Inrianaitheacht aistrithe airgid

 

ACHOIMRE AR:

Rialachán (AE) 2015/847 maidir le faisnéis a ghabhann le haistrithe cistí

CAD IS AIDHM LEIS AN RIALACHÁN?

• Leagtar amach leis rialacha maidir le faisnéis faoi íocóirí* agus íocaithe*, agus faisnéis a ghabhann le haistrithe cistí*, chun cabhrú le sciúradh airgid agus maoiniú sceimhlitheoireachta* a chosc, a bhrath agus a imscrúdú.
• Tá rialacha an Aontais Eorpaigh (AE) sa réimse seo bunaithe den chuid is mó ar mholtaí idirnáisiúnta arna nglacadh ag an Tascfhórsa um Ghníomhaíocht Airgeadais (FATF)*.

PRÍOMHPHOINTÍ

• Maidir leis an scóip, tá feidhm ag an rialachán maidir le haistrithe cistí, in aon airgeadra, a sheolfaidh nó a gheobhaidh soláthraí seirbhíse íocaíochta (PSP)* nó soláthraí idirghabhálach seirbhísí íocaíochta* bunaithe in AE.
• Ceanglaítear ar sholáthraí seirbhíse íocaíochta an íocóra faisnéis shainiúil a chur ar fáil faoin íocóir agus faoin íocaí araon, mar shampla ainm an íocaí agus uimhir chuntais íocaíochta an íocaí, agus cruinneas na faisnéise a soláthraíodh a sheiceáil.
• Ceanglaítear ar sholáthraí seirbhíse íocaíochta an íocaí agus ar sholáthraí idirghabhálach seirbhísí íocaíochta ar bith nósanna imeachta éifeachtúla a bheith i bhfeidhm acu lena bhrath an bhfuil an fhaisnéis a soláthraíodh faoin íocóir nó faoin íocaí ar iarraidh nó neamhiomlán. I gcás faisnéise atá ar iarraidh nó atá neamhiomlán, ní mór do na soláthraithe seirbhíse íocaíochta nósanna imeachta éifeachtúla bunaithe ar riosca a bheith acu le cinneadh a dhéanamh i dtaca le haistriú cistí a fhorghníomhú, a dhiúltú nó a chur ar fionraí sa chás go bhfuil faisnéis ina thaobh ar iarraidh.
• Níor cheart sonraí pearsanta a fhaigheann na soláthraithe seirbhíse íocaíochta a úsáid ach chun sciúradh airgid agus maoiniú sceimhlitheoireachta a chosc amháin agus ba chóir do na soláthraithe seirbhíse íocaíochta rúndacht na sonraí sin a áirithiú.
• Níor cheart taifead ar bith faoin íocóir nó faoin íocaí a choinneáil ar feadh tréimhse níos faide ná is gá chun sciúradh airgid agus maoiniú sceimhlitheoireachta a chosc, a bhrath agus a imscrúdú. Níor cheart don tréimhse sin bheith níos faide ná 5 bliana, agus ina dhiaidh sin ba cheart na sonraí pearsanta ar fad a scrios mura bhforáiltear a mhalairt sa dlí náisiúnta.
• Ceanglaítear ar Bhallstáit AE smachtbhannaí éifeachtacha, comhréireacha agus athchomhairleacha a bhunú maidir le sárú ar an rialachán seo.
• Tá an rialachán mar chuid de phacáiste de bhearta reachtacha AE a bhfuil sé d’aidhm leo sciúradh airgid agus maoiniú sceimhlitheoireachta a chosc, lena n–áirítear Treoir (AE) 2015/849 maidir le cosc a chur ar úsáid an chórais airgeadais chun críocha sciúrtha airgid agus maoiniú sceimhlitheoireachta (an ceathrú treoir maidir leis an sciúradh airgid) — féach an achoimre.
• Tá an rialachán ina chuid de straitéis leathan AE chun dul i ngleic le coireacht airgeadais ina gcuimsítear an obair a dhéanann:
  • an Sainghrúpa um Sciúradh Airgid agus Maoiniú Sceimhlitheoireachta, a thagann le chéile ar bhonn rialta chun dearcthaí a mhalartú agus chun cuidiú leis an gCoimisiún le reachtaíocht a ullmhú nó le beartas a shainmhíniú;
  • Coiste ar Sciúradh Airgid agus Maoiniú Sceimhlitheoireachta a Chosc, a d’fhéadfadh tuairimí a sholáthar ar bhearta arna moladh ag an gCoimisiún a chur i bhfeidhm;
  • líonra neamhfhoirmiúil d’aonaid faisnéise airgeadais (ardán AFAnna AE);
  • Comhchoiste um Údaráis Maoirseachta na hEorpa.

Leasú

• Déantar Rialachán (AE) 2015/847 maidir le gnéithe cosanta sonraí a chur san áireamh le glacadh Rialachán (AE) 2016/679 (an rialachán ginearálta maidir le cosaint sonraí — féach an achoimre) a nuashonrú le Rialachán (AE) 2019/2175.
• Ceanglaítear leis chomh maith go nglacfaidh an tÚdarás Baincéireachta Eorpach, ón 1 Eanáir 2020, ar láimh ó na húdaráis mhaoirseachta Eorpacha an cúram aon treoirlínte dírithe ar na húdaráis inniúla agus na soláthraithe seirbhísí íocaíochta maidir le bearta a bheidh le déanamh i gcomhréir le Rialachán (AE) 2015/847 a eisiúint.

Aisghairm

Déantar Rialachán (CE) Uimh. 1781/2006 a aisghairm le Rialachán (AE) 2015/847.

CÉN UAIR ATÁ TOSACH FEIDHME AN RIALACHÁIN?

Tá sé i bhfeidhm ón 26 Meitheamh 2017.

CÚLRA

Le haghaidh tuilleadh faisnéise, féach:

• Frithsciúradh airgid agus maoiniú sceimhlitheoireachta a chomhrac (An Coimisiún Eorpach)

PRÍOMHTHÉARMAÍ

PRÍOMHDHOICIMÉAD

Rialachán (AE) 2015/847 ó Pharlaimint na hEorpa agus ón gComhairle an 20 Bealtaine 2015 maidir le faisnéis a ghabhann le haistrithe cistí agus lena n–aisghairtear Rialachán (CE) Uimh. 1781/2006 (IO L 141, 5.6.2015, lgh. 1–18).

Rinneadh leasuithe comhleanúnacha ar Rialachán (AE) 2015/847 a chorprú isteach sa bhuntéacs. Níl de luach ar an leagan comhdhlúite seo ach luach doiciméadach amháin.

DOICIMÉID GHAOLMHARA

Rialachán (AE) 2016/679 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil agus maidir le saorghluaiseacht sonraí den sórt sin, agus lena n–aisghairtear Treoir 95/46/CE (An Rialachán Ginearálta maidir le Cosaint Sonraí) (IO L 119, 4.5.2016, lgh. 1–88).

Leagan comhdhlúite.

Treoir (AE) 2015/849 ó Pharlaimint na hEorpa agus ón gComhairle an 20 Bealtaine 2015 maidir le cosc a chur le húsáid an chórais airgeadais chun críoch sciúrtha airgid agus maoinithe sceimhlitheoireachta, agus lena leasaítear Rialachán (AE) Uimh. 648/2012 ó Pharlaimint na hEorpa agus ón gComhairle, agus lena n–aisghairtear Treoir 2005/60/CE ó Pharlaimint na hEorpa agus ón gComhairle agus Treoir 2006/70/CE ón gCoimisiún (IO L 141, 5.6.2015, lgh. 73–117).

Féach an leagan comhdhlúite.

Nuashonraithe 21.10.2021