(1)

Le Rialachán Cur Chun Feidhme (AE) 2021/567 (2) ón gCoimisiún, formheasadh eastóscán uiscí ó shíolta péactha an lúipín bháin mhilis mar shubstaint ghníomhach ísealriosca i gcomhréir le Rialachán (CE) Uimh. 1107/2009. Rinneadh an formheas sin faoi réir coinníollacha áirithe, go háirithe faisnéis deimhniúcháin a bheith curtha isteach ag an iarratasóir a mhéid a bhaineann le sonraíocht theicniúil na substainte gníomhaí mar a mhonaraítear í (ar bhonn táirgeacht ar scála tráchtála) agus comhlíonadh na sonraíochta teicniúla deimhnithe ag na baisceanna tocsaineachta. Go háirithe, bhain an fhaisnéis deimhniúcháin sin le huaschion na n-alcalóideach cuineolisidín (lúpainín, 13α-OH-lúpainín, 13α-aingealóiolocsalúpainín, lúipínín, ailbín, angastafóilín, 13α-tioglóiolocsalúpainín, α-isealúpainín, teitrihidreahoimdhéfhóilín, ilfhlóirín, spairtéin).

(2)

I gcomhréir leis an gceanglas sin, chuir an t-iarratasóir sainchomhad nuashonraithe isteach i mí Dheireadh Fómhair 2021, sainchomhad a ndearna an Ballstát is rapóirtéir meastóireacht air, arbh é sin an Ísiltír, i bhfoirm dréacht-tuarascáil measúnaithe athbhreithnithe.

(3)

An 9 Nollaig 2022 scaip an Ísiltír an dréacht-tuarascáil measúnaithe athbhreithnithe ar na Ballstáit eile, ar an iarratasóir agus ar an Údarás Eorpach um Shábháilteacht Bia (‘an tÚdarás’) chun barúlacha a fháil. An 22 Meán Fómhair 2023 chuir an tÚdarás a thuairimí eolaíocha in iúl maidir leis na pointí sonracha a ardaíodh le linn na barúlacha a chur isteach. An 5 Nollaig 2023 d’fhoilsigh an tÚdarás tuarascáil theicniúil (3) ina ndearnadh achoimre ar an bpróiseas comhairliúcháin le haghaidh eastóscán uiscí ó shíolta péactha an lúipín bháin mhilis.

(4)

Sa tuarascáil athbhreithniúcháin uaidh le haghaidh eastóscán uiscí ó shíolta péactha an lúipín bháin mhilis an 23 Bealtaine 2024 (4), mheas an Coimisiún an gá an tásc go bhfuil sonraíocht an ábhair theicniúil sealadach a bhaint, mar a bunaíodh in Iarscríbhinn I a ghabhann le Rialachán Cur Chun Feidhme (AE) 2021/567.

(5)

Thairis sin, ar bhonn na faisnéise deimhniúcháin a fuarthas, uaschion na n-alcalóideach cuineolisidín, (lúpainín, 13α-OH-lúpainín, 13α-aingealóiolocsalúpainín, lúipínín, ailbín, angastafóilín, 13α-tioglóiolocsalúpainín, α-isealúpainín, teitrihidreahoimdhéfhóilín, ilfhlóirín, spairtéin), ba cheart é a choinneáil ar bun ar leibhéal 0,05 g/kg. Ina theannta sin, ar bhonn thoradh an mheasúnaithe, measann an Coimisiún go bhfuil lúpainín le socrú mar mharcóir na n-alcalóideach cuineolisidín sin, agus meastar uaschion na comhdhúile sin a bheith socraithe ag leibhéal 0,035 g/kg.

(6)

D’iarr an Coimisiún ar an iarratasóir a bharúlacha a chur isteach i leith na tuarascála athbhreithniúcháin agus rinne an Coimisiún meastóireacht ar na barúlacha sin go cúramach.

(7)

Chun ardleibhéal cosanta a áirithiú do thomhaltóirí, is iomchuí uasleibhéal a bhunú le haghaidh na n-eisíontas ábhartha i sonraíocht theicniúil na substainte gníomhaí. Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) Uimh. 540/2011 a leasú dá réir.

(8)

Ba cheart am leordhóthanach a thabhairt do na Ballstáit údaruithe a leasú nó a tharraingt siar le haghaidh táirgí cosanta plandaí ina bhfuil eastóscán uiscí ó shíolta péactha an lúipín bháin mhilis, ar táirgí iad nach gcomhlíonann sonraíocht an ábhair theicniúil mar a mhonaraítear iad ar bhonn tráchtála.

(9)

Maidir le táirgí cosanta plandaí ina bhfuil eastóscán uiscí ó shíolta péactha an lúipín bháin mhilis, i gcás ina ndeonóidh na Ballstáit aon tréimhse chairde i gcomhréir le hAirteagal 46 de Rialachán (CE) Uimh. 1107/2009, ba cheart an tréimhse sin a dhul in éag, ar a dhéanaí, 15 mí tar éis don Rialachán seo a theacht i bhfeidhm.

(10)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,