Córais áirithinte aerthicéad ar ríomhaire

PRÍOMHPHOINTÍ

• Maidir le díotóirí córais¹ ní ceadmhach dóibh:
  • coinníollacha míchothroma nó coinníollacha gan údar maith a fhorchur ar aerlínte ná ar a síntiúsóirí féin;
  • cosc a chur ar aerlíne ó chórais áirithinte eile a úsáid, lena n-áirítear a seirbhís áirithinte Idirlín nó lárionaid ghlaonna féin;
  • nós imeachta ar leith maidir le lódáil nó próiseáil a choimeád d’iompróir rannpháirteach amháin nó níos mó.
• Ní mór do dhíoltóirí córais:
  • na sonraí a chuirtear ar fáil ag na haerlínte a lódáil agus a phróiseáil agus an aire agus an tráthúlacht chéanna á gcur i bhfeidhm;
  • aon sealúchas caipitil dhírigh nó caipitil indírigh atá acu in aerlíne, nó a mhalairt, a nochtadh go poiblí;
  • príomhthaispeántas a chur ar fáil do gach idirbheart aonair trína chóras áirithinte ar ríomhaire;
  • na haerlínte nach bhfuil cead acu eitilt laistigh den Aontas a aithint go soiléir sa taispeántas;
  • gan sonraí pearsanta a phróiseáil ach chun na gcríoch (áirithint a dhéanamh nó ticéad a eisiúint) ar cuireadh ar fáil iad;
  • ar iarratas ón gCoimisiún Eorpach, tuarascáil ar a ndearnadh iniúchadh neamhspleách maidir lena struchtúr úinéireachta agus samhail rialachais a chur isteach.
• Is féidir le díoltóirí córais sonraí margaíochta, áirithinte agus díolachán a chur ar fáil, ar an gcoinníoll go gcuirtear na sonraí sin ar fáil, ar bhonn neamh-idirdhealaitheach, do na hiompróirí rannpháirteacha go léir agus nach n-aithnítear an custaiméir.
• Má dhéanann díoltóirí córais i dtír nach tír den Aontas Eorpach í leatrom ar iompróirí an Aontais, féadfaidh an Coimisiún a éileamh ar na díoltóirí atá ag feidhmiú san Aontas caitheamh mar an gcéanna le haerlínte na tíre sin.
• Is féidir leis an gCoimisiún fíneálacha nach mó ná 10% de láimhdeachas na bliana roimhe sin a ghearradh ar chuideachtaí a theipeann orthu cloí leis an reachtaíocht d’aon ghnó nó le faillí.

In 2009, ghlac an Coimisiún nóta míniúcháin ina mínítear conas a bhaintear ciall as an gcoincheap “máthairiompróir”. D’fhéadfadh sé sin dul i bhfeidhm go mór ar reáchtáil ghnó an díoltóra chórais.