(1)

I gcomhréir le hAirteagal 7(1) de Rialachán (CE) Uimh. 1107/2009, chuir CEV SA iarratas faoi bhráid na hÍsiltíre an 7 Meitheamh 2016 ar fhormheas na substainte gníomhaí, eadhon eastóscán uiscí ó shíolta péactha an lúipín bháin mhilis.

(2)

I gcomhréir le hAirteagal 9(3) de Rialachán (CE) Uimh. 1107/2009, an 18 Eanáir 2017 thug an Ísiltír, an Ballstát rapporteur, fógra don iarratasóir, do na Ballstáit eile, don Choimisiún agus don Údarás Eorpach um Shábháilteacht Bia (“an tÚdarás”) faoi inghlacthacht an iarratais.

(3)

An 1 Aibreán 2019, chuir an Ballstát rapporteur dréacht-tuarascáil mheasúnaithe faoi bhráid an Choimisiúin agus cóip faoi bhráid an Údaráis, féachaint an dóigh nó a mhalairt go gcomhlíonfaidh an tsubstaint ghníomhach sin na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(4)

Rinne an tÚdarás Airteagal 12(1) de Rialachán (CE) Uimh. 1107/2009 a chomhlíonadh. I gcomhréir le hAirteagal 12(3) den Rialachán sin, d’iarr sé ar an iarratasóir faisnéis bhreise a thabhairt do na Ballstáit, don Choimisiún agus don Údarás. An measúnú ar an bhfaisnéis bhreise a rinne an Ballstát rapporteur, cuireadh faoi bhráid an Údaráis é an 3 Márta 2020 i bhformáid dréacht-tuarascála measúnaithe a bhí cothrom le dáta.

(5)

An 19 Meitheamh 2020, chuir an tÚdarás a chonclúid (2) in iúl don iarratasóir, do na Ballstáit agus don Choimisiún, maidir le cé acu ba dhóigh nó a mhalairt go gcomhlíonfaidh an tsubstaint ghníomhach, eadhon eastóscán uiscí ó shíolta péactha an lúipín bháin mhilis, na critéir formheasa dá bhforáiltear in Airteagal 4 de Rialachán (CE) Uimh. 1107/2009. Chuir an tÚdarás a chonclúid ar fáil don phobal.

(6)

An 23 Deireadh Fómhair 2020, thíolaic an Coimisiún tuarascáil athbhreithniúcháin agus dréacht-rialachán don Bhuanchoiste um Plandaí, Ainmhithe, Bia agus Beatha maidir le heastóscán uiscí ó shíolta péactha an lúipín bháin mhilis.

(7)

Tugadh deis don iarratasóir a bharúil a chur in iúl maidir leis an tuarascáil athbhreithniúcháin.

(8)

Maidir le haon úsáid ionadaíoch amháin nó níos mó a bhaintear as, ar a laghad, táirge cosanta plandaí amháin ina bhfuil an tsubstaint ghníomhach, agus go háirithe na húsáidí a scrúdaíodh agus a sonraíodh sa tuarascáil athbhreithniúcháin, is éard a suíodh gurbh amhlaidh a comhlíonadh na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(9)

Measann an Coimisiún thairis sin gur substaint a bhfuil riosca íseal ag baint léi é an t-eastóscán uiscí ó shíolta péactha an lúipín bháin mhilis de bhun Airteagal 22 de Rialachán (CE) Uimh 1107/2009. Ní substaint atá ina hábhar imní é an t-eastóscán uiscí ó shíolta péactha an lúipín bháin mhilis agus comhlíonann sé na coinníollacha a leagtar amach i bpointe 5.1 d’Iarscríbhinn II a ghabhann le Rialachán (CE) Uimh. 1107/2009.

(10)

Dá bhrí sin, is iomchuí eastóscán uiscí ó shíolta péactha an lúipín bháin mhilis a fhormheas.

(11)

I gcomhréir le hAirteagal 13(2) de Rialachán (CE) Uimh. 1107/2009 i gcomhar le hAirteagal 6 de agus i bhfianaise an eolais eolaíoch reatha agus an eolais theicniúil reatha, is gá coinníollacha agus srianta áirithe a chur san áireamh. Is iomchuí go háirithe faisnéis bhreise deimhniúcháin a éileamh.

(12)

I gcomhréir le hAirteagal 13(4) de Rialachán (CE) Uimh. 1107/2009, ba cheart an Iarscríbhinn a ghabhann le Rialachán Cur Chun Feidhme (AE) Uimh. 540/2011 ón gCoimisiún (3) a leasú dá réir.

(13)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,