Féachtar leis le nós imeachta gasta, slán agus caighdeánaithe maidir le doiciméid bhreithiúnacha* agus doiciméid sheachbhreithiúnacha* in ábhair shibhialta nó in ábhair tráchtála a chur i bhfeidhm i dtíortha éagsúla de chuid an Aontais Eorpaigh (AE).

Aisghairtear Rialachán (CE) Uimh. 1393/2007 le Rialachán (AE) 2020/1784 (féach an achoimre) ón 1 Iúil 2022 i leith.

PRÍOMHPHOINTÍ

Raon feidhme

Baineann an rialachán seo le cúrsaí sibhialta nó tráchtála sa chás ina bhfuil gá le doiciméid bhreithiúnacha nó doiciméid sheachbhreithiúnacha a tharchur ó thír AE amháin go tír AE eile.
Níl feidhm aige maidir le:
- ioncam,
- custaim,
- gnóthaí riaracháin nó
- cásanna i dtaca le dliteanas stáit as gníomhartha nó neamhghníomhartha i bhfeidhmiú údarás an stáit.
Níl feidhm leis an rialachán sa chás nach bhfuil seoladh an duine atá le seirbheáil ar eolas.

Tuilleadh feabhais a chur ar sheirbheáil (tarchur) doiciméad breithiúnach agus doiciméad seachbhreithiúnach

Tugtar isteach sa rialachán:

riail lena n–ordaítear nach mór don ghníomhaireacht fála gach beart riachtanach a dhéanamh chun an doiciméad a tharchur a luaithe agus is féidir agus, ar chaoi ar bith, laistigh de 1 mhí ón uair a fhaightear é;
foirm chaighdeánach chun an seolaí a chur ar an eolas faoina gceart diúltú don doiciméad atá le seirbheáil — ag an am a sheirbheáiltear é — nó tríd an doiciméad a chur ar ais chuig an ngníomhaireacht fála laistigh de sheachtain;
riail lena n–ordaítear nach mór do na costais, a tharlaíonn mar thoradh ar dhul i muinín oifigigh bhreithiúnaigh nó duine atá inniúil faoi dhlí na tíre AE a ndírítear uirthi, a bheith ag teacht le táille shocraithe aonair atá leagtha amach ag an tír sin roimh ré, a urramaíonn prionsabail na comhréireachta agus an neamh–idirdhealaithe;
coinníollacha comhchoiteanna do sheirbheáil ag seirbhísí poist (litir chláraithe le hadmháil fála nó a coibhéis).

Áirithíonn gníomhaireachtaí laistigh de thíortha AE an tarchur

Ainmníonn tíortha AE na gníomhaireachtaí atá freagrach as doiciméid a tharchur agus a ghlacadh. Ní mór dóibh a n–ainmneacha agus seoltaí, na limistéir gheografacha lena mbaineann siad, agus na teangacha a nglacann siad leo agus na bealaí chun doiciméid a ghlacadh a sholáthar don Choimisiún Eorpach.
Tá comhlacht lárnach ag gach tír AE chomh maith atá freagrach as faisnéis a sholáthar do na gníomhaireachtaí, aon deacrachtaí a thagann chun cinn a réiteach agus iarratais ar sheirbheáil ón ngníomhaireacht tarchuir a chur ar aghaidh chuig an ngníomhaireacht fála ábhartha i gcúinsí eisceachtúla.
Féadfaidh stát cónaidhme, stát ina bhfuil feidhm ag dlíchórais éagsúla nó stát a bhfuil aonaid chríche féinrialaithe ann breis agus gníomhaireacht amháin nó comhlacht lárnach amháin den sórt sin a ainmniú. Beidh éifeacht leis an ainmniú sin ar feadh tréimhse 5 bliana agus féadfar é a athnuachan gach 5 bliana.

Luas a chur le seirbheáil doiciméad breithiúnach agus doiciméad seachbhreithiúnach

Cuireann an t–iarratasóir doiciméid ar aghaidh chuig an ngníomhaireacht tarchuir agus íocann sé nó sí as aon chostas aistriúcháin sula dtarchuirtear an doiciméad. Ní mór don ghníomhaireacht tarchuir a chur in iúl don iarratasóir, i gcás nach bhfuil an doiciméad i dteanga a thuigeann an seoltaí nó i dteanga oifigiúil na tíre de chuid AE ina ndéanfar an tseirbheáil, gur féidir leis na seoltaithe diúltú don doiciméad.
Ní mór doiciméid a tharchur go díreach agus a luaithe agus is féidir idir na gníomhaireachtaí trí aon bhealach tarchuir iomchuí, fad is go bhfuil siad inléite agus dílis don leagan bunaidh. Ní mór iarratas a bhaineann úsáid as an bhfoirm chaighdeánach mar atá i gceangal leis an rialachán a ghreamú i gceann de na teangacha glactha a thugann tíortha AE le fios. Tá na doiciméid díolmhaithe ó reachtaíocht nó ó aon fhoirmiúlacht choibhéiseach. Ní mór don ghníomhaireacht fála admháil a sheoladh laistigh de 7 lá. Ní mór don ghníomhaireacht fála teagmháil a dhéanamh leis an ngníomhaireacht tarchuir a luaithe agus is féidir i gcás faisnéise atá ar iarraidh.

Doiciméid a sheirbheáil de réir dhlí thír ghlactha AE fála laistigh de 1 mhí

Ba chóir don ghníomhaireacht fála an doiciméad a sheirbheáil í féin, nó a áirithiú go seirbheálfar é, laistigh de 1 mhí. Mura bhfuil sé seo indéanta, ní mór don ghníomhaireacht fála an ghníomhaireacht tarchuir a chur ar an eolas agus leanúint le hiarracht a dhéanamh an doiciméad a sheirbheáil. Déantar seirbheáil de réir dhlí thír fhála AE, nó trí mhodh ar leith, má lorgaíonn an ghníomhaireacht tarchuir é seo agus má chloíonn sé leis an dlí náisiúnta. Nuair a dhéanfar an tseirbheáil, ní mór deimhniú um chur i gcrích maidir leis na foirmiúlachtaí atá i gceist a chomhlánú i dteanga a ghlacann tír thionscnaimh AE agus a chur chuig an ngníomhaireacht tarchuir.
Is é an dáta seirbheála a bheidh ann an dáta a sheirbheáiltear an doiciméad i gcomhréir le dlí thír AE a ndírítear uirthi, ach amháin sa chás nach mór é a sheirbheáil laistigh de thréimhse áirithe i gcomhréir le dlí na tíre sin. Ní fhéadfaidh an tseirbhís costais nó cánacha a thabhú sa tír AE a ndírítear uirthi, ach amháin más rud é go raibh modh seirbhíse ar leith ann nó go ndeachthas i muinín oifigeach breithiúnach ansin. Sa chás sin, is faoin iarratasóir atá sé na costais a íoc. Nó mór do thíortha AE táille aonair a shocrú roimh ré, agus í a chur in iúl don Choimisiún.
Féadfar doiciméid a sheirbheáil go díreach freisin trí úsáid a bhaint as post cláraithe le hadmháil nó trí na hoifigigh bhreithiúnacha, trí oifigigh nó trí dhaoine inniúla eile ón tír AE a ndírítear uirthi, má cheadaíonn an tír atá i gceist é. I gcúinsí eisceachtúla, féadfar doiciméid a sheoladh ar aghaidh chuig gníomhaireachtaí thír AE eile trí bhealaí taidhleoireachta nó consalacha.

An seoltaí a chur ar an eolas faoin gceart an doiciméad atá le seirbheáil a dhiúltú

Cuireann an ghníomhaireacht fála an seolaí ar an eolas go bhféadfadh sé nó sí diúltú an doiciméad a ghlacadh mura bhfuil sé scríofa i dteanga a thuigeann sé nó sí nó i dteanga oifigiúil na tíre AE ina dtarlaíonn an tseirbhís. Ní mór don diúltú tarlú tráth na seirbhíse nó tríd an doiciméad a sheoladh ar ais chuig an ngníomhaireacht fála laistigh de sheachtain.
Más eascaire toghairme é an doiciméad (ordú oifigiúil do dhuine éigin teacht os comhair cúirte dlí) nó doiciméad coibhéiseach agus nach bhfuil an cosantóir i láthair, ní fhéadfar breithiúnas a fhógairt go dtí go mbeidh sé cinnte go ndearnadh an doiciméad a sheirbheáil i gcomhréir le dlí baile thír AE, go ndearnadh an doiciméad a sheachadadh agus go raibh dóthain ama ag an gcosantóir chun cosaint a chur isteach. Mar sin féin, féadfar breithiúnas a thabhairt más rud é go ndearnadh an doiciméad a tharchur trí cheann de na modhanna a leagtar síos sa rialachán, agus más rud é go bhfuil breis agus 6 mhí caite agus nach bhfuil deimhniú d’aon sórt faighte, in ainneoin go bhfuil gach iarracht réasúnta déanta ag údaráis inniúla na tíre AE a ndírítear uirthi. Más rud é nach raibh an cosantóir ar an eolas faoin doiciméad in am trátha chun teacht i láthair, is féidir fós iarratas a dhéanamh ar fhaoiseamh laistigh d’am réasúnta tar éis don chosantóir a bheith ar an eolas faoin mbreithiúnas.
Ba chóir don Choimisiún lámhleabhar a sholáthar agus a nuashonrú go rialta, ina mbeidh an fhaisnéis arna soláthar ag tíortha AE. Faoi 2011, agus gach 5 bliana ina dhiaidh sin, ní mór dó tuarascáil a sholáthar maidir le cur i bhfeidhm an rialacháin, agus aird speisialta á cur ar éifeachtúlacht na ngníomhaireachtaí.

Aisghairm

Aisghairfear Rialachán (AE) 1393/2007 le Rialachán (CE) Uimh. 2020/1784 agus cuirfear an Rialachán sin ina ionad ón 1 Iúil 2022 i leith.

CÉN UAIR ATÁ TOSACH FEIDHME AN RIALACHÁIN?

Tá feidhm leis ón 13 Samhain 2008, ach amháin Airteagal 23 (i dtaca le faisnéis áirithe á cur in iúl agus á foilsiú ag tíortha AE) a bhfuil feidhm leis ón 13 Lúnasa 2008.

CÚLRA

Le haghaidh tuilleadh faisnéise, féach:

Seirbheáil doiciméad (An Coimisiún Eorpach).
Translation Missing (European e-Justice Portal)

PRÍOMHTHÉARMAÍ

Doiciméad breithiúnach: doiciméad dlí a eisítear le linn cás dlí shibhialta nó thráchtála (mar shampla toghairm, eascaire nó breithiúnas) nach mór a sheirbheáil ar pháirtí.

Doiciméad sheachbhreithiúnach: doiciméad dlí a sheirbheáiltear ach atá lasmuigh den cháschomhad (mar shampla, sonrasc nó fógra díshealbhaithe).

PRÍOMHDHOICIMÉAD

Rialachán (CE) Uimh. 1393/2007 ó Pharlaimint na hEorpa agus ón gComhairle an 13 Samhain 2007 maidir le doiciméid bhreithiúnacha agus doiciméid sheachbhreithiúnacha in ábhair shibhialta nó in ábhair thráchtála a sheirbheáil sna Ballstáit (doiciméid a sheirbheáil), agus lena n–aisghairtear Rialachán (CE) Uimh. 1348/2000 ón gComhairle (IO L 324, 10.12.2007, lgh. 79-120)

Rinneadh leasuithe comhleanúnacha ar Rialachán (CE) Uimh. 1393/2007 ón gComhairle a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

Nuashonraithe 11.12.2020

Začiatok