Féachtar le Rialachán (AE) 2024/900 le cur le feidhmiú cuí mhargadh inmheánach na fógraíochta polaitiúla agus tacú le díospóireacht pholaitiúil chóir oscailte. Tugtar aghaidh leis an rialachán ar na hábhair imní a bhaineann le hionramháil ar fhaisnéis agus cur isteach eachtrach i dtoghcháin, mar aon le próiseáil sonraí pearsanta chun críocha fógraíochta polaitiúla.

PRÍOMHPHOINTÍ

Cuspóirí

Tá an rialachán deartha lena áirithiú go mbeidh saoránaigh an Aontais Eorpaigh (AE) breá ábalta roghanna eolasacha a dhéanamh i dtoghcháin tríd an méid seo a leanas:
- é a dhéanamh níos éasca dóibh fógraí polaitiúla a aithint;
- cuidiú leo tuiscint a fháil ar cé atá taobh thiar dóibh;
- a chur ar a gcumas fios a bheith acu an bhfuair siad fógra spriocdhírithe.
Áiritheofar leis chomh maith go dtabharfar meas leis an bhfógraíocht pholaitiúil ar an gceart chun sonraí pearsanta a chosaint agus go gcosnófar léi saoirse tuairimíochta agus saoirse cainte, mar a fhoráiltear faoi Chairt um Chearta Bunúsacha an Aontais.

Tógann an rialachán ar dhlí reatha an Aontais, go háirithe Rialachán (AE) 2016/679 (an rialachán ginearálta maidir le cosaint sonraí) (féach an achoimre) agus Rialachán (AE) 2022/2065 (an Gníomh um Sheirbhísí Digiteacha) (féach an achoimre).

Raon feidhme

Cumhdaítear leis na rialacha trédhearcacht agus spriocdhíriú na fógraíochta polaitiúla a dhéanann gníomhaí polaitiúil, a dhéantar do ghníomhaí polaitiúil nó a dhéantar thar ceann gníomhaí polaitiúil. Cumhdaítear leo chomh maith fógraíocht ar bith den sórt sin atá faoi dhliteanas agus a ceapadh chun tionchar a imirt ar thoradh toghcháin nó reifrinn, ar iompraíocht vótála nó ar phróiseas reachtach nó rialála. Tá na rialacha sin infheidhme ar leibhéal an Aontais agus ar an leibhéal náisiúnta, an leibhéal réigiúnach agus an leibhéal áitiúil.
Ní théann na hoibleagáidí sin i gcion ar ábhar na bhfógraí polaitiúla ná ar ghnéithe eile den fhógraíocht pholaitiúil, amhail stiúradh feachtas polaitiúil, atá á rialú le rialacha náisiúnta.
Ní chumhdaítear ábhar faoi fhreagracht eagarthóireachta agus tuairimí a chuirtear i iúl i gcáil phearsanta.

Príomhghnéithe

Ní mór fógraíocht pholaitiúil a lipéadú go soiléir mar sin agus faisnéis a chur inti faoi cé a d’íoc aisti, faoin toghchán, reifreann, próiseas reachtach nó rialála a bhaineann sí leis agus faoi ar úsáideadh teicnící seachadta nó athchóirithe.
I bhfaisnéis bhreise lena soláthraítear comhthéacs níos leithne don fhógraíocht pholaitiúil, amhail faisnéis faoi na méideanna comhiomlánaithe nó a dtionscnamh, soláthraítear fógra trédhearcachta nach mór é a chur san áireamh i ngach fógra polaitiúil nó gur féidir é a aisghabháil go furasta uaidh.
Ní cheadaítear spriocdhíriú nó seachadadh fógrán fógraíochta polaitiúla ar líne ach faoi choinníollacha dochta amháin:
- ní mór na sonraí a bhailiú ón ábhar sonraí;
- ní féidir na sonraí a úsáid ach amháin má tá cead sainráite ar leithligh tugtha ag an ábhar sonraí lena n–úsáid chun críocha fógraíochta polaitiúla;
- ní féidir sonraí pearsanta mionaoiseach a úsáid;
- ní féidir catagóirí speisialta sonraí pearsanta, amhail sonraí lena nochtar bunús ciníoch nó eitneach nó tuairimí polaitiúla, a úsáid le haghaidh próifíliú;
- tá cosc ar shonraí pearsanta a úsáid a bhaineann le hábhar sonraí atá 1 bhliain ar a laghad faoin aois vótála arna mbunú le rialacha náisiúnta.
Beidh gach fógra ar líne ar fáil i stór Eorpach ar líne.
Cuirtear cosc ar fhógraíocht pholaitiúil a thagann ó urraitheoirí lasmuigh den Aontas Eorpach sna 3 mhí roimh toghchán nó reifreann.

CÉN UAIR ATÁ TOSACH FEIDHME AN RIALACHÁIN?

Le heisceachtaí áirithe, beidh feidhm ag an rialachán ón 10 Deireadh Fómhair 2025.

CÚLRA

Le haghaidh tuilleadh faisnéise, féach:

Daonlathas agus cearta toghcháin (An Coimisiún Eorpach).

PRÍOMHDHOICIMÉAD

Rialachán (AE) Uimh. 2024/900 ó Pharlaimint na hEorpa agus ón gComhairle an 13 Márta 2024 maidir le trédhearcacht agus spriocdhíriú na fógraíochta polaitiúla (IO L, 2024/900, 20.3.2024).

DOICIMÉID GHAOLMHARA

Breithiúnas na Cúirte (an Mór–Dhlísheomra) an 4 Iúil 2023. Meta Platforms Inc and Others v Bundeskartellamt. Iarratas ar réamhrialú ó Oberlandesgericht Düsseldorf. Tarchur chun réamhrialú – Daoine nádúrtha a chosaint i ndáil le sonraí pearsanta a phróiseáil – Rialachán (AE) Uimh. 2016/679 – Líonraí sóisialta ar líne – Mí–úsáid ceannasachta de pháirt oibreoir líonra den sórt sin – Mí–úsáid leanúnach i bpróiseáil sonraí pearsanta de chuid úsáideoirí an líonra sin dá bhforáiltear ina choinníollacha ginearálta úsáide – Inniúlachtaí údaráis iomaíochta de chuid Ballstáit chun a dhearbhú go bhfuil an phróiseáil sin ar neamhréir leis an Rialachán – Ceangal le hinniúlachtaí na n–údarás maoirseachta um chosaint sonraí – Airteagal 4(3) CAE – Prionsabal an chomhair dhílis – Pointí (a) go (f) den chéad fhomhír d’Airteagal 6(1) de Rialachán 2016/679 – Dleathacht na próiseála – Airteagal 9(1) agus (2) – Catagóirí speisialta sonraí pearsanta a phróiseáil – Airteagal 4, pointe 11 – Coincheap an “toilithe”. Cás C-252/21.

Rialachán (AE) 2022/2065 ó Pharlaimint na hEorpa agus ón gComhairle an 19 Deireadh Fómhair 2022 maidir le Margadh Aonair do Sheirbhísí Digiteacha agus lena leasaítear Treoir 2000/31/CE (an Gníomh um Sheirbhísí Digiteacha) (IO L 277, 27.10.2022, lgh. 1–102).

An Cód Cleachtais maidir le bréagaisnéis.

Rialachán (AE) Uimh. 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin agus lena n–aisghairtear Rialachán (CE) Uimh. 45/2001 agus Cinneadh Uimh. 1247/2002/CE (IO L 295, 21.11.2018, lgh. 39–98).

Rialachán (AE) 2016/679 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil agus maidir le saorghluaiseacht sonraí den sórt sin, agus lena n–aisghairtear Treoir 95/46/CE (an Rialachán Ginearálta maidir le Cosaint Sonraí) (IO L 119, 4.5.2016, lgh. 1–88).

Rinneadh leasuithe comhleanúnacha ar Rialachán (AE) 2016/679 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

Leagan comhdhlúite den Chonradh ar an Aontas Eorpach – Teideal I – Forálacha comhchoiteanna – Airteagal 2 (IO C 202, 7.6.2016, lch. 17).

Leagan comhdhlúite den Chonradh ar an Aontas Eorpach – Teideal II – Forálacha maidir leis na prionsabail dhaonlathacha – Airteagal 10 (IO C 202, 7.6.2016, lch. 20).

Leagan comhdhlúite den Chonradh ar Fheidhmiú an Aontais Eorpaigh – Cuid a hAon – Prionsabail – Teideal II – Forálacha a bhfuil feidhm ghinearálta acu – Airteagal 16 (sean–Airteagal 286 CCE) (IO C 202, 7.6.2016, lch. 55).

Leagan comhdhlúite den Chonradh ar Fheidhmiú an Aontais Eorpaigh – Cuid a Trí – Beartais agus gníomhaíochtaí inmheánacha an Aontais – Teideal VII – Rialacha comhchoiteanna maidir le hiomaíocht, cánachas agus comhfhogasú dlíthe – Caibidil 3 – comhfhogasú dhlíthe – Airteagal 114 (sean–Airteagal 95 CCE) (OJ C 202, 7.6.2016, lgh. 94–95).

Cairt um Chearta Bunúsacha an Aontais Eorpaigh (IO C 202, 7.6.2016, lgh. 389–405).

nuashonrú is déanaí 18.11.2024

Top