(1)

Le Rialachán (AE) Uimh. 576/2013 leagtar síos na ceanglais sláinte ainmhithe is infheidhme maidir le gluaiseacht neamhthráchtála peataí isteach i mBallstát ó Bhallstát eile agus ó thríú tíortha agus na seiceálacha is infheidhme maidir leis na gluaiseachtaí sin.

(2)

Le hAirteagal 10(1) de Rialachán (AE) Uimh. 576/2013 soláthraítear na coinníollacha faoinar féidir peataí de na speicis a liostaítear i gCuid A d’Iarscríbhinn I a ghabhann leis an Rialachán sin, is iad sin peataí madraí, cait agus firéid, a aistriú isteach i mBallstát ó chríoch nó ó thríú tír. I gcomhréir le hAirteagal 10(1), pointe (c), ní mór tástáil toirtmheasctha um antasubstaintí in aghaidh an chonfaidh a dhéanamh ar na peataí sin, tástáil a chomhlíonann na ceanglais bhailíochta a leagtar amach in Iarscríbhinn IV a ghabhann leis an Rialachán sin.

(3)

De mhaolú ar Airteagal 10(1), pointe (c), le hAirteagal 12(1) de Rialachán (AE) Uimh. 576/2013 foráiltear nach gá an tástáil toirtmheasctha um antasubstaintí a dhéanamh ar pheataí madraí, cat agus firéad atá á n-aistriú isteach i mBallstát ó chríoch nó ó thríú tír a liostaítear, i measc críocha agus tíortha eile, de bhun Airteagal 13(2) den Rialachán sin.

(4)

Chun bheith liostaithe faoi Airteagal 13(2) de Rialachán (AE) Uimh. 576/2013, ba cheart do chríoch nó do thríú tír iarratas a chur isteach ina léirítear, maidir le peataí madraí, cat agus firéad, go gcomhlíontar ann ar a laghad na critéir shonracha faoi phointí (a) go (e) d’Airteagal 13(2), chun leibhéal leordhóthanach sábháilteachta a áirithiú a mhéid a bhaineann le rioscaí don tsláinte phoiblí agus do shláinte ainmhithe a bhaineann leis na gluaiseachtaí neamhthráchtála peataí sin.

(5)

I gCuid 2 d’Iarscríbhinn II a ghabhann le Rialachán Cur Chun Feidhme (AE) Uimh. 577/2013 ón gCoimisiún (2), leagtar síos liosta na gcríoch agus na dtríú tíortha a thairbhíonn den mhaolú dá bhforáiltear in Airteagal 13(2) de Rialachán (AE) Uimh. 576/2013.

(6)

Le seiceálacha a rinne údaráis náisiúnta le blianta beaga anuas ag pointí iontrála san Aontas i gcomhréir le hAirteagal 34 de Rialachán (AE) Uimh. 576/2013, léiríodh go raibh neamhchomhlíontachtaí ann arís is arís eile a bhain le bearta coisctheacha sláinte in aghaidh an chonfaidh maidir le peataí madraí, cat agus firéad a bhí á n-aistriú ón mBealarúis agus ón Rúis. Áirítear ar na neamhchomhlíontachtaí sin gan vacsaíniú in aghaidh an chonfaidh a dhéanamh agus an vacsaíniú sin a riar go míchuí, mar aon le vacsaíniú in aghaidh an chonfaidh a rinneadh a dhoiciméadú go bréagach, ach ar deimhníodh an bhailíocht ina leith go míchruinn sna deimhnithe sláinte ainmhithe a ghabhann leis.

(7)

Mar chuid de na critéir atá le comhlíonadh ag aon tríú tír ina hiarratas maidir le hiontráil ar an liosta dá bhforáiltear in Airteagal 13(2) de Rialachán (AE) Uimh. 576/2013, ceanglaítear le pointe (d) den Airteagal sin go bhfuil rialacha maidir leis an gconfadh a chosc agus a rialú i bhfeidhm agus curtha chun feidhme go héifeachtach chun an riosca ionfhabhtaithe peataí a íoslaghdú, lena n-áirítear na rialacha maidir le vacsaíniú ainmhithe clóis in aghaidh an chonfaidh.

(8)

Thairis sin, le seirbhísí rialaithe oifigiúla ní mór a áirithiú go n-aistreofar peataí madraí, cat agus firéad in éineacht le deimhnithe sláinte ainmhithe a líontar isteach go cuí agus a eisítear i gcomhréir le hAirteagal 26 de Rialachán (AE) Uimh. 576/2013. Tugann sé sin le tuiscint go bhfuil vacsaíniú in aghaidh an chonfaidh faighte ag na peataí sin, vacsaíniú lena gcomhlíontar forálacha Iarscríbhinn III a ghabhann le Rialachán (AE) Uimh. 576/2013 go hiomlán.

(9)

Sholáthair an Bhealarúis agus an Rúis ráthaíochtaí chuige sin in éineacht lena n-iarratas maidir le hiontáil ar an liosta. Mar sin féin, léirítear go bhfuil easnaimh thromchúiseacha ann i bhforfheidhmiú an dlí ar a leibhéal náisiúnta leis na neamhchomhlíontachtaí a bhí ann arís is arís eile a shainaithin na húdaráis náisiúnta ag na pointí iontrála san Aontas maidir le peataí madraí, cat agus firéad atá á n-aistriú ón mBealarúis agus ón Rúis. Is ábhar mór amhrais iad na heasnaimh sin i ndáil le cur i bhfeidhm leanúnach agus cur chun feidhme éifeachtach na rialacha maidir leis an gconfadh a chosc agus a rialú, rialacha arna ráthú ag údaráis inniúla na dtríú tíortha sin, agus i ndáil le cruinneas an deimhnithe oifigiúil a eisítear ar a leibhéal.

(10)

I bhfianaise leitheadúlacht mhór an neamhchomhlíonta a bhaineann le stádas vacsaínithe na bpeataí in aghaidh an chonfaidh agus cruinneas a dheimhnithe, is ábhar mór imní maidir leis an riosca an confadh a thabhairt isteach san Aontas é an díolúine i ndáil le tástáil toirtmheasctha um antasubstaintí in aghaidh an chonfaidh a dhéanamh ar pheataí madraí, cat agus firéad de thionscnamh na Bealarúise agus na Rúise roimh a dteacht isteach san Aontas, trí ghluaiseacht neamhthráchtála na bpeataí sin.

(11)

Ina theannta sin, an staid eipidéimeolaíoch neamhfhabhrach sa Bhealarúis agus sa Rúis ina bhfuil an confadh fós ann agus ina mbraitear an confadh go rialta i madraí agus cait mar a chruthaítear leis an bhfaisnéis a bhailíonn an Eagraíocht Dhomhanda um Shláinte Ainmhithe ar an leibhéal idirnáisiúnta, cuireann sí leis an riosca a thuilleadh go dtabharfaí an confadh isteach san Aontas.

(12)

Chun aghaidh a thabhairt ar an staid sin agus chun an riosca a mhaolú maidir leis an gconfadh a thabhairt isteach trí ghluaiseacht neamhthráchtála madraí, cat agus firéad atá á n-aistriú ón mBealarúis agus ón Rúis, is iomchuí an ceanglas maidir le tástáil toirtmheasctha um antasubstaintí in aghaidh an chonfaidh a dhéanamh ar na peataí sin roimh a dteacht isteach i gcríoch an Aontais.

(13)

Dá bhrí sin, is gá liosta na gcríoch agus na dtríú tíortha a leagtar amach i gCuid 2 d’Iarscríbhinn II a ghabhann le Rialachán Cur Chun Feidhme (AE) Uimh. 577/2013 a thabhairt cothrom le dáta agus na hiontrálacha a bhaineann leis an mBealarúis agus leis an Rúis a bhaint den liosta sin.

(14)

Chun aon chur isteach nach bhfuil gá leis ar ghluaiseacht neamhthráchtála peataí de na speicis a liostaítear i gCuid A d’Iarscríbhinn I a ghabhann le Rialachán (AE) Uimh. 576/2013 ón mBealarúis agus ón Rúis a chosc agus chun an amlíne dá bhforáiltear in Iarscríbhinn IV a ghabhann le Rialachán (AE) Uimh. 576/2013 a chomhlíonadh maidir le tástáil toirtmheasctha um antasubstaintí in aghaidh an chonfaidh a aithint mar thástáil bhailí, ba cheart feidhm a bheith ag an Rialachán seo ón 16 Meán Fómhair 2024 ar aghaidh.

(15)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,