Nós Imeachta do Mhíchothromaíocht Mhaicreacnamaíoch (MIP)

Is éard is aidhm atá leis an Nós Imeachta do Mhíchothromaíocht Mhaicreacnamaíoch (MIP) ná treochtaí a aimsiú agus aghaidh a thabhairt orthu, treochtaí a mbíonn tionchar diúltach acu ar fheidhmiú an gheilleagair de thír an Aontais Eorpaigh (AE), de limistéar an euro nó den Aontas Eorpach ina iomlán. Is príomheilimint é de chreat athchóirithe rialachais eacnamaíoch AE a cuireadh ar bun i ndiaidh na géarchéime airgeadais in 2008.

Ceapadh é chun:

• rioscaí féideartha a aithint go luath (sásra foláirimh);
• teacht chun cinn míchothromaíochtaí dochracha maicreacnamaíocha a chosc; agus
• na míchothromaíochtaí atá ann cheana féin a cheartú.

Sa sásra foláirimh baintear úsáid as 14 tháscaire (e.g. treochtaí i scaireanna margaidh onnmhairithe, glaninfheistíocht idirnáisiúnta, costais saothair agus fiachas earnála príobháidí agus poiblí) chun rioscaí féideartha a aithint.

D’fhéadfadh an Coimisiún Eorpach a mholadh don Chomhairle moltaí a eisiúint do na tíortha a aithníodh go bhfuil míchothromaíochtaí acu. D’fheadfaí próiseas feabhsaithe monatóireachta sainiúla a chur i bhfeidhm maidir leis na tíortha a bhfuil míchothromaíochtaí iomarcacha acu nó d’fhéadfadh na tíortha sin dul isteach sa Nós Imeachta um Míchothromaíochtaí Iomarcacha (EIP). An toradh a d’fhéadfadh a bheith ar EIP faoi dheireadh ná smachtbhannaí le haghaidh tíortha de limistéar an euro (má theipeann ar na tíortha sin a n-oibleagáidí a chomhlíonadh arís agus arís eile).