Beartais fostaíochta thíortha AE: treoirlínte (2018)

 

ACHOIMRE AR:

Cinneadh (AE) 2018/1215 — treoirlínte maidir le beartas fostaíochta thíortha AE

CAD IS AIDHM LEIS AN GCINNEADH?

Soláthraítear leis treoir do thíortha AE agus a mbeartais fostaíochta á ndréachtú acu agus spriocanna náisiúnta á leagan síos acu, chun beartais chomhordaithe AE a áirithiú.

PRÍOMHPHOINTÍ

• Tá na treoirlínte sin, mar aon le treoirlínte ginearálta maidir le beartais eacnamaíocha de chuid tíortha AE agus de chuid AE, ina gcuid de na treoirlínte comhtháite chun straitéis Eoraip 2020 a chur chun feidhme.
• Tá siad á n–eisiúint ar bhonn bliantúil ó 2010 i leith.
• Tá siad ailínithe le Colún Eorpach na gCeart Sóisialta.

Dírítear treoirlínte 2018 ar an méid seo a leanas:

Borradh a chur faoin éileamh ar shaothar

Ba cheart do thíortha AE roinnt beart a dhéanamh, lena n–áirítear:

• cruthú post ardchaighdeáin lena gcothaítear fiontraíocht fhreagrach agus fíor-fhéinfhostaíocht a éascú;
• an geilleagar sóisialta a chur chun cinn go gníomhach agus nuálaíocht shóisialta a chothú;
• na cineálacha nuálacha sin oibre lena gcruthaítear deiseanna post ardchaighdeáin a spreagadh;
• sásraí socraithe tuarastal atá trédhearcach agus intuartha a spreagadh;
• mar aon le comhpháirtithe sóisialta, íosleibhéil tuarastal imleora a áirithiú.

Soláthar saothair a threisiú agus rochtain ar fhostaíocht, scileanna agus inniúlachtaí a fheabhsú

Ba cheart do thíortha AE an méid seo a leanas a dhéanamh:

• táirgiúlacht agus infhostaitheacht a chur chun cinn, i gcomhar leis na comhpháirtithe sóisialta;
• na leibhéil fhoriomlána oideachais a ardú, go háirithe do na daoine is lú cáilithe agus foghlaimeoirí ó chúlraí faoi mhíbhuntáiste;
• straitéisí cuimsitheacha a chur chun feidhme chun dul i ngleic le dífhostaíocht fhadtéarmach agus struchtúrach;
• díriú ar fháil réidh le bacainní agus dídhreasacht ar rannpháirtíocht sa mhargadh saothair;
• comhionannas inscne a áirithiú agus rannpháirtíocht ban sa mhargadh saothair a mhéadú;
• dul i ngleic leis an mbearna inscne maidir le pá.

Feidhmiú na margaí saothair agus éifeachtúlacht an phlé shóisialta a threisiú

Ba cheart do thíortha AE an méid seo a leanas a dhéanamh:

• oibriú le chéile leis na comhpháirtithe sóisialta maidir le prionsabail na solúbthachta agus na slándála, agus cearta agus oibleagáidí á gcothromú;
• iad siúd ar féidir leo páirt a ghlacadh sa mhargadh saothair a ghníomhachtú agus a chumasú go gníomhach;
• sochair dhífhostaíochta imleora a thabhairt do dhaoine dífhostaithe ar feadh tréimhse réasúnta, i gcomhréir lena ranníocaíochtaí agus le rialacha náisiúnta incháilitheachta;
• soghluaisteacht foghlaimeoirí agus oibrithe a chur chun cinn chun scileanna infhostaitheacht a neartú agus leas iomlán a bhaint as acmhainn an mhargaidh shaothair Eorpaigh;
• rannpháirtíocht thráthúil agus fhónta na gcomhpháirtithe sóisialta i ndearadh agus i gcur chun feidhme beartas agus athchóirithe ábhartha a áirithiú.

Comhdheiseanna a chur ar fáil do gach uile dhuine, cuimsiú sóisialta a chothú agus dul i ngleic leis an mbochtaineacht

Ba cheart do thíortha AE an méid seo a leanas a dhéanamh:

• margaí saothair uileghabhálacha a chur chun cinn, a bheidh oscailte do chách, trí bhearta éifeachtacha a chur i bhfeidhm chun dul i ngleic le gach cineál idirdhealaithe agus comhdheiseanna a chur chun cinn do na grúpaí atá faoi ghannionadaíocht;
• córais cosanta sóisialta a nuachóiriú;
• straitéisí coisctheacha agus comhtháite a fhorbairt agus a chur chun feidhme trí chomhcheangal díobh seo a leanas
  • tacaíocht ioncaim imleor
  • margaí saothair uileghabhálacha agus rochtain ar sheirbhísí ardchaighdeáin
  • freastal ar riachtanais aonair;
• infhaighteacht seirbhísí inacmhainne, inrochtana agus ardchaighdeáin a áirithiú, amhail
  • oideachas agus cúram luath-óige
  • cúram lasmuigh den scoil
  • oideachas
  • oiliúint
  • tithíocht
  • seirbhísí sláinte agus
  • cúram fadtéarmach;
• rochtain thráthúil ar chúram sláinte coisctheach agus íceach, agus cúram fadtéarmach ardchaighdeáin a sholáthar;
• leorgacht agus inbhuanaitheacht córas pinsean d’oibrithe agus do dhaoine féinfhostaithe a áirithiú.

CÉN UAIR ATÁ TOSACH FEIDHME AN CHINNIDH?

Tá sé i bhfeidhm ón 19 Iúil 2018.

CÚLRA

• Tá na treoirlínte sin comhsheasmhach leis an gComhaontú Cobhsaíochta agus Fáis agus dlíthe agus tionscnaimh eile AE lena n–áirítear na cinn maidir le:
  • Ráthaíocht don Aos Óg;
  • athlánpháirtiú na ndaoine dífhostaithe fadtéarmacha sa mhargadh saothair;
  • Conairí Uas-scilithe.
• Tá na tionscnaimh sin comhcheangailte sa Seimeastar Eorpach, lena gcuirtear chun feidhme Straitéis Fostaíochta na hEorpa agus lena ndéantar monatóireacht ar na beartais éagsúla chun spriocanna Eoraip 2020 a bhaint amach.

PRÍOMHDHOICIMÉAD

Cinneadh (AE) 2018/1215 ón gComhairle an 16 Iúil 2018 maidir le treoirlínte bheartais fostaíochta na mBallstát (IO L 224 an 5.9.2018, lgh. 4-9)

DOICIMÉID GHAOLMHARA

Moladh ón gComhairle an 15 Márta 2018 maidir le Creat Eorpach le haghaidh Printíseachtaí Cáilíochta agus Éifeachtacha (IO C 153, 2.5.2018, lgh. 1-6)

Forógra Idirinstitiúideach maidir le Colún Eorpach na gCeart Sóisialta (IO C 428, 13.12.2017, lgh. 10-15)

Moladh (AE) 2015/1184 ón gComhairle an 14 Iúil 2015 maidir le mór-threoirlínte bheartais eacnamaíocha na mBallstát agus an Aontais Eorpaigh (IO L 192, 18.7.2015, lgh. 27-31)

Cinneadh 2010/707/AE ón gComhairle an 21 Deireadh Fómhair 2010 maidir le treoirlínte bheartais fostaíochta na mBallstát (IO L 308,24.11.2010, lgh. 46-51)

Nuashonraithe 05.03.2019