This document is an excerpt from the EUR-Lex website
Eurojust
Eurojust
Eurojust
- Date of last review:
- 15/02/2024
- Author:
- Oifig Foilseachán an Aontais Eorpaigh
- Responsible entity(ies):
- Comhairle an Aontais Eorpaigh
- Summarised document(s):
- Summary code:
-
-
01.05.04.01 Gníomhaireachtaí díláraithe
-
23.03.00.00 Comhar breithiúnach in ábhair choiriúla
- 23.07.07.00 Institiúidí agus gníomhaireachtaí
-
01.05.04.01 Gníomhaireachtaí díláraithe
- EUROVOC descriptor:
- Directory code:
Eurojust
ACHOIMRE AR:
CAD IS AIDHM LEIS AN RIALACHÁN?
- Tá sé mar aidhm leis dul i ngleic le coireacht thromchúiseach thrasteorann ar bhealach níos éifeachtaí trí athrú a dhéanamh ar struchtúr Ghníomhaireacht an Aontais Eorpaigh um Chomhar Ceartais Choiriúil (Eurojust) agus trína chur ar chumas Choláiste Eurojust díriú níos mó ar chúrsaí oibriúcháin.
- Cuirtear san áireamh ann bunú Oifig an Ionchúisitheora Phoiblí Eorpaigh (OIPE) agus rialacha úra le haghaidh cosaint sonraí san in institiúidí agus i ngníomhaireachtaí an Aontais Eorpaigh (AE).
- Déantar socruithe a chinneadh leis maidir le páirt a thabhairt do Pharlaimint na hEorpa agus do na parlaimintí náisiúnta i measúnú a dhéanamh ar ghníomhaíochtaí Eurojust.
- Le Rialachán leasaitheach (AE) 2023/2131 tugtar isteach rialacha nua chun an comhar breithiúnach idir údaráis náisiúnta Bhallstáit an Aontais Eorpaigh (AE) agus Eurojust a nuachóiriú trí bhíthin córas digiteach chun faisnéis a mhalartú maidir le cionta sceimhlitheoireachta a imscrúdú agus a ionchúiseamh.
PRÍOMHPHOINTÍ
Ról Eurojust
- Bunaithe ar oibríochtaí arna ndéanamh agus ar fhaisnéis arna soláthar ag údaráis na mBallstát agus ag Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol), OIPE agus an Oifig Eorpach Frith-Chalaoise (OLAF), tacaíonn Eurojust leis an gcomhordú agus an leis an gcomhar idir údaráis náisiúnta imscrúduithe agus ionchúisimh agus neartaíonn sé an comhordú agus comhar sin i ndáil le coireacht thromchúiseach a thagann faoina dhlínse (féach thíos), sna cásanna seo a leanas nuair is coir í:
- a théann i gcion ar Bhallstát amháin nó níos mó;
- a théann i gcion ar Bhallstát amháin agus ar thír nach tír den Aontas Eorpach í nó ar Bhallstát amháin agus ar eagraíocht idirnáisiúnta, ar an gcoinníoll go bhfuil comhaontú comhair nó socrú comhair tugtha i gcrích leis an tír nó leis an eagraíocht sin, nó i gcás ar leith go bhfuil leas riachtanach ann maidir le cúnamh den sórt sin a sholáthar (dá bhforáiltear in rialachán leasaitheach (AE) 2023/2131); nó
- lena dteastaíonn ionchúiseamh ina leith ar bhoinn chomhchoiteanna.
- Déanann Eurojust a shainchúraimí ar iarratas ó údaráis inniúla na mBallstát, ar a thionscnamh féin nó ar iarratas ón OIPE laistigh de theorainneacha inniúlacht OIPE.
Áirítear an méid a leanas ar shainchúraimí oibriúcháin Eurojust:
- comhoibriú go dlúth le OIPE ar cheisteanna dlínse;
- comhoibriú leis an nGréasán Breithiúnach Eorpach i gcúrsaí coiriúla agus dul i gcomhairle leis maidir leo;
- comhoibriú le hinstitiúidí, comhlachtaí, oifigí agus gníomhaireachtaí AE agus le gréasáin atá bunaithe sa limistéar saoirse, slándála agus ceartais;
- tacú le gníomhaíocht na mBallstát maidir le cineálacha coireachta tromchúisí a bhfuil údarás dlíthiúil aige ina leith a chosc (e.g. sceimhlitheoireacht, gníomhaíochtaí sciúrtha airgid, gáinneáil ar dhaoine; gáinneáil ar orgáin, drugaí agus airm thine);
- tacaíocht oibriúcháin, theicniúil agus airgeadais a sholáthar d’oibríochtaí agus imscrúduithe trasteorann na mBallstát, lena n–áirítear d’fhoirne comhpháirtíochta imscrúdaithe;
- tacú le gníomhaíocht na mBallstát maidir le cinedhíothú, coireanna in aghaidh na daonnachta, coireanna cogaidh agus cionta coiriúla gaolmhara a chomhrac, lena n–áirítear trí fhianaise a bhaineann leis na coireanna sin agus le cionta coiriúla gaolmhara a chaomhnú, a anailísiú agus a stóráil, mar aon le malartú fianaise den sórt sin a éascú, nó seachas sin, í a chur ar fáil go díreach do na húdaráis náisiúnta ábhartha agus d’údaráis bhreithiúnacha idirnáisiúnta, go háirithe an Chúirt Choiriúil Idirnáisiúnta.
Inniúlacht
- Leagtar amach in Iarscríbhinn I de Rialachán (AE) 2018/1727 na cineálacha coireachta tromchúisí atá faoi dhlínse Eurojust i gcomhréir le hAirteagal 3(1) den rialachán.
- Nuair a ghlacann OIPE a shainchúraimí imscrúdaitheacha agus ionchúisimh, ní fheidhmeoidh Eurojust a údarás dlíthiúil maidir le coireanna a bhfeidhmíonn OIPE a údarás ina leith, ach amháin:
- i gcásanna a bhaineann leis na Ballstáit sin nach nglacann páirt i gcomhar feabhsaithe ar bhunú OIPE; agus
- ar iarratas ó na Ballstáit sin nó ar iarratas ón OIPE.
- Feidhmeoidh Eurojust a údarás dlíthiúil maidir le coireanna a bhaineann le leasanna airgeadais AE i gcásanna a bhaineann leis na Ballstáit a ghlacann páirt i gcomhar feabhsaithe ar bhunú OIPE, ach nach bhfuil an t–údarás dlíthiúil ag OIPE ina leith nó i gcás go gcinnfeadh sé nach bhfeidhmeoidh sé é.
- Bunóidh agus coimeádfaidh Eurojust dlúthchaidreamh le OIPE bunaithe ar chomhar frithpháirteach laistigh dá shainorduithe faoi seach.
Struchtúr agus eagrú
- Cuimsítear in Eurojust:
- na baill náisiúnta;
- an coláiste — ina bhfuil na baill náisiúnta ar fad, agus ionadaí amháin de chuid an Choimisiúin Eorpaigh i gcás go mbíonn an Coláiste i mbun a fheidhmeanna bainistíochta amháin, agus ní a fheidhmeanna oibriúcháin;
- an Bord Feidhmiúcháin;
- an stiúrthóir riaracháin.
- Is é 5 bliana téarmaí oifige na mball náisiúnta agus a n–ionadaithe agus is féidir é a athnuachan uair amháin.
- Déantar ionadaíocht ar son an Choimisiúin ar an gcoláiste agus ar an mBord Feidhmiúcháin araon.
- Tá an Bord Feidhmiúcháin freagrach as cinntí riaracháin a dhéanamh chun dea–fheidhmiú Eurojust a áirithiú.
Próiseáil sonraí pearsanta
- Leis na rialacha cuirtear na rialacha úra cosanta le haghaidh institiúidí agus ghníomhaireachtaí AE san áireamh.
- Tá na Ballstáit freagrach as cruinneas na sonraí a aistríonn siad chuig Eurojust, as na sonraí sin a choinneáil cothrom le dáta agus as dlíthiúlacht na sonraí sin a tharchur chuig Eurojust.
- Tá Eurojust freagrach as cruinneas na sonraí a sholáthraíonn soláthraithe sonraí eile nó a bhíonn mar thoradh ar a anailísí nó ar a bhailiú sonraí féin agus as iad sin a choinneáil cothrom le dáta.
- Ba cheart do Eurojust a áirithiú go ndéanfar na sonraí a phróiseáil go cóir agus go dleathach, agus go ndéanfar iad a bhailiú agus a phróiseáil le haghaidh críoch shonrach.
- Ba cheart go mbeadh ceart rochtana ag ábhar sonraí (aon duine sainaitheanta nó inaitheanta) ar shonraí oibriúcháin faoi féin nó fúithi féin a phróiseálann Eurojust.
Saoráid stórála lárnach
- Ós rud é nach féidir fianaise a bhaineann le cinedhíothú, coireanna in aghaidh na daonnachta, coireanna cogaidh agus cionta coiriúla gaolmhara a stóráil go sábháilte sa chríoch ina bhfuil an chogaíocht ag tarlú, amhail san Úcráin i gcás fhogha míleata leanúnach na Rúise, bunaítear le Rialachán leasaitheach (AE) 2022/838 saoráid uathoibrithe bainistíochta sonraí agus stórála lárnach d’fhianaise den sórt sin.
- I bhfianaise chineál íogair na sonraí pearsanta atá i gceist, ní mór go gcloífidh a bpróiseáil, lena n–áirítear bailiú, caomhnú, anailísiú agus malartú, leis na caighdeáin is airde cibearshlándála.
Malartú faisnéise maidir le cásanna sceimhlitheoireachta
Ceanglaítear le Rialachán leasaitheach (AE) 2023/2131 ar na Ballstáit faisnéis a sholáthar do Eurojust maidir le himscrúduithe coiriúla ar bith a bhaineann le cionta sceimhlitheoireachta a luaithe is a chuirtear cásanna den sórt sin ar aghaidh chuig a gcuid údarás breithiúnach.
- Cruthaítear leis bealach slán cumarsáide digití idir na Ballstáit agus Eurojust.
- Leasaítear leis na rialacha maidir le próiseáil sonraí laistigh de chóras bainistíochta sonraí Eurojust, ina ndéantar na sonraí oibríochtúla pearsanta uile a stóráil agus a chros-seiceáil, chun go mbeifear ábalta bonneagar teicniúil úrscothach atá éasca le húsáid a chur ar bun.
- Treisítear leis cumais Eurojust chun naisc idir imscrúduithe agus ionchúisimh thrasteorann i réimse na sceimhlitheoireachta a aimsiú agus chun na Ballstáit a chur ar an eolas faoi na naisc sin.
- Simplítear leis an comhar le tíortha nach tíortha den Aontas Eorpach iad trí rochtain ar an gcóras bainistíochta riosca a dheonú d’ionchúisitheoirí idirchaidrimh atá ar iasacht do Eurojust.
Rialú daonlathais
- Chun trédhearcacht agus maoirseacht dhaonlathach Eurojust a mhéadú, déanfaidh Parlaimint na hEorpa agus parlaimintí náisiúnta measúnú comhpháirteach ar a ghníomhaíochtaí.
Aisghairm
Cuirtear Rialachán (AE) 2018/1727 in ionad Chinneadh 2002/187/CGB agus aisghairtear leis an Rialachán sin é.
CÉN UAIR ATÁ TOSACH FEIDHME AN RIALACHÁIN?
- Tá feidhm ag Rialachán (AE) 2018/1727 ón 12 Nollaig 2019.
- Tá feidhm ag Rialachán leasaitheach (AE) 2023/2131 ón 31 Deireadh Fómhair 2023.
CÚLRA
Le haghaidh tuilleadh faisnéise, féach:
- Cad a dhéanaimid (Eurojust).
PRÍOMHDHOICIMÉAD
Rialachán (AE) 2018/1727 ó Pharlaimint na hEorpa agus ón gComhairle an 14 Samhain 2018 maidir le Gníomhaireacht an Aontais Eorpaigh um Chomhar Ceartais Choiriúil (Eurojust), agus lena n–aisghairtear Cinneadh 2002/187/CGB ón gComhairle agus a ghabhann in ionad an Chinnidh sin (IO L 295, 21.11.2018, lgh. 138–183).
Rinneadh leasuithe comhleanúnacha ar Rialachán (AE) 2018/1727 a ionchorprú sa bhuntéacs. Níl de luach ar an leagan comhdhlúite seo ach luach doiciméadach amháin.
DOICIMÉID GHAOLMHARA
Rialachán (AE) Uimh. 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin agus lena n–aisghairtear Rialachán (CE) Uimh. 45/2001 agus Cinneadh Uimh. 1247/2002/CE (IO L 295, 21.11.2018, lgh. 39–98).
Rialachán (AE) Uimh. 2017/1939 ón gComhairle an 12 Deireadh Fómhair 2017 lena gcuirtear chun feidhme comhar feabhsaithe maidir le bunú Oifig an Ionchúisitheora Phoiblí Eorpaigh (“OIPE”) (IO L 283, 31.10.2017, lgh. 1–71).
Féach an leagan comhdhlúite.
Nuashonraithe 15.02.2024
