabhairt maidir le Státchabhair ar an gcoinníoll nach sáraíonn an chabhair a thugtar don chuideachta lena mbaineann thar thréimhse ama ar leith méid sonrach socraithe — an riail de minimis mar a thugtar air.
- Ní mór do thíortha AE trédhearcacht agus monatóireacht na cabhrach díolmhaithe a ráthú. Áirítear leis sin an chabhair atá i gceist a fhoilsiú ar shuíomh gréasáin an Choimisiúin Eorpaigh agus tuarascáil bhliantúil maidir le cur i bhfeidhm na cabhrach a bheidh le cur faoi bhráid an Choimisiúin ag an tír AE.
- Leis an rialachán lena gceadaítear an díolúine ní mór iarratas a dhéanamh ar feadh tréimhse shonraithe amháin. Féadfar é sin a leasú má thagann athrú suntasach ar aon cheann de na tosca lena dtugtar údar don díolúine.
- Sula nglacann an Coimisiún le rialachán trína ndeonófar díolúine, ní mór dó ar dtús báire dréacht a fhoilsiú chun deis a thabhairt do pháirtithe leasmhara tuairimí a chur isteach.
- Tá foráil sa rialachán i leith Coiste Comhairleach maidir le Státchabhair a bhunú ina mbeidh ionadaithe as tíortha AE agus ar a mbeidh an Coimisiún ina chathaoirleach. Ní mór don Choimisiún dul i gcomhairle leis na gCoiste nuair a fhoilsíonn sé dréacht-Rialachán ina dtugtar díolúine d’aon chatagóir státchabhrach agus freisin sula nglacfar an rialachán sa deireadh thiar.
CÉN UAIR ATÁ TOSACH FEIDHME AN RIALACHÁIN?
Tá feidhm leis ón 14 Deireadh Fómhair 2015.
CÚLRA
Le haghaidh breis faisnéise, féach:
PRÍOMHDHOICIMÉAD
Rialachán (AE) 2015/1588 ón gComhairle an 13 Iúil 2015 maidir le cur i bhfeidhm Airteagal 107 agus Airteagal 108 den Chonradh ar Fheidhmiú an Aontais Eorpaigh ar chineálacha áirithe Státchabhrach cothrománaí (IO L 248, 24.9.2015, lgh. 1-8)
Rinneadh leasuithe comhleanúnacha ar Rialachán (AE) Uimh. 2015/1588 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.
Nuashonraithe 21.06.2019
Top