Sábháilteacht árthaí brú simplí in AE

Tá dhá phríomhchuspóir ag dlí an Aontais Eorpaigh (AE) maidir le hárthaí brú simplí (mar shampla, sorcóirí tumadóireachta) a chur ar an margadh agus iad a chur ag obair: (i) chun daoine, ainmhithe clóis agus réadmhaoin a chosaint ar na guaiseacha a eascraíonn as sceitheadh nó pléascadh; (ii) chun na rialacha céanna a chur i bhfeidhm ar fud AE maidir leis na hárthaí brú sin a dhíol.

ACHT

Treoir 2014/29/AE ó Pharlaimint na hEorpa agus ón gComhairle an 26 Feabhra 2014 maidir le comhchuibhiú rialacha na mBallstát a bhaineann le hárthaí brú simplí a chur ar fáil ar an margadh.

ACHOIMRE

Tá dhá phríomhchuspóir ag dlí an Aontais Eorpaigh (AE) maidir le hárthaí brú simplí (mar shampla, sorcóirí tumadóireachta) a chur ar an margadh agus iad a chur ag obair: (i) chun daoine, ainmhithe clóis agus réadmhaoin a chosaint ar na guaiseacha a eascraíonn as sceitheadh nó pléascadh; (ii) chun na rialacha céanna a chur i bhfeidhm ar fud AE maidir leis na hárthaí brú sin a dhíol.

CÉARD A DHÉANANN AN TREOIR SEO?

Leagtar síos inti rialacha comhionanna maidir le hárthaí brú simplí a chur ar an margadh agus iad a chur ag obair.

Baineann an treoir le hárthaí a ndéantar iad a mhonarú i sraitheanna, amhail aon árthach táite le brú tomhsaire inmheánach níos airde ná 0.5 bar ann a ceapadh chun aer nó nítrigin a choimeád istigh ann agus nár ceapadh chun bheith scaoilte. Baineann an treoir freisin leis na codanna agus na cóimeálacha a chuireann le cumhacht an árthaigh faoi bhrú déanta de cháilíochtaí áirithe cruach nó alúmanaim.

Ní bhaineann an treoir le: (i) árthaí atá deartha go speisialta le haghaidh úsáide núicléiche; (ii) árthaí atá suiteáilte ar longa agus ar aerárthaí; (iii) múchtóirí dóiteáin.

PRÍOMHPHOINTÍ

Sainítear faoin treoir freagrachtaí monaróirí, allmhaireoirí agus dáileoirí na n-árthaí brú simplí.

• 1.

  Ni mór an comhartha comhréireachta CE a bheith ar an gcuid is mó de na hárthaí brú simplí laistigh de raon na treorach chun a thaispeáint go gcomhlíonann siad na ceanglais riachtanacha sábháilteachta i leith reachtaíocht AE.

• 2.

  Ní mór don mhonaróir measúnú comhréireachta a dhéanamh agus doiciméadúchán teicniúil mionsonraithe a leagadh amach do na hárthaí.

• 3.

  Ní mór d’allmhaireoirí a sheiceáil cé acu an bhfuil measúnuithe comhréireachta cearta déanta ag na monaróirí agus ní mór dóibh an t-údarás a dhéanann monatóireacht ar shábháilteacht a chur ar an eolas má mheasann siad nach gcloíonn an t-árthach leis na ceanglais riachtanacha sábháilteachta.

• 4.

  Ni mór an doiciméadúchán riachtanach go léir a thaifeadadh agus é a choimeád ar feadh deich mbliana.

• 5.

  Ní mór na treoracha agus an fhaisnéis sábháilteachta a bheith scríofa i dteanga a mbeidh úsáideoirí deiridh ábalta í a thuiscint go héasca.

• 6.

  Ní mór do na monaróirí agus do na hallmhaireoirí iad seo a leanas a léiriú ar a n-árthaí: ainm, trádainm cláraithe nó trádmharc cláraithe agus seoladh poist teagmhála.

• 7.

  Sonraítear faoin treoir cad is gá do na húdaráis fhaireachas margaidh náisiúnta a dhéanamh chun táirgí neamhchomhlíontacha a aithint agus chun a chinntiú nach gcuirfear na táirgí seo ar an margadh nó nach gcuirfear ag obair iad ar mhargadh AE.

CATHAIN A MBEIDH FEIDHM AG AN TREOIR SEO?

Cuireadh an treoir i bhfeidhm an 18 Aibreán 2014 agus cuirfear chun feidhme í ón 20 Aibreán 2016. Aisghairfear Treoir 2009/105/CE le héifeacht ón 20 Aibreán 2016.

CÚLRA

Nuashonraíonn an treoir na rialacha AE atá ann cheana féin maidir le hárthaí brú simplí a chur ar an margadh agus a chur ag obair. Is cuid den iarracht í seo dlí na hEorpa a nuachóiriú i réimse leathan earnálacha tionsclaíochta chun rialacha a shimpliú, chun ualaí riarachán a laghdú agus chun rialacha níos soiléire agus níos comhsheasmhaí a leagadh amach.

Féach ar láithreán gréasáin an Choimisiúin Eorpaigh maidir le hárthaí brú simplí chun tuilleadh faisnéise a fháil.

Nuashonraithe 17.02.2015