Fuinneamh ardfheidhmíochta, ísealcharbóin agus inbhuanaithe ar phraghas íseal

Cuid bhunúsach de bheartas fuinnimh AE is ea straitéis AE um nuálaíocht agus um theicneolaíocht fuinnimh. Tá sé mar aidhm leis an straitéis forbairt bhreise a dhéanamh ar an teicneolaíocht fuinnimh agus ar an nuálaíocht.

GNÍOMH

Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún - Teicneolaíochtaí fuinnimh agus nuálaíocht (COM(2013) 253 final an 2 Bealtaine 2013)

ACHOIMRE

Cuid bhunúsach de bheartas fuinnimh AE is ea straitéis AE um nuálaíocht agus um theicneolaíocht fuinnimh. Tá sé mar aidhm leis an straitéis forbairt bhreise a dhéanamh ar an teicneolaíocht fuinnimh agus ar an nuálaíocht.

CAD A DHÉANTAR SA TEACHTAIREACHT?

Leagtar amach straitéis ann trína gcuirtear leis an reachtaíocht reatha lena chinntiú go mbeidh earnáil teicneolaíochta agus nuálaíochta lárnach i gcónaí ag AE agus go mbeidh ar chumas na hearnála sin dul i ngleic leis na dúshláin fuinnimh chomh fada le 2020 agus ina dhiaidh sin.

Tá sé mar aidhm leis teicneolaíochtaí fuinnimh ardfheidhmíochta, ísealcharbóin agus inbhuanaithe ar phraghas íseal a thabhairt chun an mhargaidh, rud a chomhlíonfaidh cuspóirí na Straitéise Eoraip 2020 maidir le fás cliste, inbhuanaithe agus uilechuimsitheach.

PRÍOMHPHOINTÍ

Cuimsítear na prionsabail seo a leanas sa teachtaireacht seo:

• an córas fuinnimh iomlán a chur san áireamh agus tosaíochtaí á leagan amach (i.e. conas a théann teicneolaíocht aonair i bhfeidhm ar an gcóras fuinnimh ina iomláine);
• an nasc idir an nuálaíocht agus an beartas fuinnimh a neartú;
• na hacmhainní airgeadais don taighde agus don nuálaíocht a chur i dtoll a chéile; agus
• díriú ar theicneolaíochtaí don tréimhse tar éis 2020.

Tá an Coimisiún Eorpach, in éineacht le páirtithe leasmhara i bPlean Straitéiseach um Theicneolaíocht Fuinnimh (SET)* an Aontais Eorpaigh, ag féachaint le forbairt Treochláir Chomhtháite a áirithiú (faoi stiúir ghrúpa stiúrtha phlean SET) ina ndéantar na nithe seo a leanas:

• 1.

  déantar treochláir theicneolaíochta phlean SET a chomhdhlúthú;

• 2.

  cuimsítear an slabhra taighde agus nuálaíochta ar fad (ón mbuntaighde go dtí go gcuirtear táirge ar fáil sa mhargadh); agus

• 3.

  sainaithnítear róil shoiléire agus tascanna soiléire do na páirtithe leasmhara éagsúla, amhail an Chomhghuaillíocht Eorpach um Thaighde san Fhuinneamh (EERA) agus an Institiúid Eorpach um Nuálaíocht agus Teicneolaíocht (EIT).

Anuas air sin, sainmhíneofar plean gníomhaíochta maidir le hinfheistíochtaí comhpháirteacha agus aonair chun tacú leis an treochlár comhtháite.

Déanfaidh an Coimisiún agus tíortha AE tuairisciú agus faireachán an treochláir chomhtháite agus an phlean gníomhaíochta a neartú trí bhíthin an chórais faisnéise um theicneolaíochtaí fuinnimh straitéiseacha (SETIS) de phlean SET.

Cuirfidh an Coimisiún struchtúr comhordaithe ar bun (faoi ghrúpa stiúrtha phlean SET) chun infheistíochtaí sa taighde agus sa nuálaíocht maidir le héifeachtúlacht fuinnimh a chur chun cinn.

Éilítear sa teachtaireacht ar Pharlaimint na hEorpa agus ar an gComhairle na nithe seo a leanas a dhéanamh:

• a dtacaíocht i leith phlean SET a athdhearbhú,
• tacú leis na príomhphrionsabail agus leis na príomhfhorbairtí atá riachtanach don teicneolaíocht fuinnimh agus don nuálaíocht ar fud AE, agus
• tacú le hacmhainní AE, náisiúnta agus príobháideacha a ailíniú chun cabhrú leis an straitéis sin.

CÚLRA

Tá féidearthacht mhór ag baint le teicneolaíochtaí ísealcharbóin (i.e. grianfhuinneamh, cumhacht gaoithe, nó gabháil agus stóráil charbóin) chun astuithe gáis cheaptha teasa a laghdú (GHG), an fuinneamh inbhuanaithe a fheabhsú, poist a chruthú, an fás eacnamaíoch, agus an méid a bhíonn an Eoraip ag brath ar sholáthraithe fuinnimh seachtracha a laghdú. Mar sin féin, is iondúil a bhíonn an nuáil sa réimse seo costasach, rioscúil agus mall, agus is mar gheall air sin go bhfuil straitéis de dhíth chun é a fhorbairt.

Féach an teicneolaíocht agus an nuálaíocht agus an plean straitéiseach um theicneolaíocht fuinnimh ar láithreán gréasáin an Choimisiúin Eorpaigh chun tuilleadh faisnéise a fháil.

PRÍOMHTHÉARMAÍ

*Tá sé mar aidhm le plean SET luas a chur faoi fhorbairt agus úsáid teicneolaíochtaí ísealcharbóin. Déanann sé an taighde agus an nuálaíocht, mar aon leis an gcomhar ar fud na hEorpa, a chur chun cinn. Ag an am céanna, féachann sé le teicneolaíochtaí a fheabhsú agus a gcostas siúd a laghdú.

Nuashonraithe 26.08.2015