Buanchomhar struchtúrtha

Faoi Chonradh Liospóin tugtar deis do Bhallstáit áirithe an Aontais Eorpaigh (AE) a gcuid comhair i gcúrsaí míleata a neartú trí bhuanchomhar struchtúrtha a chruthú (Airteagail 42(6) agus 46 den Chonradh ar an Aontas Eorpach (CAE). Chun é seo a dhéanamh, ní mór do thíortha leasmhara dhá phríomhchoinníoll a chomhlíonadh a ndéantar foráil dóibh i bPrótacal Uimh. 10 a ghabhann leis an gconradh:

• iarrachtaí níos tréine a dhéanamh chun a gcumais chosanta a fhorbairt trína rannpháirtíochtaí náisiúnta a fhorbairt agus trí bheith rannpháirteach i bhfórsaí ilnáisiúnta, sna príomhchláir Eorpacha trealaimh agus i ngníomhaíocht na Gníomhaireachta Eorpaí um Chosaint a bhaineann le cumais chosanta a fhorbairt, le taighde, le soláthar agus le harmálacha
• an cumas a bheith acu faoi 2010 ar a dhéanaí spriocaonaid chomhraic agus an lóistíocht tacaíochta a chur ar fáil, a bheidh in ann na cúraimí dá dtagraítear in Airteagal 43 CAE a chur i gcrích laistigh de thréimhse 5 go 30 lá agus, ag brath ar riachtanais, ar feadh tréimhse 30 go 120 lá.

Déanann an Ghníomhaireacht Eorpach um Chosaint measúnú go rialta ar rannpháirtíochtaí na dtíortha rannpháirteacha.

Na Ballstáit AE ar mian leo buanchomhar struchtúrtha a bhunú, ní mór dóibh é sin a chur in iúl don Chomhairle agus d’Ardionadaí AE do Ghnóthaí Eachtracha agus don Bheartas Slándála. Tar éis don fhógra seo a fháil, ní mór don Chomhairle glacadh le cinneadh trí thromlach cáilithe lena mbunaítear buanchomhar struchtúrtha agus liosta na dtíortha rannpháirteacha. Déanann an Chomhairle cinneadh, trí thromlach cáilithe na dtíortha atá rannpháirteach sa bhuanchomhar struchtúrtha, maidir le ballraíocht tíortha nua nó le tíortha áirithe a chur ar fionraí. Ní ghlactar le cinntí agus le moltaí laistigh de chreat an bhuanchomhair struchtúrtha ach amháin le haontoilíocht ó bhaill rannpháirteacha na Comhairle.