Bearta maidir le neamhleathadh diúracán balaistíoch

Tacaíonn an gníomh le gníomhaíochtaí idirnáisiúnta i gcoinne leathadh diúracán balaistíoch.

GNÍOMH

Cinneadh 2014/913/CBES ón gComhairle an 15 Nollaig 2014 lena dtacaítear le Cód Iompair na Háige agus le neamhleathadh diúracán balaistíoch maidir le cur i bhfeidhm straitéis AE i gcoinne leathadh arm ollscriosta

ACHOIMRE

Tacaíonn an gníomh le gníomhaíochtaí idirnáisiúnta i gcoinne leathadh diúracán balaistíoch.

CÉARD A DHÉANANN AN CINNEADH SEO?

Tugann an tAontas Eorpach (AE) tacaíocht ann:

• do Chód Iompair na Háige (HCoC) agus don réimeas um rialú teicneolaíocht diúracán (MTCR), go sonrach;
• do neamhleathadh a chur chun cinn ar fud an domhain, go ginearálta.

Faoin gcinneadh seo, cuirtear bearta straitéis AE i gcoinne leathadh arm ollscriosta chun cinn. Féachtar leis an straitéis sin dul i ngleic le leathadh arm ollscriosta (AOS) trí obair a dhéanamh le heagraíochtaí idirnáisiúnta agus le príomhthíortha.

PRÍOMHPHOINTÍ

Faoin gcinneadh seo, cuireann an Foras um thaighde straitéiseach cistiúchán deEUR 990 000ar fáil le haghaidh tionscadal, chun:

• feasacht a mhéadú maidir le baol an leata;
• cumas na n-eagraíochtaí idirnáisiúnta déileáil leis an mbaol, a mhéadú;
• na tíortha uile, a bhfuil cumas diúracán balaistíoch acu, a spreagadh chun Cód na Háige a shíniú;
• cur i bhfeidhm an chóid a thacú agus chun comhlíonadh threoirlínte MTCR a chur chun cinn.

Go sonrach, déanfar na nithe seo a leanas a tháirgeadh nó a reáchtáil sna tionscadail:

• imeachtaí for-rochtana:
  • ceithre sheimineár ar imeall chruinnithe Chód na Háige agus imeachtaí ábhartha na Náisiún Aontaithe;
  • seimineáir i dtrí phríomhréigiún, go háirithe an Meánoirthear, an Áise Thoir Thuaidh agus an Áise Thoir Theas;
  • misin saineolaithe chuig 10 bpríomhthír, ina ndíreofar ar an tionscal, ar eolaithe, ar shaineolaithe rialú easpórtála agus ar an arm.
• ábhar fógraíochta do Chód na Háige (1 000 leabhrán, 1 500 bileog eolais agus láithreán gréasáin);
• ceithre pháipéar ó shaineolaithe (déanfar scrúdú sna páipéir sin ar bhearta tógála muiníne, ar rialuithe easpórtála, ar aistriú eolais, srl.).

CÚLRA

• MTCR - cumann deonach tíortha a bhfuil mar aidhm aige leathadh na gcóras ar féidir AOSanna a iompar, a shrianadh.
• Cód na Háige - rialacha iompair maidir le diúracáin bhalaistíocha, m.sh. bíonn ar na tíortha sínithe a mbeartais diúracán balaistíoch a fhógairt agus fógraí a eisiúint sula ndéantar na diúracáin sin a thástáil.

Nuashonraithe 20.08.2015