(1)

Is é is aidhm d’aontas na margaí caipitil, a cuireadh i láthair i dteachtaireacht ón gCoimisiún an 30 Meán Fómhair 2015 maidir le Plean Gníomhaíochta chun Aontas na Margaí Caipitil a thógáil, margaí caipitil an Aontais a fhorbairt agus a n-ilroinnt feadh na dteorainneacha náisiúnta a laghdú, agus ar an gcaoi sin cuideachtaí a chumasú rochtain a fháil ar fhoinsí cistiúcháin seachas iasachtú bainc agus a struchtúr maoinithe a oiriúnú le linn dóibh a bheith ag aibiú agus ag dul i méid. Le maoiniú níos éagsúlaithe i bhfoirm fiachais agus cothromais laghdófar rioscaí do chuideachtaí aonair agus don gheilleagar foriomlán, agus chomh maith leis sin cuideofar le cuideachtaí an Aontais, lena n-áirítear fiontair bheaga agus mheánmhéide (FBManna), a n-acmhainneacht fáis a bhaint amach. Aithnítear nach mór Aontas na Margaí Caipitil a thabhairt i gcrích níos tapúla agus nach mór go mbainfidh an infheistíocht amach na leibhéil is gá de bharr thosaíochtaí beartais an Aontais a bhaineann le cosaint an chomhshaoil, le digitiú agus le huathriail straitéiseach. Is céim riachtanach d’Aontas na Margaí Caipitil é dul chun cinn a dhéanamh i réimse an liostaithe, go háirithe sa ghearrthéarma, ach mar bheart neamhspleách ní féidir gur leor é.

(2)

Éilítear le hAontas na Margaí Caipitil creat rialála éifeachtúil agus éifeachtach a thacaíonn le rochtain ar chistiú cothromais phoiblí do chuideachtaí, lena n-áirítear FBManna. Le Treoir 2014/65/AE ó Pharlaimint na hEorpa agus ón gComhairle (3), cruthaíodh cineál nua ionaid trádála, margadh fáis FBManna, chun rochtain ar chaipiteal a éascú do FBManna go sonrach. Léiríodh go follasach i dTreoir 2014/65/AE freisin gur gá faireachán a dhéanamh ar an gcaoi ar cheart le rialachán a bheidh ann amach anseo úsáid margaí fáis FBManna a chothú agus a chur chun cinn a thuilleadh agus dreasachtaí breise a sholáthar do FBManna chun rochtain a fháil ar mhargaí caipitil trí mhargaí fáis FBManna. Ní mór a áirithiú le bearta den sórt sin nach amháin go dtugann margaí fáis FBManna deis, atá ag éirí níos tarraingtí i gcónaí, do FBManna cistí a thiomsú ach freisin, le himeacht ama agus le rath, gur féidir le FBManna rochtain a fháil ar mhargaí caipitil eile, má roghnaíonn siad é sin a dhéanamh.

(3)

Le Rialachán (AE) 2019/2115 ó Pharlaimint na hEorpa agus ón gComhairle (4), tugadh isteach laghduithe comhréireacha chun úsáid margaí fáis FBManna a fheabhsú agus chun ceanglais rialála ar eisitheoirí ag iarraidh urrúis a ligean isteach ar mhargaí fáis FBManna a laghdú, agus leibhéal iomchuí cosanta infheisteoirí agus sláine an mhargaidh á gcaomhnú an tráth céanna. Mar sin féin, ní mór níos mó a dhéanamh chun rochtain ar mhargaí poiblí an Aontais a dhéanamh níos tarraingtí agus chun go mbeidh cóir rialála cuideachtaí níos solúbtha agus comhréireach ó thaobh a méide de. Mhol an Fóram Ardleibhéil maidir le hAontas na Margaí Caipitil go mbainfeadh an Coimisiún bacainní rialála a chuireann bac ar chuideachtaí rochtain a fháil ar mhargaí poiblí. Leag an Grúpa Saineolaithe Teicniúla Páirtithe Leasmhara maidir le FBManna moltaí mionsonraithe amach maidir le conas rochtain cuideachtaí agus, go háirithe, FBManna ar mhargaí poiblí an Aontais a chothú.

(4)

Mar fhorbairt ar cheann de thionscnaimh an Choimisiúin mar chuid dá straitéis téarnaimh i ndiaidh COVID-19, eadhon, an Pacáiste Téarnaimh um Margaí Caipitil, tugadh leasuithe spriocdhírithe isteach i Rialacháin (AE) 2017/1129 (5) agus (AE) 2017/2402 (6) ó Pharlaimint na hEorpa agus ón gComhairle, agus i dTreoracha 2014/65/AE agus 2004/109/CE ó Pharlaimint na hEorpa agus ón gComhairle (7) chun é a dhéanamh níos éasca do chuideachtaí a ndeachaigh an ghéarchéim eacnamaíoch a d’eascair as an bpaindéim i bhfeidhm orthu, caipiteal cothromais ar mhargaí poiblí a chruinniú, infheistíochtaí san fhíorgheilleagar a éascú, athchaipitliú tapa gnólachtaí a cheadú, agus acmhainneacht na mbanc an téarnamh a mhaoiniú a mhéadú. Ar an iomlán, áfach, agus ar roinnt cúiseanna, ní raibh ach tionchar teoranta ag na bearta sin.

(5)

Ar bhonn na moltaí ón nGrúpa Saineolaithe Teicniúla Páirtithe Leasmhara maidir le FBManna agus mar fhorbairt ar Rialachán (AE) 2019/2115 agus ar na bearta arna nglacadh faoi Rialachán (AE) 2021/337 ó Pharlaimint na hEorpa agus ón gComhairle (8), agus mar chuid den Phacáiste Téarnaimh um Margaí Caipitil, gheall an Coimisiún tionscnamh reachtach a chur i láthair chun rochtain ar mhargaí poiblí san Aontas a dhéanamh níos tarraingtí trí chostais chomhlíontachta a laghdú, agus trí bhacainní móra lena gcuirtear cosc ar chuideachtaí a bhaint, lena n-áirítear FBManna, rochtain a fháil ar mhargaí poiblí san Aontas. Chun a chuspóirí a bhaint amach, ba cheart raon feidhme leathan a bheith leis an tionscnamh reachtach sin agus ba cheart aghaidh a thabhairt leis ar bhacainní a bhaineann le rochtain cuideachtaí ar mhargaí poiblí, eadhon na céimeanna roimh an tairiscint tosaigh don phobal, an tairiscint tosaigh don phobal (TTP) agus na céimeanna i ndiaidh TTP. Go sonrach, ba cheart an simpliú agus baint na mbacainní a dhíriú ar na céimeanna TTP agus i ndiaidh TTP trí aghaidh a thabhairt ar na ceanglais throma maidir le nochtadh chun ligean isteach chun trádála ar mhargaí poiblí a iarraidh, ceanglais a leagtar síos i Rialachán (AE) 2017/1129, agus trí aghaidh a thabhairt ar na ceanglais throma leanúnacha maidir le nochtadh a leagtar síos i Rialachán (AE) Uimh. 596/2014 ó Pharlaimint na hEorpa agus ón gComhairle (9).

(6)

Le Rialachán (AE) 2017/1129 leagtar síos ceanglais maidir le tarraingt suas, formheas agus dáileadh an réamheolaire atá le foilsiú nuair a thairgtear urrúis don phobal nó nuair a ligtear isteach iad chun a dtrádála ar mhargadh rialáilte atá lonnaithe i mBallstát nó atá ag feidhmiú i mBallstát. Chun tarraingteacht mhargaí poiblí an Aontais a threisiú, is gá aghaidh a thabhairt ar na bacainní a eascraíonn as fad, castacht agus costais arda dhoiciméadacht an réamheolaire, i gcás ina mbeidh rochtain á hiarraidh ag cuideachtaí, lena n-áirítear FBManna, ar mhargaí poiblí den chéad uair trí TTP, agus i gcás ina mbeidh rochtain ag cuideachtaí ar mhargaí poiblí le haghaidh eisiúintí tánaisteacha urrús cothromais nó neamhchothromais. Ar an gcúis chéanna, ba cheart aghaidh a thabhairt freisin ar fhad phróiseas grinnscrúdaithe agus formheasta na réamheolairí sin a dhéanann údaráis inniúla, agus ar easpa an chóineasaithe sna próisis sin ar fud an Aontais.

(7)

I gcás tairiscintí beaga urrús don phobal, d’fhéadfadh na costais a bhaineann le réamheolaire a tháirgeadh a bheith díréireach maidir le comaoin iomlán na tairisceana. Níl feidhm ag Rialachán (AE) 2017/1129 maidir le hurrúis a thairiscint don phobal ar lú a gcomaoin iomlán san Aontas ná EUR 1 000 000. Ina theannta sin, i bhfianaise mhéideanna éagsúla na margaí airgeadais ar fud an Aontais, is féidir leis na Ballstáit tairiscintí urrús don phobal a dhíolmhú ón oibleagáid réamheolaire a fhoilsiú i gcás inar lú comaoin iomlán na dtairiscintí sin ná tairseach áirithe, ar féidir leis na Ballstáit í a shocrú idir EUR 1 000 000 agus EUR 8 000 000. Bhain Ballstáit áirithe úsáid as an bhféidearthacht sin, agus tá tairseacha díolúine éagsúla ann mar thoradh air sin, rud a chruthaíonn castacht agus easpa soiléireachta d’eisitheoirí agus infheisteoirí araon. Chun laghdú a dhéanamh ar an gcastacht faoi Rialachán (AE) 2017/1129 agus chun soiléireacht dhlíthiúil a chothú, ba cheart an tairseach is ísle, EUR 1 000 000, nach bhfuil feidhm ag an Rialachán sin faoina bun, a bhaint.

(8)

Chun ilroinnt na margaí a laghdú agus aird á tabhairt an tráth céanna ar mhéideanna éagsúla na margaí caipitil náisiúnta laistigh den Aontas, ba cheart córas déthairsí a chur in ionad an chórais atá ann cheana lena gceadaítear do na Ballstáit tairseacha díolúine éagsúla idir EUR 1 000 000 agus EUR 8 000 000 a shocrú. Is í an phríomhthairseach is ceart a bheith ann EUR 12 000 000 in aghaidh an eisitheora nó an tairgeora mar chomaoin comhiomlánaithe san Aontas, arna ríomh thar thréimhse 12 mhí, agus ba cheart do na Ballstáit a bheith in ann a chinneadh tairseach EUR 5 000 000 a chur i bhfeidhm. Faoi bhun na tairsí EUR 12 000 000 nó EUR 5 000 000, ba cheart tairiscintí urrús don phobal a dhíolmhú ón oibleagáid réamheolaire a fhoilsiú, ar choinníoll nach bhfuil nós imeachta an phas ag teastáil le haghaidh na dtairiscintí sin. I gcás na díolúine sin, áfach, ba cheart cead a bheith ag na Ballstáit, ach gan é a bheith d’oibleagáid orthu, a cheangal ar an eisitheoir doiciméad ina bhfuil an fhaisnéis dá dtagraítear in Airteagal 7 de Rialachán (AE) 2017/1129, nó, doiciméad ina bhfuil na ceanglais faisnéise ar an leibhéal náisiúnta, a fhoilsiú, ar choinníoll go bhfuil méid agus leibhéal na faisnéise sin coibhéiseach leis an bhfaisnéis a leagtar amach in Airteagal 7 de Rialachán (AE) 2017/1129, nó níos lú. Níor cheart go gcuirfeadh aon ní sa Rialachán seo cosc ar na Ballstáit sin rialacha a thabhairt isteach ar an leibhéal náisiúnta lena gceadaítear d’oibreoirí saoráidí trádála iltaobhacha (MTFanna) inneachar an doiciméid a chinneadh, ar doiciméad maidir le ligean isteach é a chuirtear de cheangal ar eisitheoir a thaispeáint nuair a ligtear a chuid urrús isteach chun a dtrádála ar dtús nó rialacha mionsonraithe an athbhreithnithe a dhéanfar air a chinneadh.

(9)

Ba cheart tairiscintí trasteorann urrús don phobal atá díolmhaithe ón oibleagáid réamheolaire a fhoilsiú a bheith faoi réir na gceanglas náisiúnta maidir le nochtadh arna leagan amach ag na Ballstáit lena mbaineann, i gcás inarb infheidhme. Mar sin féin, maidir le heisitheoirí, tairgeoirí nó daoine a iarrann go ligfí urrúis isteach chun a dtrádála ar mhargadh rialáilte nach bhfuil faoi réir na hoibleagáide réamheolaire a fhoilsiú, ba cheart dóibh tairbhiú de nós imeachta an phas i gcás ina roghnóidh siad réamheolaire a tharraingt suas ar bhonn deonach.

(10)

Tá roinnt forálacha i Rialachán (AE) 2017/1129 ina dtagraítear don chomaoin iomlán tairiscintí áirithe urrús don phobal, lena n-áirítear tairiscintí urrús don phobal atá ar siúl, atá le ríomh thar thréimhse 12 mhí. Chun soiléireacht a thabhairt d’eisitheoirí, d’infheisteoirí agus d’údaráis inniúla agus chun cuir chuige éagsúla a sheachaint ar fud an Aontais, is gá a shonrú conas a dhéanfar comaoin iomlán na dtairiscintí urrús sin don phobal a ríomh thar thréimhse 12 mhí.

(11)

In Airteagal 1(5), pointe (a), de Rialachán (AE) 2017/1129 tá díolúine ón oibleagáid réamheolaire a fhoilsiú maidir le hurrúis a ligean isteach chun a dtrádála ar mhargadh rialáilte, urrúis atá idirmhalartach le hurrúis a ligeadh isteach chun a dtrádála cheana ar an margadh rialáilte céanna, ar choinníoll gur lú ná 20 % de líon na n-urrús a ligeadh isteach cheana chun a dtrádála ar an margadh rialáilte céanna iad na hurrúis nua a ligeadh isteach thar thréimhse 12 mhí, agus ar choinníoll nach bhfuil ligean isteach den sórt sin comhcheangailte le tairiscint urrús don phobal. Chun castacht a laghdú agus chun teorainn a chur le costais agus ualaí neamhriachtanacha, ba cheart feidhm a bheith ag an díolúine sin freisin maidir le tairiscint don phobal faoi Airteagal 1(4) den Rialachán sin. Ar na cúiseanna céanna, ba cheart an tairseach chéatadáin lena socraítear an incháilitheacht le haghaidh na díolúine sin a mhéadú sa tairiscint urrús don phobal agus sa ligean isteach chun a dtrádála ar mhargadh rialáilte araon. Ina theannta sin, ba cheart a chuimsiú sa díolúine maidir le tairiscintí urrús don phobal tairiscint don phobal d’urrúis atá le ligean isteach chun a dtrádála ar mhargadh rialáilte nó ar mhargadh fáis FBManna agus atá idirmhalartach le hurrúis a ligeadh isteach cheana chun a dtrádála ar an margadh rialáilte céanna nó ar an margadh fáis FBManna céanna. Ós rud é go bhfuil dlúthbhaint idir cearta suibscríbhinne agus eisiúint scaireanna nua, ba cheart a chumhdach leis an díolúine sin freisin an ceart chun suibscríobh le haghaidh scaireanna atá idirmhalartach le scaireanna atá ann cheana. Chun cosaint infheisteoirí a áirithiú, go háirithe d’infheisteoirí miondíola, ba cheart doiciméad gearrfhoirme ina bhfuil faisnéis bhunriachtanach d’infheisteoirí a chur ar fáil don phobal nuair a dhéantar tairiscint urrús idirmhalartach faoin díolúine. Ba cheart an doiciméad a chur ar fáil don phobal agus a chomhdú le húdarás inniúil an Bhallstáit baile, ach níor cheart é a bheith faoi réir a fhormheasta.

(12)

Tá díolúine in Airteagal 1(5), pointe (b), de Rialachán (AE) 2017/1129 ón oibleagáid réamheolaire a fhoilsiú maidir le ligean isteach chun a dtrádála ar mhargadh rialáilte scaireanna a eascraíonn as comhshó nó malartú urrús eile nó a eascraíonn as feidhmiú na gceart a thugtar le hurrúis eile, ar choinníoll gur lú na scaireanna nua a ligeadh isteach, thar thréimhse 12 mhí, ná 20 % de líon na scaireanna den aicme chéanna a ligeadh isteach cheana chun a dtrádála ar an margadh rialáilte céanna. Ba cheart an tairseach 20 % sin a ailíniú leis an tairseach don díolúine le haghaidh urrús atá idirmhalartach le hurrúis a ligeadh isteach cheana chun a dtrádála ar an margadh rialáilte céanna ós rud é go bhfuil an dá dhíolúine coibhéiseach ó thaobh raon feidhme de.

(13)

Ní mór do chuideachtaí a ligtear isteach a gcuid urrús chun a dtrádála ar mhargadh rialáilte nó ar mhargadh fáis FBManna na ceanglais maidir le nochtadh tréimhsiúil agus leanúnach a leagtar síos i Rialachán (AE) Uimh. 596/2014, i dTreoir 2004/109/CE a chomhlíonadh agus, i gcás eisitheoirí ar mhargaí fáis FBManna, na ceanglais siúd i Rialachán Tarmligthe (AE) 2017/565 ón gCoimisiún (10) a chomhlíonadh. I gcás ina n-eisíonn na cuideachtaí sin urrúis atá idirmhalartach le hurrúis a ligeadh isteach cheana chun a dtrádála ar na cineálacha sin ionad trádála, ba cheart iad a dhíolmhú ón oibleagáid réamheolaire a fhoilsiú, toisc go mbeidh go leor d’ábhar riachtanach réamheolaire ar fáil go poiblí cheana féin agus toisc go mbeidh infheisteoirí ábalta trádáil a dhéanamh ar bhonn na faisnéise sin. Mar sin féin, ba cheart díolúine den sórt sin a bheith faoi réir cosaintí lena n-áirithítear gur chomhlíon an chuideachta atá ag eisiúint na n-urrús na ceanglais maidir le nochtadh tréimhsiúil agus leanúnach faoi dhlí an Aontais agus nach bhfuil sí faoi réir athstruchtúrú nó tionscnamh imeachtaí dócmhainneachta, faoi mar a shainmhínítear faoi dhlí an Aontais. Thairis sin, chun cosaint infheisteoirí a áirithiú, go háirithe infheisteoirí miondíola, ba cheart doiciméad gearrfhoirme ina mbeidh faisnéis bhunriachtanach d’infheisteoirí a chur ar fáil fós don phobal. Ba cheart an doiciméad a chomhdú le húdarás inniúil an Bhallstáit baile, ach níor cheart é a bheith faoi réir a fhormheasta. I gcás ina bhfuil nasc ag cearta suibscríbhinne le hurrúis a chumhdaítear leis an díolúine maidir leis an tairiscint nó an ligean isteach chun trádála ar mhargadh rialáilte, ba cheart an díolúine a bheith infheidhme, dá bhrí sin, maidir le cearta suibscríbhinne arb é atá i gceist leo ceart fabhrach na scairshealbhóirí atá ann cheana na hurrúis a chumhdaítear leis an díolúine a shuibscríobh. I gcás ina n-éiríonn díolúintí eile atá ann cheana iomarcach mar gheall ar raon feidhme na díolúine, ba cheart na díolúintí eile sin a bhaint.

(14)

In Airteagal 1(4), pointe (j), de Rialachán (AE) 2017/1129, díolmhaítear institiúidí creidmheasa ón oibleagáid réamheolaire a fhoilsiú i gcás ina dtairgtear urrúis neamhchothromais áirithe, nó ina ligtear urrúis neamhchothromais áirithe isteach chun a dtrádála ar mhargadh rialáilte, a eisítear ar bhealach leanúnach nó arís agus arís eile suas go dtí comaoin chomhiomlánaithe de EUR 75 000 000 thar thréimhse 12 mhí. Le Rialachán (AE) 2021/337, mar chuid den Phacáiste Téarnaimh um Margaí Caipitil, méadaíodh an tairseach sin go EUR 150 000 000 ar feadh tréimhse theoranta chun tiomsú airgid a chothú d’institiúidí creidmheasa agus chun deis a thabhairt do na hinstitiúidí sin chun tacú lena gcliaint san fhíorgheilleagar. Chun leanúint le tacaíocht a thabhairt do thiomsú airgid trí mhargaí caipitil eisitheoirí, lena n-áirítear institiúidí creidmheasa, ba cheart an tairseach mhéadaithe a tugadh isteach le Rialachán (AE) 2021/337 a dhéanamh buan.

(15)

Chun castacht dhoiciméadacht an réamheolaire a laghdú, agus chun doiciméad níos comhchuibhithe a dhéanamh den réamheolaire agus, ar an gcaoi sin, a inléiteacht d’infheisteoirí ar fud an Aontais a fheabhsú, gan beann ar an dlínse ina dtairgtear urrúis don phobal nó ina ligtear isteach iad chun a dtrádála ar mhargadh rialáilte, is gá formáid chaighdeánaithe a thabhairt isteach don réamheolaire le haghaidh urrúis chothromais agus le haghaidh urrúis neamhchothromais araon agus lena cheangal go ndéanfar an fhaisnéis a áirítear sa réamheolaire a nochtadh i seicheamh caighdeánaithe agus, ag an am céanna, a bheith cúramach gan ró-ualú a dhéanamh ar réamheolairí le faisnéis atá iomarcach nó nach bhfuil ábhartha ach ar éigean.

(16)

I gcásanna áirithe, bíonn an réamheolaire nó na doiciméid ghaolmhara an-mhór, rud a fhágann go mbíonn siad mí-oiriúnach d’infheisteoirí chun cinneadh feasach infheistíochta a dhéanamh agus go mbíonn sé róchostasach d’eisitheoirí iad a tháirgeadh mar gheall ar an gcostas a bhaineann le réamheolairí fada. Ina theannta sin, tá éagsúlacht mhór ar fud an Aontais idir fad na réamheolairí agus a bhformáid, rud atá bunoscionn leis an gcuspóir cóineasú a chothú laistigh d’aontas na margaí caipitil. Chun inléiteacht na réamheolairí a fheabhsú, na costais a bhaineann le tarraingt suas réamheolairí a laghdú d’eisitheoirí, cóineasú a chruthú ar fud an Aontais, agus é a dhéanamh níos éasca d’infheisteoirí anailís a dhéanamh ar réamheolairí agus a mbealach a dhéanamh tríothu, is gá uasteorainn leathanaigh a shocrú. Níor cheart, áfach, an teorainn leathanach sin a thabhairt isteach ach le haghaidh tairiscintí don phobal nó le haghaidh scaireanna a ligtear isteach chun a dtrádála ar mhargadh rialáilte. Ní bheadh teorainn leathanach iomchuí maidir le hurrúis chothromais nach scaireanna nó urrúis neamhchothromais iad, lena n-áirítear raon leathan ionstraimí éagsúla, cinn chasta san áireamh. Ba cheart, thairis sin, an méid seo a leanas a eisiamh ón teorainn leathanach: an achoimre; faisnéis a chorpraítear trí thagairt, lena n-áirítear doiciméad clárúcháin uilíoch a fhormheasann údarás inniúil nó a chomhdaítear le húdarás inniúil; faisnéis a áirítear i ndoiciméad clárúcháin uilíoch a úsáidtear mar chuid de réamheolaire; agus faisnéis atá le soláthar i gcás ina bhfuil stair chasta airgeadais ag an eisitheoir nó ina bhfuil gealltanas suntasach airgeadais déanta aige, nó i gcás ollathrú suntasach faoi mar a shainmhínítear i Rialachán Tarmligthe (AE) 2019/980 ón gCoimisiún (11).

(17)

Ba cheart formáid chaighdeánaithe agus ord caighdeánaithe na faisnéise atá le nochtadh i réamheolaire a leagan amach sa Rialachán seo, gan beann ar cé acu a rinneadh nó nach ndearnadh réamheolaire, nó réamheolaire bunaidh, a tharraingt suas mar dhoiciméad aonair nó cé acu atá nó nach bhfuil sé comhdhéanta de dhoiciméid leithleacha, cé is moite de chás ina bhfuil an fhaisnéis san áireamh i ndoiciméad clárúcháin uilíoch. Is gá, dá bhrí sin, go leagtar amach in Iarscríbhinní I, II agus III a ghabhann le Rialachán (AE) 2017/1129 ord caighdeánaithe na ranna chun an fhaisnéis a nochtadh sa réamheolaire, nó, ar leithligh, chun í a nochtadh sa doiciméad clárúcháin agus sa nóta urrús. Ba cheart na hIarscríbhinní sin a bheith ina mbonn don Choimisiún chun leasú a dhéanamh ar aon ghníomh tarmligthe lena bhforchuirtear formáid chaighdeánaithe agus ord caighdeánaithe na ranna den réamheolaire, den réamheolaire bunaidh agus de na téarmaí deiridh, lena n-áirítear maidir le míreanna um nochtadh laistigh de na ranna sin. Ina theannta sin, is gá ord caighdeánaithe na faisnéise atá le nochtadh in achoimre an réamheolaire a leagan amach.

(18)

Chun an t-ualach a laghdú ar eisitheoirí a iarrann ligean isteach chun trádála ar mhargadh rialáilte san Aontas agus, an tráth céanna, a thairgeann urrúis nó a láithríonn iad go príobháideach le hinfheisteoirí i dtríú tír, agus a gceanglófaí orthu roinnt doiciméad a tharraingt suas murach sin, níor cheart feidhm a bheith ag an teorainn leathanach ná ag an bhformáid chaighdeánaithe agus an ord caighdeánaithe maidir le réamheolaire a bhaineann le hurrúis den sórt sin a ligean isteach chun a dtrádála.

(19)

Chun cóineasú a bhaint amach ar fud an Aontais maidir le formáid na réamheolairí, ba cheart a cheangal ar an Údarás Maoirseachta Eorpach (an tÚdarás Eorpach um Urrúis agus Margaí) (ÚEUM)), arna bhunú le Rialachán (AE) Uimh. 1095/2010 ó Pharlaimint na hEorpa agus ón gComhairle (12), dréachtchaighdeáin theicniúla cur chun feidhme a fhorbairt chun teimpléad agus leagan amach na réamheolairí, lena n-áirítear an chlómhéid, agus na ceanglais stíle a shonrú, ag brath ar an gcineál réamheolaire agus ar chineál na n-infheisteoirí a bhfuiltear ag díriú orthu. Ina theannta sin, chun cuidiú le hinfheisteoirí an réamheolaire a láimhseáil, ba cheart a cheangal ar ÚEUM treoirlínte a fhorbairt maidir le sothuigtheacht agus maidir le teanga shimplí a úsáid i réamheolairí chun a áirithiú go mbeidh an fhaisnéis a sholáthraítear iontu gonta, soiléir agus soláimhsithe don úsáideoir, agus aird á tabhairt ar chineál an réamheolaire agus ar chineál na n-infheisteoirí a bhfuiltear ag díriú orthu. Ba cheart don Choimisiún na caighdeáin theicniúla cur chun feidhme sin a ghlacadh trí bhíthin gníomhartha cur chun feidhme de bhun Airteagal 291 den Chonradh ar Fheidhmiú an Aontais Eorpaigh (CFAE) agus i gcomhréir le hAirteagal 15 de Rialachán (AE) Uimh. 1095/2010.

(20)

Is doiciméad tábhachtach agus fíor-riachtanach í achoimre an réamheolaire, a fheidhmíonn mar threoir chun tacú le hinfheisteoirí miondíola tuiscint níos fearr a fháil ar an réamheolaire ina iomláine agus a mbealach a dhéanamh tríd agus, ar an gcaoi sin, cinntí feasacha infheistíochta a dhéanamh. Chun go mbeidh achoimre an réamheolaire níos soléite agus níos sothuigthe d’infheisteoirí miondíola, is gá ligean d’eisitheoirí faisnéis a chur i láthair nó achoimre a thabhairt uirthi in achoimre an réamheolaire i bhfoirm cairteacha, graf nó táblaí, laistigh den teorainn leathanach a leagtar amach in Airteagal 7 de Rialachán (AE) 2017/1129.

(21)

Le Rialachán (AE) 2017/1129, ceadaítear d’eisitheoirí leathanach amháin a chur le huasfhad achoimre an réamheolaire i gcás ina bhfuil ráthaíocht ag gabháil leis na hurrúis, ós rud é nach mór faisnéis faoin ráthaíocht agus faoin ráthóir araon a sholáthar. I gcás ina bhfuil níos mó ná ráthóir amháin ann, áfach, d’fhéadfadh sé nach leor leathanach breise. Is gá, dá bhrí sin, foráil a dhéanamh maidir le fad achoimre an réamheolaire a leathnú a thuilleadh i gcás ráthaíochtaí a sholáthraíonn níos mó ná ráthóir amháin.

(22)

Chun coinníollacha aonfhoirmeacha a áirithiú maidir le cur i bhfeidhm na gceanglas maidir le hachoimre an réamheolaire, ba cheart a cheangal ar ÚEUM dréachtchaighdeáin theicniúla cur chun feidhme a fhorbairt chun teimpléad agus leagan amach achoimrí a shonrú, lena n-áirítear na ceanglais chlómhéide agus stíle. Ina theannta sin, chun cuidiú le hinfheisteoirí miondíola a mbealach a dhéanamh trí achoimre an réamheolaire, ba cheart a cheangal ar ÚEUM treoirlínte a fhorbairt maidir le sothuigtheacht agus maidir le teanga shimplí a úsáid in achoimrí chun a áirithiú go mbeidh an fhaisnéis a sholáthraítear iontu gonta, soiléir agus soláimhsithe don úsáideoir. Ba cheart don Choimisiún na caighdeáin theicniúla cur chun feidhme sin a ghlacadh trí bhíthin gníomhartha cur chun feidhme de bhun Airteagal 291 CFAE agus i gcomhréir le hAirteagal 15 de Rialachán (AE) Uimh. 1095/2010.

(23)

Le Rialachán (AE) 2017/1129, ceadaítear d’eisitheoir ar fhormheas údaráis inniúil doiciméad clárúcháin inniúil dó nó di ar feadh tréimhse 2 bhliain airgeadais as a chéile stádas eisitheora rialta a bheith aige nó aici agus a bheith in ann gach doiciméad clárúcháin uilíoch, agus aon leasú orthu, a chomhdú ina dhiaidh sin gan formheas a fháil roimh ré. Chun ualaí nach bhfuil gá leo a laghdú agus chun úsáid an doiciméid clárúcháin uilíoch a dhreasú, ba cheart an tréimhse sin a laghdú go bliain airgeadais amháin. Ní bheidh tionchar ag an maolú sin ar chosaint infheisteoirí, toisc nach féidir an doiciméad clárúcháin uilíoch ná aon leasú air a úsáid mar chomhchuid de réamheolaire gan é a bheith formheasta ag an údarás inniúil iomchuí. Ina theannta sin, tá cead ag údarás inniúil athbhreithniú a dhéanamh ar dhoiciméad clárúcháin uilíoch a comhdaíodh leis ar bhonn ex post aon uair a mheasann an t-údarás inniúil sin gur gá sin agus, i gcás inarb iomchuí, aon uair a iarrann sé leasuithe.

(24)

Chun TTP cuideachtaí príobháideacha ar mhargaí poiblí an Aontais a éascú agus, go ginearálta, chun costais neamhriachtanacha agus ualaí neamhriachtanacha a laghdú do chuideachtaí a thairgeann urrúis don phobal nó a iarann ligean isteach chun a dtrádála ar mhargadh rialáilte, ba cheart cuíchóiriú suntasach a dhéanamh ar an réamheolaire le haghaidh urrúis chothromais agus neamhchothromais araon, agus a áirithiú go gcoinneofar ardleibhéal leordhóthanach cosanta infheisteoirí.

(25)

Cé go bhfuil sé ró-shaintreorach do FBManna, is cosúil go mbeadh an leibhéal nochta i Réamheolaire Fáis AE oiriúnach don fheidhm do chuideachtaí a iarann ligeann isteach chun trádála iad ar mhargadh rialáilte. Is iomchuí, dá bhrí sin, Iarscríbhinní I, II agus III a ghabhann le Rialachán (AE) 2017/1129 a ailíniú le leibhéal nochta an réamheolaire fáis AE, trí na hIarscríbhinní gaolmhara a leagtar síos i Rialachán Tarmligthe (AE) 2019/980 a ghlacadh mar thagairt.

(26)

Mar gheall ar an tábhacht mhéadaitheach a bhaineann le breithnithe inbhuanaitheachta i gcinntí infheistíochta, tá infheisteoirí ag féachaint níos mó i gcónaí ar fhaisnéis faoi chúrsaí comhshaoil, sóisialta agus rialachais (ESG) agus cinntí feasacha infheistíochta á ndéanamh acu. Is gá, dá bhrí sin, cosc a chur ar ghlas-snasú, trí leagan síos na faisnéise a bhaineann le ESG a bheidh le soláthar, i gcás inarb ábhartha, sa réamheolaire i ndáil le hurrúis chothromais nó neamhchothromais a thairgtear don phobal nó a ligtear isteach chun a dtrádála ar mhargadh rialáilte. Níor cheart, áfach, forluí a bheith ann idir an ceanglas sin agus an ceanglas a leagtar síos i ngníomhartha reachtacha eile de chuid an Aontais an fhaisnéis sin a sholáthar. Cuideachtaí a thairgeann urrúis chothromais don phobal nó a iarrann urrúis chothromais a ligean isteach chun a dtrádála ar mhargadh rialáilte, ba cheart dóibh, dá bhrí sin, na tuarascálacha bainistíochta agus na tuarascálacha comhdhlúite bainistíochta a chorprú trí thagairt sa réamheolaire, ar feadh na dtréimhsí a chumhdaítear leis an bhfaisnéis airgeadais stairiúil, lena n-áirítear an tuairisciú inbhuanaitheachta, mar a cheanglaítear le Treoir 2013/34/AE ó Pharlaimint na hEorpa agus ón gComhairle (13). Ina theannta sin, ba cheart an chumhacht a thabhairt don Choimisiún sceidil a leagan amach ina sonrófar an fhaisnéis a bhaineann le ESG atá le cuimsiú i réamheolairí maidir le hurrúis neamhchothromais a fhógraítear mar urrúis ina gcuirtear tosca ESG san áireamh nó ina saothraítear cuspóirí ESG. Ba cheart don Choimisiún comhsheasmhacht a áirithiú idir an fhaisnéis a cheanglaítear a nochtadh i réamheolaire agus, i gcás inarb infheidhme, na nochtaí inbhuanaitheachta a cheanglaítear faoi Threoir 2013/34/AE nó, i gcás inarb infheidhme, na nochtaí inbhuanaitheachta a cheanglaítear faoi Rialachán (AE) 2023/2631 ó Pharlaimint na hEorpa agus ón gComhairle (14), gan an bonn a bhaint de chineál deonach an lipéid agus de na teimpléid um rogha a bheith páirteach a leagtar amach sa Rialachán sin.

(27)

Foráiltear in Airteagal 14 de Rialachán (AE) 2017/1129 go bhféadfaí réamheolaire simplithe a tharraingt suas le haghaidh eisiúintí tánaisteacha a dhéanann cuideachtaí a ligeadh isteach chun trádála cheana ar mhargadh rialáilte nó ar mhargadh fáis FBManna go leanúnach ar feadh 18 mí ar a laghad. Mar sin féin, meastar go bhfuil leibhéal nochta na réamheolairí simplithe le haghaidh eisiúintí tánaisteacha fós ró-shaintreorach agus róchosúil le leibhéal nochta réamheolaire chaighdeánaigh chun difríocht shuntasach a dhéanamh maidir le heisiúintí tánaisteacha cuideachtaí ar ligeadh a n-urrúis isteach cheana chun a dtrádála ar mhargadh rialáilte nó ar mhargadh fáis FBManna agus atá faoi réir ceanglais maidir le nochtadh tréimhsiúil agus leanúnach. Chun go mbeidh sé níos éasca an doiciméadacht um liostú a thuiscint, agus mar sin chun cosaint infheisteoirí a dhéanamh níos éifeachtaí, agus costais agus ualaí d’eisitheoirí a laghdú, ba cheart ‘Réamheolaire Leantach an Aontais Eorpaigh (an réamheolaire leantach AE)’ nua agus níos éifeachtaí a thabhairt isteach le haghaidh na n-eisiúintí tánaisteacha sin. Chun teorainn a chur le hualaí ar eisitheoirí agus chun infheisteoirí a chosaint, áfach, is gá foráil a dhéanamh maidir le hidirthréimhse do réamheolairí arna bhformheas faoin gcóras nochta simplithe le haghaidh eisiúintí tánaisteacha roimh dháta chur i bhfeidhm an chórais nua. Ba cheart réamheolaire leantach AE den sórt sin a bheith ar fáil do chatagóirí éagsúla eisitheoirí ar ligeadh a n-urrúis isteach chun a dtrádála ar mhargadh rialáilte nó ar mhargadh fáis FBManna go leanúnach ar feadh na 18 mí roimhe sin ar a laghad, nó do thairgeoirí urrús den sórt sin. Ba cheart a áirithiú leis na critéir sin gur chomhlíon na heisitheoirí sin na ceanglais maidir le nochtadh tréimhsiúil agus leanúnach a leagtar síos i dTreoir 2004/109/CE, i gcás inarb infheidhme, Rialachán (AE) Uimh. 596/2014, nó, i gcás inarb infheidhme, Rialachán Tarmligthe (AE) 2017/565.

(28)

Chun gur féidir le heisitheoirí lántairbhe a bhaint as an réamheolaire leantach AE mar chineál réamheolaire maolaithe, ba cheart a raon feidhme a bheith leathan agus ba cheart a chuimsiú ann tairiscintí poiblí urrús nó urrúis a ligean isteach chun a dtrádála ar mhargadh rialáilte ar urrúis iad atá idirmhalartach nó neamh-idirmhalartach le hurrúis a ligeadh isteach cheana chun a dtrádála. Ina theannta sin, chun go mbeidh cuideachtaí rathúla in ann méadú agus tairbhe a bhaint as bonn níos leithne infheisteoirí a bheith ar fáil dóibh, ba cheart an réamheolaire leantach AE a bheith ar fáil do chuideachtaí atá ag iarraidh aistriú ó mhargadh fáis FBManna go margadh rialáilte, ar an gcoinníoll gur ligeadh a n-urrúis isteach chun a dtrádála ar mhargadh fáis FBManna go leanúnach ar feadh na 18 mí roimhe ar a laghad. Mar sin féin, maidir le heisitheoir nach ligtear isteach ach a urrúis neamhchothromais chun a dtrádála ar mhargadh rialáilte nó ar mhargadh fáis FBManna, níor cheart cead a bheith aige nó aici réamheolaire leantach AE a tharraingt suas chun urrúis chothromais a ligean isteach chun a dtrádála ar mhargadh rialáilte, toisc go n-éilítear leis sin go nochtfaí réamheolaire iomlán chun gur féidir le hinfheisteoirí cinneadh feasach infheistíochta a dhéanamh.

(29)

Ón 31 Nollaig 2022 i leith, ní féidir an réamheolaire téarnaimh AE dá dtagraítear i Rialachán (AE) 2017/1129 a úsáid a thuilleadh. Ba é an buntáiste a bhí leis an réamheolaire téarnaimh AE gur dhoiciméad aonair é a bhí teoranta ó thaobh méide de, rud a d’fhág go raibh sé éasca ar eisitheoirí é a tharraingt suas agus ar infheisteoirí é a thuiscint. Ar na cúiseanna sin, i gcás ina mbaineann an réamheolaire Leantach AE le scaireanna agus ina bhfuil sé faoi réir teorainn leathanach, d’fhéadfadh an réamheolaire Leantach AE samhail chomhchosúil a leanúint agus ba cheart é a bheith faoi réir na tréimhse grinnscrúdaithe laghdaithe céanna agus a bhí an réamheolaire téarnaimh AE. Mar sin féin, níor cheart feidhm a bheith ag an tréimhse theoranta grinnscrúdaithe i gcás aistriú ó mhargadh fáis FBManna chuig margadh rialáilte. Ina theannta sin, níor cheart, ar chúiseanna follasacha, nochtaí a bhaineann le géarchéim COVID-19 a éileamh le ceanglais an réamheolaire leantaigh AE. Ós rud é gur cheart an réamheolaire leantach AE a chur in ionad an réamheolaire shimplithe le haghaidh eisiúintí tánaisteacha agus an réamheolaire téarnaimh AE, ba cheart é a bheith buan agus a chur ar fáil le haghaidh eisiúintí tánaisteacha urrús cothromais agus neamhchothromais araon. Ina theannta sin, níor cheart úsáid an réamheolaire leantaigh AE sin a bheith faoi réir aon srianta thar an gceanglas maidir le híostréimhse agus le tréimhse leanúnach chun urrúis lena mbaineann a ligean isteach chun a dtrádála ar mhargadh rialáilte nó ar mhargadh fáis FBManna.

(30)

Ba cheart achoimre maolaithe a bheith sa réamheolaire leantach AE mar fhoinse faisnéise úsáideach le haghaidh infheisteoirí miondíola. Ba cheart an achoimre sin a leagan amach ag tús an réamheolaire leantaigh AE agus ba cheart díriú inti ar fhaisnéis bhunriachtanach lena gcuirfear ar chumas infheisteoirí a chinneadh cé acu de na tairiscintí don phobal agus ligean isteach urrús chun a dtrádála a ndéanfaidh siad tuilleadh staidéir orthu, agus athbhreithniú a dhéanamh ina dhiaidh sin ar an réamheolaire leantach AE ina iomláine chun cinneadh feasach infheistíochta a dhéanamh. Mar sin féin, níor cheart an achoimre a bheith riachtanach chun urrúis neamhchothromais dá dtagraítear in Airteagal 7(1) de Rialachán (AE) 2017/1129 a ligean isteach chun a dtrádála.

(31)

Chun doiciméad comhchuibhithe a dhéanamh den réamheolaire leantach AE agus chun a inléiteacht a éascú d’infheisteoirí ar fud an Aontais, gan beann ar an dlínse ina dtairgtear urrúis don phobal nó ina ligtear isteach iad chun a dtrádála ar mhargadh rialáilte, ba cheart leagan amach an doiciméid a chaighdeánú le haghaidh urrúis chothromais agus urrúis neamhchothromais araon. Ar an gcúis chéanna, ba cheart an fhaisnéis sa réamheolaire leantach AE a nochtadh in ord caighdeánaithe. Mar sin féin, chun tacú le heisiúintí tánaisteacha urrús neamhchothromais, lena n-áirítear mar chuid de chláir thairisceana, ba cheart raon feidhme chur i bhfeidhm an réamheolaire leantaigh AE le haghaidh urrúis neamhchothromais a bheith leathan, agus an deis a thabhairt d’eisitheoirí é a tharraingt suas mar dhoiciméad aonair, nó mar dhoiciméid ar leithligh.

(32)

Chun inléiteacht an réamheolaire leantaigh AE a fheabhsú agus chun é a dhéanamh níos éasca d’infheisteoirí anailís a dhéanamh air agus a mbealach a dhéanamh tríd, ba cheart é a bheith faoi réir teorainn leathanach le haghaidh eisiúintí tánaisteacha scaireanna. Os a choinne sin, ní bheadh teorainn leathanach iomchuí do chatagóir leathan urrús cothromais seachas scaireanna nó urrús neamhchothromais, lena n-áirítear raon leathan ionstraimí éagsúla, ionstraimí casta san áireamh. Ba cheart, thairis sin, an méid seo a leanas a eisiamh ón teorainn leathanach: an achoimre; faisnéis a chorpraítear trí thagairt, lena n-áirítear doiciméad clárúcháin uilíoch a fhormheasann údarás inniúil nó a chomhdaítear le húdarás inniúil; agus faisnéis atá le soláthar i gcás ina bhfuil stair chasta airgeadais ag an eisitheoir nó ina bhfuil gealltanas suntasach airgeadais déanta aige nó aici, nó i gcás ollathrú suntasach.

(33)

Ceann de phríomhchuspóirí Aontas na Margaí Caipitil is ea rochtain FBManna ar mhargaí poiblí san Aontas a éascú, agus foinsí cistiúcháin seachas iasachtú bainc a sholáthar do na FBManna sin agus an deis a thabhairt dóibh méadú agus fás. D’fhéadfadh an costas a bhaineann le réamheolaire a tháirgeadh a bheith ina dhíspreagadh do FBManna atá sásta urrúis a thairiscint don phobal, agus gnáthmhéid bheag chomaoin na dtairiscintí sin á meas. Réamheolaire níos éadroime is ea an réamheolaire fáis AE, a tugadh isteach le Rialachán (AE) 2017/1129, agus tá sé ar fáil do FBManna agus do roinnt catagóirí eile tairbhithe, lena n-áirítear cuideachtaí a bhfuil caipitliú margaidh suas le EUR 500 milliún acu agus ar ligeadh a n-urrúis isteach cheana chun a dtrádála ar mhargadh fáis FBManna. Bhí sé d’aidhm ag an réamheolaire fáis AE na costais a bhaineann le réamheolaire a ullmhú d’eisitheoirí beaga a laghdú, agus ag am céanna faisnéis ábhartha a sholáthar d’infheisteoirí chun an tairiscint a mheas agus cinneadh feasach infheistíochta a dhéanamh. Cé gur féidir le heisitheoirí a dhréachtaíonn réamheolaire fáis AE coigilteas costas measartha mór a bhaint amach, meastar go bhfuil an leibhéal nochta a dhéantar i réamheolaire fáis AE fós ró-shaintreorach agus róchosúil le réamheolaire caighdeánach chun difríocht shuntasach a dhéanamh do FBManna. Dá bhrí sin, tá gá le réamheolaire eisiúna fáis AE ina bhfuil riachtanais níos éadroime chun nach mbeidh an doiciméadacht um liostú do FBManna chomh casta trom agus lena mbeidh FBManna in ann coigilteas níos tábhachtaí fós a bhaint amach. Chun teorainn a chur leis na hualaí ar eisitheoirí agus chun infheisteoirí a chosaint, is gá, áfach, foráil a dhéanamh maidir le hidirthréimhse le haghaidh Réamheolairí Fáis de chuid AE a fhormheasfar roimh dháta chur i bhfeidhm an chórais nua.

(34)

Ba cheart na ceanglais a bhaineann le hinneachar an réamheolaire eisiúna fáis AE a bheith éadrom, ag cur san áireamh leibhéal nochta an réamheolaire téarnaimh AE agus cuid de na doiciméid is simplí um ligean isteach a éilíonn roinnt margaí fáis FBManna ar eisitheoirí a tháirgeadh i gcás díolúine ón oibleagáid maidir le réamheolaire a fhoilsiú; tá ábhar na ndoiciméad sin leagtha síos i leabhair rialacha na margaí fáis FBManna. Ba cheart an fhaisnéis laghdaithe atá le nochtadh sa réamheolaire eisiúna fáis AE a bheith comhréireach le méid na gcuideachtaí atá liostaithe ar na margaí fáis FBManna agus lena riachtanais tiomsaithe airgid agus ba cheart leibhéal leordhóthanach cosanta d’infheisteoirí a áirithiú léi. Ina theannta sin, ba cheart doiciméad amháin a bheith sa réamheolaire eisiúna fáis AE, ionas go mbeidh sé éasca agus simplí do chuideachtaí, go háirithe FBManna, é a tharraingt suas agus go mbeidh sé éasca ar infheisteoirí é a léamh.

(35)

Ba cheart an réamheolaire fáis eisiúna AE a bheith ar fáil do FBManna, eisitheoirí seachas FBManna a ligtear a n-urrúis isteach nó a bhfuil a n-urrúis le ligean isteach chun a dtrádála ar mhargadh fáis FBManna, agus cuideachtaí beaga neamhliostaithe nach airde ná EUR 50 000 000 thar thréimhse 12 mhí a gcomaoin iomlán i leith na n-urrús a thairgtear don phobal. Chun caighdeán nochta dhá shraith ar mhargaí rialáilte a sheachaint, ag brath ar mhéid an eisitheora, níor cheart an réamheolaire fáis eisiúna AE a bheith ar fáil do chuideachtaí ar ligeadh a n-urrúis isteach cheana nó a bhfuil a n-urrúis le ligean isteach chun a dtrádála ar mhargaí rialáilte. Mar sin féin, chun uasghrádú chuig margadh rialáilte a éascú agus chun go mbeidh eisitheoirí in ann tairbhe a bhaint as bonn níos leithne infheisteoirí a bheith ar fáil dóibh, ba cheart eisitheoirí ar ligeadh a n-urrúis isteach cheana chun a dtrádála ar mhargadh fáis FBManna go leanúnach ar feadh na 18 mí roimhe ar a laghad a cheadú chun an réamheolaire leantach AE a úsáid chun aistriú chuig margadh rialáilte.

(36)

Ba cheart achoimre mhaolaithe a bheith sa réamheolaire fáis eisiúna AE, mar fhoinse faisnéise úsáideach d’infheisteoirí miondíola, ag a mbeadh an leagan amach agus an t-ábhar céanna agus atá ag an réamheolaire leantach AE. Ba cheart an achoimre sin a leagan amach ag tús an réamheolaire eisiúna fáis AE agus ba cheart díriú inti ar fhaisnéis bhunriachtanach lena mbeidh infheisteoirí in ann a chinneadh cé acu de na tairiscintí urrús don phobal a ndéanfaidh siad tuilleadh staidéir orthu, agus athbhreithniú a dhéanamh ina dhiaidh sin ar an réamheolaire eisiúna fáis AE ina iomláine chun cinneadh feasach infheistíochta a dhéanamh.

(37)

Ba cheart an réamheolaire eisiúna fáis AE a bheith ina dhoiciméad comhchuibhithe atá éasca d’eisitheoirí, go háirithe FBManna, é a tharraingt suas agus atá éasca d’infheisteoirí é a léamh, gan beann ar an dlínse laistigh den Aontas ina dtairgtear na hurrúis lena mbaineann don phobal. Ba cheart, dá bhrí sin, leagan amach an doiciméid a chaighdeánú le haghaidh urrúis chothromais agus urrúis neamhchothromais araon agus ba cheart an fhaisnéis a áirítear sa réamheolaire eisiúna fáis AE a nochtadh in ord caighdeánaithe. Chun inléiteacht an réamheolaire eisiúna fáis AE a chaighdeánú agus a fheabhsú a thuilleadh agus chun é a dhéanamh níos éasca d’infheisteoirí anailís a dhéanamh air agus a mbealach a dhéanamh tríd, ba cheart teorainn leathanach a thabhairt isteach i gcás ina dtarraingeofar suas réamheolaire eisiúna fáis AE le haghaidh eisiúintí scaireanna. Ba cheart an teorainn leathanach sin a bheith éifeachtach freisin ó thaobh an fhaisnéis is gá a sholáthar le go mbeidh infheisteoirí in ann cinntí feasacha infheistíochta a dhéanamh agus ba cheart í a bheith éifeachtúil ó thaobh na gceanglas níos éadroime maidir le hinneachar an réamheolaire eisiúna fáis AE. Bheadh teorainn leathanach míchuí, áfach, do chatagóir leathan urrús cothromais seachas scaireanna nó urrús neamhchothromais, lena gcuimsítear raon leathan ionstraimí éagsúla, ionstraimí casta san áireamh. Lena chois sin, ba cheart an méid seo a leanas a eisiamh ón teorainn leathanach: an achoimre, aon fhaisnéis a chorpraítear trí thagairt, agus aon fhaisnéis atá le soláthar i gcás ina bhfuil stair chasta airgeadais ag an eisitheoir nó ina bhfuil gealltanas airgeadais suntasach déanta aige, nó i gcás ollathrú suntasach.

(38)

Leis an réamheolaire leantach AE agus an réamheolaire eisiúna fáis AE, ba cheart na réamheolairí caighdeánacha i Rialachán (AE) 2017/1129 a chomhlánú. Dá bhrí sin, mura luaitear a mhalairt go sainráite, tá gach tagairt do ‘réamheolaire’ faoi Rialachán (AE) 2017/1129 le tuiscint mar thagairt do gach cineál réamheolaire éagsúil, lena n-áirítear an réamheolaire leantach AE agus an réamheolaire eisiúna fáis AE. Tugtar le tuiscint, le cineál deonach na gcineálacha réamheolaire, gur féidir le heisitheoir ceann de na cineálacha réamheolaire atá ar fáil a roghnú i gcás ina bhfuil gá le réamheolaire le tairiscint don phobal nó ligean isteach chun trádála ar mhargadh rialáilte.

(39)

Chun muinín a chothú in úsáid an réamheolaire leantaigh AE agus an réamheolaire eisiúna fáis AE, tá sé tábhachtach go mbeadh a n-éifeachtacht agus a raon feidhme soiléir, ós rud é go bhfuil an réamheolaire leantach AE agus an réamheolaire eisiúna fáis AE faoi réir an chórais dliteanais chéanna agus atá réamheolaire iomlán, le haghaidh tairiscintí intíre agus trasteorann nó ligean isteach chun trádála. Dá bhrí sin, i gcás ina bhfuil eisitheoir i dteideal réamheolaire leantach AE nó réamheolaire eisiúna fáis AE a úsáid, a bhfágann an dá cheann acu go bhfuil ullmhú an idirbhirt atá i gceist níos éifeachtúla agus níos éadroime, agus nach ann d’aon chomaoin ábhartha eile i gcoinne úsáid aon cheann de na réamheolairí sin, ba cheart rogha an eisitheora as measc na gcineálacha réamheolaire atá ar fáil don eisitheoir a chosaint agus níor cheart do chomhairleoirí ná d’údaráis inniúla an t-eisitheoir a chur i dtreo réamheolaire iomlán a tharraingt suas i gcás nach bhfuil dianghá leis sin.

(40)

Ba cheart tosca riosca atá ábhartha agus sonrach don eisitheoir agus dá urrúis a lua sa réamheolaire. Ar an gcúis sin, cuirfear tosca riosca i láthair freisin i líon teoranta catagóirí riosca, ag brath ar a gcineál. Chun an t-ualach ar eisitheoirí a laghdú, áfach, in ionad an cheanglais chun na tosca riosca is ábhartha a rangú, ba cheart ceanglas a chur, i ngach catagóir, chun na tosca riosca is ábhartha a liostú ar bhealach atá comhsheasmhach leis an measúnú a dhéanann an t-eisitheoir. Chun an réamheolaire a dhéanamh níos intuigthe agus chun é a dhéanamh níos éasca d’infheisteoirí cinntí feasacha infheistíochta a dhéanamh, is gá a shonrú nár cheart d’eisitheoirí barraíocht tosca riosca cineálacha a chur sa réamheolaire, tosca nach bhfeidhmíonn ach mar shéanadh, nó a bhféadfadh tosca sonracha riosca ar cheart d’infheisteoirí a bheith ar an eolas fúthu a cheilt leo.

(41)

Faoi Airteagal 17(1) de Rialachán (AE) 2017/1129, i gcás nach féidir praghas tairisceana deiridh nó méid na n-urrús atá le tairiscint don phobal a chur sa réamheolaire, tá ceart chun tarraingt siar ag an infheisteoir ar féidir é a fheidhmiú laistigh de 2 lá oibre tar éis an praghas tairisceana deiridh nó méid na n-urrús atá le tairiscint don phobal a chomhdú. Chun an leibhéal cosanta d’infheisteoirí a mhéadú, ba cheart síneadh a chur leis an tréimhse inar féidir le hinfheisteoirí an ceart chun tarraingt siar a fheidhmiú.

(42)

Le hAirteagal 19 de Rialachán (AE) 2017/1129, tugtar an deis d’eisitheoirí faisnéis áirithe a chorprú sa réamheolaire trí thagairt a dhéanamh. Tugadh an fhéidearthacht sin isteach chun an t-ualach ar eisitheoirí a laghdú agus dúbláil faisnéise a nochtadh agus a foilsíodh cheana faoi dhlí eile um sheirbhísí airgeadais an Aontais a sheachaint. Éascófar a thuilleadh an fhéidearthacht faisnéis a chorprú trí thagairt amach anseo, a luaithe a bheidh infheisteoirí in ann rochtain a fháil uirthi ar bhealach níos éifeachtúla agus níos éifeachtaí ar an ionad Eorpach ilfhreastail aonair (‘ESAP’) a bunaíodh le Rialachán (AE) 2023/2859 ó Pharlaimint na hEorpa agus ón gComhairle (15). Le ESAP, ba cheart d’infheisteoirí a bheith in ann an chuid is mó d’fhaisnéis ábhartha a aimsiú in aon áit amháin, agus ar an gcaoi sin rochtain ar fhaisnéis a chorpraítear trí thagairt i réamheolairí a éascú a thuilleadh. Ina theannta sin, ba cheart cead a bheith ag cuideachtaí i gcónaí faisnéis nach bhfuil le nochtadh i réamheolaire a chorprú trí thagairt ar bhonn deonach, ar choinníoll go gcomhlíonann an fhaisnéis sin na coinníollacha a leagtar síos i Rialachán (AE) 2017/1129 maidir le corprú trí thagairt.

(43)

Chun deireadh a chur le costais agus ualaí nach bhfuil gá leo agus chun éifeachtúlacht agus éifeachtacht chorprú na faisnéise sa réamheolaire trí thagairt a mhéadú, ba cheart a shoiléiriú nár cheart a cheangal ar chuideachtaí forlíonadh a fhoilsiú le haghaidh faisnéis airgeadais bhliantúil nó eatramhach nua i réamheolaire bunaidh atá fós bailí, murab ionann agus na cásanna a shonraítear i Rialachán Tarmligthe (AE) 2019/979. Ina ionad sin, ba cheart a bheith in ann an fhaisnéis airgeadais bhliantúil nó eatramhach nua a chorprú trí thagairt sa réamheolaire bunaidh, ar choinníoll go gcomhlíontar na ceanglais maidir le corprú trí thagairt, amhail foilsiú leictreonach agus ceanglais teanga. Mar sin féin, ba cheart cead a bheith ag cuideachtaí an fhaisnéis sin a fhoilsiú go deonach i bhforlíonadh.

(44)

Le Rialachán (AE) 2017/1129 cuirtear chun cinn cóineasú agus comhchuibhiú rialacha a bhaineann le grinnscrúdú agus formheas a dhéanann údaráis inniúla ar réamheolairí. Go sonrach, rinneadh na critéir maidir le grinnscrúdú ar iomláine, intuigtheacht agus comhsheasmhacht an réamheolaire a leagan síos i Rialachán Tarmligthe (AE) 2019/980. Níl an liosta critéar sin uileghabhálacha, áfach, toisc gur cheart an fhéidearthacht a bheith ann nuálaíochtaí sna margaí airgeadais a chur san áireamh. Dá thoradh sin, le Rialachán Tarmligthe (AE) 2019/980, ceadaítear d’údaráis inniúla critéir bhreise a chur i bhfeidhm maidir le réamheolairí a ghrinnscrúdú agus a fhormheas i gcás inar gá chun infheisteoirí a chosaint. Cuireadh in iúl sa tuarascáil athbhreithnithe piaraí ó ÚEUM gur cruthaíodh leis an bhféidearthacht sin difríochtaí ábhartha sa chaoi a gcuireann údaráis inniúla critéir bhreise ghrinnscrúdaithe i bhfeidhm agus a n-iarrann siad ar eisitheoirí faisnéis bhreise a sholáthar sa réamheolaire faoina ngrinnscrúdú.

(45)

Chun cóineasú agus comhchuibhiú na gníomhaíochta maoirseachta réamheolaire a dhéanann na húdaráis inniúla a chothú, ar cheart di deimhneacht a thabhairt d’eisitheoirí agus muinín a thabhairt d’infheisteoirí, is iomchuí na himthosca a shonrú faoinar féidir údarás inniúil na critéir bhreise sin a úsáid, an cineál faisnéise breise a bhféadfaidh na húdaráis inniúla a cheangal í a nochtadh sa bhreis ar an bhfaisnéis a cheanglaítear chun réamheolaire, réamheolaire leantach AE nó réamheolaire eisiúna fáis AE a tharraingt suas, lena n-áirítear an cineál faisnéise breise a bhféadfaí a cheangal í a nochtadh de réir na gcritéar breise agus an amlíne chun an réamheolaire a fhormheas.

(46)

Chun a áirithiú go gcuirtear eisitheoirí ar an eolas go tráthúil maidir le toradh an ghrinnscrúdaithe ar a réamheolaire, ba cheart a chur de cheangal ar údaráis inniúla spriocdháta soiléir lena ngrinnscrúdú a urramú. I gcás ina mainnítear cinneadh a dhéanamh maidir leis an réamheolaire laistigh de na teorainneacha ama a leagtar síos, ba cheart d’údarás inniúil an chúis leis an mainneachtain sin a chur in iúl don eisitheoir, don tairgeoir nó don duine a iarrann ligean isteach chun trádála ar mhargadh rialáilte agus do ÚEUM, ar cheart dó tuarascáil chomhiomlán a fhoilsiú ar bhonn bliantúil maidir leis na húdaráis inniúla a bheith ag comhlíonadh na dteorainneacha ama a leagtar síos. Ina theannta sin, ba cheart do na Ballstáit a áirithiú go bhfuil bearta iomchuí i bhfeidhm chun aghaidh a thabhairt ar aon mhainneachtain ag na húdaráis inniúla na teorainneacha ama a leagtar síos a chomhlíonadh chun cinneadh a dhéanamh maidir leis an réamheolaire. Níor cheart a mheas, áfach, gurb ionann mainneachtain den sórt sin agus an t-iarratas a fhormheas.

(47)

Ina theannta sin, ba cheart uastréimhse ama a shocrú chun bailchríoch a chur ar an nós imeachta grinnscrúdaithe agus i gcomhair chinneadh an údaráis inniúil maidir leis an réamheolaire. Ós rud é go bhfuil tionchar ag fachtóirí nach bhfuil neart ag an údarás inniúil orthu ar fhad an nós imeachta maidir le grinnscrúdú freisin, ba cheart an tréimhse ama a leagan síos mar uasfhad an nós imeachta ina iomláine, lena gcumhdófaí gníomhaíochtaí ón duine atá ag déanamh iarratais ar réamheolaire a fhormheas agus ón údarás inniúil araon. Ós rud é go bhféadfadh sé a bheith deacair gach cás nach féidir grinnscrúdú a thabhairt chun críche laistigh den tréimhse ama a leagtar síos a réamh-mheas, tá sé tábhachtach na coinníollacha a shonrú maidir le maoluithe a d’fhéadfadh a bheith ann ón tréimhse ama sin. Ina theannta sin, ar an gcaoi chéanna leis na teorainneacha ama a leagtar síos in Airteagal 20 de Rialachán (AE) 2017/1129, má mhainníonn an t-údarás inniúil cinneadh a dhéanamh maidir leis an réamheolaire laistigh den uastréimhse ama sin, níor cheart a mheas gurb ionann sin agus an réamheolaire a fhormheas. Ar mhaithe leis an tsoiléireacht dhlíthiúil, ba cheart a shoiléiriú sa sainmhíniú ar ‘formheas’ nach mbaineann sé le cruinneas na faisnéise i réamheolaire.

(48)

Rinneadh athbhreithniú piaraí ÚEUM ar ghrinnscrúdú agus formheas réamheolairí ag na húdaráis inniúla agus foilsíodh an tuarascáil athbhreithnithe piaraí roimh an togra ón gCoimisiún le haghaidh an Rialacháin leasaithigh seo. Ós rud é gur féidir le ÚEUM athbhreithnithe piaraí a dhéanamh tráth ar bith a mheasann ÚEUM a bheith iomchuí i gcomhréir le Rialachán (AE) Uimh. 1095/2010, ní gá ceanglas den sórt sin a shonrú i Rialachán (AE) 2017/1129. Dá bhrí sin, ba cheart Airteagal 20(13) de Rialachán (AE) 2017/1129 a bhaint, lena gcuirtear de cheangal ar ÚEUM athbhreithniú piaraí ar nósanna imeacht na n-údarás inniúil maidir le grinnscrúdú agus formheas a eagrú agus a dhéanamh.

(49)

Ceanglaítear le hAirteagal 21(1) de Rialachán (AE) 2017/1129, i gcás TTP d’aicme scaireanna a ligtear isteach chun a trádála ar mhargadh rialáilte den chéad uair, réamheolaire a fhoilsiú 6 lá oibre ar a laghad roimh dheireadh na tairisceana. Chun próisis leabharbhunaithe thapa a chothú, go háirithe i margaí mearghluaiseachta, agus chun cur le tarraingteacht chuimsiú na n-infheisteoirí miondíola i dtairiscintí den chineál sin, ba cheart an íostréimhse reatha 6 lá idir foilsiú an réamheolaire agus deireadh tairisceana scaireanna a laghdú, gan dul i gcion ar chosaint infheisteoirí.

(50)

Chun sonraí a bhailiú lena dtacaítear le measúnú ar an réamheolaire leantach AE agus ar an réamheolaire eisiúna fáis AE, ba cheart leis an sásra stórála dá dtagraítear in Airteagal 21(6) de Rialachán (AE) 2017/1129 an réamheolaire leantach AE agus an réamheolaire eisiúna fáis AE a chumhdach, ar cheart iad a idirdhealú go soiléir ó na cineálacha eile réamheolairí.

(51)

Chun dáileadh an réamheolaire ar infheisteoirí ionchasacha a dhéanamh níos inbhuanaithe, chun digitiú san earnáil airgeadais a mhéadú agus chun deireadh a chur le costais neamhriachtanacha, níor cheart infheisteoirí ionchasacha a bheith i dteideal cóip pháipéir de réamheolaire a iarraidh a thuilleadh. Dá bhrí sin, níor cheart cóip den réamheolaire a sheachadadh chuig infheisteoirí ionchasacha ach i bhformáid leictreonach, arna hiarraidh sin agus í a bheith saor in aisce.

(52)

Ceanglaítear le hAirteagal 23(3) de Rialachán (AE) 2017/1129 ar idirghabhálaithe airgeadais a chur in iúl d’infheisteoirí a cheannaigh nó a shuibscríobh urrúis tríd an idirghabhálaí airgeadais sin go bhféadfaí forlíonadh a fhoilsiú agus, in imthosca áirithe, go bhféadfaí teagmháil a dhéanamh leis na hinfheisteoirí sin an lá a fhoilseofar forlíonadh. Le Rialachán (AE) 2021/337, tugadh isteach míreanna 2a agus 3a a ghabhann leis an Airteagal sin, ina ndéantar foráil maidir le córas níos comhréirí chun ualaí ar idirghabhálaithe airgeadais a laghdú, agus ardleibhéal cosanta d’infheisteoirí á choinneáil. Sonraítear sna míreanna sin na hinfheisteoirí ar cheart do na hidirghabhálaithe airgeadais dul i dteagmháil leo nuair a fhoilseofar forlíonadh agus nuair a chuirfear síneadh leis an spriocdháta faoina ndéanfar teagmháil leis na hinfheisteoirí sin agus an spriocdháta faoinar féidir na hinfheisteoirí sin a gcearta chun tarraingt siar a fheidhmiú. Ina theannta sin, sonraítear sna míreanna sin gur cheart d’idirghabhálaithe airgeadais teagmháil a dhéanamh le hinfheisteoirí a cheannaíonn nó a shuibscríobhann urrúis tráth nach déanaí ná deireadh na tréimhse tairisceana tosaigh. Tagraíonn an tréimhse sin don tréimhse ar lena linn a thairgeann eisitheoirí nó tairgeoirí urrúis don phobal mar a leagtar síos sa réamheolaire agus ní chuimsítear inti tréimhsí ina dhiaidh sin ar lena linn a n-athdhíoltar urrúis ar an margadh. Chuaigh an córas a tugadh isteach le hAirteagal 23(2a) agus (3a) de Rialachán (AE) 2017/1129 in éag an 31 Nollaig 2022. I bhfianaise an aiseolais dhearfaigh ar an iomlán ó na páirtithe leasmhara maidir leis an gcóras sin, ba cheart é a dhéanamh buan.

(53)

Le hAirteagal 23(2a) agus (3a) de Rialachán (AE) 2017/1129 cuireadh síneadh leis an spriocdháta chun teagmháil a dhéanamh le hinfheisteoirí incháilithe maidir le forlíonadh a fhoilsiú go dtí deireadh an chéad lae oibre tar éis an lae a fhoilsítear an forlíonadh. Ionas gur féidir le hidirghabhálaithe airgeadais an spriocdháta sin a chomhlíonadh, is gá a leagan síos nach gceanglófar ar idirghabhálaithe airgeadais ach na hinfheisteoirí sin a d’aontaigh go rachfaí i dteagmháil leo trí mhodh leictreonach, mar shampla trí ríomhphost, a chur ar an eolas faoi fhoilsiú forlíonaidh. Anuas air sin, ba cheart d’idirghabhálaithe airgeadais a thairiscint do na hinfheisteoirí sin a chuir in iúl gur mian leo nach ndéanfar teagmháil leo ach trí mhodhanna eile seachas modhanna leictreonacha rogha maidir le teagmháil leictreonach chun an fógra i ndáil le foilsiú forlíonaidh a fháil agus chun na críche sin amháin. Is gá freisin a cheangal ar idirghabhálaithe airgeadais a chur in iúl do na hinfheisteoirí sin nach n-aontaíonn go rachfaí i dteagmháil leo trí mhodh leictreonach agus a dhiúltaíonn an rogha maidir le teagmháil leictreonach a dhéanamh leo gur féidir leo breathnú ar shuíomh gréasáin an eisitheora nó an idirghabhálaí airgeadais chun a sheiceáil an bhfoilsítear nó nach bhfoilsítear forlíonadh.

(54)

Mar thoradh ar léirmhínithe éagsúla maidir le cibé acu ba cheart nó nár cheart cead a thabhairt d’eisitheoir réamheolaire bunaidh a fhorlíonadh chun urrúis eile, nó urrúis a bhfuil gnéithe éagsúla acu seachas na cinn ar formheasadh an réamheolaire bunaidh sin ina leith a thabhairt isteach, tá easpa cóineasaithe ann idir na Ballstáit. Chun cosaint infheisteoirí a áirithiú agus cóineasú rialála a chothú ar fud an Aontais, is iomchuí a leagan síos, dá bhrí sin, nár cheart forlíonadh ar réamheolaire bunaidh a úsáid chun cineál nua urrúis a thabhairt isteach nach bhfuil an fhaisnéis riachtanach ina leith cuimsithe sa réamheolaire bunaidh sin ach amháin más gá déanamh amhlaidh chun ceanglais chaipitil a chomhlíonadh faoi dhlí an Aontais nó faoin dlí náisiúnta lena ndéantar dlí an Aontais a thrasuí. Thairis sin, chun cóineasú maidir le húsáid an réamheolaire bunaidh a chothú a thuilleadh, ba cheart d’ÚEUM soiléireacht bhreise a sholáthar trí threoirlínte maidir leis na himthosca ina bhfuil sé le meas go dtugtar cineál nua urrúis isteach le forlíonadh nach bhfuil tuairisc air cheana i réamheolaire bunaidh.

(55)

Ceanglaítear le hAirteagal 27 de Rialachán (AE) 2017/1129 ar eisitheoirí aistriúcháin ar a réamheolaire a chur ar fáil chun é a chur ar a gcumas d’údaráis agus d’infheisteoirí grinnscrúdú iomchuí a dhéanamh ar na réamheolairí sin agus rioscaí a mheasúnú. I bhformhór na gcásanna, ní mór aistriúchán a chur ar fáil i gceann amháin ar a laghad de na teangacha oifigiúla a nglacann údaráis inniúla gach Ballstáit leis i gcás ina ndéantar tairiscint nó ina n-iarrtar ligean isteach chun trádála. Chun laghdú suntasach a dhéanamh ar ualaí neamhriachtanacha, ba cheart cead a bheith ag cuideachtaí réamheolaire a tharraingt suas i dteanga a úsáidtear de ghnáth sa réimse airgeadais idirnáisiúnta, gan beann ar cibé acu atá nó nach bhfuil an tairiscint nó an ligean isteach chun trádála de chineál intíre nó trasteorann, agus ba cheart ceanglas an aistriúcháin a bheith teoranta d’achoimre an réamheolaire chun cosaint infheisteoirí miondíola a áirithiú. Ba cheart do Bhallstát a bheith in ann, áfach, rogha a dhéanamh gan a bheith páirteach agus ina ionad sin a éileamh go ndéanfaí an réamheolaire maidir le tairiscint urrús don phobal nó urrúis a ligean isteach chun a dtrádála ar mhargadh rialáilte nach bhfuil á iarraidh ach sa Bhallstát sin amháin, go ndéanfaí an réamheolaire sin a tharraingt suas i dteanga a nglacann údarás inniúil an Bhallstáit sin léi. Sna cásanna sin, ba cheart a chur de cheangal ar an mBallstát sin fógra a thabhairt don Choimisiún agus do ÚEUM maidir lena chinneadh. Chun trédhearcacht a sholáthar d’eisitheoirí agus d’infheisteoirí, ba cheart d’ÚEUM a fhoilsiú, ar a shuíomh gréasáin, liosta de na teangacha a nglacann údaráis inniúla gach Ballstáit leo le haghaidh tairiscint urrús don phobal nó urrúis a ligean isteach chun a dtrádála ar mhargadh rialáilte nach bhfuil á iarraidh ach sa Bhallstát sin.

(56)

Ceanglaítear le hAirteagal 29 de Rialachán (AE) 2017/1129 faoi láthair go ndéanfaidh údarás inniúil Bhallstát baile eisitheoir na n-urrús lena mbaineann réamheolaire a tharraingítear suas agus a fhormheastar i gcomhréir le dlíthe tríú tír (‘réamheolaire tríú tír’), agus faoi réir na ndlíthe sin, a fhormheas, gan beann ar cibé acu atá nó nach bhfuil an réamheolaire tríú tír sin formheasta cheana ag an údarás ábhartha tríú tír. Ceanglaítear leis an Airteagal sin freisin go nglacfaidh an Coimisiún cinneadh ina sonrófar go bhfuil na ceanglais faisnéise a fhorchuirtear le dlí náisiúnta an tríú tír sin comhionann leis na ceanglais faoi Rialachán (AE) 2017/1129. Chun an rochtain ar mhargaí poiblí san Aontas a éascú d’eisitheoirí tríú tíortha, lena n-áirítear FBManna, agus chun deiseanna infheistíochta breise a chur ar fáil d’infheisteoirí san Aontas, agus a gcosaint á háirithiú ag an am céanna, is gá na forálacha maidir leis an gcóras coibhéise a leasú. Ba cheart a shoiléiriú, i gcás ligean isteach chun trádála ar mhargadh rialáilte, nó i gcás ina dtairgfear urrúis don phobal san Aontas, nach bhfuil réamheolairí coibhéiseacha tríú tír atá formheasta cheana ag údarás maoirseachta na tríú tíre le comhdú ach le húdarás inniúil an Bhallstáit baile. Ina theannta sin, na critéir ghinearálta coibhéise, atá le bunú faoi láthair ar na ceanglais a leagtar síos in Airteagail 6, 7, 8 agus 13 de Rialachán (AE) 2017/1129, ba cheart iad a leathnú chun forálacha maidir le dliteanas, bailíocht an réamheolaire, tosca riosca, grinnscrúdú, formheas agus foilsiú an réamheolaire, agus forlíontaí a chuimsiú. Chun cosaint infheisteoirí san Aontas a áirithiú, is gá a shonrú freisin go bhfuil na cearta agus na hoibleagáidí uile dá bhforáiltear faoi Rialachán (AE) 2017/1129 le cuimsiú sa réamheolaire tríú tír. Tá cead, freisin, ag eisitheoirí tríú tír an nós imeachta faoi Airteagal 28 de Rialachán (AE) 2017/1129 a úsáid maidir le haon chineál tairisceana urrús don phobal nó ligean isteach chun trádála ar mhargadh rialáilte, trí réamheolaire a tharraingt suas i gcomhréir leis an Rialachán sin.

(57)

Tá gá le comhar éifeachtach le húdaráis mhaoirseachta tríú tíortha i ndáil le malartú faisnéise leis na húdaráis sin agus forfheidhmiú na n-oibleagáidí faoi Rialachán (AE) 2017/1129 i dtríú tíortha chun infheisteoirí san Aontas a chosaint agus chun cothroime iomaíochta idir eisitheoirí atá bunaithe san Aontas agus eisitheoirí tríú tír a áirithiú. Chun malartú faisnéise éifeachtúil comhsheasmhach le húdaráis mhaoirseachta a áirithiú, ba cheart d’údaráis inniúla na mBallstát nó do ÚEUM, arna iarraidh sin d’údarás inniúil amháin ar a laghad, socruithe comhair le húdaráis mhaoirseachta ábhartha na dtríú tíortha a bhunú, agus ba cheart an chumhacht a thabhairt don Choimisiún an t-ábhar íosta agus an teimpléad a bheidh le húsáid le haghaidh na socruithe sin a chinneadh. Thairis sin, ba cheart do ÚEUM comhordú ar fhorbairt socruithe comhair idir údaráis inniúla agus údaráis mhaoirseachta ábhartha tríú tíortha a éascú agus, i gcás inar gá, dáileadh na faisnéise a fhaightear ó údaráis mhaoirseachta tríú tíortha a d’fhéadfadh a bheith ábhartha maidir le bearta atá le glacadh faoi Airteagail 38 agus 39 de Rialachán (AE) 2017/1129 ar údaráis inniúla a éascú. Mar sin féin, chun cosaint infheisteoirí a áirithiú, maidir le tríú tíortha atá ar liosta an Aontais de dhlínsí cánach neamh-chomhoibríocha chun críoch cánach nó ar an liosta de na dlínsí a bhfuil easnaimh straitéiseacha ina gcóras náisiúnta maidir leis an sciúradh airgid agus maoiniú na sceimhlitheoireachta a chomhrac agus ar bagairt shuntasach iad ar chóras airgeadais an Aontais, is gá gur cheart iad a eisiamh ó na comhaontuithe comhair sin.

(58)

Is gá a áirithiú go bhfuil an réamheolaire leantach AE, an réamheolaire eisiúna fáis AE agus achoimrí gaolmhara réamheolaire faoi réir na smachtbhannaí riaracháin agus na mbeart riaracháin céanna le réamheolairí eile. Ba cheart na smachtbhannaí agus na bearta sin a bheith éifeachtach, comhréireach agus athchomhairleach agus cur chuige comhchoiteann a áirithiú sna Ballstáit.

(59)

Ceanglaítear le hAirteagal 47 de Rialachán (AE) 2017/1129 ar ÚEUM tuarascáil a fhoilsiú gach bliain ina mbeidh staidreamhmaidir leis na réamheolairí a formheasadh agus ar tugadh fógra ina leith san Aontas agus ina mbeidh anailís ar threochtaí. Is gá a leagan síos gur cheart a chuimsiú sa tuarascáil sin freisin faisnéis staidrimh faoi na réamheolairí eisiúna fáis AE, arna n-idirdhealú de réir cineálacha eisitheoirí, agus ba cheart anailís a dhéanamh inti ar inúsáidteacht na gcóras nochta is infheidhme faoin réamheolaire leantach AE, faoi na réamheolairí eisiúna fáis AE agus faoi na doiciméid chlárúcháin uilíocha. Ba cheart anailís a dhéanamh sa tuarascáil sin freisin ar an díolúine nua maidir le heisiúintí tánaisteacha urrús atá idirmhalartach le hurrúis a ligeadh isteach cheana chun a dtrádála ar mhargadh rialáilte nó ar mhargadh fáis FBManna. Thairis sin, ba cheart a áireamh sa tuarascáil sin, bunaithe ar thuarascáil arna soláthar ag ÚEUM don Choimisiún, anailís an áirithítear cóineasú maoirseachta ar fud an Aontais le nósanna imeachta grinnscrúdaithe agus formheasa na n-údarás inniúil agus an bhfuil siad fós iomchuí i bhfianaise na gcuspóirí atá á saothrú acu. Ar deireadh, ba cheart a áireamh sa tuarascáil sin anailís ar cé acu atá nó nach bhfuil an fhéidearthacht ag na Ballstáit nochtaí náisiúnta faoi bhun na tairsí díolúine ábhartha de EUR 12 000 000 nó EUR 5 000 000 a éileamh chun urrúis a thairiscint don phobal fabhrach chun ceanglais náisiúnta maidir le nochtadh a chóineasú agus an bhfuil na nochtaí náisiúnta sin ina mbacainn roimh urrúis a thairiscint don phobal sna Ballstáit sin.

(60)

Ba cheart don Choimisiún, i ndiaidh tréimhse ama iomchuí i ndiaidh dháta chur i bhfeidhm an Rialacháin leasaithigh seo, athbhreithniú a dhéanamh ar chur i bhfeidhm Rialachán (AE) 2017/1129 agus measúnú a dhéanamh go háirithe i dtaobh an iomchuí fós na forálacha maidir le hachoimre an réamheolaire, na córais nochta le haghaidh an réamheolaire Leantaigh AE, réamheolaire eisiúna Fáis AE agus an doiciméad clárúcháin uilíoch chun a gcuspóirí a bhaint amach. Is gá a leagan síos freisin gur cheart anailís a dhéanamh sa tuarascáil sin ar na sonraí, na treochtaí agus na costais ábhartha i ndáil leis an réamheolaire leantach AE agus an réamheolaire eisiúna Fáis AE. Go sonrach, ba cheart measúnú a dhéanamh sa tuarascáil sin i dtaobh an mbaintear an chothromaíocht chuí amach leis na córais nua sin idir cosaint infheisteoirí agus laghdú an ualaigh riaracháin. I bhfianaise a thábhachtaí atá sé a áirithiú go gcuirtear dlús le hAontas na Margaí Caipitil, agus go léirítear leis réaltachtaí an mhargaidh a luaithe is féidir tar éis dóibh tarlú, ní mór an tréimhse iomchuí chun na hathbhreithnithe sin a dhéanamh ag an gCoimisiún a bheith níos giorra ná an tréimhse a bhí ann sular glacadh an Rialachán leasaitheach seo. Ba cheart don Choimisiún measúnú a dhéanamh freisin i dtaobh an bhfuil tuilleadh comhchuibhithe ar na forálacha maidir le dliteanas réamheolaire ag teastáil agus, má tá, ba cheart dó breithniú a dhéanamh ar leasuithe a dhéanamh ar na forálacha dliteanais a leagtar amach i Rialachán (AE) 2017/1129.

(61)

Le Rialachán (AE) Uimh. 596/2014, bunaítear creat láidir chun sláine an mhargaidh agus muinín infheisteoirí a chaomhnú trí dhéileáil cos istigh, nochtadh neamhdhleathach faisnéise ón taobh istigh agus cúbláil margaidh a chosc. Cuirtear roinnt oibleagáidí maidir le nochtadh agus coimeád taifead ar eisitheoirí leis agus éilítear ar eisitheoirí leis faisnéis ón taobh istigh a nochtadh don phobal. 6 bliana i ndiaidh theacht i bhfeidhm Rialachán (AE) Uimh. 596/2014, léiríodh le haiseolas a fuarthas ó pháirtithe leasmhara a bailíodh i gcomhthéacs na gcomhairliúchán poiblí agus na ngrúpaí saineolaithe go gcuireann roinnt gnéithe den Rialachán sin ualach mór ar eisitheoirí. Is gá, dá bhrí sin, soiléireacht dhlíthiúil a fheabhsú, aghaidh a thabhairt ar cheanglais dhíréireacha ar eisitheoirí agus tarraingteacht fhoriomlán mhargaí caipitil an Aontais a mhéadú, agus leibhéal iomchuí cosanta infheisteoirí agus sláine an mhargaidh á n-áirithiú.

(62)

Le hAirteagail 14 agus 15 de Rialachán (AE) Uimh. 596/2014 cuirtear toirmeasc ar dhéileáil cos istigh, ar nochtadh neamhdhleathach faisnéise ón taobh istigh agus ar chúbláil margaidh. Tá eisceacht in Airteagal 5 den Rialachán sin, áfach, maidir leis na toirmisc ar chláir aischeannaigh agus ar chobhsú. Ionas go mbainfidh clár aischeannaigh leas as an díolúine sin, tá oibleagáid ar eisitheoirí tuairisc a thabhairt d’údaráis inniúla uile na n-ionad trádála ar ligeadh na scaireanna isteach chun a dtrádála orthu nó a dtrádáiltear orthu ar gach idirbheart a bhaineann leis an gclár aischeannaigh, lena n-áirítear faisnéis a shonraítear i Rialachán (AE) Uimh. 600/2014 ó Pharlaimint na hEorpa agus ón gComhairle (16). Ina theannta sin, tá oibleagáid ar eisitheoirí na trádálacha a nochtadh don phobal ina dhiaidh sin. Tá na hoibleagáidí sin an-anásta. Is gá, dá bhrí sin, an nós imeachta tuairiscithe a shimpliú trína cheangal ar eisitheoir faisnéis maidir le hidirbhearta cláir aischeannaigh a thuairisciú d’údarás inniúil an mhargaidh is ábhartha, agus don údarás sin amháin, i gcomhthéacs leachtachta dá scaireanna. Is gá freisin an oibleagáid maidir le nochtadh a shimpliú trí chead a thabhairt d’eisitheoir gan faisnéis chomhiomlánaithe a nochtadh ach amháin lena léirítear an méid comhiomlánaithe agus an meánphraghas ualaithe in aghaidh an lae agus in aghaidh an ionaid trádála.

(63)

Tá coincheap na faisnéise ón taobh istigh a leagtar amach in Airteagal 7(1), pointe (d), de Rialachán (AE) Uimh. 596/2014 rótheoranta, áfach, toisc nach mbaineann sé ach le daoine atá freagrach as orduithe a fhorghníomhú a bhaineann le hionstraimí airgeadais, ach go hiarbhír, d’fhéadfadh sé go mbeadh daoine eile ar an eolas faoi ordú nó idirbheart atá le teacht. Dá bhrí sin, ba cheart an coincheap sin a leathnú chun cásanna a chumhdach freisin ina gcuirtear faisnéis ar aghaidh de bhua cuntas dílseánaigh nó ciste bainistithe a bhainistiú, agus go háirithe chun gach catagóir daoine a d’fhéadfadh a bheith ar an eolas faoi ordú amach anseo a chuimsiú.

(64)

De réir Airteagal 11(1) de Rialachán (AE) Uimh. 596/2014, is é atá i gceist le sondáil margaidh faisnéis a chur in iúl d’infheisteoir ionchasach amháin nó níos mó, sula bhfógraítear an t-idirbheart, d’fhonn spéis infheisteoirí ionchasacha in idirbheart féideartha agus na coinníollacha a bhaineann leis a thomhas, amhail a mhéid nó a phraghsáil fhéideartha. Is cleachtas seanbhunaithe é sondáil margaidh a chuireann le margaí caipitil éifeachtúla. D’fhéadfadh sé, áfach, go gceanglófaí le sondáil margaidh faisnéis ón taobh istigh a nochtadh d’infheisteoirí ionchasacha agus go nochtfaí na páirtithe lena mbaineann do rioscaí dlíthiúla dá deasca. Ba cheart an sainmhíniú ar shondáil margaidh a bheith leathan chun freastal ar chineálacha éagsúla tíopeolaíochta na sondála agus na gcleachtas éagsúil ar fud an Aontais. Dá bhrí sin, ba cheart a áireamh freisin leis an sainmhíniú ar shondáil margaidh faisnéis a chur in iúl nach dtagann aon fhógra sonrach faoi idirbheart ina dhiaidh, mar sa chás sin freisin, d’fhéadfaí faisnéis ón taobh istigh a nochtadh d’infheisteoirí ionchasacha agus ba cheart eisitheoirí a bheith ábalta tairbhe a bhaint as an gcosaint a thugtar le hAirteagal 11 de Rialachán (AE) Uimh. 596/2014.

(65)

Foráiltear le hAirteagal 11(4) de Rialachán (AE) Uimh. 596/2014 go measfar gur i ngnáthfheidhmiú fostaíochta, gairme nó dualgas duine a dhéantar faisnéis ón taobh istigh a nochtadh le linn sondáil margaidh agus, dá bhrí sin, ní hionann an nochtadh sin agus nochtadh neamhdhleathach faisnéise ón taobh istigh, i gcás ina gcomhlíonann an rannpháirtí margaidh a dhéanann an nochtadh na ceanglais riachtanacha a leagtar síos in Airteagal 11(3) agus Airteagal 11(6), mar aon leis na ceanglais a leagtar síos in Airteagal 11(4) den Rialachán sin. Ionas go seachnófar an léirmhíniú lena gceanglófaí ar rannpháirtithe margaidh a dhéanann nochtadh agus sondáil margaidh á déanamh acu na ceanglais go léir a leagtar amach in Airteagal 11(4) de Rialachán (AE) Uimh. 596/2014 a chomhlíonadh, ba cheart a shonrú nach bhfuil sa chóras sondála margaidh agus sna ceanglais in Airteagal 11(4) ach rogha do rannpháirtithe margaidh a dhéanann an nochtadh agus gur cosaint ar líomhain maidir le nochtadh neamhdhleathach faisnéise ón taobh istigh iad. Mar sin féin, cé nár cheart a thoimhdiú go bhfuil faisnéis ón taobh istigh nochta go neamhdhleathach ag rannpháirtithe margaidh a dhéanann an nochtadh agus nach gcomhlíonann na ceanglais a leagtar amach in Airteagal 11(4) de Rialachán (AE) Uimh. 596/2014 agus sondáil margaidh á déanamh acu, níor cheart do na rannpháirtithe margaidh sin a dhéanann an nochtadh a bheith ábalta leas a bhaint as an gcosaint a thugtar dóibh siúd a dhéanann na ceanglais sin a chomhlíonadh. Lena áirithiú gur féidir údaráis inniúla rian iniúchóireachta próisis a fháil lena bhféadfaí nochtadh faisnéise ón taobh istigh do thríú páirtithe a thabhairt le tuiscint, ba cheart a shonrú freisin go bhfuil na ceanglais a leagtar amach in Airteagal 11(3) agus (6) de Rialachán (AE) Uimh. 596/2014 éigeantach do gach rannpháirtí margaidh a dhéanann an nochtadh, gan beann ar chomhlíonadh an nós imeachta roghnaigh in Airteagal 11(4) den Rialachán sin.

(66)

Is féidir leachtacht i scaireanna eisitheora a fheabhsú trí ghníomhaíochtaí soláthair leachtachta, lena n-áirítear socruithe maidir le cruthú margaidh nó conarthaí leachtachta. Is é atá i gceist le socrú maidir le cruthú margaidh conradh idir an t-oibreoir margaidh agus tríú páirtí a gheallann go gcoinneoidh sé an leachtacht i scaireanna áirithe agus a bhaineann leas as lacáistí ar tháillí trádála i gcomaoin air sin. Tugtar conradh leachtachta ar chonradh idir eisitheoir agus tríú páirtí a gheallann go soláthróidh sé leachtacht i scaireanna an eisitheora, agus ar son an eisitheora. Le Rialachán (AE) 2019/2115, tugadh isteach in Airteagal 13 de Rialachán (AE) Uimh. 596/2014 an fhéidearthacht d’eisitheoirí ionstraimí airgeadais a ligtear isteach chun a dtrádála ar mhargaí fáis FBManna conradh leachtachta a dhéanamh le soláthraí leachtachta, ar choinníoll go gcomhlíontar coinníollacha áirithe. Ceann de na coinníollacha sin is ea gur admhaigh an t-oibreoir margaidh nó an gnólacht infheistíochta a oibríonn an margadh fáis FBManna i scríbhinn don eisitheoir go bhfuair sé cóip den chonradh leachtachta agus gur aontaigh sé le téarmaí agus coinníollacha an chonartha sin. Ní páirtí i gconradh leachtachta é oibreoir an mhargaidh fáis FBManna, áfach, agus bíonn castacht iomarcach mar thoradh ar an gceanglas gur aontaigh an t-oibreoir sin le téarmaí agus coinníollacha an chonartha leachtachta. Chun deireadh a chur leis an gcastacht sin agus chun forálacha leachtachta a chothú maidir leis na margaí fáis FBManna sin, is iomchuí deireadh a chur leis an gceanglas ar oibreoirí na margaí fáis FBManna aontú le téarmaí agus coinníollacha na gconarthaí leachtachta.

(67)

Tá sé d’aidhm ag an toirmeasc ar dhéileáil cos istigh cosc a chur ar aon saothrú a d’fhéadfaí a dhéanamh ar fhaisnéis ón taobh istigh agus ba cheart é a chur i bhfeidhm a luaithe a bheidh an fhaisnéis sin ar fáil. Is é is aidhm don cheanglas, go príomha, faisnéis ón taobh istigh a nochtadh cur ar chumas infheisteoirí cinntí feasacha a dhéanamh. Nuair a nochtar faisnéis ag céim an-luath agus nuair is de chineál sealadach é, d’fhéadfaí infheisteoirí a chur amú leis, seachas cur le praghasmhúnlú éifeachtúil agus aghaidh a thabhairt ar neamhshiméadracht na faisnéise. Dá bhrí sin, i bpróiseas fadtréimhseach, níor cheart a chumhdach leis an oibleagáid maidir le nochtadh fógraí a bhaineann le rúin amháin, caibidlíocht leanúnach ná, ag brath ar na himthosca, dul chun cinn caibidlíochta, amhail cruinniú idir ionadaithe na gcuideachtaí. Ba cheart don eisitheoir faisnéis a nochtadh a bhaineann leis na himthosca nó an teagmhas ar leith amháin a bhfuil sé i gceist ag an bpróiseas fadtréimhseach a bhaint amach nó a tharlaíonn mar thoradh air (‘teagmhas deiridh’), a luaithe is féidir tar éis do na himthosca sin nó an teagmhas sin tarlú. Mar shampla, i gcás cumaisc, ba cheart nochtadh a dhéanamh a luaithe is féidir tar éis don lucht bainistíochta cinneadh a dhéanamh an comhaontú cumaisc a shíniú, a luaithe a bheidh eilimintí lárnacha an chumaisc comhaontaithe. Go ginearálta, i gcás comhaontuithe conarthacha, ba cheart a mheas gur tharla an teagmhas deiridh nuair a comhaontaíodh bunchoinníollacha an chomhaontaithe sin. I gcás próisis nach próisis fhadtréimhseacha iad, a bhaineann le teagmhas aonuaire nó le sraith imthosca, go háirithe nuair nach mbraitheann tarlú an teagmhais nó na sraithe imthosca sin ar an eisitheoir, ba cheart an nochtadh a dhéanamh a luaithe a thiocfaidh an t-eisitheoir ar an eolas faoin teagmhas nó faoin tsraith imthosca sin.

(68)

Ní bhíonn sé simplí i gcónaí a shainaithint go díreach an uair a éiríonn sraith imthosca nó teagmhas críochnaitheach. Chun a chur ar chumas an eisitheora an tráth a bheidh gá leis an nochtadh faisnéise ón taobh istigh a shainaithint, ba cheart an chumhacht a thabhairt don Choimisiún chun gníomhartha tarmligthe a ghlacadh chun liosta nach bhfuil uileghabhálach d’imthosca deiridh nó de theagmhais deiridh i bpróisis fhadtréimhseacha a leagan amach, rud a spreagfadh an oibleagáid atá ann an fhaisnéis a nochtadh agus i gcás gach teagmhais nó imthoisce, an tráth a mheastar gur tharla an teagmhais nó imthoisc.

(69)

Ba cheart d’eisitheoirí rúndacht faisnéise a bhaineann le céimeanna idirmheánacha a áirithiú i gcás nár nochtadh fós na himthosca nó an teagmhas, a bhfuil sé beartaithe é a bhaint amach le próiseas fadtréimhseach nó a tharlaíonn mar thoradh air. Nuair a nochtar na himthosca nó an teagmhas sin, níor cheart ceangal a bheith ar an eisitheoir rúndacht na faisnéise a bhaineann le céimeanna idirmheánacha a chosaint a thuilleadh.

(70)

D’fhéadfadh cásanna a bheith ann ina bhféadfadh sé go mbeadh ar an eisitheoir nochtadh imthosca nó teagmhas ar leith a chur siar tar éis dóibh tarlú. Foráiltear le hAirteagal 17(4) de Rialachán (AE) Uimh. 596/2014 go bhféadfaidh eisitheoir nó rannpháirtí sa mhargadh lamháltas astaíochtaí, ar a fhreagracht féin, moill a chur ar nochtadh faisnéise ón taobh istigh don phobal ar choinníoll go gcomhlíonfar coinníollacha áirithe. Níor cheart neamhnochtadh ó eisitheoir faisnéise ón taobh istigh a bhaineann le céimeanna idirmheánacha i bpróiseas fadtréimhseach a bheith faoi réir na gceanglas a leagtar síos in Airteagal 17(4) de Rialachán (AE) Uimh. 596/2014. Chun deimhneacht dhlíthiúil a áirithiú don eisitheoir nó don rannpháirtí sa mhargadh lamháltas astaíochtaí agus léirmhíniú comhsheasmhach ar na coinníollacha chun moill a chur ar an bhfaisnéis ón taobh istigh, ba cheart na coinníollacha sin a shoiléiriú trí thagairt dhíreach a dhéanamh do ráitis phoiblí roimhe sin nó do chineálacha eile cumarsáide ón eisitheoir nó ón rannpháirtí sa mhargadh lamháltas astaíochtaí. Chun tuilleadh soiléirithe a chur ar fáil, ba cheart don Choimisiún a bheith cumhachtaithe chun gníomh tarmligthe a ghlacadh chun liosta nach bhfuil uileghabhálach a leagan amach de chásanna ina bhfuil sé i gceist ag an eisitheoir nó an rannpháirtí sa mhargadh lamháltas astaíochtaí moill a chur ar an bhfaisnéis ón taobh istigh agus go bhfuil an fhaisnéis sin i gcodarsnacht leis an bhfógra poiblí is déanaí nó aon chineál cumarsáide eile ón eisitheoir nó ón rannpháirtí sa mhargadh lamháltas astaíochtaí faoin ábhar céanna dá dtagraíonn an fhaisnéis ón taobh istigh.

(71)

Le hAirteagal 18(1) de Rialachán (AE) Uimh. 596/2014, cuirtear oibleagáid ar eisitheoirí agus ar aon duine a ghníomhaíonn thar a gceann nó ar a son liosta a tharraingt suas agus a choinneáil cothrom le dáta de na daoine go léir a bhfuil rochtain acu ar fhaisnéis ón taobh istigh agus atá ag obair dóibh faoi chonradh fostaíochta, nó a dhéanann cúraimí ar shlí eile lena dtugtar rochtain dóibh ar fhaisnéis ón taobh istigh, lena n-áirítear comhairleoirí, cuntasóirí agus gníomhaireachtaí rátála creidmheasa. Le hAirteagal 18(6) de Rialachán (AE) Uimh. 596/2014, cuirtear teorainn leis an oibleagáid sin d’eisitheoirí ar ligeadh a gcuid ionstraimí isteach chun a dtrádála ar mhargadh fáis FBM, ionas nach mbeidh orthu ach na daoine sin a mbíonn rochtain thráthrialta ar fhaisnéis ón taobh istigh acu, mar gheall ar nádúr a bhfeidhme nó a bpoist laistigh den eisitheoir, a áireamh ar a gcuid liostaí de dhaoine ar an taobh istigh.

(72)

I roinnt Ballstát, meastar go bhfuil tábhacht ar leith le liostaí de dhaoine ar an taobh istigh chun ardleibhéal sláine margaidh a áirithiú. Ar an gcúis sin, le hAirteagal 18(6), an dara fomhír, de Rialachán (AE) Uimh. 596/2014, ceadaítear do na Ballstáit a cheangal ar eisitheoirí ar mhargaí fáis FBManna liostaí níos cuimsithí de dhaoine ar an taobh istigh a tharraingt suas ina gcuimsítear gach duine a bhfuil rochtain acu ar fhaisnéis ón taobh istigh, ar bhonn formáide maolaithe, áfach, lena n-éilítear níos lú faisnéise ina leith. Chun an t-ualach rialála iomarcach a sheachaint, agus an fhaisnéis fhíor-riachtanach á coinneáil ag na húdaráis inniúla chun sáruithe ar dhrochúsáid mhargaidh a imscrúdú, ba cheart an fhormáid mhaolaithe sin a úsáid le haghaidh gach liosta de dhaoine ar an taobh istigh.

(73)

Foráiltear le hAirteagal 19 de Rialachán (AE) Uimh. 596/2014 maidir le bearta coisctheacha i gcoinne drochúsáid mhargaidh agus, go sonrach, déileáil cos istigh, maidir le daoine a chomhlíonann freagrachtaí bainistíochta agus daoine a bhfuil dlúthbhaint acu leo. Ar na bearta sin tá fógra a thabhairt maidir le hidirbhearta in ionstraimí airgeadais an eisitheora ábhartha agus tá an toirmeasc ar idirbhearta a dhéanamh sna hionstraimí sin le linn tréimhsí sainithe áirithe. Go sonrach, foráiltear le hAirteagal 19(8) de Rialachán (AE) Uimh. 596/2014 nach mór do dhaoine a chomhlíonann freagrachtaí bainistíochta fógra a thabhairt don eisitheoir agus don údarás inniúil i gcás ina bhfuil idirbhearta ag na daoine ar mó iad ná an tairseach EUR 5 000 i mbliain féilire, chomh maith le haon idirbheart ina dhiaidh sin sa bhliain chéanna. Baineann na fógraí, a mhéid a bhaineann le heisitheoirí, le hidirbhearta a dhéanann daoine a chomhlíonann freagrachtaí bainistíochta nó le daoine a bhfuil dlúthbhaint acu leo ar a gcuntas féin i ndáil le scaireanna nó ionstraimí fiachais an eisitheora sin, nó le díorthaigh nó ionstraimí airgeadais eile atá nasctha leo. Foráiltear in Airteagal 19(9) de Rialachán (AE) Uimh. 596/2014 go bhfuil na húdaráis inniúla in ann an tairseach a mhéadú go EUR 20 000.

(74)

Ionas go seachnófar ceanglas míchuí ar dhaoine a chomhlíonann freagrachtaí bainistíochta idirbhearta a thuairisciú, agus ar chuideachtaí idirbhearta a nochtadh, ar idirbhearta iad nach mbeadh fiúntach d’infheisteoirí, is iomchuí an tairseach le haghaidh tuairisciú agus nochtaí gaolmhara a ardú ó EUR 5 000 go EUR 20 000. An tráth céanna, ba cheart solúbthacht a thabhairt do na húdaráis inniúla chun an tairseach sin a mhéadú go EUR 50 000 nó chun í a ísliú go EUR 10 000, i gcás ina bhfuil údar cuí leis i bhfianaise dhálaí an mhargaidh náisiúnta.

(75)

Le hAirteagal 19(11) de Rialachán (AE) Uimh. 596/2014, cuirtear toirmeasc ar dhaoine a chomhlíonann freagrachtaí bainistíochta, le linn tréimhse 30 lá féilire roimh thuairisciú airgeadais an eisitheora (tréimhse dhúnta), scaireanna nó ionstraimí fiachais an eisitheora nó na díorthaigh nó ionstraimí airgeadais eile atá nasctha leo a thrádáil, mura rud é go dtabharfaidh an t-eisitheoir a thoiliú agus go gcomhlíontar imthosca sonracha. Cuimsítear sa díolúine sin ón gceanglas an tréimhse dhúnta faoi láthair scaireanna fostaí nó scéimeanna coigiltis chomh maith le cáilíochtaí nó teidlíocht scaireanna. Chun comhsheasmhacht rialacha a chur chun cinn ar fud aicmí sócmhainní éagsúla, ba cheart an díolúine sin a leathnú chun a áireamh sna scéimeanna fostaithe díolmhaithe na scéimeanna sin a bhaineann le hionstraimí airgeadais nach scaireanna iad, agus chomh maith leis sin, chun cáilíocht nó teidlíocht ionstraimí nach scaireanna iad a chumhdach.

(76)

Maidir le hidirbhearta áirithe nó gníomhaíochtaí áirithe a dhéanann an duine a chomhlíonann freagrachtaí bainistíochta le linn na tréimhse dúnta, d’fhéadfadh baint a bheith acu le socruithe neamh-inchúlghairthe a dhéantar lasmuigh de thréimhse dhúnta. D’fhéadfadh na hidirbhearta nó na gníomhaíochtaí sin a bheith mar thoradh ar shainordú lánroghnach bainistíochta sócmhainní arna fhorghníomhú ag tríú páirtí neamhspleách faoi shainordú lánroghnach bainistíochta sócmhainní. D’fhéadfadh na hidirbhearta nó na gníomhaíochtaí sin a bheith mar thoradh ar ghníomhaíochtaí corparáideacha atá údaraithe go cuí nach dtugtar le fios leo go gcaitear go tairbheach leis an duine a chomhlíonann freagrachtaí bainistíochta. Thairis sin, d’fhéadfadh na hidirbhearta nó na gníomhaíochtaí sin a bheith mar thoradh ar oidhreachtaí, bronntanais agus tabhartais a ghlacadh, nó ar fheidhmiú roghanna, todhchaíochtaí, nó díorthach eile a comhaontaíodh lasmuigh den tréimhse dhúnta. Ní bhaineann na gníomhaíochtaí agus na hidirbhearta sin, i bprionsabal, le cinntí infheistíochta gníomhacha arna ndéanamh ag na daoine a chomhlíonann freagrachtaí bainistíochta. Dá dtoirmeascfaí idirbhearta nó gníomhaíochtaí dá leithéid le linn na tréimhse dúnta, chuirfí srian iomarcach le saoirse daoine a chomhlíonann freagrachtaí bainistíochta, toisc nach bhfuil aon riosca ann go mbainfidh siad tairbhe as buntáiste faisnéiseach. Chun a áirithiú nach mbeidh feidhm ag an toirmeasc ar thrádáil le linn na tréimhse dúnta ach maidir le hidirbhearta nó gníomhaíochtaí a bhraitheann ar ghníomhaíocht infheistíochta thoiliúil an duine a chomhlíonann freagrachtaí bainistíochta, níor cheart a chumhdach faoin toirmeasc sin idirbhearta nó gníomhaíochtaí a bhraitheann ar thosca seachtracha go heisiach nó nach mbaineann le cinntí gníomhacha infheistíochta ó na daoine a chomhlíonann freagrachtaí bainistíochta.

(77)

Le comhtháthú na margaí atá ag méadú, méadaítear an riosca um dhrochúsáid mhargaidh trasteorann. Chun sláine an mhargaidh a chosaint, ba cheart do na húdaráis inniúla oibriú i gcomhar le chéile go pras tráthúil, agus le ÚEUM freisin. Chun an comhar sin a neartú, ba cheart ÚEUM a bheith in ann gníomhú as tionscnamh údaráis inniúil amháin nó níos mó chun comhar na n-údarás inniúil a éascú agus an deis a bheith ann aon imscrúdú nó aon chigireacht lena bhfuil éifeacht trasteorann a chomhordú. Tá sé cruthaithe go bhfuil ardáin chomhair a bhunaigh an tÚdarás Eorpach um Árachas agus Pinsin Cheirde úsáideach mar uirlis mhaoirseachta chun malartú faisnéise a neartú agus chun comhar idir údaráis a fheabhsú. Is iomchuí, dá bhrí sin, an deis a thabhairt isteach freisin gur féidir le ÚEUM na hardáin sin a bhunú agus a chomhordú i réimse na margaí urrús, as tionscnamh údaráis inniúil amháin nó níos mó, i gcás ina bhfuil imní ann faoi shláine an mhargaidh nó faoi fheidhmiú cuí margaí. I bhfianaise an chaidrimh láidir idir margaí airgeadais agus spotmhargaí, ba cheart ÚEUM a bheith in ann na hardáin sin a chur ar bun le comhlachtaí poiblí a dhéanann faireachán ar mhargaí mórdhíola tráchtearraí, as tionscnamh údaráis inniúil amháin nó níos mó, lena n-áirítear Gníomhaireacht an Aontais Eorpaigh um Chomhar idir Rialálaithe Fuinnimh (ACER), i gcás ina ndéanann ábhair imní den sórt sin difear do mhargaí airgeadais agus do spotmhargaí araon.

(78)

Tá sé ríthábhachtach faireachán a dhéanamh ar shonraí ordaithe chun faireachas a dhéanamh ar ghníomhaíocht an mhargaidh. Ba cheart, dá bhrí sin, rochtain éasca a bheith ag údaráis inniúla ar na sonraí a bhfuil gá acu leo dá ngníomhaíocht mhaoirseachta. Baineann cuid de na sonraí sin le hionstraimí a thrádáiltear in ionad trádála atá lonnaithe i mBallstát eile. Chun éifeachtacht na maoirseachta a fheabhsú, ba cheart do na húdaráis inniúla sásra a bhunú chun sonraí ordaithe a mhalartú ar bhonn leanúnach. Chun a áirithiú go mbeidh raon feidhme an tsásra sin um shonraí ordaithe a mhalartú comhréireach lena úsáid, níor cheart an oibleagáid a bheith rannpháirteach sa sásra sin ach a bheith ar údaráis inniúla a dhéanann maoirseacht ar mhargaí a bhfuil ardleibhéal gníomhaíochta trasteorann ag baint leo. Ba cheart do na Ballstáit sin a mbeadh spéis ag a n-údaráis inniúla ina bheith rannpháirteach sa sásra ar bhonn deonach na forálacha céanna a chomhlíonadh agus rannchuidiú le cistiú an tsásra. Tá a shaineolas léirithe ag ÚEUM maidir le moil malartaithe sonraí a bhunú, amhail malartú sonraí tuairiscithe idirbheart trí chur chun feidhme cruthaithe an tSásra um Malartú Tuairiscithe Idirbheart (TREM), nó tríd an bPointe Rochtana Aonair ar Shonraí Idirbhearta EMIR trí chur chun feidhme an Innill Tuairiscithe Trádála agus Comhlíontachta Trádála (TRACE). Dá bhrí sin, ba cheart d’údaráis inniúla rannpháirteacha a bheith in ann an sásra nua a bhunú chun sonraí ordaithe a mhalartú trí fhorbairt an tionscadail a tharmligean chuig ÚEUM.Ba cheart don Choimisiún liosta de na hionaid trádála a bhfuil gné shuntasach trasteorann ag baint leo a chinneadh i ngníomhartha tarmligthe tríd an méid trádála ar an ionad trádála ar a laghad a chur san áireamh i gcás gach aicme ionstraimí airgeadais chomh maith leis an méid trádála ar an ionad trádála sin in ionstraimí airgeadais a bhfuil údarás inniúil an mhargaidh is ábhartha ina leith éagsúil le húdarás inniúil an ionaid trádála. Chun deimhneacht dhlíthiúil a sholáthar agus gan moill a chur ar chur chun feidhme an tsásra, ba cheart na critéir chun ionaid trádála a bhfuil gné shuntasach trasteorann ag baint leo a chinneadh a shocrú sa Rialachán seo agus tairseacha sonracha a shocrú le haghaidh scaireanna. Chun a áirithiú go leanfaidh na critéir de bheith inoibrithe agus solúbtha go leor chun forbairtí na margaí airgeadais agus an gá atá le maoirseacht éifeachtach a chur san áireamh, ba cheart an chumhacht a thabhairt don Choimisiún an liosta d’ionaid trádála ainmnithe a leasú agus a thabhairt cothrom le dáta le himeacht ama trí bhíthin gníomh tarmligthe, agus comhréireacht á háirithiú ag an am céanna, agus a iarraidh ar ÚEUM tuairim a thabhairt. Ina theannta sin, níor cheart baint a bheith ag an sásra um malartú sonraí ordaithe ach le scaireanna ar dtús, sula mbainfidh sé le bannaí agus todhchaíochtaí chomh maith, agus ábharthacht na n-ionstraimí airgeadais sin á cur san áireamh i gcomhthéacs trádáil trasteorann agus cúbláil margaidh araon. Mar sin féin, chun a áirithiú go léiríonn sásra mar sin um shonraí ordaithe a mhalartú forbairtí sna margaí airgeadais mar aon le cumas na n-údarás inniúil sonraí nua a phróiseáil, ba cheart an chumhacht a thabhairt don Choimisiún chun raon feidhme na n-ionstraimí a leathnú tuilleadh ar féidir a sonraí ordaithe a mhalartú tríd an sásra sin agus chun cuimsiú bannaí agus todhchaíochtaí a chur ar athló, seans, agus anailís ÚEUM ar imscaradh na meicníochta á cur san áireamh, go háirithe ó thaobh costas de.

(79)

Chun feabhas a chur ar an bhfaireachán a dhéantar ar orduithe trí fhorbairtí teicneolaíochta agus chun sláine an mhargaidh a threisiú, ba cheart do na húdaráis inniúla a bheith in ann rochtain a fháil ar shonraí ordaithe, ní hamháin ar iarratas ad hoc, ach ar bhonn leanúnach freisin. Thairis sin, chun próiseáil sonraí ordaithe ag údaráis inniúla náisiúnta a éascú, is gá formáid sonraí den sórt sin a chomhchuibhiú.

(80)

Is toisc thábhachtach é an riosca go sárófaí na ceanglais maidir le nochtadh ar bhealach neamhaireach faoi Rialachán (AE) Uimh. 596/2014 agus na smachtbhannaí riaracháin lena mbaineann lena ndíspreagtar cuideachtaí ligean chun trádála a iarraidh. Chun ualach iomarcach ar chuideachtaí, go háirithe FBManna, lena n-áirítear micrifhiontair, a sheachaint, ba cheart méid deiridh na smachtbhannaí i leith sáruithe arna ndéanamh ag daoine dlítheanacha i ndáil le ceanglais maidir le nochtadh a bheith comhréireach le méid na cuideachta. Bunaítear le Rialachán (AE) Uimh. 596/2014, Airteagal 30(2), pointí (j)(iii) agus (iv), íosmhéid d’uasmhéid na smachtbhannaí is féidir le húdarás inniúil náisiúnta a fhorchur i sárú a bhaineann leis an gcóras nochta. Chun comhréireacht a áirithiú, ba cheart na méideanna sin a chinneadh, mar riail ghinearálta, bunaithe ar láimhdeachas bliantúil iomlán na cuideachta. Mar sin féin, i gcás ina mbeadh méid deiridh an smachtbhanna a fhorchuirfear díréireach íseal i bhfianaise na n-imthosca a leagtar amach in Airteagal 31 de Rialachán (AE) Uimh. 596/2014 tríd an uasmhéid a leagtar amach sa dlí náisiúnta a chur i bhfeidhm bunaithe ar an láimhdeachas bliantúil iomlán, ba cheart do na Ballstáit a áirithiú gur féidir leis na húdaráis inniúla náisiúnta méid deiridh na smachtbhannaí a mhéadú, tríd an uasmhéid a bhunaítear sa dlí náisiúnta a chur san áireamh, mar a shloinntear i ndearbhmhéideanna. Sna cásanna sin, is iomchuí freisin cead a thabhairt do gach Ballstát ina dhlí náisiúnta leibhéal uasta smachtbhannaí níos ísle a chur i bhfeidhm le haghaidh FBManna, mar a léirítear i ndearbhmhéideanna, mar bhealach chun a áirithiú go gcaithfear leo go comhréireach. Mar sin féin, ba cheart cead a bheith ag Ballstát an leibhéal uasta céanna a bhunú ina dhlí náisiúnta agus a shloinntear i ndearbhmhéideanna i gcás gach cineáil eisitheora.

(81)

Agus sonraí pearsanta á bpróiseáil ag na húdaráis inniúla faoi chuimsiú Rialachán (AE) Uimh. 596/2014, ba cheart dóibh Rialachán (AE) 2016/679 ó Pharlaimint na hEorpa agus ón gComhairle a chomhlíonadh (17). Maidir leis an bpróiseáil sonraí pearsanta a dhéanann ÚEUM faoi chuimsiú an Rialacháin sin, ba cheart do ÚEUM Rialachán (AE) 2018/1725 ó Pharlaimint na hEorpa agus ón gComhairle a chomhlíonadh (18). Go sonrach, ba cheart do ÚEUM agus údaráis náisiúnta inniúla sonraí pearsanta a choinneáil ar feadh tréimhse nach faide ná mar is gá chun na gcríoch sin dá ndéantar na sonraí pearsanta a phróiseáil

(82)

Chun na ceanglais a leagtar amach sa Rialachán seo a shonrú, i gcomhréir lena chuspóirí, ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh a tharmligean chuig an gCoimisiún i dtaca le hinneachar agus formáid chaighdeánaithe a shonrú chomh maith le hord caighdeánaithe an réamheolaire, an réamheolaire bunaidh agus na dtéarmaí críochnaitheacha, ina sonraítear an fhaisnéis íosta atá le háireamh sa doiciméad clárúcháin uilíoch, ina sonraítear ábhar laghdaithe agus formáid chaighdeánaithe agus ord caighdeánaithe réamheolaire leantach AE agus réamheolaire eisiúna Fáis AE, cóineasú maoirseachta a chothú trí na critéir ghrinnscrúdaithe agus na nósanna imeachta maidir le formheas an réamheolaire ag údaráis inniúla a shonrú tuilleadh, critéir ghinearálta coibhéise a shonrú a thuilleadh maidir le réamheolairí arna dtarraingt suas ag eisitheoirí tríú tír, lena gcinntear inneachar íosta na socruithe comhair idir údaráis inniúla nó, i gcás ina n-iarrann ceann amháin ar a laghad de na húdaráis sin, ÚEUM agus údaráis mhaoirseachta tríú tír é, de bhun Rialachán (AE) 2017/1129, chomh maith le liosta nach bhfuil uileghabhálach d’imeachtaí deiridh a leagan amach agus a athbhreithniú i bpróisis agus i gcásanna fadtréimhseacha nár cheart an nochtadh a mhoilliú, liosta na n-ionstraimí airgeadais a leathnú chun a chur ar chumas na n-údarás inniúil sonraí ordaithe a fháil, liosta d’ionaid trádála ainmnithe a bhfuil gné shuntasach trasteorann i scaireanna acu a bhunú agus a thabhairt cothrom le dáta, de bhun Rialachán (AE) Uimh. 596/2014. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (19). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile an tráth céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(83)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí a thabhairt don Choimisiún caighdeáin theicniúla cur chun feidhme, arna bhforbairt ag ÚEUM, a ghlacadh, maidir leis an gclómhéid, agus na ceanglais stíle a shonrú, ag brath ar an gcineál réamheolaire agus ar chineál na n-infheisteoirí a bhfuiltear ag díriú orthu; teimpléad agus leagan amach na n-achoimrí ar réamheolairí, lena n-áirítear na ceanglais maidir le clómhéid agus stíl; formáid laghdaithe na liostaí de dhaoine ar an taobh istigh; na socruithe iomchuí a cheanglaítear leis an sásra chun sonraí ordaithe a mhalartú; agus na socruithe, córais agus nósanna imeachta iomchuí d’ionaid trádála chun sásra a bhunú chun sonraí den sórt sin a mhalartú go leanúnach agus go tráthúil, lena n-áirítear formáid agus spriocdhátaí do sholáthar na sonraí arna n-iarraidh ag údarás inniúil. Ba cheart don Choimisiún na caighdeáin theicniúla cur chun feidhme sin a ghlacadh trí bhíthin gníomhartha cur chun feidhme de bhun Airteagal 291 CFAE agus i gcomhréir le hAirteagal 15 de Rialachán (AE) Uimh. 1095/2010.

(84)

Ós rud é nach féidir leis na Ballstáit cuspóirí an Rialacháin seo a ghnóthú go leordhóthanach, toisc go n-éilítear leis na bearta a tugadh isteach comhchuibhiú iomlán ar fud an Aontais agus, de bharr fairsinge agus éifeachtaí, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú.

(85)

Ba cheart, dá bhrí sin, Rialacháin (AE) Uimh. 596/2014, (AE) Uimh. 600/2014 agus (AE) 2017/1129 a leasú dá réir,

(1)

leasaítear Airteagal 1 mar a leanas:

(2)

leasaítear Airteagal 2 mar a leanas:

(3)

in Airteagal 3, cuirtear an méid seo a leanas in ionad mhíreanna 1 agus 2:

(4)

in Airteagal 4, cuirtear an méid seo a leanas in ionad mhír 1:

(5)

in Airteagal 5(1), cuirtear an méid seo a leanas in ionad na chéad fhomhíre:

‘Maidir le haon athdhíol urrús ina dhiaidh sin a bhí faoi réir ceann amháin nó níos mó de na cineálacha tairisceana urrús don phobal a liostaítear in Airteagal 1(4), pointí (a) go (db), measfar gur tairiscint ar leithligh é agus beidh feidhm ag an sainmhíniú a leagtar amach in Airteagal 2, pointe (d), chun a chinneadh an tairiscint urrús don phobal é an t-athdhíol sin. Beidh láithriú urrús trí idirghabhálaithe airgeadais faoi réir réamheolaire a fhoilsiú mura bhfuil feidhm ag ceann de na díolúintí a liostaítear in Airteagal 1(4), pointí (a) go (db), maidir leis an láithriú deiridh.’

(6)

leasaítear Airteagal 6 mar a leanas:

(7)

leasaítear Airteagal 7 mar a leanas:

(8)

in Airteagal 9(2), cuirtear an méid seo a leanas in ionad an dara fomhír:

‘Tar éis don údarás inniúil doiciméad clárúcháin uilíoch an eisitheora a fhormheas le haghaidh bliain airgeadais amháin, féadfar doiciméid clárúcháin uilíocha ina dhiaidh sin a chomhdú leis an údarás inniúil gan formheas a fháil roimh ré.’

(9)

in Airteagal 11(2), an dara fomhír, cuirtear an méid seo a leanas in ionad na coda réamhráití:

‘Áiritheoidh na Ballstáit, áfach, nach mbeidh aon dliteanas sibhialta ar aon duine ar bhonn na hachoimre de bhun Airteagal 7 agus ar an mbonn sin amháin, lena n-áirítear aon aistriúchán uirthi, mura rud é gur fíor an méid a leanas:’

(10)

leasaítear Airteagal 13 mar a leanas:

(11)

scriostar Airteagal 14;

(12)

cuirtear an méid seo a leanas in ionad Airteagal 14a:

(*7)  Rialachán Tarmligthe (AE) 2017/565 ón gCoimisiún an 25 Aibreán 2016 lena bhforlíontar Treoir 2014/65/AE ó Pharlaimint na hEorpa agus ón gComhairle a mhéid a bhaineann le ceanglais eagraíochtúla agus coinníollacha oibriúcháin do ghnólachtaí infheistíochta agus téarmaí sainithe chun críoch na Treorach sin (IO L 87, 31.3.2017, lch. 1).’;"

(13)

scriostar Airteagal 15;

(14)

cuirtear an t-airteagal seo a leanas isteach:

(15)

in Airteagal 16, cuirtear an méid seo a leanas in ionad mhír 1:

(16)

in Airteagal 17(1), cuirtear an méid seo a leanas in ionad phointe (a):

;

(17)

leasaítear Airteagal 19 mar a leanas:

(18)

leasaítear Airteagal 20 mar a leanas:

(19)

leasaítear Airteagal 21 mar a leanas:

(20)

leasaítear Airteagal 23 mar a leanas:

(21)

leasaítear Airteagal 27 mar a leanas:

(22)

cuirtear an méid seo a leanas in ionad Airteagal 29:

(23)

cuirtear an méid seo a leanas in ionad Airteagal 30:

(*8)  Treoir (AE) 2015/849 ó Pharlaimint na hEorpa agus ón gComhairle an 20 Bealtaine 2015 maidir le cosc a chur le húsáid an chórais airgeadais chun críoch sciúrtha airgid agus maoinithe sceimhlitheoirí, lena leasaítear Rialachán (AE) Uimh. 648/2012 ó Pharlaimint na hEorpa agus ón gComhairle, agus lena n-aisghairtear Treoir 2005/60/CE ó Pharlaimint na hEorpa agus ón gComhairle agus Treoir 2006/70/CE ón gCoimisiún (IO L 141, 5.6.2015, lch. 73).’;"

(24)

in Airteagal 38(1), an chéad fhomhír, cuirtear an méid seo a leanas in ionad phointe (a):

;

(25)

in Airteagal 40, cuirtear an méid seo a leanas in ionad an dara fomhír:

‘Chun críocha Airteagal 20, beidh feidhm ag ceart achomhairc freisin i gcás nach mbeidh cinneadh glactha ag an údarás inniúil chun iarratas ar fhormheas a fhormheas nó a dhiúltú nó i gcás nach mbeidh iarratas ar bith ar athruithe ná ar fhaisnéis fhorlíontach déanta aige laistigh de na teorainneacha ama a leagtar amach in Airteagal 20(2), (3), (6) agus (6a) i ndáil leis an iarratas sin.’

(26)

leasaítear Airteagal 44 mar a leanas:

(27)

leasaítear Airteagal 47 mar a leanas:

(28)

scriostar Airteagal 47a;

(29)

in Airteagal 48, cuirtear an méid seo a leanas in ionad mhíreanna 1 agus 2:

(30)

cuirtear an t-airteagal seo a leanas leis:

(31)

leasaítear Iarscríbhinní I go Va i gcomhréir leis an Iarscríbhinn a ghabhann leis an Rialachán seo.

(1)

in Airteagal 3, cuirtear an pointe seo a leanas leis:

;

(2)

leasaítear Airteagal 5 mar a leanas:

(3)

cuirtear an méid seo a leanas in ionad Airteagal 7(1), pointe (d):

;

(4)

leasaítear Airteagal 11 mar a leanas:

(5)

in Airteagal 13(12), an chéad fhomhír, cuirtear an méid seo a leanas in ionad phointe (d):

;

(6)

leasaítear Airteagal 17 mar a leanas:

(7)

leasaítear Airteagal 18 mar a leanas:

(8)

leasaítear Airteagal 19 mar a leanas:

(9)

in Airteagal 23(2), cuirtear an méid seo a leanas in ionad phointe (g):

;

(10)

in Airteagal 25, cuirtear isteach an mhír seo a leanas:

(11)

cuirtear na hairteagail seo a leanas isteach:

(12)

scriostar Airteagal 28

(13)

cuirtear an méid seo a leanas in ionad Airteagal 29:

(*9)  Rialachán (AE) 2016/679 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil agus maidir le saorghluaiseacht sonraí den sórt sin, agus lena n-aisghairtear Treoir 95/46/CE (An Rialachán Ginearálta maidir le Cosaint Sonraí) (IO L 119, 4.5.2016, lch. 1).’;"

(14)

leasaítear Airteagal 30 mar a leanas:

(15)

in Airteagal 31, cuirtear an méid seo a leanas in ionad mhír 1:

(16)

leasaítear Airteagal 35 mar a leanas:

(17)

leasaítear Airteagal 38 mar a leanas: