(1)

Chuaigh an Conradh ag bunú an Chomhphobail Eorpaigh do Ghual agus Cruach in éag an 23 Iúil 2002 i gcomhréir le hAirteagal 97 den Chonradh sin. Aistríodh sócmhainní agus dócmhainní uile an Chomhphobail Eorpaigh do Ghual agus Cruach (CEGC) chuig an Aontas an 24 Iúil 2002.

(2)

I gcomhréir le Prótacal (Uimh. 37), táthar chun glanluach na sócmhainní agus na ndócmhainní, faoi mar a thaispeántar iad i gclár comhardaithe CEGC an 23 Iúil 2002, a mheas mar shócmhainní atá ceaptha le haghaidh taighde sna hearnálacha atá gaolmhar leis an tionscal guail agus cruach, dá ngairtear “CEGC faoi leachtú”, agus, dá ngairtear, ar an leachtú a bheith críochnaithe, “sócmhainní an Chiste Taighde um Ghual agus Cruach”.

(3)

Foráiltear le Prótacal (Uimh. 37) freisin go bhfuiltear chun leas eisiach a bhaint as an ioncam ó na sócmhainní sin, dá ngairtear “An Ciste Taighde um Ghual agus Cruach” (RFCS), le haghaidh taighde, lasmuigh den chlár réime taighde, sna hearnálacha atá gaolmhar leis an tionscal guail agus cruach i gcomhréir le forálacha Phrótacal (Uimh. 37) agus gníomhartha arna nglacadh ar bhonn an phrótacail sin.

(4)

An 1 Feabhra 2003 ghlac an Chomhairle Cinneadh 2003/76/CE (2), lena mbunaítear na rialacha le haghaidh Phrótacal (Uimh. 37) a chur chun feidhme.

(5)

De bharr an chomhthéacs rátaí ísle úis, tá na hioncaim arna sannadh do chistiú na dtionscadal taighde maidir le gual agus cruach ag laghdú go gasta. Mar thoradh air sin, d’fhéadfadh nach mbainfí amach an t-íosbhuiséad criticiúil atá ann chun glao bliantúil ar thograí a eagrú le haghaidh chlár taighde de chuid RFCS (“an clár”). Tá gá le híosbhuiséad criticiúil le haghaidh glao a eagrú ionas go mbeidh an clár in ann tacaíocht fhónta a thabhairt do thionscadail taighde chomhoibríocha fhiúntacha a bhfuil an mhais chriticiúil agus an breisluach Aontais acu chun feabhas a chur ar an inbhuanaitheacht, an iomaíochas, an tsláinte, an tsábháilteacht agus dálaí oibre sna hearnálacha atá gaolmhar leis an tionscal guail agus cruach, agus an tionchar atá ag na hearnálacha sin ar an gcomhshaol a laghdú.

(6)

Sa Teachtaireacht ón gCoimisiún chuig Parlaimint na hEorpa, chuig an gComhairle Eorpach, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún maidir leis an gComhaontú Glas don Eoraip, thug an Coimisiún gealltanas tacú le teicneolaíochtaí ceannródaíocha don chruach glan lena mbainfear próiseas déanta cruach atá beagnach saor ó charbón amach faoi 2030. Chun an méid sin a chumasú, thug an Coimisiún gealltanas féachaint an bhféadfaí cuid den chistiú faoin CEGC faoi leachtú a úsáid.

(7)

Sa Teachtaireacht ón gCoimisiún chuig Parlaimint na hEorpa, chuig an gComhairle Eorpach, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún maidir leis an bplean dar teideal European Green Deal Investment Plan [Plean Infheistíochta an Chomhaontaithe Ghlais don Eoraip], bhí an Coimisiúin den tuairim, chun spriocanna an Aontais a bhaint amach, gur gá athbhreithniú a dhéanamh ar bhunúis dlí RCFS chun go mbeifear in ann sócmhainní CEGC faoi leachtú a úsáid agus, ar an leachtú a bheith críochnaithe, sócmhainní RFCS a úsáid.

(8)

Ba cheart go gceadófaí sciar de shócmhainní CEGC faoi leachtú a dhíol agus, ar an leachtú a bheith críochnaithe, sócmhainní RFCS a dhíol chun tionscadail taighde sna hearnálacha guail agus cruach a mhaoiniú, ar choinníoll go gcoinneofar cúlchistí chun na hoibleagáidí teoranta atá fágtha a ráthú, atá mar thoradh ar aon dócmhainn nárbh fhéidir a thuar, agus ar choinníoll go ndéanfar cuid réasúnach de na sócmhainní nach bhfuil gá léi a thuilleadh chun na hoibleagáidí sin a ráthú a infheistiú chun ioncaim a ghiniúint.

(9)

D’fhéadfadh go mbeadh gá sciar de shócmhainní CEGC faoi leachtú a dhíol agus, ar an leachtú a bheith críochnaithe, sócmhainní RFCS a dhíol chun leithdháileadh bliantúil EUR 111 mhilliún a sholáthar do RFCS go dtí 2027. Bainfear úsáid as an leithdháileadh sin mar a leanas: le EUR 40 milliún in aghaidh na bliana maoineofar taighde comhoibríoch in earnálacha an ghuail agus na cruach agus leis an EUR 71 mhilliún atá fágtha maoineofar teicneolaíochtaí ceannródaíocha lena mbainfear amach próiseas déanta cruach atá beagnach saor ó charbón agus tionscadail taighde maidir le haistriú cóir mianach guail a bhíodh ag feidhmiú roimhe seo nó mianaigh ghuail atá á ndúnadh, agus bonneagar gaolmhar i gcomhréir leis an Sásra um Aistriú Cóir agus i gcomhlíonadh Airteagal 4(2) de Chinneadh 2003/76/CE. Tá an fhéidearthacht sciar de shócmhainní CEGC faoi leachtú a dhíol agus, ar an leachtú a bheith críochnaithe, sócmhainní RFCS a dhíol teoranta do leithdháiltí bliantúla do na blianta airgeadais 2021–2027 a mhaoiniú.

(10)

Ba cheart, mar sin, gan RFCS a mhaoiniú leis an nglanioncam ó na hinfheistíochtaí amháin ach, i gcás inar gá, leis an ioncam arna ghiniúint trí chuid de shócmhainní RFCS a dhíol freisin, go feadh an mhéid a bheartaítear don tréimhse 2021–2027.

(11)

Ba cheart na forálacha lena leagtar síos an nós imeachta maidir le glacadh na dtreoirlínte airgeadais ilbhliantúla le haghaidh na sócmhainní a bhainistiú agus iad sin lena leagtar síos an nós imeachta maidir le treoirlínte teicniúla ilbhliantúla le haghaidh an chláir a scriosadh, mar go cumhdaítear iad le hAirteagal 2(2) de Phrótacal (Uimh. 37) agus go bhfuil siad iomarcach dá bhrí sin.

(12)

Ba cheart deireadh a chur leis an sásra smúdála dá dtagraítear in Airteagal 5(2) de Chinneadh 2003/76/CE toisc gur uirlis é atá imithe i léig.

(13)

Ba cheart mír nua a chur isteach in Airteagal 1 de Chinneadh 2003/76/CE chun go bhféadfar éilimh a dhíscríobh bunaithe ar na prionsabail a bunaíodh le hAirteagal 101(2), an chéad fhomhír, de Rialachán (AE, Euratom) 2018/1046 ó Pharlaimint na hEorpa agus ón gComhairle (3) (“an Rialachán Airgeadais”).

(14)

Ba cheart, dá bhrí sin, Cinneadh 2003/76/CE a leasú dá réir sin,