(1)

Le Rialachán (AE) 2019/817 agus Rialachán (AE) 2019/818 ó Pharlaimint na hEorpa agus ón gComhairle, bunaítear creat le haghaidh idir-inoibritheacht idir córais faisnéise an Aontais Eorpaigh i réimse na dteorainneacha, na víosaí, an chomhair póilíneachta agus an chomhair bhreithiúnaigh, an tearmainn agus na himirce.

(2)

Tá roinnt comhpháirteanna idir-inoibritheachta sa chreat sin lena n-áirítear an stóras coiteann sonraí céannachta (CIR). Le CIR cruthaítear comhad aonair le haghaidh gach duine a chláraítear sa Chóras Dul Isteach/Imeachta (EES), an Córas Faisnéise Víosaí (VIS), an Córas Eorpach um Fhaisnéis agus Údarú Taistil (ETIAS), an Córas Eorpach chun comparáid a dhéanamh idir taifid dhachtalascópacha iarrthóirí tearmainn (Eurodac) nó an Córas Faisnéise Eorpach um Thaifid Choiriúla le haghaidh Náisiúnaigh Tríú Tír (ECRIS-TCN). Bunaítear an chomhpháirt sin chun sainaithint cheart daoine atá cláraithe sna córais sin a éascú agus chun cuidiú leis an tsainaithint sin, chun tacú leis an mbreathadóir ilchéannachtaí (MID), agus chun rochtain na n-údarás ainmnithe a shonraítear sna forálacha gaolmhara sna Rialacháin a chuíchóiriú.

(3)

De bhun Rialacháin (AE) 2019/817 agus (AE) 2019/818, cinnfidh an Coimisiún an dáta óna gcuirfear tús le hoibríochtaí an stórais choitinn sonraí céannachta, a luaithe a chomhlíonfar na coinníollacha in Airteagal 72(3) de Rialachán (AE) 2019/817 agus in Airteagal 68(3) de Rialachán (AE) 2019/818. Tá an dáta sin le socrú laistigh de 30 lá tar éis ghlacadh an ghnímh cur chun feidhme.

(4)

Tá sé fíoraithe ag an gCoimisiún gur glacadh na gníomhartha cur chun feidhme is gá chun an stóras coiteann sonraí céannachta a oibriú (3); go bhfuil sé dearbhaithe ag Gníomhaireacht an Aontais Eorpaigh chun Bainistiú Oibríochtúil a dhéanamh ar Chórais Mhórscála TF sa Limistéar Saoire, Slándála agus Ceartais (eu-LISA) go bhfuil tástáil chuimsitheach curtha i gcrích go rathúil aici ar CIR, ar tástáil í a rinne sí i gcomhar le húdaráis na mBallstát; go bhfuil na socruithe teicniúla agus dlíthiúla chun na sonraí dá dtagraítear in Airteagal 18 de Rialacháin (AE) 2019/817 agus (AE) 2019/818 a bhailiú agus a tharchur bailíochtaithe ag eu-LISA, agus go bhfuil fógra tugtha ag eu-LISA don Choimisiún fúthu; go bhfuil sé dearbhaithe ag eu-LISA go bhfuil tástáil chuimsitheach curtha i gcrích go rathúil aige ar na sásraí agus nósanna imeachta uathoibrithe um rialú cáilíochta sonraí, ar na táscairí coiteanna cáilíochta sonraí agus ar na híoschaighdeáin cháilíochta sonraí, ar tástáil í a rinne sé i gcomhar le húdaráis na mBallstát.

(5)

Dá bhrí sin, is iomchuí an dáta a chuirfear tús le hoibríochtaí an stóras choitinn sonraí céannachta a chinneadh.

(6)

Ós rud é go gcuireann Rialachán (AE) 2019/817 agus (AE) 2019/818 le acquis Schengen, i gcomhréir le hAirteagal 4 de Phrótacal Uimh. 22 maidir le Seasamh na Danmhairge, prótacal atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh, thug an Danmhairg fógra faoi chur chun feidhme Rialacháin (AE) 2019/817 agus (AE) 2019/818 ina dlí náisiúnta. Dá bhrí sin, tá an Danmhairg faoi cheangal ag an gCinneadh seo.

(7)

Is é atá sa Chinneadh seo forbairt ar fhorálacha acquis Schengen nach bhfuil Éire rannpháirteach iontu, i gcomhréir le Prótacal Uimh. 19 maidir le acquis Schengen arna lánpháirtiú i gcreat an Aontais Eorpaigh, prótacal atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh, agus, faoi réir chur i bhfeidhm Airteagal 4 den Phrótacal sin, níl Éire faoi cheangal aige ná faoi réir a chur i bhfeidhm.

(8)

Maidir leis an Íoslainn agus leis an Iorua, is é atá sa Chinneadh seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích ag Comhairle an Aontais Eorpaigh agus Poblacht na hÍoslainne agus Ríocht na hIorua maidir le comhlachas an dá Stát sin le acquis (4) Schengen a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointe A, de Chinneadh 1999/437/CE ón gComhairle (5).

(9)

Maidir leis an Eilvéis, is é atá sa Chinneadh seo forbairt ar fhorálacha acquis Schengen de réir bhrí an Chomhaontaithe idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis (6) Schengen a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointe A, de Chinneadh 1999/437/CE, arna léamh i gcomhar le hAirteagal 3 de Chinneadh 2008/146/CE ón gComhairle (7).

(10)

Maidir le Lichtinstéin, is é atá sa Chinneadh seo forbairt ar fhorálacha acquis Schengen de réir bhrí an Phrótacail idir an tAontas Eorpach, an Comhphobal Eorpach, Cónaidhm na hEilvéise agus Prionsacht Lichtinstéin i ndáil le haontachas Phrionsacht Lichtinstéin leis an gComhaontú idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis (8) Schengen a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointe A, de Chinneadh 1999/437/CE arna léamh i gcomhar le hAirteagal 3 de Chinneadh 2011/350/AE ón gComhairle (9).

(11)

Maidir leis an gCipir, is é atá sa Chinneadh seo gníomh atá ag cur le acquis Schengen nó atá gaolmhar leis ar dhóigh eile, de réir bhrí Airteagal 3(1) d’Ionstraim Aontachais 2003,