(1)

An 21 Deireadh Fómhair 2019, ghlac an Chomhairle Cinneadh (AE) 2019/1750 (1) lena leasaítear Cinneadh (AE) 2019/274 (2) maidir le síniú, thar ceann an Aontais Eorpaigh agus an Chomhphobail Eorpaigh do Fhuinneamh Adamhach an Chomhaontuithe maidir le Ríocht Aontaithe na Breataine Móire agus Thuaisceart Éireann a bheith ag tarraingt siar as an Aontas Eorpach agus as an gComhphobal Eorpach do Fhuinneamh Adamhach (“an Comhaontú”).

(2)

Ba cheart an Comhaontú a fhormheas thar ceann an Aontais Eorpaigh agus an Chomhphobail Eorpaigh do Fhuinneamh Adamhach.

(3)

Aon tagairtí don Aontas sa chinneadh seo, ba cheart a thuiscint go n‐áirítear leo an Comhphobal Eorpach do Fhuinneamh Adamhach.

(4)

An dáta a dtiocfaidh an Comhaontú seo i bhfeidhm, tiocfaidh deireadh go huathoibríoch, mar thoradh ar an tarraingt siar, le sainorduithe chomhaltaí uile na n‐institiúidí, na gcomhlachtaí agus na ngníomhaireachtaí de chuid an Aontais a ainmníodh, a ceapadh nó a toghadh i dtaca le comhaltas na Ríochta Aontaithe san Aontas.

(5)

Is iomchuí modúlachtaí ionadaíocht an Aontais sa Chomhchoiste agus sna coistí speisialaithe arna mbunú leis an gComhaontú a shainiú. Is é an Coimisiún, faoi mar a fhoráiltear in Airteagal 17(1) CAE, atá chun ionadaíocht a dhéanamh don Aontas agus chun seasaimh an Aontais a chur in iúl, faoi mar a bhunaíonn an Chomhairle iad i gcomhréir leis na Conarthaí. Tá an Chomhairle chun a feidhmeanna sainithe beartas agus a feidhmeanna comhordaitheacha faoi mar a fhoráiltear dóibh in Airteagal 16(1) CAE a fheidhmiú trí na seasaimh a bheidh le glacadh thar ceann an Aontais sa Chomhchoiste agus sna coistí speisialaithe a bhunú. Ina theannta sin, i gcás ina n-iarrtar ar an gComhchoiste gníomhartha a ghlacadh a bhfuil éifeachtaí dlíthiúla leo, tá na seasaimh atá le ghlacadh thar ceann an Aontais sa Chomhchoiste le bunú i gcomhréir leis an nós imeachta a leagtar amach in Airteagal 218(9) den Chonradh ar Fheidhmiú an Aontais Eorpaigh. Sé mhí sula dtiocfaidh Airteagal 5 den Phrótacal maidir le hÉirinn/Tuaisceart Éireann a ghabhann leis an gComhaontú um Tharraingt Siar chun bheith infheidhme, déanfar na modúlachtaí do rannpháirtíocht Ballstát i gcruinnithe an Chomhchoiste agus na gcoistí speisialaithe a athbhreithniú, agus an staid nua arna cruthú amhlaidh á cur san áireamh.

(6)

Meabhraítear go ndearnadh roinnt dearbhuithe a chur i miontuairiscí na Comhairle Eorpaí an 25 Samhain 2018., De réir an Dearbhaithe i gcás ina mbainfidh seasamh an Aontais, a bheidh le glacadh sa Chomhchoiste, le síneadh ar an idirthréimhse, gníomhóidh an Chomhairle i gcomhréir leis na treoirlínte ón gComhairle Eorpach agus cuirfear san áireamh, in aon chinneadh maidir le síneadh a chur leis an idirthréimhse, comhlíonadh na n‐oibleagáidí atá ar an Ríocht Aontaithe faoin gComhaontú, lena n‐áirítear na Prótacail a ghabhann leis. Cuireadh dhá dhearbhú eile ón gComhairle Eorpach agus ón gCoimisiún san miontuairiscí sin thuas de chuid na Comhairle Eorpaí. Dearbhú léiritheach maidir le hAirteagal 184 den Chomhaontú um Tharraingt Siar, agus dearbhú maidir le raon feidhme comhaontuithe na socruithe a bheidh ann sa todhchaí.

(7)

I gcás ina bhfuil an tAontas chun seasamh a ghlacadh sa Chomhchoiste, tá an Chomhairle agus an Coimisiún chun na Dearbhuithe a áirítear i miontuairiscí Chomhairle Eorpach an 25 Samhain 2018 a urramú.

(8)

Tá Parlaimint na hEorpa le cur go hiomlán ar an eolas láithreach, mar a fhoráiltear in Airteagal 218(10) CFAE, ar bhonn modúlachtaí praiticiúla comhair lena mbeidh sí ábalta a sainchumais a fheidhmiú go hiomlán i gcomhréir leis na Conarthaí.

(9)

Nuair is gá don Aontas gníomhú chun forálacha an Chomhaontaithe a chomhlíonadh, tá gníomhaíocht den sórt sin le déanamh i gcomhréir le forálacha na gConarthaí agus, san am céanna, teorainneacha na gcumhachtaí a thugtar do gach institiúid á n‐urramú. Dá bhrí sin, seachas i gcás ina dtagraíonn an Comhaontú d’institiúidí, do chomhlachtaí, d’oifigí agus do ghníomhaireachtaí sonracha eile de chuid an Aontais, is faoin gCoimisiún atá sé an fhaisnéis nó na fógraí a cheanglaítear leis an gComhaontú a thabhairt don Ríocht Aontaithe, dul i gcomhairle leis an Ríocht Aontaithe maidir le hábhair shonracha, agus cuireadh a chur ar ionadaithe ón Ríocht Aontaithe chun bheith i láthair ag cruinnithe comhairliúcháin nó caibidlíochta idirnáisiúnta mar chuid de thoscaireacht an Aontais. Is faoin gCoimisiún freisin atá sé ionadaíocht a dhéanamh don Aontas os comhair an phainéil eadrána i gcás ina gcuirtear isteach díospóid chun eadrána i gcomhréir le hAirteagal 170 den Chomhaontú. I gcomhlíonadh dhualgas an chomhair dhílis dá dtagraítear in Airteagal 4(3) CAE, tá an Coimisiún chun dul i gcomhairle leis an gComhairle roimh ré, mar shampla, trí phríomhlínte na n‐aighneachtaí sin de chuid an Aontais atá beartaithe a chur faoi bhráid an phainéil a chur faoi bhráid na Comhairle, agus trí na barúlacha a thugann an Chomhairle a chur san áireamh. Is ar an gcúis chéanna ba cheart gur faoin gCoimisiún a bheadh sé socruithe riaracháin amhail na socruithe dá dtagraítear in Airteagal 134 den Chomhaontú a chomhaontú leis an Ríocht Aontaithe.

(10)

Sa ráiteas uaidh do mhiontuairiscí chruinniú na Comhairle an 29 Eanáir 2018, thug an Coimisiún le fios go ndéanfaidh sé doiciméad treorach a eisiúint, tar éis dó dul i gcomhairle leis an gComhairle, maidir le cur i bhfeidhm comhsheasmhach Airteagal 128(5) den Chomhaontú.

(11)

De bhun Airteagal 129(4) den Chomhaontú, féadfaidh an Ríocht Aontaithe, le linn na hidirthréimhse, comhaontuithe idirnáisiúnta arna ndéanamh aici ina cáil féin a chaibidil, a shíniú agus a dhaingniú i réimsí ina bhfuil inniúlacht eisiach ag an Aontas, ar choinníoll nach dtiocfaidh na comhaontuithe sin i bhfeidhm ná nach gcuirfear i bhfeidhm iad le linn na hidirthréimhse, murar údaraigh an tAontas amhlaidh. Is gá na coinníollacha agus an nós imeachta a leagan amach chun údaruithe den sórt sin a dheonú. I bhfianaise an mheáchain pholaitiúil a bhaineann le cinntí lena dtugtar údaruithe den sórt sin, is iomchuí an chumhacht chun na húdaruithe sin a ghlacadh a thabhairt don Chomhairle trí bhíthin gníomhartha cur chun feidhme, ag gníomhú di ar thogra ón gCoimisiún.

(12)

Tugann an Comhaontú aghaidh, i bprótacail ar leithligh, ar chásanna an-sonrach na hÉireann/Thuaisceart Éireann, na Limistéar Bunáite Flaitheasach de chuid na Ríochta Aontaithe sa Chipir agus Ghiobráltar. Ó tharla go mb’fhéidir gur ghá d’Éirinn, do Phoblacht na Cipire agus do Ríocht na Spáinne, faoi seach, comhaontuithe déthaobhacha den sórt sin a dhéanamh leis an Ríocht Aontaithe, de réir mar is gá le haghaidh fheidhmiú ceart na socruithe dá bhforáiltear sna prótacail shonracha sin, is gá na coinníollacha agus an nós imeachta a leagan amach chun údarú a thabhairt don Bhallstát atá i gceist comhaontuithe déthaobhacha den sórt sin a chaibidil agus a thabhairt i gcrích i gcás ina mbaineann siad le réimsí ina bhfuil inniúlacht eisiach ag an Aontas. I bhfianaise an mheáchain pholaitiúil a bhaineann le cinntí lena dtugtar údaruithe den sórt sin, is iomchuí an chumhacht chun na húdaruithe sin a ghlacadh a thabhairt don Chomhairle trí bhíthin gníomhartha cur chun feidhme, ag gníomhú di ar thogra ón gCoimisiún.

(13)

De réir Airteagal 18(1) agus (4) den Chomhaontú, tá na Ballstáit óstacha chun doiciméad a fhianaíonn a stádas cónaithe i gcomhréir leis an gComhaontú a eisiúint do náisiúnaigh den Ríocht Aontaithe, dá mbaill teaghlaigh féin agus do dhaoine eile a thagann faoi raon feidhme Theideal II de Chuid a Dó den Chomhaontú. De réir Airteagal 26 den Chomhaontú, tá an Ballstát oibre chun doiciméad a eisiúint do náisiúnaigh den Ríocht Aontaithe a bhfuil cearta acu mar oibrithe trasteorann faoin gComhaontú, doiciméad lena ndeimhnítear an stádas atá acu mar oibrí trasteorann faoin gComhaontú. Chun coinníollacha aonfhoirmeacha a áirithiú le haghaidh chur chun feidhme na bhforálacha sin laistigh den Aontas d’fhonn é a éascú, go háirithe d’údaráis rialaithe teorann, doiciméid den sórt sin a aithint agus falsú agus góchumadh a chosc trí ghnéithe slándála ardleibhéil, ba cheart cumhachtaí cur chun feidhme a thabhairt don Choimisiún chun an tréimhse bhailíochta, formáid dhoiciméid den sórt sin agus na sonraíochtaí teicniúla do dhoiciméid den sórt sin a leagan síos, chomh maith leis an ráiteas coiteann a cheanglaítear a bheith ag gabháil le doiciméid a eisítear faoi Airteagal 18 agus Airteagal 26 den Chomhaontú, eadhon ráiteas gur eisíodh iad i gcomhréir leis an gComhaontú. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (3). Chun na críche sin, ba cheart an Coiste arna bhunú le hAirteagal 6 de Rialachán (CE) Uimh. 1683/95 ón gComhairle a bheith de chúnamh ag an gCoimisiún (4). Más gá, féadfar a áireamh i ngníomhartha cur chun feidhme den sórt sin bearta iomchuí chun falsú agus góchumadh doiciméad den sórt sin a chosc. Sa chás sin, níor cheart iad a chur ar fáil ach do na comhlachtaí sin a d’ainmnigh na Ballstáit ina gcomhlachtaí atá freagrach as iad a chur i gcló agus do dhaoine a bhfuil údarú cuí faighte acu ó Bhallstát nó ón gCoimisiún. Ba cheart nár dhochar gníomhartha cur chun feidhme den sórt sin d’aon socruithe speisialta a d’fhéadfadh Éire a dhéanamh, de bhua an Chomhaontaithe, leis an Ríocht Aontaithe i ndáil le gluaiseacht daoine sa Chomhlimistéar Taistil.

(14)

I gcomhréir le hAirteagal 106a den Chonradh ag bunú an Chomhphobail Eorpaigh do Fhuinneamh Adamhach, tá feidhm ag Airteagal 50 CAE maidir leis an gComhphobal Eorpach do Fhuinneamh Adamhach.

(15)

Faoi mar a fhoráiltear in Airteagal 50(4) CAE, níor ghlac an Ríocht Aontaithe páirt i bpléití na Comhairle maidir leis an gcinneadh seo ná ina ghlacadh,