(1)

Tá tionchar á imirt ag ionradh na Rúise ar an Úcráin an 24 Feabhra 2022 ar fheirmeoirí san Aontas.

(2)

Is í an infhaighteacht iompair an phríomhchúis imní maidir leis an trádáil idir an Úcráin agus an tAontas. Ba iad aerfoirt na hÚcráine is túisce a bhí thíos leis de dheasca ionradh na Rúise agus cuireadh na hoibríochtaí loingseoireachta tráchtála uile i gcalafoirt na hÚcráine ar fionraí.

(3)

Is dócha go mbeidh iarmhairtí tromchúiseacha ag an ngéarchéim ar sholáthar an ghráin ar an leibhéal domhanda, agus fágfaidh sin go dtiocfaidh ardú breise ar phraghsanna, rud a chuirfidh leis an ardú as cuimse atá ag teacht ar phraghsanna fuinnimh agus leasachán, agus a mbeidh tionchar aige ar fheirmeoirí san Aontas.

(4)

An dara hábhar imní atá ann nach féidir leanúint de tháirgí an Aontais a sheachadadh chun na hÚcráine ná, seans, chun na Rúise agus na Bealarúise ach oiread ar chúiseanna lóistíochta agus airgeadais, rud a chuirfeadh isteach ar an trádáil i roinnt earnálacha, agus a d’fhágfadh go mbeadh míchothromaíochtaí margaidh ar an margadh inmheánach. Dhéanfadh sin difear go príomha d’earnálacha na bhfíonta agus na mbiotáillí, na mbianna próiseáilte (lena n-áirítear torthaí agus glasraí próiseáilte), bainne foirmle do naíonáin, agus bia peataí i gcás na Rúise, torthaí agus glasraí i gcás na Bealarúise, táirgí ainmhí i gcás na hÚcráine.

(5)

Dá bhrí sin, tá géarbhagairt ann go mbeidh suaitheadh sa mhargadh i ngeall ar arduithe móra ar chostais agus ar shuaitheadh trádála, ar nithe iad a dteastaíonn gníomhaíocht éifeachtach éifeachtúil ina leith.

(6)

Na bearta idirghabhála sa mhargadh atá ar fáil faoi Rialachán (AE) Uimh. 1308/2013 i bhfoirm idirghabhála poiblí, cabhrach stórála príobháidí nó aistarraingtí ón margadh, d’fhéadfaidís a bheith éifeachtach maidir le cothromaíocht áirithe sa mhargadh a athbhunú trí tháirgí a bhaint den mhargadh go sealadach nó go buan, ach ní bearta iad de chineál a chabhródh le cur i gcoinne suaitheadh sa mhargadh mar thoradh ar arduithe ar chostais. Cé gur gá don mhargadh dul in oiriúint de réir a chéile d’imthosca nua, tá gá le tacaíocht do tháirgeoirí in earnálacha ina bhfuil costais ionchuir ag ardú go leibhéil nach bhfuil inbhuanaithe agus i gcás nach féidir gnáth-asraon margaidh a fháil do tháirgí.

(7)

Chun freagairt go héifeachtúil éifeachtach don bhagairt go mbeidh suaitheadh sa mhargadh, tá sé fíor-riachtanach cabhair a sholáthar do tháirgeoirí sna hearnálacha talmhaíochta sin san Aontas atá thíos leis an suaitheadh sin sa mhargadh. Ba cheart do na Ballstáit ceann amháin nó níos mó de na hearnálacha lena mbaineann, nó cuid díobh, a roghnú chun tacú leis na táirgeoirí is mó atá thíos le suaitheadh sa mhargadh.

(8)

Is iomchuí, dá bhrí sin, deontas airgeadais a thabhairt do na Ballstáit chun tacú le táirgeoirí atá i mbun gníomhaíochtaí lena gcothaítear an tslándáil bia nó lena dtugtar aghaidh ar mhíchothromaíochtaí ar an margadh, rud a fhágfaidh go bhféadfar an coigeartú is gá a dhéanamh. Ba cheart an méid atá ar fáil do gach Ballstát a leagan amach, agus tábhacht gach Ballstáit in earnáil talmhaíochta an Aontais á chur san áireamh, ar bhonn na nglan-uasteorainneacha d’íocaíochtaí díreacha a leagtar amach in Iarscríbhinn III a ghabhann le Rialachán (AE) Uimh. 1307/2013 ó Pharlaimint na hEorpa agus ón gComhairle (3).

(9)

Ba cheart do na Ballstáit bearta a cheapadh lena rannchuidítear leis an tslándáil bia nó lena dtugtar aghaidh ar mhíchothromaíochtaí ar an margadh. Ba cheart d’fheirmeoirí a bheith incháilithe chun tacaíocht a fháil faoi na bearta sin ar choinníoll go mbíonn siad ag gabháil do cheann amháin nó níos mó de na gníomhaíochtaí seo a leanas agus na spriocanna sin á saothrú acu: an geilleagar ciorclach, bainistíocht cothaitheach, úsáid éifeachtúil acmhainní, agus modhanna táirgthe atá neamhdhíobhálach don chomhshaol agus don aeráid.

(10)

Ba cheart do na Ballstáit an chabhair a dháileadh trí na bealaí is éifeachtaí ar bhonn critéir oibiachtúla neamh-idirdhealaitheacha, ar critéir iad lena gcuirtear san áireamh méid an tsuaite sa mhargadh a tharla sna hearnálacha éagsúla, agus é á áirithiú san am céanna gurb iad na feirmeoirí a thairbheoidh den chabhair ar deireadh, agus aon saobhadh ar an margadh agus ar an iomaíocht á sheachaint.

(11)

Maidir leis an méid a leithdháilfear ar gach Ballstát, ós rud é nach gcúiteofaí leis ach cuid den chaillteanas iarbhír a bhain do tháirgeoirí sna hearnálacha talmhaíochta, ba cheart cead a bheith ag na Ballstáit tacaíocht bhreise a dheonú do na táirgeoirí sin, faoi na coinníollacha céanna maidir le hoibiachtúlacht, neamh-idirdhealú agus neamhshaobhadh iomaíochta. I bhfianaise mhéid na géarchéime atá ann faoi láthair, féadfaidh an tacaíocht náisiúnta bhreise sin, ar bhonn eisceachtúil, a bheith a dhá oiread níos mó, ar a mhéad, ná na méideanna a leagtar amach san Iarscríbhinn a ghabhann leis an Rialachán seo.

(12)

Chun an tsolúbthacht a thabhairt do na Ballstáit an chabhair a dháileadh de réir mar is gá chun déileáil le suaitheadh an mhargaidh, ba cheart cead a bheith acu í a charnadh le tacaíocht eile arna maoiniú ag an gCiste Eorpach um Ráthaíocht Talmhaíochta agus ag an gCiste Eorpach Talmhaíochta um Fhorbairt Tuaithe.

(13)

An chabhair dá bhforáiltear sa Rialachán seo, ba cheart í a dheonú mar bheart lena dtacaítear leis na margaí talmhaíochta i gcomhréir le hAirteagal 4(1), pointe (a) de Rialachán (AE) Uimh. 1306/2013, tar éis aistriú cistí ón gcúlchiste le haghaidh géarchéim san earnáil talmhaíochta dá bhforáiltear in Airteagal 25 den Rialachán sin.

(14)

Ós rud é gur in euro a shocraítear an chabhair ón Aontas, is gá, chun cur i bhfeidhm aonfhoirmeach comhuaineach a áirithiú, dáta a shocrú chun an tsuim a leithdháiltear ar na Ballstáit nár ghlac an euro a chomhshó ina n-airgeadra náisiúnta. Is iomchuí, dá bhrí sin, an t-imeacht feidhme a chinneadh le haghaidh an ráta malairte i gcomhréir le hAirteagal 106 de Rialachán (AE) Uimh. 1306/2013. I bhfianaise an phrionsabail dá dtagraítear i bpointe (b) de mhír 2 agus na gcritéar a leagtar síos i mír 5, pointe (c) den Airteagal sin, is é dáta theacht i bhfeidhm an Rialacháin seo ba cheart a bheith san imeacht feidhme.

(15)

Ar chúiseanna buiséadacha, níor cheart don Aontas an caiteachas a thabhóidh na Ballstáit a mhaoiniú ach amháin i gcás ina ndéanfar an caiteachas sin faoi dháta incháilitheachta áirithe.

(16)

Chun trédhearcacht, faireachán agus riar cuí a áirithiú maidir leis na méideanna atá ar fáil dóibh, ba cheart do na Ballstáit an Coimisiún a chur ar an eolas faoi na bearta nithiúla a bheidh le déanamh, faoi na critéir a úsáideadh chun iad a bhunú, faoin réasúnaíocht leis an gcabhair a dháileadh ar na hearnálacha éagsúla trí chéile, faoi na bearta a glacfar chun saobhadh na hiomaíochta sna margaí lena mbaineann a sheachaint, faoi thionchar beartaithe na mbeart agus faoi na modhanna chun a sheiceáil gur baineadh amach é.

(17)

Suaitheadh láithreach ar an margadh is ea na deacrachtaí a bhaineann le rochtain a fháil ar ionchuir agus na fadhbanna lóistíochta a eascraíonn as stad tobann a theacht ar lastais tráchtála agus, dá bhrí sin, tá gá le gníomh láithreach chun aghaidh a thabhairt ar an gcás go héifeachtúil éifeachtach.

(18)

Chun a áirithiú go bhfaighidh táirgeoirí cabhair a luaithe is féidir, ba cheart a chur a gcumas do na Ballstáit an Rialachán seo a chur chun feidhme gan mhoill. Dá bhrí sin, ba cheart an Rialachán seo a theacht i bhfeidhm an lá tar éis lá a fhoilsithe in Iris Oifigiúil an Aontais Eorpaigh. Ba cheart feidhm a bheith aige ar choinníoll gur i gcomhréir le Rialachán (AE, Euratom) 2018/1046 ó Pharlaimint na hEorpa agus ón gComhairle a aistreofar EUR 350 000 000 ón gcúlchiste chuig na línte buiséid lena maoineofar an beart a bhfuil gá leis (4); ón lá a fhoilseofar teachtaireacht ón gCoimisiún in Iris Oifigiúil an Aontais Eorpaigh ar teachtaireacht í lena sonrófar go ndearnadh an t-aistriú,