(1)

Leagtar síos le Rialachán (AE) 2016/429 rialacha sonracha ó thaobh galair de maidir leis na galair a liostaítear i gcomhréir le hAirteagal 5(1) de, agus leagtar síos freisin an chaoi a bhfuil na rialacha sin le cur i bhfeidhm maidir le catagóirí éagsúla de ghalair liostaithe. Leis an Rialachán sin déantar foráil go mbunóidh na Ballstáit cláir dhíothaithe éigeantacha le haghaidh na ngalar liostaithe dá dtagraítear in Airteagal 9(1), pointe (b), de, agus déantar foráil maidir le cláir dhíothaithe roghnacha le haghaidh na ngalar liostaithe dá dtagraítear in Airteagal 9(1), pointe (c), de, agus maidir le formheas na gclár sin ag an gCoimisiún. Le Rialachán (AE) 2016/429 déantar foráil freisin maidir leis an bhformheas nó an aistarraingt a dhéanfaidh an Coimisiún ar stádas saor ó ghalair Ballstát nó criosanna nó deighleog díobh maidir le galair liostaithe áirithe dá dtagraítear in Airteagal 9(1), pointí (b) agus (c), de.

(2)

Le Rialachán Tarmligthe (AE) 2020/689 (2) ón gCoimisiún forlíontar Rialachán (AE) 2016/429 agus leagtar síos na critéir maidir le stádas saor ó ghalair a dheonú, a choinneáil ar bun, a chur ar fionraí agus a aistarraingt i gcás Ballstát nó criosanna nó deighleoga díobh, agus na ceanglais maidir le formheas clár díothaithe éigeantach nó roghnach le haghaidh Ballstát nó criosanna nó deighleoga díobh.

(3)

Le Rialachán Cur Chun Feidhme (AE) 2021/620 ón gCoimisiún (3) leagtar síos rialacha cur chun feidhme le haghaidh na ngalar liostaithe dá dtagraítear in Airteagal 9(1), pointí (a), (b) agus (c), de Rialachán (AE) 2016/429, maidir le hainmhithe, a mhéid a bhaineann le stádas saor ó ghalair agus stádas neamh-vacsaínithe atá ag Ballstáit áirithe nó criosanna nó deighleoga díobh, agus formheas na gclár díothaithe le haghaidh na ngalar liostaithe sin. Go háirithe, liostaítear ann sna hIarscríbhinní a ghabhann leis, na Ballstáit nó na criosanna nó deighleoga díobh a bhfuil stádas formheasta saor ó ghalair acu agus liostaítear ann freisin na cláir dhíothaithe éigeantacha nó roghnacha fhormheasta atá ann cheana. De thoradh na staide eipidéimeolaíche maidir le galair áirithe a bheith ag athrú, is gá Iarscríbhinní áirithe a ghabhann le Rialachán Cur Chun Feidhme (AE) 2021/620 a leasú chun stádais saor ó ghalair Ballstát áirithe nó criosanna díobh a fhormheas agus chun an formheas a tharraingt siar i gcás criosanna áirithe de Bhallstáit ina ndeimhnítear ráigeanna galar nó nach bhfuil na coinníollacha maidir le stádas saor ó ghalair a choinneáil ar bun á gcomhlíonadh iontu a thuilleadh, agus chun cláir dhíothaithe éigeantacha nó roghnacha áirithe arna gcur faoi bhráid an Choimisiúin a fhormheas.

(4)

Maidir le hionfhabhtú le Brucella abortus, B. melitensis agus B. suis, buinneach víreasach buaibheach (BVB), ionfhabhtú leis an víreas gormtheanga (séiritíopaí 1-24), seipticéime fuilreatha víreasach agus neacróis fhuilghinte ionfhabhtaíoch (NFI), chuir roinnt Ballstát iarratas chuig an gCoimisiún le déanaí ar fhormheas ar an stádas saor ó ghalair nó ar leasuithe ar chláir dhíothaithe le haghaidh criosanna áirithe dá gcríoch. Tá fógra tugtha ag Ballstát freisin faoi ráigeanna ionfhabhtuithe leis an víreas gormtheanga, rud nach mór a léiriú freisin san Iarscríbhinn ábhartha a ghabhann le Rialachán Cur Chun Feidhme (AE) 2021/620.

(5)

Maidir le hionfhabhtú le Brucella abortus, B. melitensis agus B. suis i mbó-ainmhithe, chuir an Iodáil faisnéis faoi bhráid an Choimisiúin lena léirítear go gcomhlíontar na coinníollacha maidir le stádas saor ó ghalair a aithint a leagtar síos i Rialachán Tarmligthe (AE) 2020/689 i gcúige Agrigento i réigiún na Sicile. Tar éis don Choimisiún measúnú a dhéanamh, léiríodh go gcomhlíonann an t-iarratas sin na critéir a leagtar síos i gCuid II, Caibidil 4, de Rialachán Tarmligthe (AE) 2020/689 maidir le stádas saor ó ghalair a dheonú. Dá bhrí sin, ba cheart an cúige sin a liostú mar chúige saor ó Brucella abortus, B. melitensis agus B. suis i mbó-ainmhithe i gCuid I, Caibidil 1, d’Iarscríbhinn I a ghabhann le Rialachán Cur Chun Feidhme (AE) 2021/620.

(6)

Maidir le BVB, chuir an Ghearmáin faisnéis faoi bhráid an Choimisiúin lena léirítear go gcomhlíontar na coinníollacha maidir le stádas saor ó ghalair a fhormheas i leith BVB, ar coinníollacha iad a leagtar síos i Rialachán Tarmligthe (AE) 2020/689, i réigiúin Göttingen, Northeim agus Stade i stát na Sacsaine Íochtaraí agus i réigiún Kleve i stát Nordrhein-Westfalen. Tar éis don Choimisiún measúnú a dhéanamh, léiríodh go gcomhlíonann na hiarratais sin na critéir a leagtar síos i gCuid II, Caibidil 4, de Rialachán Tarmligthe (AE) 2020/689 maidir le stádas saor ó ghalar a dheonú i leith BVB. Dá bhrí sin, ba cheart na criosanna sin a liostú i gCuid I d’Iarscríbhinn VII a ghabhann le Rialachán Cur Chun Feidhme (AE) 2021/620, mar chriosanna ag a bhfuil stádas saor ó ghalair i leith BVB.

(7)

Maidir le hionfhabhtú leis an víreas gormtheanga, tá fógra tugtha ag an Spáinn don Choimisiún faoi ráig ionfhabhtaithe leis an víreas gormtheanga séiritíopa 4 i gcúige Alicante i bpobal féinrialaitheach Valencia. Ós rud é go bhfuil stádas saor ó ghalair ag an limistéar sin, agus go liostaítear é i gCuid I d’Iarscríbhinn VIII a ghabhann le Rialachán Cur Chun Feidhme (AE) 2021/620, ba cheart formheas an stádais saor ó ghalair i leith ionfhabhtú leis an víreas gormtheanga a aistarraingt, agus ba cheart an iontráil a bhaineann leis an Spáinn sa liosta sin a leasú dá réir.

(8)

Chuir an Spáinn an Coimisiún ar an eolas freisin gur chuir sí le raon feidhme críochach an chláir díothaithe roghnaigh i leith ionfhabhtú leis an víreas gormtheanga a formheasadh cheana féin le haghaidh an chreasa a liostaítear i gCuid II d’Iarscríbhinn VIII a ghabhann le Rialachán Cur Chun Feidhme (AE) 2021/620 trí chrios a chur leis a chuimsíonn cúige Alicante i bpobal féinrialaitheach Valencia. Dá bhrí sin, ba cheart an limistéar sin a chur leis an iontráil a bhaineann leis an Spáinn i gCuid II d’Iarscríbhinn VIII a ghabhann le Rialachán Cur Chun Feidhme (AE) 2021/620, agus ba cheart an leasú atá beartaithe ar an gclár díothaithe i leith ionfhabhtú leis an víreas gormtheanga a fhormheas.

(9)

Maidir le hionfhabhtú le seipticéime fuilreatha víreasach, tá faisnéis curtha faoi bhráid an Choimisiúin ag an Danmhairg agus an Eastóin lena léirítear go gcomhlíontar na coinníollacha maidir le stádas saor ó ghalair i leith seipticéime fuilreatha víreasach a aithint a leagtar síos le Rialachán Tarmligthe (AE) 2020/689 i gcríoch iomlán na mBallstát féin. Tar éis don Choimisiún measúnú a dhéanamh, léiríodh go gcomhlíonann na hiarratais sin na critéir a leagtar síos i gCuid II, Caibidil 4, de Rialachán Tarmligthe (AE) 2020/689 maidir le stádas saor ó ghalar a dheonú i leith seipticéime fuilreatha víreasach. Dá bhrí sin, ba cheart críoch iomlán na mBallstát sin a liostú i gCuid I d’Iarscríbhinn XII a ghabhann le Rialachán Cur Chun Feidhme (AE) 2021/620, mar chríocha ag a bhfuil stádas saor ó ghalair i leith seipticéime fuilreatha víreasach.

(10)

Maidir le NFI, tá faisnéis curtha faoi bhráid an Choimisiúin ag an Eastóin agus an Fhionlainn lena léirítear go gcomhlíontar na coinníollacha maidir le stádas saor ó ghalair i leith NFI a fhormheas a leagtar síos le Rialachán Tarmligthe (AE) 2020/689 ina críoch iomlán agus i ndeighleog amháin dá cuid, faoi seach. Tar éis don Choimisiún measúnú a dhéanamh, léiríodh go gcomhlíonann an t-iarratas sin na critéir a leagtar síos i gCuid II, Caibidil 4, de Rialachán Tarmligthe (AE) 2020/689 maidir le stádas saor ó ghalair a dheonú i leith NFI. Dá bhrí sin, ba cheart críoch iomlán na hEastóine agus deighleog amháin de chuid na Fionlainne a liostú i gCuid I d’Iarscríbhinn XIII a ghabhann le Rialachán Cur Chun Feidhme (AE) 2021/620 mar chríoch agus mar dheighleog ag a bhfuil stádas saor ó ghalair i leith NFI.

(11)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,