(1)

Le Rialachán (CE) Uimh. 1831/2003 foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh isteach iarratas ar ullmhóid de Enterococcus lactis NCIMB 11181 a údarú (a sainaithníodh roimhe seo mar Enterococcus faecium NCIMB 11181). Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(3)

Baineann an t-iarratas le húdarú na hullmhóide de Enterococcus lactis NCIMB 11181 mar bhreiseán beathaithe lena úsáid i mbeatha agus in uisce óil le haghaidh sicíní lena ramhrú nó sicíní a thógtar le bheith ina mbéaróga, speicis éanlaithe clóis eile lena ramhrú nó a thógtar le bheith ina mbéaróga, agus éin ornáideacha, agus iarrtar ann go n-úsáidfí an ullmhóid sin go comhuaineach i mbeatha leis na coicideastait sóidiam moinéinsine agus dé-coicíonáit, agus go n-aicmeofaí an breiseán sin sa chatagóir ‘breiseáin zóiteicniúla’ agus san fheidhmghrúpa ‘cobhsaitheoirí fhlóra na stéige’.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 30 Eanáir 2024 (2) go bhfuil an ullmhóid de Enterococcus lactis NCIMB 11181 sábháilte do shicíní lena ramhrú nó a thógtar le bheith ina mbéaróga, do speicis eile éanlaithe clóis lena ramhrú nó a thógtar le bheith ina mbéaróga, agus d’éin ornáideacha, agus do thomhaltóirí agus don chomhshaol. Tháinig an tÚdarás ar an gconclúid freisin go meastar nach greannaitheoir craicinn ná súl é foirmliú soladach uiscethuaslagtha an bhreiseáin. De bharr nádúr próiténieach an oibreáin ghníomhaigh, meastar gur íogróirí riospráide iad foirmlithe soladacha agus foirmlithe soladacha uiscethuaslagtha an bhreiseáin. Níorbh fhéidir leis an Údarás teacht ar chonclúid maidir le hacmhainneacht fhoirmliú soladach an bhreiseáin a bheith greannach don chraiceann agus do na súile nó maidir leis an bhféidearthacht go mbeadh an dá fhoirmliú den bhreiseán ina gcúis le híogrú craicinn. Thairis sin, tháinig sé ar an gconclúid go bhfuil úsáid Enterococcus lactis NCIMB 11181 comhoiriúnach leis na coicideastait sóidiam moinéinsine agus dé-coicíonáit. Tar éis measúnú a dhéanamh ar shonraí a chuir an t-iarratasóir isteach le déanaí, tháinig an tÚdarás ar an gconclúid sa tuairim uaidh an 16 Meán Fómhair 2025 (3) go bhféadfadh an breiseán a bheith éifeachtúil mar bhreiseán zóiteicniúil le haghaidh sicíní lena ramhrú nuair a thugtar é ag 3×1010 ADC/kg d’ábhar beatha iomlán agus in uisce óil ag 1,5×1010 ADC/L. An chonclúid maidir le sicíní lena ramhrú, leathnaítear í chun sicíní a thógtar le bheith ina mbéaróga a chumhdach agus eachtarshuitear í maidir le gach éanlaith chlóis lena ramhrú, gach éanlaith chlóis a thógtar le bheith ina mbéaróga agus éin ornáideacha. Níor mheas an tÚdarás go bhfuil gá le ceanglais shonracha maidir le faireachán iarmhargaidh.

(5)

Maidir leis na conclúidí agus na moltaí ar ar thángthas i measúnú roimhe seo i ndáil le hiarratas eile ar údarú an bhreiseáin chéanna, conclúidí agus moltaí a d’fhíoraigh an tÚdarás sa tuairim uaidh an 1 Feabhra 2012 (4), mheas an tSaotharlann Tagartha a bunaíodh le Rialachán (CE) Uimh. 1831/2003 go bhfuil na conclúidí agus na moltaí sin bailí agus infheidhme maidir leis an iarratas atá ann faoi láthair. I gcomhréir le hAirteagal 5(4), pointe (a), de Rialachán (CE) Uimh. 378/2005 ón gCoimisiún (5), ní raibh gá le tuarascáil mheastóireachta ón tSaotharlann Tagartha dá bhrí sin.

(6)

I bhfianaise an mhéid thuas, measann an Coimisiún go gcomhlíonann an ullmhóid de Enterococcus lactis NCIMB 11181 na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na hullmhóide sin a údarú le haghaidh éanlaith chlóis lena ramhrú agus a thógtar le bheith ina mbéaróga nó le haghaidh atáirgthe agus éin ornáideacha. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(7)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,