An Coinbhinsiún maidir leis an Danóib a chosaint

 

ACHOIMRE AR:

An Coinbhinsiún maidir le Comhoibriú um Chosaint agus um Úsáid Inbhuanaithe na Danóibe

Cinneadh 97/825/CE maidir leis an gcoinbhinsiún maidir le comhoibriú um chosaint agus um úsáid inbhuanaithe na Danóibe

CAD IS AIDHM LEIS AN GCOINBHINSIÚN AGUS LEIS AN GCINNEADH?

• Tá sé mar aidhm leis an gcoinbhinsiún comhoibriú maidir le bainistíocht uisce trasteorann in Abhantrach na Danóibe a áirithiú agus, ag déanamh amhlaidh, a áirithiú go ndéanfar uiscí dromchla agus screamhuisce laistigh den abhantrach a bhainistiú agus a úsáid ar bhealach inbhuanaithe agus cothrom.
• Leis an gcinneadh faomhtar an coinbhinsiún thar ceann an Aontais Eorpaigh (AE).

PRÍOMHPHOINTÍ

Cuspóirí

Tá roinnt cuspóirí leis an gcoinbhinsiún:

• bainistíocht uisce inbhuanaithe agus cothrom a bhaint amach, lena n–áirítear — a mhéid is féidir — caomhnú, feabhsú agus úsáid réasúnach uiscí dromchla agus screamhuisce sa dobharcheantar;
• na guaiseacha a thagann as timpistí a bhaineann le substaintí atá guaiseach d’uisce, tuilte agus guaiseacha oighir na habhann a rialú;
• ualaí truaillithe na Mara Duibhe ó fhoinsí sa dobharcheantar a laghdú.

Comhoibriú

• Aontaíonn na páirtithe oibriú i gcomhar ar shaincheisteanna bunúsacha bainistíochta uisce agus bearta a dhéanamh chun:
  • dálaí reatha comhshaoil agus cáilíochta uisce na habhann agus na n–uiscí ina dobharcheantar a choimeád agus a fheabhsú,
  • tionchair dhíobhálacha agus athruithe atá ag tarlú nó ar dóigh go dtarlóidh siad, a chosc agus a laghdú, a mhéid is féidir.
• Ní mór do na páirtithe tosaíochtaí a leagan síos agus bearta ar leibhéal intíre agus ar an leibhéal idirnáisiúnta a neartú, a chomhchuibhiú agus a chomhordú.
• Bunaítear leis an gcoinbhinsiún an prionsabal “íoc mar a thruaillítear” agus prionsabal an “réamhchúraim” mar bhunús chun an abhainn agus na ceantair máguaird a chosaint.
• Leagtar amach sa choinbhinsiún rialacha maidir le comhar iltaobhach i roinnt réimsí, lena n–áirítear:
  • tionchar trasteorann a chosc, a rialú agus a laghdú;
  • bearta sainiúla um chosaint foinsí uisce;
  • teorainneacha astaíochtaí.

Raon feidhme

Baineann an coinbhinsiún le dobharcheantar na Danóibe mar a shainítear sa choinbhinsiún. Baineann sé go sonrach le gníomhaíochtaí beartaithe agus bearta leanúnacha áirithe is cúis le, nó ar dóigh go mbeadh siad ina gcúis le, tionchair trasteorann:

• scaoileadh fuíolluisce, ionchur cothaitheach agus substaintí guaiseacha, agus scaoileadh teasa;
• gníomhaíochtaí agus bearta beartaithe in obair bhonneagair uisce;
• gníomhaíochtaí beartaithe eile agus bearta maidir le húsáid uisce, amhail úsáid cumhachta uisce agus aistriú agus astarraingt uisce;
• oibriú an bhonneagair hidriteicniúil atá ann cheana amhail taiscumair agus gléasraí cumhachta uisce, agus bearta chun tionchar comhshaoil a chosc agus éiceachórais a chosaint;
• láimhseáil substaintí atá guaiseach d’uisce agus cosc réamhchúraim ar thimpistí.

Tá feidhm ag an gcoinbhinsiún le saincheisteanna iascaigh agus loingseoireachta intíre i gcomhthéacs truailliú a tharlaíonn de bharr gníomhaíochtaí dá leithéid.

Coimisiún Idirnáisiúnta um Chosaint na Danóibe (ICPDR)

Bunaítear leis an gcoinbhinsiún an ICPDR lena chuid aidhmeanna agus rialacha a chur chun feidhme.

Éascaíonn an ICPDR comhoibriú sna cásanna seo a leanas chomh maith:

• idir tíortha Abhantrach na Danóibe agus réigiún na Mara Duibhe ina bhfuil comhordú ag teastáil;
• le heagraíochtaí idirnáisiúnta eile;
• ar dhúshláin bhainistíochta uisce eile agus cinn nua.

Tá comhaltaí an ICPDR, lena n–áirítear tíortha nach tíortha den Aontas Eorpach iad, tiomanta do Chreat–treoir Uisce AE — Treoir 2000/60/CE (féach an achoimre) a chur chun feidhme.

DÁTA TEACHT I BHFEIDHM

Tháinig an Coinbhinsiún i bhfeidhm ar an 22 Deireadh Fómhair 1998.

CÚLRA

• Uisce (An Coimisiún Eorpach).

PRÍOMHDHOICIMÉID

Coinbhinsiún maidir le comhoibriú um chosaint agus um úsáid inbhuanaithe na Danóibe (Coinbhinsiún maidir leis an Danóib a chosaint) (IO L 342, 12.12.1997, lgh. 19–43).

Cinneadh 97/825/CE ón gComhairle an 24 Samhain 1997 maidir le tabhairt i gcrích an Choinbhinsiúin maidir le comhoibriú um chosaint agus um úsáid inbhuanaithe na Danóibe (IO L 342, 12.12.1997, lch. 18).

DOICIMÉID GHAOLMHARA

Treoir 2000/60/CE ó Pharlaimint na hEorpa agus ón gComhairle an 23 Deireadh Fómhair 2000 lena mbunaítear creat i gcomhair gnímh ag an gComhphobal sa réimse a bhaineann le beartas uisce (IO L 327, 22.12.2000, lgh 1–73).

Rinneadh leasuithe comhleanúnacha ar Threoir 2000/60/CE a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

Nuashonraithe 20.10.2021