Rialacha maidir le caighdeáin mhargaíocht d’uibheacha

 

ACHOIMRE AR:

Rialachán (CE) Uimh. 589/2008 — caighdeáin mhargaíochta d’uibheacha

CAD IS AIDHM LEIS AN RIALACHÁN?

Leagtar amach ann caighdeáin mhargaíocht d’uibheacha* a dhíoltar in AE lena n-áirítear grádú uibheacha, lipéadú, dálaí maireachtála cearc agus coimeád taifead.

Cuirtear chun feidhme Rialachán (CE) Uimh. 1234/2007 leis — ar cuireadh Rialachán (AE) Uimh. 1308/2013 ina ionad agus a aisghaireadh le Rialachán (AE) Uimh. 1308/2013 — i dtaca le rialacha maidir le comheagraíocht na margaí i dtáirgí talmhaíochta in AE, lena n-áirítear caighdeáin mhargaíochta le haghaidh líon táirgí amhail uibheacha.

PRÍOMHPHOINTÍ

Is féidir uibheacha a rangú mar Rang A nó mar Rang B.

Ní mór d’uibheacha Rang A na saintréithe seo a leanas a bheith acu:

• sliogán i ngnáthchruth atá glan agus nach bhfuil damáistithe;
• spás aeir laistigh den ubh de mhéid nach mó ná 6 mm;
• buíocán nach bhfuil imlíne air atá le feiceáil go soiléir agus a bhogann beagáinín nuair a thiontaítear an ubh;
• ní mór don ghealacán a bheith trédhearcach agus tréshoilseach;
• ní bheidh ábhar nó boladh coimhthíoch san ubh;
• ní léireoidh an ubh forbairt frídíní.

Ní nífear nó ní ghlanfar uibheacha Rang A roimh ghrádú nó ina dhiaidh, agus ní dhéanfar iad a chóiriú lena gcaomhnú nó ní dhéanfar iad a fhuarú faoi 5 °C.

Déantar uibheacha Rang A a ghrádú de réir meáchain:

• XL - níos mó ná 72 g,
• L - 63-72 g,
• M - 53-62 g,
• S - níos lú ná 53 g.

Is ionann uibheacha Rang B agus na cinn nach gcomhlíonann tairseacha cáilíochta uibheacha Rang A, nó is uibheacha Rang A iad a íosghrádaíodh.

Is ag ionaid phacála amháin atá an cead uibheacha a ghrádú agus a phacáil, agus a bpacaí* a lipéadú. Caithfidh na hionaid phacála an trealamh cuí a bheith acu chun na huibheacha a ghrádú agus a mharcáil. Ní mór uibheacha a ghrádú, a mharcáil agus a phacáil laistigh de 10 lá ón mbreith.

Ní mór pacáistiú iompair uibheacha a mharcáil le:

• ainm agus seoladh an táirgeora,
• cód an táirgeora,
• líon na n-uibheacha agus/nó a meáchan,
• dáta nó tréimhse na breithe,
• dáta an tseolta.

Ní mór pacaí a bhfuil uibheacha Rang A iontu a mharcáil leis an modh feirmeoireachta a úsáideadh agus dáta na híosmharthanachta — tréimhse nach faide ná 28 lá i ndiaidh na breithe.

Féadfar uibheacha a lipéadú mar “uibheacha saor-raoin”, “uibheacha ó chearca fara” nó “uibheacha ó chearca cúbarnaí”. Ní mór do chearca saor-raoin rochtain leanúnach a bheith acu i rith an lae ar chlóis faoin aer; féadfaidh feirmeoirí, áfach, an rochtain a shrianadh ar maidin corruair i gcomhréir le dea-chleachtas feirmeoireachta ainmhithe. Ciallaíonn “uibheacha ó chearca cúbarnaí” gur coinníodh na cearca i gcásanna cúbarnaí feabhsaithe*, toisc go bhfuil cosc ar chásanna cúbarnaí (ar a dtugtar cásanna “cúbarnaí”’) in AE ó 2012 i leith (Treoir 1999/74/CE ón gComhairle — béaróga a chosaint).

Má ghlacann AE bearta chun an tsláinte phoiblí a chosaint lena dteastaíonn go gcoinnítear cearca laistigh, amhail le linn ráigeanna den fhliú éanúil, féadfar uibheacha a chur ar an margadh fós mar uibheacha “saor-raoin” ar an gcoinníoll nach mbeidh an srian ar chlóis faoin aer níos faide ná 16 seachtaine go leanúnach.

Ní mór do chlóis faoin aer a bheith cumhdaithe den chuid is mó le fásra agus nach mbainfear úsáid astu chun críche ar bith eile seachas úlloird, coillearnach agus féarach beostoic.

Ní bheidh dlús uasta stocála na gclós faoin aer níos mó ná 2 500 cearc in aghaidh an heicteáir nó cearc amháin in aghaidh 4 m².

Féadfar na focail “úr” nó “rí-úr” a úsáid le cáilíocht níos airde ar uibheacha Rang A a léiriú go dtí 9 lá i ndiaidh na breithe.

Féadfar tagairtí a dhéanamh do chearca a bheathaítear le gránaigh i gcás gurb ionann na gránaigh agus 60 % d’fhoirmle an bheathaithe.

Ní mór do tháirgeoirí uibheacha taifid a choinneáil maidir le:

• an modh feirmeoireachta a úsáideadh,
• líon agus aois na gcearc,
• dáta na cuileála agus líon na gcearc a cuileáladh,
• líon nó meáchan na n-uibheacha a dhíoltar in aghaidh an lae,
• ainmneacha agus seoltaí na gceannaitheoirí.

Ní mór do thíortha AE cigirí a cheapadh chun seiceálacha ar chomhlíonadh a dhéanamh.

CÉN UAIR ATÁ TOSACH FEIDHME AN RIALACHÁIN?

Tá feidhm leis ón 1 Iúil 2008.

CÚLRA

Le haghaidh breis faisnéise, féach:

• Ionstraimí beartais don earnáil uibheacha (An Coimisiún Eorpach).

PRÍOMHTHÉARMAÍ

PRÍOMHDHOICIMÉAD

Rialachán (CE) Uimh. 589/2008 ón gCoimisiún an 23 Meitheamh 2008 lena leagtar síos rialacha maidir le cur chun feidhme Rialachán (CE) Uimh. 1234/2007 ón gComhairle maidir le caighdeáin mhargaíochta d’uibheacha (IO L 163, 24.6.2008, lgh. 6-23)

Rinneadh leasuithe comhleanúnacha ar Rialachán (CE) Uimh. 589/2008 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

DOICIMÉID GHAOLMHARA

Rialachán (AE) Uimh. 1308/2013 ó Pharlaimint na hEorpa agus ón gComhairle an 17 Nollaig 2013 lena mbunaítear comheagrú na margaí i dtáirgí talmhaíochta agus lena n-aisghairtear Rialacháin (CEE) Uimh. 922/72, (CEE) Uimh. 234/79, (CE) Uimh. 1037/2001 agus (CE) Uimh. 1234/2007 ón gComhairle (IO L 347, 20.12.2013, lgh. 671-854)

Féach an leagan comhdhlúite.

Treoir 1999/74/CE ón gComhairle an 19 Iúil 1999 lena leagtar síos caighdeáin íosta chun béaróga a chosaint (IO L 203, 3.8.1999, lgh. 53-57)

Féach an leagan comhdhlúite.

Nuashonraithe 27.02.2018