(1)

Is é is cuspóir don Treoir seo creat cuimsitheach a sholáthar chun foréigean in aghaidh na mban agus foréigean teaghlaigh a chosc agus a chomhrac go héifeachtach ar fud an Aontais. Déanann sí amhlaidh trí bhearta a neartú agus a thabhairt isteach i ndáil leis na réimsí seo a leanas: cionta coiriúla agus pionóis ábhartha a shainiú, íospartaigh a chosaint agus rochtain ar cheartas, tacaíocht d’íospartaigh, bailiú feabhsaithe sonraí, cosc, comhordú agus comhar.

(2)

Is bunluachanna de chuid an Aontais iad an comhionannas idir mná agus fir agus an neamh-idirdhealú agus is cearta bunúsacha iad a chumhdaítear, faoi seach, in Airteagal 2 den Chonradh ar an Aontas Eorpach (CAE) agus in Airteagail 21 agus 23 de Chairt um Chearta Bunúsacha an Aontais Eorpaigh (‘an Chairt’). Cuireann foréigean in aghaidh na mban agus foréigean teaghlaigh na luachanna agus na cearta sin i mbaol, rud a bhaineann an bonn de chearta na mban agus na gcailíní chun comhionannais i ngach réimse den saol agus a chuireann bac ar a rannpháirtíocht chomhionann sa tsochaí agus sa saol gairmiúil.

(3)

Is ionann foréigean in aghaidh na mban agus foréigean teaghlaigh agus sárú ar chearta bunúsacha amhail an ceart chun dínit an duine, an ceart chun beatha agus chun iomláine an duine, an toirmeasc ar íde nó ar phionós atá mídhaonna nó táireach, an ceart chun measa ar an saol príobháideach agus ar shaol an teaghlaigh, an ceart chun saoirse agus slándála, an ceart go gcosnófaí sonraí pearsanta, an ceart chun neamh-idirdhealaithe, lena n-áirítear ar fhorais inscne, agus cearta an linbh, mar a chumhdaítear sa Chairt agus i gCoinbhinsiún na Náisiún Aontaithe um Chearta an Linbh.

(4)

Leis an Treoir seo, tacaítear leis na gealltanais idirnáisiúnta atá déanta ag na Ballstáit chun foréigean in aghaidh na mban agus foréigean teaghlaigh a chomhrac agus a chosc, go háirithe Coinbhinsiún na Náisiún Aontaithe maidir le gach cineál Idirdhealaithe in aghaidh na mBan a Dhíothú agus Coinbhinsiún na Náisiún Aontaithe ar Chearta Daoine faoi Mhíchumas, agus, i gcás inarb ábhartha, Coinbhinsiún Chomhairle na hEorpa chun foréigean in aghaidh na mban agus foréigean teaghlaigh a chosc agus a chomhrac agus Coinbhinsiún na hEagraíochta Idirnáisiúnta Saothair maidir le foréigean agus ciapadh a dhíothú i saol na hoibre, a síníodh an 21 Meitheamh 2019 sa Ghinéiv.

(5)

I bhfianaise na sainiúlachtaí a bhaineann leis na cionta foréigin in aghaidh na mban agus foréigin teaghlaigh, is gá tacar cuimsitheach rialacha a leagan síos lena dtugtar aghaidh ar fhadhb leanúnach an fhoréigin in aghaidh na mban agus an fhoréigin teaghlaigh agus lena bhfreastalaítear ar riachtanais shonracha íospartaigh an fhoréigin sin. Léiríodh nach leor na forálacha atá ann cheana ar leibhéal an Aontais agus ar an leibhéal náisiúnta chun foréigean in aghaidh na mban agus foréigean teaghlaigh a chomhrac agus a chosc go héifeachtach. Go háirithe, cé go ndírítear, i dTreoracha 2011/36/AE (3) agus 2011/93/AE (4) ó Pharlaimint na hEorpa agus ón gComhairle, ar chineálacha sonracha foréigin den sórt sin, agus go soláthraítear, le Treoir 2012/29/AE ó Pharlaimint na hEorpa agus ón gComhairle (5), ina leagtar síos an creat ginearálta d’íospartaigh na coireachta, roinnt coimircí d’íospartaigh, rud a chiallaíonn, chun críocha na Treorach seo, íospartaigh an fhoréigin in aghaidh na mban agus an fhoréigin teaghlaigh, ní thugtar aghaidh ar a riachtanais shonracha leo.

(6)

Is féidir foréigean in aghaidh na mban agus foréigean teaghlaigh a dhéanamh níos measa i gcás ina dtarlaíonn sé in éineacht le hidirdhealú bunaithe ar theaglaim de ghnéas agus d’aon fhoras nó forais eile idirdhealaithe dá dtagraítear in Airteagal 21 den Chairt, eadhon cine, dath, tionscnamh eitneach nó sóisialta, airíonna géiniteacha, teanga, reiligiún nó creideamh, tuairim pholaitiúil nó eile, ballraíocht i mionlach náisiúnta, maoin, breith, míchumas, aois nó claonadh gnéasach (‘idirdhealú trasnach’). Dá bhrí sin, ba cheart do na Ballstáit aird chuí a thabhairt ar íospartaigh a ndéantar difear dóibh mar gheall ar idirdhealú trasnach den sórt sin trí bhearta sonracha a dhéanamh. Daoine a ndéanann idirdhealú trasnach difear dóibh, tá baol méadaithe rompu go bhfulaingeoidh siad foréigean inscnebhunaithe. Dá bharr sin, ba cheart do na Ballstáit an leibhéal riosca méadaithe sin a chur san áireamh agus na bearta dá bhforáiltear sa Treoir seo á gcur chun feidhme, go háirithe maidir leis an measúnú aonair chun riachtanais chosanta íospartach a shainaithint, saintacaíocht d’íospartaigh agus oiliúint agus faisnéis do ghairmithe ar dócha go mbeidh teagmháil acu le híospartaigh.

(7)

Tá íospartaigh i mbaol méadaithe imeaglaithe, díoltais agus íospairt tánaistí agus athíospartha. Ba cheart do na Ballstáit a áirithiú go dtabharfaí aird ar leith ar na rioscaí sin agus ar an ngá atá le dínit agus sláine fhisiciúil íospartach den sórt sin a chosaint. Ba cheart a chur san áireamh, agus measúnú á dhéanamh ar an riosca go mbainfí díoltas amach, an raibh aithne roimh ré ag an íospartach ar an gciontóir nó an raibh caidreamh acu leo roimhe.

(8)

Ba cheart d’íospartaigh a bheith in ann rochtain a fháil ar a gcearta roimh imeachtaí coiriúla, lena linn agus ar feadh tréimhse iomchuí ina ndiaidh i gcomhréir lena riachtanais agus faoi na coinníollacha a leagtar amach sa Treoir seo.

(9)

Forálacha na Treorach seo a bhaineann le cearta íospartach, ba cheart feidhm a bheith acu maidir le gach íospartach iompair choiriúil ar foréigean in aghaidh na mban nó foréigean teaghlaigh é, arna choiriúlú faoi dhlí an Aontais nó faoin dlí náisiúnta. Áirítear leis sin na cionta coiriúla a shainítear sa Treoir seo, eadhon ciorrú ball giniúna ban, pósadh éigeantais, comhroinnt neamhthoiliúil ábhair atá dlúthphearsanta nó ionramháilte, cibearstalcaireacht, cibirchiapadh, cibearsplancáil agus cibirghríosú chun foréigin nó fuatha, agus iompar coiriúil a chumhdaítear le gníomhartha dlí eile de chuid an Aontais, go háirithe Treoracha 2011/36/AE agus 2011/93/AE. Ar deireadh, tagann cionta coiriúla áirithe faoin dlí náisiúnta faoin sainmhíniú ar fhoréigean in aghaidh na mban. Áirítear orthu cionta amhail feimeamharú, éigniú, ciapadh gnéasach, mí-úsáid ghnéasach, stalcaireacht, luathphósadh, ginmhilleadh éigeantach, steiriliú éigeantach agus cineálacha éagsúla cibearfhoréigin, amhail ciapadh gnéasach ar líne agus cibearbhulaíocht. Is cineál foréigin é foréigean teaghlaigh a d’fhéadfaí a choiriúlú go sonrach faoin dlí náisiúnta nó a chumhdach le cionta coiriúla a dhéantar laistigh den teaghlach nó den aonad teaghlaigh nó idir iarchéilí nó céilí reatha nó idir iarpháirtithe nó páirtithe reatha, is cuma cé acu atá nó nach bhfuil teaghlach á roinnt acu. Is féidir le Ballstáit aonair tuiscint níos leithne a bheith acu ar a bhfuil i gceist le foréigean in aghaidh na mban faoin dlí coiriúil náisiúnta. Ba cheart a thabhairt faoi deara nach dtugtar aghaidh leis an Treoir seo ar raon iomlán an iompair choiriúil arb ionann é agus foréigean in aghaidh na mban.

(10)

Is léiriú leanúnach é an foréigean in aghaidh na mban ar idirdhealú struchtúrach in aghaidh na mban, a eascraíonn as caidreamh cumhachta idir mná agus fir atá neamhionann go stairiúil. Is cineál foréigin inscnebhunaithe é a chuireann fir i bhfeidhm go príomha ar mhná agus ar chailíní. Tá sé fréamhaithe sna róil, iompraíochtaí, gníomhaíochtaí agus tréithe a measann sochaí iad a bheith oiriúnach d’fhir agus do mhná, ar rudaí iad atá tógtha go sóisialta. Dá bharr sin, ba cheart dearcadh atá íogair ó thaobh inscne de a chur san áireamh agus an Treoir seo á cur i bhfeidhm.

(11)

Is fadhb shóisialta thromchúiseach é an foréigean teaghlaigh, fadhb a bhíonn i bhfolach go minic. Is féidir tráma tromchúiseach síceolaíoch agus fisiciúil a bheith mar thoradh air agus iarmhairtí tromchúiseacha aige do shaol pearsanta agus gairmiúil íospartaigh toisc gur gnách gur duine an ciontóir ar a bhfuil aithne ag an íospartach agus lena mbeadh coinne ag an íospartach a bheith in ann muinín a bheith aici nó aige as nó aisti. Is féidir foirmeacha éagsúla a bheith i gceist le foréigean den sórt sin, lena n-áirítear foréigean fisiciúil, gnéasach, síceolaíoch agus eacnamaíoch, agus is féidir leis tarlú laistigh de cineálacha éagsúla caidrimh. Is minic a chuimsíonn foréigean teaghlaigh smacht comhéigneach agus is féidir leis tarlú má bhí nó má tá teaghlach á roinnt ag an gciontóir leis an íospartach.

(12)

Ceaptar na bearta faoin Treoir seo chun aghaidh a thabhairt ar riachtanais shonracha na mban agus na gcailíní, ós rud é, mar atá dearbhaithe le sonraí agus staidéir, go ndéanann na cineálacha foréigin a chumhdaítear leis an Treoir seo difear díréireach dóibh, eadhon foréigean in aghaidh na mban agus foréigean teaghlaigh. Mar sin féin, déantar difear do dhaoine eile leis na cineálacha foréigin sin freisin agus, dá bhrí sin, ba cheart dóibh tairbhe a bhaint as na bearta céanna d’íospartaigh dá bhforáiltear sa Treoir seo. Dá bhrí sin, ba cheart don téarma ‘íospartach’ a bheith ag tagairt do gach duine, gan beann ar a n-inscne, agus, mura sonraítear a mhalairt sa Treoir seo, ba cheart do gach íospartach a bheith in ann tairbhe a bhaint as na cearta a bhaineann le cosaint d’íospartaigh agus rochtain ar cheartas, tacaíocht d’íospartaigh agus bearta coisctheacha.

(13)

Mar gheall ar a leochaileacht, dá bhfeicfí foréigean teaghlaigh, d’fhéadfadh sé a bheith tubaisteach do leanaí. Is iondúil go ndéantar díobháil dhíreach shíceolaíoch agus mhothúchánach do leanaí a fheiceann foréigean teaghlaigh laistigh den aonad teaghlaigh nó baile, rud a chuireann isteach ar a bhforbairt agus tá baol méadaithe ann go bhfulaingeoidh siad ó thinneas fisiciúil agus meabhrach, sa ghearrthéarma agus san fhadtéarma araon. Céim thábhachtach i gcosaint leanaí atá ag fulaingt mar gheall ar fhoréigean teaghlaigh is ea an admháil gur íospartaigh iad leanaí a ndearnadh díobháil dóibh go díreach toisc go bhfaca siad foréigean teaghlaigh.

(14)

Chun críocha na Treorach seo, ba cheart ‘údaráis inniúla’ a thuiscint mar an t-údarás nó na húdaráis a ainmníodh faoin dlí náisiúnta mar údaráis atá inniúil chun dualgas dá bhforáiltear sa Treoir seo a chomhlíonadh. Ba cheart do gach Ballstát a chinneadh cé na húdaráis atá le bheith inniúil i leith gach ceann de na dualgais sin.

(15)

De bhun Airteagal 288 den Chonradh ar Fheidhmiú an Aontais Eorpaigh (CFAE), tá treoir le bheith ina ceangal, maidir leis an toradh atá le baint amach, ar gach Ballstát chuig a ndírítear í, ach tá sé le bheith fágtha faoi na húdaráis náisiúnta foirm agus modhanna a roghnú. Mar sin féin, i bhfianaise gur cion de chineál speisialta é ciorrú ball giniúna ban agus an ghá tá lena áirithiú go gcosnaítear íospartaigh a ndéantar damáiste sonrach dóibh mar thoradh air sin, ba cheart aghaidh a thabhairt ar an gcion sin go sonrach i ndlíthe coiriúla na mBallstát. Is cleachtas drochídeach agus dúshaothraitheach é ciorrú ball giniúna ban a bhaineann le baill ghiniúna mná nó cailín agus a dhéantar chun forlámhas ar mhná agus ar chailíní a chaomhnú agus a dhearbhú agus chun smacht sóisialta a chur ar ghnéasacht na mban agus na gcailíní. Déantar é uaireanta i gcomhthéacs pósadh éigeantais leanaí nó foréigean teaghlaigh. Is féidir le ciorrú ball giniúna ban tarlú mar chleachtas traidisiúnta a dhéanann comhphobail áirithe ar mhná. Ba cheart a chumhdach leis cleachtais chiorrúcháin a dhéantar ar chúiseanna nach cúiseanna leighis iad, a dhéanann damáiste doleasaithe agus damáiste ar feadh an tsaoil d’íospartaigh. Mar thoradh ar chiorrú ball giniúna ban, déantar damáiste síceolaíoch agus sóisialta, rud a chuireann isteach go mór ar cháilíocht saoil an íospartaigh. Ba cheart don téarma ‘eisceadh’ a bheith ag tagairt do bhaint amach iomlán nó páirteach an bhrillín agus an labia majora. Ba cheart don téarma ‘ionfhiobúlú’ a bheith ag tagairt do dhúnadh an labia majora trí liopaí seachtracha na pite a fhuáil go páirteach le chéile chun oscailt na faighne a chúngú. Ba cheart don téarma ‘aon chiorrú eile a dhéanamh’ a bheith ag tagairt do gach athrú fisiciúil eile ar na baill ghiniúna ban.

(16)

Is cineál foréigin é an pósadh éigeantais lena mbaineann sáruithe tromchúiseacha ar chearta bunúsacha agus, go háirithe, cearta na mban agus na gcailíní chun sláine coirp, chun saoirse, chun neamhspleáchais, chun sláinte fisiciúla agus meabhairshláinte, chun sláinte gnéis agus atáirgthe, chun oideachais agus chun an tsaoil phríobháidigh. Is tosca iad an bhochtaineacht, an dífhostaíocht, gnáthaimh nó coinbhleachtaí lena gcuirtear pósadh éigeantais chun cinn. Baintear úsáid as foréigean fisiciúil agus gnéasach agus as bagairtí foréigin go minic chun iallach a chur ar bhean nó ar chailín pósadh. Go minic, bíonn cineálacha teacht i dtír agus foréigin fhisiciúil agus shíceolaíoch, amhail teacht i dtír gnéasach, ag gabháil leis an bpósadh éigeantais. Dá bhrí sin, is gá do na Ballstáit uile an pósadh éigeantais a choiriúlú agus ciontóirí a chur faoi réir pionóis iomchuí. Ní dochar an Treoir seo do na sainmhínithe ar ‘phósadh’ dá bhforáiltear sa dlí náisiúnta nó idirnáisiúnta. Ba cheart do na Ballstáit na bearta is gá a dhéanamh chun foráil a dhéanamh maidir le tréimhse theorann lenar féidir pósadh éigeantais a imscrúdú, a ionchúiseamh, a chur chun trialach agus breithniú a dhéanamh air. Ós rud é gur mionaoisigh iad íospartaigh an phósta éigeantais go minic, ba cheart do na tréimhsí teorann leanúint ar feadh tréimhse ama atá leordhóthanach agus atá i gcomhréir le tromchúis an chiona atá i gceist chun gur féidir imeachtaí a thionscnamh go héifeachtúil tar éis don íospartach 18 mbliana d’aois a shlánú.

(17)

Is gá foráil a dhéanamh do shainiú comhchuibhithe ar chionta agus do phionóis maidir le cineálacha áirithe cibearfhoréigin i gcás ina bhfuil dlúthbhaint ag foréigean le húsáid teicneolaíochtaí faisnéise agus cumarsáide (‘TFC’) agus ina n-úsáidtear na teicneolaíochtaí sin chun déine thionchar díobhálach an chiona a mhéadú go suntasach, rud a athraíonn saintréithe an chiona. Leis an gcibearfhoréigean, dírítear go háirithe ar pholaiteoirí, ar iriseoirí agus ar chosantóirí chearta an duine ar mná iad. Is iad cosantóirí chearta an duine daoine aonair, grúpaí nó eagraíochtaí a dhéanann cearta an duine agus saoirsí bunúsacha a aithnítear go huilíoch a chur chun cinn agus a chosaint. Is féidir leis an gcibearfhoréigean mná a chur ina dtost agus srian a chur ar a rannpháirtíocht shochaíoch, sa chaoi is nach bhfuil an rannpháirtíocht sin ar comhchéim le rannpháirtíocht shochaíoch na bhfear. Bíonn tionchar díréireach ag an gcibearfhoréigean ar mhná agus ar chailíní i suíomhanna oideachais, amhail scoileanna agus ollscoileanna, agus bíonn iarmhairtí díobhálacha aige sin ar a mbreisoideachas agus ar a meabhairshláinte, cruthaíonn sé eisiamh sóisialta, imní agus spreagann sé féindochar agus, i gcásanna tromchúiseacha, is féidir le féinmharú a bheith mar thoradh air.

(18)

Le húsáid TFC, tá an baol ann go méadófar go héasca, go tapa agus go forleathan cineálacha áirithe cibearfhoréigin lena ngabhann baol soiléir go gcruthófar nó go ngéarófar mórdhíobháil fhadtéarmach don íospartach. An fhéidearthacht go dtarlódh géarú den sórt sin, atá ina réamhriachtanas le haghaidh roinnt cionta cibearfhoréigin a dhéanamh, ar cionta iad a shainítear sa Treoir seo, ba cheart an fhéidearthacht sin a bheith léirithe leis an ngné a bhaineann le hábhar áirithe a dhéanamh ‘inrochtana don phobal’ trí bhíthin TFC. Ba cheart a thuiscint leis na téarmaí ‘inrochtana don phobal’ agus ‘inrochtana go poiblí’ gur tagairt iad don fhéidearthacht a bheith in ann líon suntasach daoine a shroicheadh. Ba cheart na téarmaí sin a léirmhíniú agus a chur i bhfeidhm ag féachaint do na himthosca ábhartha, lena n-áirítear an teicneolaíocht a úsáidtear chun an t-ábhar sin a dhéanamh inrochtana. Thairis sin, chun rialacha íosta a leagan síos do na cineálacha cibearfhoréigin is tromchúisí, tá na cionta ábhartha a shainítear sa Treoir seo teorannaithe d’iompar ar dóigh dó díobháil thromchúiseach nó díobháil thromchúiseach shíceolaíoch a dhéanamh don íospartach nó teorannaithe d'iompar ar dóigh dó eagla thromchúiseach a chur ar an íospartach go bhfuil a shábháilteacht nó a sábháilteacht nó sábháilteacht cleithiúnaithe i mbaol. I ngach cás, agus measúnú á dhéanamh an dócha go ndéanfadh an t-iompar díobháil thromchúiseach, ba cheart imthosca sonracha an cháis a chur san áireamh, gan dochar do neamhspleáchas na mbreithiúna. Is féidir an dóchúlacht go ndéanfaí díobháil thromchúiseach a thuiscint ó imthosca fíorasacha oibiachtúla. Leis an Treoir seo, bunaítear creat dlíthiúil íosta i ndáil leis sin, agus tá saoirse ag na Ballstáit rialacha coiriúla níos déine a ghlacadh nó a choinneáil ar bun.

(19)

Go háirithe toisc gur féidir iad a scaipeadh go héasca, go tapa agus go forleathan, chomh maith lena gcineál dlúthphearsanta, maidir le híomhánna, físeáin nó ábhar comhchosúil ina léirítear gníomhaíochtaí gáirsiúla nó baill dhlúthphearsanta duine a dhéanamh inrochtana don phobal trí bhíthin TFC gan toiliú an duine sin, is féidir leis sin a bheith an-díobhálach d’íospartaigh. Ba cheart a chumhdach leis an gcion ábhartha a shainítear sa Treoir seo gach cineál ábhair den sórt sin, amhail íomhánna, grianghraif agus físeáin, lena n-áirítear íomhánna gnéasaithe, gearrthóga fuaime agus gearrthóga físe. Ba cheart a chumhdach leis cásanna ina ndéantar an t-ábhar a dhéanamh inrochtana don phobal trí bhíthin TFC gan toiliú an íospartaigh, is cuma ar thoiligh an t-íospartach le giniúint an ábhair nó an bhféadfadh sé gur tharchuir an t-íospartach chuig duine ar leith é. Ba cheart a áireamh sa chion freisin táirgeadh, ionramháil nó athrú neamhthoiliúil, mar shampla trí eagarthóireacht a dhéanamh ar íomhánna, lena n-áirítear trí bhíthin na hintleachta saorga, ar ábhar é a thugann le tuiscint go bhfuil duine ag gabháil do ghníomhaíochtaí gnéasacha, a mhéid a dhéantar an t-ábhar inrochtana don phobal ina dhiaidh sin, trí bhíthin TFC, gan toiliú an duine sin. Ba cheart a áireamh le táirgeadh, ionramháil nó athrú den sórt sin ‘domhainbhrionnuithe’ a chumadh, i gcás inar an-chosúil an t-ábhar le duine, réada, áiteanna nó eintitis nó imeachtaí eile atá ann go hiarbhír, ina léirítear gníomhaíochtaí gnéasacha duine leis an ábhar, agus ina bhfeicfí go bréagach do dhaoine eile go bhfuil an t-ábhar barántúil nó fírinneach. Ar mhaithe le híospartaigh iompair den sórt sin a chosaint go héifeachtach, ba cheart an bhagairt go ndéanfaí iompar den sórt sin a chumhdach freisin.

(20)

Scaipeadh íomhánna, físeán nó ábhair eile ina léirítear gníomhaíochtaí gáirsiúla nó baill dhlúthphearsanta duine gan toiliú an duine sin ar an bpobal trí bhíthin TFC, níor cheart é a choiriúlú i gcás ina bhfuil gá le neamhchoiriúlú den sórt sin chun na cearta bunúsacha a chosnaítear faoin gCairt a choimirciú, go háirithe an tsaoirse chun tuairimí a nochtadh, lena n-áirítear an tsaoirse chun faisnéis agus barúlacha a fháil agus a thabhairt i sochaí oscailte dhaonlathach, chomh maith le saoirse na n-ealaíon agus na n-eolaíochtaí, lena n-áirítear an tsaoirse acadúil. Thairis sin, níor cheart a chumhdach leis an gcion ábhar a bheith á láimhseáil ag údaráis phoiblí, go háirithe chun imeachtaí coiriúla a sheoladh nó chun an choireacht a chosc, a bhrath nó a imscrúdú, agus ba cheart do na Ballstáit a bheith in ann duine a dhíolmhú ó fhreagracht in imthosca sonracha, mar shampla i gcás ina láimhseálann línte cabhrach teileafóin nó idirlín ábhar chun cion a thuairisciú do na húdaráis.

(21)

Is cineál nua-aimseartha foréigin í an chibearstalcaireacht a dhéantar go minic ar bhaill teaghlaigh nó ar dhaoine atá ina gcónaí sa teaghlach céanna leis na gciontóir, ach déanann iarpháirtithe nó daoine aitheantais í freisin. De ghnáth, baineann an ciontóir mí-úsáid as an teicneolaíocht chun iompar comhéigneach agus smachtúil, ionramháil agus faireachas a threisiú, rud a mhéadaíonn eagla, imní agus leithlisiú an íospartaigh de réir a chéile ó chairde, ó mhuintir agus óna chuid nó a cuid oibre. Dá bhrí sin, ba cheart rialacha íosta maidir leis an gcibearstalcaireacht a bhunú. Ba cheart chumhdach le cion na cibearstalcaireachta faireachas a dhéantar arís is arís eile nó go leanúnach ar an íospartach, trí bhíthin TFC, gan toiliú an íospartaigh ná gan údarú dlíthiúil. D’fhéadfaí faireachas den sórt sin a chumasú trí shonraí pearsanta an íospartaigh a phróiseáil, amhail trí bhíthin bradaíl aitheantais, trí phasfhocail a ghoid, trí ghléasanna an íospartaigh a haiceáil, trí bhogearraí eochairlogála a ghníomhachtú go rúnda chun rochtain a fháil ar spásanna príobháideacha an íospartaigh, trí aipeanna geologánaithe a shuiteáil, lena n-áirítear earraí stalcaireachta, nó trí ghléasanna an íospartaigh a ghoid. Thairis sin, ba cheart a chumhdach le cion na cibearstalcaireachta faireachán a dhéanamh ar íospartaigh, gan toiliú ná údarú an íospartaigh, trí ghléasanna teicneolaíochta atá nasctha trí Idirlíon na Rudaí Nithiúla, amhail fearais chliste tí. Mar sin féin, is féidir cásanna a bheith ann ina ndéantar faireachas ar chúiseanna dlisteanacha, mar shampla i gcomhthéacs tuismitheoirí a dhéanann faireachán ar an áit ina bhfuil a leanaí agus ar a ngníomhaíocht ar líne, i gcomhthéacs gaolta a dhéanann faireachán ar shláinte daoine breoite, daoine scothaosta, daoine leochaileacha nó daoine faoi mhíchumas, nó i gcomhthéacs faireachán ar na meáin agus faisnéise foinse oscailte.

(22)

Ba cheart dliteanas coiriúil a theorannú do chásanna inar dócha go ndéanfadh faireachán díobháil thromchúiseach don íospartach. Agus measúnú á dhéanamh an dócha go ndéanfadh an gníomh díobháil thromchúiseach, ba cheart díriú ar cibé acu a dhéanfadh nó nach ndéanfadh an gníomh díobháil d’íospartach go ginearálta.

(23)

Sa sainiú ar chion na cibearstalcaireachta, ba cheart don choincheap ‘rianú’ a bheith ag tagairt do rianú shuíomh an duine agus gluaiseachtaí an duine sin a leanúint agus ba cheart don choincheap ‘faireachán’ a bheith ag tagairt do bheith ag coinneáil súil ar dhuine ar bhonn níos ginearálta, lena n-áirítear a bheith ag faire ar ghníomhaíochtaí an duine sin. I gcomhthéacs na cibearstalcaireachta, tá sé d’aidhm, sa deireadh, ag an dá ghníomh duine a smachtú.

(24)

Ba cheart rialacha íosta maidir le cion an chibirchiaptha a leagan síos chun na cineálacha cibirchiaptha is tromchúisí a chumhdach. Ba cheart a áireamh leis sin gabháil arís agus arís eile nó go leanúnach d’iompar bagrach atá dírithe ar dhuine ar a laghad i gcás ina mbaineann bagairtí le hiompar sin, trí bhíthin TFC, chun cionta coiriúla a dhéanamh agus i gcás inar dócha go gcuirfeadh iompar den sórt sin eagla thromchúiseach ar an duine maidir lena shábháilteacht nó sábháilteacht nó maidir le sábháilteacht cleithiúnaithe. Ba cheart a áireamh leis sin freisin gabháil, in éineacht le daoine eile, trí bhíthin TFC, d’iompar bagrach nó maslach atá inrochtana go poiblí, ar iompar é atá dírithe ar dhuine, i gcás inar dócha go ndéanfadh iompar den sórt sin díobháil thromchúiseach shíceolaíoch don duine sin. Is féidir le hionsaithe leathana den sórt sin, lena n-áirítear ionsaithe comhordaithe droinge ar líne, tiontú ina n-ionsaithe as líne nó a bheith ina gcúis le gortú suntasach síceolaíoch agus, i gcásanna tromchúiseacha, le féinmharú an íospartaigh. Is minic a dhírítear ionsaithe den sórt sin ar pholaiteoirí, ar iriseoirí agus ar chosantóirí chearta an duine ar mná iad, nó ar mhná aitheanta eile, ach is féidir leo tarlú freisin i gcomhthéacsanna éagsúla, mar shampla ar champais, i scoileanna agus ag an obair. Ba cheart aghaidh a thabhairt ar fhoréigean ar líne den sórt sin go háirithe i gcás ina dtarlaíonn na hionsaithe ar scála leathan, mar shampla i bhfoirm ciapadh carntha a bheith á dhéanamh ag líon suntasach daoine. Ba cheart a áireamh leis na rialacha íosta maidir le cion an chibirchiaptha freisin íomhá, físeán nó ábhar comhchosúil eile ina léirítear baill ghiniúna a sheoladh gan iarraidh chuig duine (‘cibearsplancáil’), i gcás inar dócha go ndéanfadh iompar den sórt sin díobháil thromchúiseach shíceolaíoch don duine sin. Úsáidtear an chibearsplancáil go minic chun mná a imeaglú agus a chur ina dtost. Ba cheart a áireamh freisin sna rialacha íosta maidir le cion an chibirchiaptha rialacha maidir le cásanna ina gcuirtear faisnéis phearsanta an íospartaigh ar fáil don phobal trí bhíthin TFC, gan toiliú an íospartaigh, chun daoine eile a ghríosú chun díobháil fhisiciúil shíceolaíoch nó díobháil thromchúiseach shíceolaíoch a dhéanamh don íospartach (‘docsáil’).

(25)

Le blianta beaga anuas, tá méadú mór tagtha ar ghríosú poiblí chun foréigin agus fuatha, lena n-áirítear bunaithe ar inscne, mar thoradh ar an méadú atá tagtha ar úsáid an idirlín agus na meán sóisialta. Treisítear scaipeadh éasca, tapa agus fairsing na fuathchainte tríd an domhan digiteach de thairbhe na héifeachta díchoisc ar líne, toisc go laghdaíonn toimhde na hanaithnideachta ar líne, agus an mothúchán go bhfuiltear saor ó phionós, an leisce a bheadh ar dhaoine caint den sórt sin a dhéanamh de ghnáth. Is minic a dhírítear ar mhná le fuath gnéasach agus le fuath in aghaidh na mban ar líne, ar féidir leis tiontú ina fhuathchoireacht as líne. Ní mór an t-iompar sin a chosc nó a stopadh ag céim luath. Ní i gcónaí a thagraíonn an friotal a úsáidtear sa chineál gríosaithe sin go díreach d’inscne an duine ar a bhfuiltear ag díriú, ach is féidir an spreagadh claonta a aithint go hindíreach ó ábhar foriomlán an ghríosaithe nó ó chomhthéacs foriomlán an ghríosaithe.

(26)

Le cion an chibirghríosaithe chun foréigin nó fuatha, glactar leis nach gcuirtear an gríosú in iúl i gcomhthéacs príobháideach amháin, ach go poiblí trí úsáid a bhaint as TFC. Dá bhrí sin, ba cheart a bheith i gceist leis go scaipfí ábhar ar an bpobal, ar cheart a thuiscint leis mír ábhair ar leith arb ionann í agus gríosú chun foréigin nó fuatha a dhéanamh inrochtana, trí TFC, do líon daoine a d’fhéadfadh a bheith neamhtheoranta, eadhon an t-ábhar a dhéanamh inrochtana go héasca d’úsáideoirí i gcoitinne, gan gá le tuilleadh gníomhaíochta ón duine a sholáthair an t-ábhar, gan beann ar rochtain iarbhír a bheith ag na daoine sin ar an bhfaisnéis atá i gceist. Dá réir sin, i gcás ina bhfuil gá le clárú nó cead isteach do ghrúpa úsáideoirí chun rochtain a fháil ar an ábhar, níor cheart an fhaisnéis sin a mheas a bheith scaipthe ar an bpobal ach amháin i gcás ina gcláraítear nó ina ligtear isteach go huathoibríoch úsáideoirí atá ag iarraidh rochtain a fháil ar an ábhar gan cinneadh ó dhuine nó gan roghnú cé dó nó di ar cheart rochtain a cheadú. Agus measúnú á dhéanamh acu an gcáilíonn ábhar mar ghríosú chun fuatha nó chun foréigin, ba cheart do na húdaráis inniúla an ceart bunúsach chun tuairimí a nochtadh mar a chumhdaítear in Airteagal 11 den Chairt a chur san áireamh.

(27)

Chun cothromaíocht chóir a áirithiú idir an tsaoirse chun tuairimí a nochtadh agus ionchúiseamh chion an chibirghríosaithe chun foréigin nó fuatha, níor cheart do na Ballstáit a bheith in ann a roghnú pionós a ghearradh ach amháin i gcás inar iompar é a dhéantar ar bhealach a d’fhéadfadh cur isteach ar an mbeartas poiblí nó atá bagrach, drochídeach nó maslach. Níor cheart an bonn a bhaint d’éifeachtacht na forála lena sainítear cion an chibirghríosaithe chun foréigin nó fuatha mar thoradh ar chur i bhfeidhm na gcoinníollacha sin, i gcás ina gceanglaítear sin leis an dlí náisiúnta.

(28)

Ba cheart pionóis do na cionta a shainítear sa Treoir seo a beith éifeachtach, athchomhairleach agus comhréireach. Chuige sin, ba cheart íosleibhéil don uastéarma príosúnachta a shocrú do dhaoine nádúrtha. Maidir leis na huastéarmaí príosúnachta dá bhforáiltear sa Treoir seo le haghaidh na gcionta arna ndéanamh ag daoine nádúrtha, ba cheart feidhm a bheith acu maidir leis na foirmeacha is tromchúisí de chionta den sórt sin ar a laghad.

(29)

Ba cheart d’íospartaigh a bheith in ann cionta foréigin in aghaidh na mban nó foréigin teaghlaigh a thuairisciú agus fianaise a sholáthar go héasca gan a bheith faoi réir íospairt thánaisteach ná athíospartha. Tá sé ríthábhachtach go ndéanfaí íospartaigh, agus cionta á dtuairisciú acu, a atreorú chuig pointe teagmhála speisialaithe, nuair is féidir, gan beann ar ghearán coiriúil a bheith déanta. D’fhéadfadh gur póilín oilte nó aon ghairmí atá oilte chun cúnamh a sholáthar d’íospartaigh a bheadh sa phointe teagmhála sin.

(30)

Ba cheart do na Ballstáit, sa bhreis ar thuairisciú go pearsanta, an deis a sholáthar gearáin a thíolacadh ar líne nó trí TFC inrochtana agus slán eile chun foréigean in aghaidh na mban nó foréigean teaghlaigh a thuairisciú, ar a laghad maidir le cibearchoireanna chomhroinnt neamhthoiliúil na n-ábhar pearsanta nó ionramháilte, na cibearstalcaireachta, an chibirchiaptha agus an chibirghríosaithe chun foréigin nó fuatha mar a shainítear sa Treoir seo. Ba cheart d’íospartaigh a bheith in ann ábhair a bhaineann lena dtuairisca uaslódáil, amhail seatanna scáileáin den iompar foréigneach líomhnaithe.

(31)

I bhfianaise shainiúlachtaí an fhoréigin in aghaidh na mban agus an fhoréigin teaghlaigh, agus i bhfianaise an riosca mhéadaithe go bhféadfadh íospartaigh a ngearán a tharraingt siar in ainneoin gur íospartach ciona iad, tá sé tábhachtach go mbaileofaí fianaise ábhartha ar bhealach cuimsitheach a luaithe is féidir, i gcomhréir leis na rialacha náisiúnta nós imeachta is infheidhme.

(32)

Is féidir leis na Ballstáit cúnamh dlí, lena n-áirítear cúnamh dlí saor in aisce, a leathnú chuig íospartaigh agus cionta coiriúla á dtuairisciú acu, i gcás ina bhforáiltear dó sin leis an dlí náisiúnta. Agus measúnú á dhéanamh ar acmhainní an íospartaigh chun cinneadh a dhéanamh i dtaobh an ndeonófar cúnamh dlíthiúil, ba cheart do na Ballstáit rochtain éifeachtach an íospartaigh ar a acmhainní airgeadais nó a hacmhainní airgeadais a mheas. Is féidir smacht eacnamaíoch ag an gciontóir a bheith i gceist leis an bhforéigean teaghlaigh, agus d’fhéadfadh sé nach mbeadh rochtain éifeachtach ag íospartaigh ar a n-acmhainní airgeadais féin.

(33)

I gcás an fhoréigin teaghlaigh agus an fhoréigin in aghaidh na mban, go háirithe i gcás ina ndéanann dlúthbhaill teaghlaigh nó dlúthpháirtithe é, d’fhéadfadh íospartaigh a bheith faoin méid sin éigeantais ó thaobh an chiontóra go mbeadh eagla orthu dul i dteagmháil leis na húdaráis inniúla, fiú má tá a saol i mbaol. Dá bhrí sin, ba cheart do na Ballstáit a áirithiú nach mbeidh a rialacha rúndachta ina gconstaic do ghairmithe cúraim sláinte cásanna a thuairisciú do na húdaráis inniúla, i gcás ina bhfuil forais réasúnacha acu lena chreidiúint go bhfuil garbhaol ann go ndéanfar díobháil thromchúiseach fhisiciúil. Tá údar le tuairisciú den sórt sin toisc go bhféadfadh sé nach ndéanfadh na daoine dá dtarlaíonn gníomhartha den sórt sin nó a fhianaíonn gníomhartha den sórt sin go díreach iad a thuairisciú. Ar an gcaoi chéanna, maidir le cásanna d’fhoréigean teaghlaigh nó d’fhoréigean in aghaidh na mban a ndéantar difear do leanaí, is minic nach ndéantar iad a bhrath go dtí go dtugann tríú páirtithe iompar neamhrialta nó díobháil fhisiciúil don leanbh faoi deara. Ní mór leanaí a chosaint go héifeachtach ar cineálacha foréigin den sórt sin agus bearta leordhóthanacha a dhéanamh go pras. Dá bhrí sin, níor cheart do ghairmithe a mbíonn teagmháil acu le híospartaigh ar leanaí iad, lena n-áirítear gairmithe cúraim sláinte, seirbhísí sóisialta nó oideachais, a bheith srianta ag rialacha rúndachta i gcás ina bhfuil forais réasúnacha acu lena chreidiúint go ndearnadh díobháil thromchúiseach fhisiciúil do leanbh. I gcás ina dtuairiscíonn gairmithe cásanna foréigin den sórt sin, ba cheart do na Ballstáit a áirithiú nach bhfuil siad faoi dhliteanas i leith sárú rúndachta. Mar sin féin, ba cheart pribhléid ghairmiúil dlí a chosaint, i gcomhréir le hAirteagal 7 den Chairt, mar is cuí i bhfianaise an róil bhunúsaigh a shanntar do dhlíodóirí i sochaí dhaonlathach. I gcás ina bhforáiltear dó sin leis an dlí náisiúnta, ba cheart an phribhléid chléireach-aithríoch, nó prionsabail choibhéiseacha is infheidhme chun saoirse reiligiúin a choimirciú, a chosaint freisin. Ina theannta sin, ní dochar an fhéidearthacht atá ag gairmithe cásanna foréigin den sórt sin a thuairisciú do rialacha náisiúnta maidir le rúndacht foinsí is infheidhme i gcomhthéacs na meán.

(34)

Chun dul i ngleic le tearcthuairisciú i gcásanna inar leanbh an t-íospartach, ba cheart nósanna imeachta maidir le tuairisciú atá sábháilte agus oiriúnach do leanaí a bhunú. Is féidir ceistiú ó na húdaráis inniúla i dteanga shimplí inrochtana a bheith i gceist leis sin. Ba cheart do na Ballstáit a áirithiú, a mhéid is féidir, go bhfuil gairmithe a bhfuil saineolas acu ar chúram agus tacaíocht a thabhairt do leanaí i láthair chun cabhrú leo le nósanna imeachta tuairiscithe. D’fhéadfadh nach mbeadh cúnamh den sórt sin ábhartha i gcásanna áirithe, mar shampla mar gheall ar aibíocht an linbh nó i gcás tuairisciú ar líne, nó i gcás ina bhféadfadh sé a bheith deacair cúnamh den sórt sin a thabhairt, mar shampla i limistéir inar tearc an daonra.

(35)

Tá sé tábhachtach go n-áiritheodh na Ballstáit nach ndíspreagfar íospartaigh ar náisiúnaigh tríú tír iad, gan beann ar a stádas cónaithe, ó chásanna foréigin in aghaidh na mban nó foréigin teaghlaigh a thuairisciú agus go gcaithfear leo ar bhealach neamh-idirdhealaitheach maidir lena stádas cónaithe i gcomhréir le cuspóirí Threoir 2012/29/AE. Chun gach íospartach a chosaint ar fhoréigean a dhéantar arís agus arís eile, tá sé tábhachtach cur chuige íospartach-lárnach a chur i bhfeidhm. Go háirithe, ba cheart a áirithiú nach gcuireann forfheidhmiú an nós imeachta um fhilleadh faoi Threoir 2008/115/CE ó Pharlaimint na hEorpa agus ón gComhairle (6) cosc ar íospartaigh a gceart chun éisteacht a fháil a fheidhmiú faoi Threoir 2012/29/AE. Is féidir leis na Ballstáit, i gcomhréir le Treoir 2008/115/CE, cinneadh a dhéanamh cead cónaithe uathrialach nó údarú eile a dheonú lena dtairgtear ceart fanachta ar chúiseanna atruacha daonnúla nó eile do náisiúnach tríú tír atá ag fanacht go neamhdhleathach ar a gcríoch agus tá siad leis an oibleagáid faoin Treoir sin a chomhlíonadh maidir le riachtanais speisialta daoine leochaileacha a chur san áireamh, a mhéid is féidir, le linn na tréimhse le haghaidh imeacht deonach, i gcás ina ndeonaítear tréimhse den sórt sin de bhun na Treorach sin.

(36)

D’fhéadfadh baol ar leith a bheith ann d’íospartaigh an fhoréigin in aghaidh na mban nó an fhoréigin teaghlaigh i ngeall ar mhoilleanna maidir le gearáin fúthu a phróiseáil, ós rud é go bhféadfaidís fós bheith i mbaol láithreach agus go bhféadfadh na ciontóirí a bheith ina ndlúthbhaill teaghlaigh nó ina gcéilí go minic. Dá bhrí sin, ba cheart oiliúint chuí a chur ar na húdaráis inniúla agus an saineolas leordhóthanach agus na huirlisí imscrúdaitheacha éifeachtacha a bheith acu chun gníomhartha den sórt sin a imscrúdú agus a ionchúiseamh, gan dualgas a bheith orthu seirbhísí nó aonaid speisialaithe a chur ar bun.

(37)

Níor cheart imscrúduithe ar ghníomhartha éignithe ná ionchúisimh ina leith a bheith ag brath ar íospartach nó ar ionadaí an íospartaigh a bheith ag tuairisciú gníomhartha den sórt sin nó ar ghearán ó íospartach nó ó ionadaí an íospartaigh. Ar an gcaoi chéanna, ba cheart leanúint d’imeachtaí coiriúla fiú i gcás ina dtarraingíonn an t-íospartach siar an gearán. Ní dochar an méid sin do rogha na n-údarás ionchúisimh scor d’imeachtaí coiriúla ar chúiseanna eile, mar shampla i gcás ina gcinneann siad nach bhfuil dóthain fianaise ann chun leanúint d’imeachtaí coiriúla.

(38)

Is iondúil go mbíonn cosaint láithreach agus tacaíocht shonrach de dhíth ar íospartaigh foréigin teaghlaigh agus íospartaigh foréigin ghnéasaigh, mar shampla i gcás foréigean dlúthpháirtí, nuair a bhíonn an ráta atitimeachais ard de ghnáth. Dá bhrí sin, ba cheart tús a chur le measúnú aonair ar riachtanais an íospartaigh ag an gcéim is luaithe is féidir, amhail tráth a thagann an t-íospartach i dteagmháil den chéad uair leis na húdaráis inniúla, a luaithe is féidir tar éis don íospartach teagmháil a dhéanamh leis na húdaráis inniúla den chéad uair, nó a luaithe a thagann amhras chun cinn gur íospartach foréigin teaghlaigh nó foréigin ghnéasaigh an duine. Is féidir é sin a dhéanamh sula ndéanann íospartach cion a thuairisciú go foirmiúil nó ar thionscnamh na n-údarás inniúil féin má thuairiscíonn tríú páirtí an cion.

(39)

Agus measúnú á dhéanamh ar riachtanais chosanta agus tacaíochta an íospartaigh, ba cheart gurb é an príomhábhar imní a bheadh ann ná sábháilteacht an íospartaigh a áirithiú agus tacaíocht shaincheaptha a sholáthar, agus, inter alia, imthosca aonair an íospartaigh á gcur san áireamh. D’fhéadfaí a áireamh ar na himthosca lena n-éilítear aird ar leith, mar shampla, go bhfuil an t-íospartach torrach, go bhfuil an t-íospartach ag brath ar an gciontóir nó ar an duine atá faoi dhrochamhras nó go bhfuil an t-íospartach i gcaidreamh leis an gciontóir nó leis an duine atá faoi dhrochamhras, an baol go bhfillfeadh an t-íospartach ar an gciontóir nó ar an duine atá faoi dhrochamhras, go bhfuil an t-íospartach scartha le déanaí ón gciontóir nó ón duine atá faoi dhrochamhras, an baol féideartha go n-úsáidfí leanaí chun smacht a fheidhmiú ar an íospartach, na rioscaí d’íospartaigh faoi mhíchumas, agus úsáid ainmhithe coimhdeachta chun brú a chur ar an íospartach. Ba cheart méid an smachta atá ag an gciontóir nó ag an duine atá faoi dhrochamhras ar an íospartach, cibé acu go síceolaíoch nó go heacnamaíoch, a chur san áireamh freisin.

(40)

Chun tacaíocht chuimsitheach agus cosaint chuimsitheach d’íospartaigh a áirithiú, ba cheart baint a bheith ag na húdaráis inniúla uile agus ag na comhlachtaí ábhartha uile, gan a bheith teoranta d’údaráis forfheidhmithe dlí ná d’údaráis bhreithiúnacha, le measúnú a dhéanamh ar na rioscaí d’íospartaigh agus ar bhearta tacaíochta iomchuí ar bhonn treoirlínte soiléire arna n-eisiúint ag na Ballstáit. Ba cheart a áireamh i dtreoirlínte den sórt sin tosca atá le cur san áireamh agus measúnú á dhéanamh ar an mbaol a eascraíonn ón gciontóir nó ón duine atá faoi dhrochamhras, lena n-áirítear an tuiscint go bhfuil sé chomh dóchúil chéanna go mbeidh daoine atá faoi dhrochamhras atá cúisithe i mionchionta chomh contúirteach leis na daoine sin atá faoi dhrochamhras a chúisítear i gcionta níos tromchúisí, go háirithe i gcásanna foréigin teaghlaigh agus stalcaireachta. Ba cheart do na húdaráis inniúla athbhreithniú a dhéanamh an measúnú aonair go tráthrialta chun a áirithiú go dtabharfar aghaidh ar aon riachtanas nua cosanta nó tacaíochta atá ag an íospartach. Mar shampla, d’fhéadfaí athbhreithniú den sórt sin a dhéanamh ag amanna tábhachtacha sa phróiseas, amhail ag tús imeachtaí cúirte, tráth a thugtar breithiúnas nó ordú, nó i gcomhthéacs imeachtaí chun athbhreithniú a dhéanamh ar shocruithe caomhnóireachta nó ar chearta rochtana.

(41)

Chun íospairt thánaisteach agus athíospairt, imeaglú agus díoltas a sheachaint, ba cheart do chleithiúnaithe na bearta cosanta céanna a thugtar don íospartach a fháil, mura rud é go bhfuil comharthaí ann nach bhfuil riachtanais shonracha ag cleithiúnaithe. Ba cheart do na húdaráis inniúla measúnú a dhéanamh i dtaobh an bhfuil aon chomharthaí ann nach bhfuil aon riachtanais shonracha chosanta ag an gcleithiúnaí toisc, más féidir a chinneadh nach bhfuil aon riachtanais shonracha chosanta ann, gur díréireach a bheadh aon bheart a bheadh bunaithe ar an toimhde mhícheart go bhfuil riachtanais chosanta shonracha ag baint leis. Mar gheall ar a leochaileacht, tá cleithiúnaithe faoi bhun 18 mbliana d’aois go háirithe i mbaol díobháil mhothúchánach a fhulaingt a dhéanann dochar dá bhforbairt. I gcás ina bhforáiltear dó sin leis an dlí náisiúnta, is féidir a mheas go bhfuil cleithiúnaithe eile i mbaol rud comhchosúil.

(42)

Is minic a bhíonn tacaíocht shonrach de dhíth ar íospartaigh. Chun a áirithiú go bhfaigheann siad tairiscintí tacaíochta go héifeachtach, ba cheart do na húdaráis inniúla íospartaigh a atreorú chuig na seirbhísí tacaíochta iomchuí. Ba cheart é sin a bheith amhlaidh, go háirithe, i gcás ina bhfuil sé suite i measúnú aonair go bhfuil riachtanais tacaíochta ar leith ag an íospartach. Agus cinneadh á dhéanamh an ndéanfar íospartaigh ar leanaí iad a atreorú chuig seirbhísí tacaíochta, ba cheart tús áite a thabhairt do leas na n-íospartach sin, mar a leagtar síos in Airteagal 24 den Chairt. Ba cheart do na Ballstáit a áirithiú go bhfuil an phróiseáil a dhéanann údaráis inniúla ar shonraí pearsanta gaolmhara bunaithe ar an dlí, i gcomhréir leis na forálacha ábhartha maidir le dlíthiúlacht na próiseála a leagtar amach i Rialachán (AE) 2016/679 ó Pharlaimint na hEorpa agus ón gComhairle (7) agus i gcomhréir le Treoir (AE) 2016/680 ó Pharlaimint na hEorpa agus ón gComhairle (8). Ba cheart a áireamh ar dhlí den sórt sin coimircí iomchuí i ndáil le sonraí pearsanta lena n-urramaítear éirim an chirt maidir le cosaint sonraí agus lena ndéantar foráil maidir le bearta oiriúnacha agus sonracha chun cearta bunúsacha agus leasanna na ndaoine aonair a choimirciú. I gcás ina n-aistríonn údaráis inniúla sonraí pearsanta íospartach chuig seirbhísí tacaíochta chun críoch atreoraithe íospartach, ba cheart dóibh a áirithiú go bhfuil na sonraí a aistrítear teoranta don mhéid is gá chun na seirbhísí tacaíochta a chur ar an eolas faoi imthosca an cháis, ionas go bhfaighidh íospartaigh an tacaíocht agus an chosaint iomchuí. Níor cheart do sheirbhís tacaíochta sonraí pearsanta a stóráil ach amháin chomh fada agus is gá agus, in aon chás, ar feadh tréimhse nach faide ná 5 bliana, nó tréimhse ama níos giorra má bhunaítear sa dlí náisiúnta é, tar éis na teagmhála deireanaí idir an tseirbhís tacaíochta agus an t-íospartach.

(43)

Ba cheart do na Ballstáit na bearta is gá a dhéanamh chun a áirithiú go bhfuil fáil ar orduithe urchoisc éigeandála, orduithe sriantacha agus orduithe cosanta chun cosaint éifeachtach a áirithiú d’íospartaigh agus do chleithiúnaithe.

(44)

Gan ionadú a dhéanamh ar ghabháil agus coinneáil daoine atá faoi dhrochamhras agus ciontóirí, a fhanann faoi réir an dlí náisiúnta, ba cheart do na Ballstáit a áirithiú gur féidir orduithe urchoisc éigeandála, orduithe sriantacha nó orduithe cosanta a eisiúint i gcásanna ina bhfuil contúirt láithreach ann, amhail i gcás ina bhfuil díobháil ar tí tarlú nó ina bhfuil sí tagtha chun cinn cheana féin agus gur dócha go ndéanfar an díobháil sin arís, agus, i gcásanna ábhartha den sórt sin agus i gcás, de bhun an dlí náisiúnta, ina bhfuil orduithe den sórt sin faoi réir iarratas ón íospartach, go gcuirtear íospartaigh ar an eolas faoin bhféidearthacht iarratas a dhéanamh ar orduithe den sórt sin.

(45)

Is féidir a áireamh ar orduithe cosanta cosc a chur ar an gciontóir rochtain a fháil ar cheantair áirithe, ar theacht níos gaire d’íospartach nó do chleithiúnaithe ná achar forordaithe nó ar theagmháil a dhéanamh leo, lena n-áirítear trí chomhéadain ar líne a úsáid. Is féidir a áireamh ar orduithe cosanta freisin toirmeasc a chur ar airm thine nó airm mharfacha a shealbhú, i gcás inar gá. Ba cheart orduithe urchoisc éigeandála, orduithe sriantacha nó orduithe cosanta a eisiúint ar feadh tréimhse shonraithe nó go dtí go ndéanfar iad a mhodhnú nó a urscaoileadh.

(46)

Le faireachán leictreonach, is féidir, i gcás inarb ábhartha, comhlíonadh orduithe urchoisc éigeandála, orduithe sriantacha agus orduithe cosanta a áirithiú, fianaise ar sháruithe ar orduithe den sórt sin a thaifeadadh agus maoirseacht ciontóirí a fheabhsú. I gcás ina bhfuil sé ar fáil, iomchuí agus ábhartha, agus imthosca an cháis agus cineál dlíthiúil na n-imeachtaí á gcur san áireamh, ba cheart faireachán leictreonach a mheas chun forfheidhmiú orduithe urchoisc éigeandála, orduithe sriantacha agus orduithe cosanta a áirithiú. I gcás ina n-úsáidtear faireachán leictreonach, ba cheart íospartaigh a chur ar an eolas i gcónaí faoi chumais agus teorainneacha an fhaireacháin leictreonaigh.

(47)

Chun éifeachtacht orduithe urchoisc éigeandála, orduithe sriantacha agus orduithe cosanta a choimirciú, ba cheart sáruithe ar orduithe den sórt sin a bheith faoi réir pionós. Is féidir leis na pionóis sin a bheith de chineál coiriúil nó neamhchoiriúil agus is féidir príosúnacht, fíneálacha nó aon phionós atá éifeachtach, comhréireach agus athchomhairleach a bheith san áireamh leo. Tá sé ríthábhachtach go mbeadh an rogha ag íospartaigh a bheith ar an eolas faoi shárú ar orduithe urchoisc éigeandála, orduithe sriantacha nó orduithe cosanta, i gcás ina bhféadfadh sárú den sórt sin tionchar a imirt ar a sábháilteacht. Ós rud é gur féidir le sáruithe ar orduithe urchoisc éigeandála, orduithe sriantacha nó orduithe cosanta rioscaí a mhéadú agus gur gá tuilleadh cosanta a chur i bhfeidhm mar gheall orthu, ba cheart athbhreithniú ar an measúnú aonair a mheas, nuair is gá, tar éis sárú tuairiscithe.

(48)

Trí fhianaise maidir le hiompar gnéasach an íospartaigh roimhe seo, roghanna gnéis an íospartaigh agus éadaí nó feisteas an íospartaigh a chur i láthair chun cur i gcoinne chreidiúnacht agus easpa toilithe na n-íospartach i gcásanna foréigin ghnéasaigh, go háirithe cásanna éignithe, is féidir steiréitíopaí díobhálacha d’íospartaigh a threisiú agus íospairt thánaisteach nó athíospairt a bheith mar thoradh air. Dá bhrí sin, ba cheart do na Ballstáit a áirithiú nach gceadaítear fianaise a bhaineann le hiompar gnéasach an íospartaigh roimhe seo, nó le gnéithe eile de shaol príobháideach an íospartaigh a bhaineann leis sin, ach amháin i gcás ina bhfuil gá léi chun measúnú a dhéanamh ar shaincheist shonrach sa chás i dtrácht nó chun na cearta chun cosanta a fheidhmiú.

(49)

I bhfianaise na sainiúlachtaí agus na gcúinsí uathúla a bhaineann le cionta foréigin in aghaidh na mban agus foréigin teaghlaigh, tá luach bunúsach ag baint le treoirlínte d’údaráis forfheidhmithe dlí agus d’údaráis ionchúisimh. Mar gheall ar leochaileachtaí ar leith na n-íospartach, tá sé ríthábhachtach treoir a thabhairt maidir leis an gcaoi ar cheart caitheamh leo ag gach céim den phróiseas chun feasacht a mhúscailt agus chun athíospairt a sheachaint agus aghaidh á tabhairt ar na cineálacha sin cionta. Is féidir treoirlínte d’údaráis ionchúisimh a thuiscint mar lámhleabhar nós imeachta agus mar thagairt don dea-chleachtas araon. Go háirithe maidir le conas dul i dteagmháil le híospartaigh agus conas caitheamh leo i gcomhréir lena gcúinsí uathúla agus lena dtaithí uathúil, is féidir le sainseirbhísí ban sainchomhairle agus saintreoir a thabhairt bunaithe ar a n-idirghníomhaíochtaí laethúla le híospartaigh. Moltar do na Ballstáit dul i gcomhairle le sainseirbhísí ban agus comhoibriú leo chun aon treoirlínte den sórt sin a chruthú agus chun athbhreithniú a dhéanamh orthu. Ba cheart do na Ballstáit athbhreithniú a dhéanamh ar a dtreoirlínte d’údaráis forfheidhmithe dlí agus d’údaráis ionchúisimh nuair a tharlaíonn forbairtí tábhachtacha ina gcreataí dlíthiúla nó sa tsochaí i gcoitinne. D’fhéadfaí a áireamh leis sin cásanna ina ndéantar athruithe substaintiúla ar dhlíthe atá ann cheana nó ar chásdlí seanbhunaithe nó ina dtagann treochtaí nua nó cineálacha nua foréigin chun cinn, go háirithe i gcás ina n-eascraíonn cineálacha nua cibearfhoréigin as forbairtí teicneolaíocha.

(50)

I bhfianaise chastachtaí agus thromchúis chionta an fhoréigin in aghaidh na mban agus an fhoréigin teaghlaigh agus i bhfianaise riachtanais shonracha tacaíochta na n-íospartach, ba cheart do na Ballstáit a áirithiú go soláthraíonn comhlachtaí ainmnithe tacaíocht bhreise agus go ndéanann siad cionta den sórt sin a chosc. I bhfianaise an tsaineolais atá acu in ábhair a bhaineann leis an idirdhealú ar fhorais ghnéis, is maith atá comhlachtaí comhionannais náisiúnta, a cuireadh ar bun i gcomhréir le Treoir 2004/113/CE ón gComhairle (9), agus le Treoracha 2006/54/CE (10) agus 2010/41/AE (11) ó Pharlaimint na hEorpa agus ón gComhairle, in ann na cúraimí sin a dhéanamh. Chun go mbeidh na comhlachtaí sin in ann a gcúraimí a dhéanamh go héifeachtach, ba cheart do na Ballstáit a áirithiú go soláthraítear acmhainní leordhóthanacha daonna agus airgeadais dóibh.

(51)

Maidir le cionta áirithe a chumhdaítear leis an Treoir seo, tá riosca ag baint leo go dtarlódh íospairt athfhillteach, fhaidréiseach nó leanúnach fiú. Tarlaíonn an riosca sin go háirithe i ndáil le cionta a bhaineann le hábhar a eascraíonn as cionta áirithe cibearfhoréigin a dhéanamh inrochtana, trí TFC, i bhfianaise a éasca agus a ghasta is féidir ábhar den sórt sin a scaipeadh ar mhórscála agus na ndeacrachtaí a bhíonn ann go minic maidir le hábhar den sórt sin a bhaint anuas. Tá an riosca sin fós ann fiú tar éis ciontaithe. Dá bhrí sin, chun cearta íospartaigh na gcionta sin a chosaint go héifeachtach, ba cheart do na Ballstáit bearta oiriúnacha a dhéanamh a bhfuil sé mar aidhm leo an t-ábhar i dtrácht a bhaint anuas go pras. Ós rud é go bhféadfadh sé nach mbeadh sé indéanta i gcónaí an t-ábhar a bhaint anuas ag an bhfoinse, mar shampla mar gheall ar dheacrachtaí dlíthiúla nó praiticiúla a bhaineann le hordú baint anuas a fhorghníomhú nó a fhorfheidhmiú, ba cheart cead a bheith ag na Ballstáit foráil a dhéanamh freisin d’orduithe chun rochtain ar ábhar den sórt sin a dhíchumasú go pras.

(52)

Maidir le forálacha na Treorach seo maidir le horduithe agus bearta eile chun ábhar ábhartha a bhaint anuas agus rochtain air a dhíchumasú, níor cheart aon difear a dhéanamh do na rialacha ábhartha a leagtar amach i Rialachán (AE) 2022/2065 ó Pharlaimint na hEorpa agus ón gComhairle (12). Go háirithe, ba cheart a chomhlíonadh le horduithe den sórt sin an toirmeasc ar oibleagáidí ginearálta maidir le faireachán nó aimsiú gníomhach fíoras a fhorchur agus ceanglais shonracha an Rialacháin sin maidir le horduithe chun ábhar neamhdhleathach ar líne a bhaint anuas.

(53)

Ar na bearta arb é is aidhm dóibh ábhar a bhaint anuas go pras nó rochtain ar ábhar a dhíchumasú, ba cheart a áireamh, go háirithe, cumhacht a thabhairt do na húdaráis náisiúnta orduithe a eisiúint chuig soláthraithe seirbhísí óstála chun mír shonrach amháin nó níos mó den ábhar i dtrácht a bhaint anuas nó rochtain uirthi nó orthu a dhíchumasú. Ba cheart d’údaráis náisiúnta a bheith in ann orduithe a dhíriú freisin ar sholáthraithe seirbhísí idirghabhálacha ábhartha eile chun rochtain a dhíchumasú.

(54)

Aon bhearta chun ábhar a bhaint anuas nó chun rochtain air a dhíchumasú, lena n-áirítear, go háirithe, orduithe chun ábhar a bhaint anuas nó rochtain air a dhíchumasú, d’fhéadfadh siad difear a dhéanamh do chearta agus leasanna páirtithe seachas na híospartaigh, amhail na soláthraithe ábhair, na soláthraithe seirbhísí óstála a bhféadfaí a gcuid seirbhísí a úsáid agus úsáideoirí deiridh na seirbhísí sin, chomh maith leis an leas ginearálta. Dá bhrí sin, ba cheart a áirithiú nach féidir orduithe agus bearta den sórt sin a dhéanamh ach ar bhealach trédhearcach agus go ndéantar foráil maidir le coimircí leordhóthanacha chun a áirithiú go leanfaidh siad de bheith teoranta don mhéid is gá agus is comhréireach, go n-áirithítear deimhneacht dhlíthiúil, gur féidir le soláthraithe seirbhísí óstála, soláthraithe seirbhísí idirghabhálacha ábhartha eile agus soláthraithe ábhair a gceart chun leighis bhreithiúnaigh éifeachtaigh a fheidhmiú i gcomhréir leis an dlí náisiúnta, agus go ndéantar cothromaíocht chóir a bhaint amach idir na cearta agus na leasanna uile lena mbaineann, lena n-áirítear cearta bunúsacha na bpáirtithe uile lena mbaineann i gcomhréir leis an gCairt. Tá tábhacht ag baint le hualú cúramach na gceart agus na leasanna uile atá i mbaol de réir an cháis.

(55)

I bhfianaise na tábhachta a d’fhéadfadh a bheith le hábhar a d’fhéadfadh a bheith ina ábhar do na horduithe nó do na bearta eile arna ndéanamh faoin Treoir seo chun é a bhaint nó chun rochtain air a dhíchumasú chun na cionta ábhartha a imscrúdú nó a ionchúiseamh faoin dlí coiriúil, ba cheart na bearta is gá a dhéanamh ionas gur féidir leis na húdaráis inniúla ábhar den sórt sin a fháil nó a dhaingniú, i gcás inar gá. D’fhéadfadh sé a bheith i gceist leis na bearta sin, mar shampla, ceangal a chur ar sholáthraithe seirbhísí óstála ábhartha nó ar sholáthraithe seirbhísí idirghabhálacha ábhartha eile an t-ábhar a tharchur chuig na húdaráis sin nó an t-ábhar a chaomhnú ar feadh tréimhse theoranta nach dtéann thar a bhfuil riachtanach. Ba cheart slándáil an ábhair a áirithiú le haon bhearta den sórt sin, ba cheart do bhearta den sórt sin a bheith teoranta i gcónaí don mhéid atá réasúnach agus comhréireach, agus ba cheart dóibh na rialacha is infheidhme maidir le cosaint sonraí pearsanta a chomhlíonadh.

(56)

Chun íospairt thánaisteach a sheachaint, ba cheart d’íospartaigh a bheith in ann cúiteamh a fháil le linn imeachtaí coiriúla.

(57)

Ba cheart do sheirbhísí speisialaithe tacaíochta tacaíocht a sholáthar d’íospartaigh gach cineáil foréigin in aghaidh na mban agus foréigin teaghlaigh, lena n-áirítear foréigean gnéasach, ciorrú ball giniúna ban, pósadh éigeantais, ginmhilleadh éigeantach agus steiriliú, ciapadh gnéasach agus cineálacha éagsúla cibearfhoréigin. Ba cheart sainseirbhísí tacaíochta a thairiscint d’íospartaigh gan beann ar ghearán foirmiúil a bheith déanta acu.

(58)

Ba cheart do shainseirbhísí tacaíochta tacaíocht a sholáthar d’íospartaigh atá saincheaptha dá riachtanais shonracha. Ba cheart do dhuine den inscne chéanna tacaíocht den sórt sin a sholáthar i gcás ina n-iarrtar sin nó i gcás inarb iomchuí agus i gcás ina bhfuil duine den sórt sin ar fáil. Ag cur leis na ceanglais a leagtar amach i dTreoir 2012/29/AE, is gá an creat dlíthiúil a fhorlíonadh chun a áirithiú go soláthraítear sainseirbhísí tacaíochta leis na huirlisí uile is gá chun tacaíocht spriocdhírithe agus chomhtháite a sholáthar d’íospartaigh, i bhfianaise a riachtanas sonrach. D’fhéadfaí seirbhísí den sórt sin a sholáthar sa bhreis ar sheirbhísí ginearálta tacaíochta d’íospartaigh, nó mar chuid chomhtháite de sheirbhísí den sórt sin, ar féidir leo leas a bhaint as eintitis atá ann cheana a sholáthraíonn saintacaíocht, amhail sainseirbhísí tacaíochta do mhná. D’fhéadfadh údaráis phoiblí, eagraíochtaí tacaíochta d’íospartaigh, nó eagraíochtaí neamhrialtasacha eile saintacaíocht a sholáthar, agus tíreolaíocht agus comhdhéanamh déimeagrafach na mBallstát á gcur san áireamh. Ba cheart acmhainní daonna leordhóthanacha agus acmhainní airgeadais leordhóthanacha a thabhairt d’údaráis den sórt sin nó d’eagraíochtaí den sórt sin. I gcás inarb eagraíochtaí neamhrialtasacha a sholáthraíonn na seirbhísí, ba cheart do na Ballstáit a áirithiú go bhfaigheann siad cistí iomchuí.

(59)

Is féidir ról ríthábhachtach a bheith ag sainseirbhísí ban maidir le comhairle agus tacaíocht a sholáthar d’íospartaigh, lena n-áirítear ionaid tacaíochta do mhná, ionaid dídine do mhná, línte cabhrach, ionaid éigeandála um éigniú, ionaid atreorúcháin d’fhoréigean gnéasach agus seirbhísí coisctheacha príomhúla. Is féidir le heagraíochtaí neamhrialtasacha faoi stiúir ban iad a sholáthar freisin.

(60)

Is iondúil go mbíonn an iliomad riachtanas cosanta agus tacaíochta ag íospartaigh. Chun aghaidh a thabhairt go héifeachtach ar na riachtanais sin, ba cheart do na Ballstáit sainseirbhísí tacaíochta a sholáthar san áitreabh céanna, trí sheirbhísí a chomhordú trí phointe teagmhála, nó trí rochtain ar sheirbhísí den sórt sin a éascú trí rochtain ilfhreastail ar líne. Le rochtain ilfhreastail ar líne, d’áiritheofaí go mbeadh íospartaigh i gceantair iargúlta nó íospartaigh nach bhfuil ar a gcumas sainseirbhísí tacaíochta den sórt sin a shroicheadh go fisiciúil in ann rochtain a fháil ar sheirbhísí den sórt sin freisin. Ba cheart a bheith i gceist le rochtain ilfhreastail ar líne, ar a laghad, suíomh gréasáin aonair cothrom le dáta a chur ar bun ar a gcuirtear an fhaisnéis ábhartha uile agus treoracha maidir le rochtain a fháil ar sheirbhísí tacaíochta agus cosanta atá ar fáil. Ba cheart le suíomh gréasáin den sórt sin na ceanglais inrochtaineachta do dhaoine faoi mhíchumas a leanúint.

(61)

Tá riachtanais tacaíochta uathúla ag íospartaigh i bhfianaise an tráma a d’fhualaing siad. Ba cheart do shainseirbhísí tacaíochta cúnamh a sholáthar d’íospartaigh, rud a thugann níos mó cumhachta dóibh agus a chuidíonn lena bpróiseas téarnaimh. Ba cheart líon leordhóthanach sainseirbhísí tacaíochta a bheith ar fáil agus iad scaipthe go leormhaith ar chríoch gach Ballstáit, agus tíreolaíocht agus comhdhéanamh déimeagrafach an Bhallstáit lena mbaineann á gcur san áireamh, chomh maith le modhanna ar líne a thairiscint. Chun cabhrú leis an gcuspóir sin, ba cheart tacaíocht speisialaithe a sholáthar, nuair is féidir, i dteanga is féidir leis an íospartach a thuiscint agus ar bhealach atá oiriúnach ó thaobh aoise de don íospartach.

(62)

Ba cheart a mheas go bhfuil sainseirbhísí tacaíochta, lena n-áirítear ionaid dídine agus ionaid éigeandála um éigniú, bunriachtanach le linn géarchéimeanna agus staideanna éigeandála, lena n-áirítear le linn géarchéimeanna sláinte. Is é an aidhm ba cheart a bheith ann go leanfaí de na seirbhísí sin a thairiscint i gcásanna ina dtagann borradh faoi chásanna foréigin teaghlaigh agus foréigin in aghaidh na mban.

(63)

Ba cheart cúnamh agus tacaíocht a sholáthar d’íospartaigh roimh imeachtaí coiriúla, lena linn agus ar feadh tréimhse iomchuí ina ndiaidh, mar shampla i gcás ina bhfuil gá fós le cóir leighis chun aghaidh a thabhairt ar iarmhairtí tromchúiseacha fisiciúla nó síceolaíocha an fhoréigin, nó i gcás ina bhfuil sábháilteacht an íospartaigh i mbaol mar gheall ar na ráitis a rinne an t-íospartach le linn na n-imeachtaí sin.

(64)

I ngeall ar a thrámaithí atá an foréigean gnéasach, lena n-áirítear éigniú, tá freagairt an-íogair ag teastáil ó bhaill foirne oilte agus speisialaithe. Tá gá ag íospartaigh an foréigin ghnéasaigh le tacaíocht tráma phráinneach in éineacht le scrúduithe fóiréinseacha láithreacha chun an fhianaise atá ag teastáil le haghaidh ionchúisimh amach anseo a choinneáil slán. Ba cheart líon leordhóthanach ionad éigeandála um éigniú nó ionad atreorúcháin d’fhoréigean gnéasach a bheith ar fáil agus iad scaipthe go leormhaith ar chríoch gach Ballstáit, agus tíreolaíocht agus comhdhéanamh déimeagrafach an Bhallstáit lena mbaineann á gcur san áireamh. Is féidir le hionaid den sórt sin a bheith mar chuid den chóras cúraim sláinte atá ann cheana sa Bhallstát. Ar an gcaoi chéanna, is iondúil go mbíonn tacaíocht spriocdhírithe de dhíth ar íospartaigh ciorraithe ball giniúna ban, ar cailíní iad go minic. Dá bhrí sin, ba cheart do na Ballstáit a áirithiú go soláthraíonn siad tacaíocht thiomnaithe atá saincheaptha do na híospartaigh sin. I bhfianaise imthosca uathúla íospartaigh cionta den sórt sin agus na leochaileachta a bhaineann leo, ba cheart saintacaíocht den sórt sin a sholáthar agus na caighdeáin is airde príobháideachais agus rúndachta á n-urramú.

(65)

Meastar gur idirdhealú ar fhorais ghnéis é gnéaschiapadh ag an obair le Treoracha 2004/113/CE, 2006/54/CE agus 2010/41/AE. Bíonn iarmhairtí diúltacha suntasacha ag an ngnéaschiapadh ag an obair ar na híospartaigh agus ar na fostóirí araon. Ba cheart seirbhísí comhairleoireachta inmheánacha nó seachtracha a sholáthar d’íospartaigh agus d’fhostóirí araon, i gcás ina ndéantar gnéaschiapadh ag an obair a choiriúlú go sonrach faoin dlí náisiúnta. Ba cheart a áireamh i seirbhísí den sórt sin faisnéis maidir le bealaí chun aghaidh a thabhairt go leormhaith ar chásanna gnéaschiaptha ag an obair agus ar leigheasanna atá ar fáil chun an ciontóir a bhaint den áit oibre.

(66)

Moltar do na Ballstáit a áirithiú go bhfuil línte cabhrach náisiúnta inrochtana saor in aisce tríd an uimhir chomhchuibhithe ar leibhéal an Aontais, eadhon 116 016, sa bhreis ar aon uimhreacha náisiúnta atá ann cheana, agus go bhfuil siad ar fáil de lá agus d’oíche. Ba cheart an pobal a chur ar an eolas go leormhaith faoin uimhir chomhchuibhithe sin a bheith ann agus faoina húsáid. Ba cheart do shainseirbhísí tacaíochta, lena n-áirítear sainseirbhísí tacaíochta do mhná, a bheith in ann línte cabhrach den sórt sin a oibriú i gcomhréir leis an gcleachtas náisiúnta. Tá taithí shuntasach ag soláthraithe línte cabhrach atá ann cheana, lena n-áirítear eagraíochtaí neamhrialtasacha, ar sheirbhísí den sórt sin a sholáthar. Ba cheart a áireamh leis an tacaíocht a sholáthraítear trí línte cabhrach den sórt sin comhairleoireacht ghéarchéime agus soláthar faisnéise d’íospartaigh faoi sheirbhísí duine le duine, amhail ionaid dídine, sainseirbhísí tacaíochta, seirbhísí sóisialta agus sláinte ábhartha eile nó na póilíní. Ba cheart do línte cabhracha tacaíochta d’íospartaigh na coireachta a bheith in ann íospartaigh a atreorú chuig sainseirbhísí tacaíochta, sainlínte cabhrach, nó an dá rud, i gcás inar gá agus ina n-iarrtar sin.

(67)

Tá ról ríthábhachtach ag ionaid dídine agus ag cóiríocht eatramhach iomchuí eile d’íospartaigh na coireachta chun íospartaigh a chosaint ar ghníomhartha foréigin. Chomh maith le háit shábháilte fanachta a sholáthar, ba cheart d’ionaid dídine an tacaíocht is gá a sholáthar maidir le fadhbanna cónasctha a bhaineann le sláinte na n-íospartach, lena n-áirítear meabhairshláinte, staid airgeadais agus folláine a gcuid leanaí, agus íospartaigh á n-ullmhú sa deireadh do shaol neamhspleách. Ba cheart do na Ballstáit a áirithiú go bhfuil líon leordhóthanach ionad dídine agus cóiríocht eatramhach iomchuí eile ar fáil. Is é is aidhm don téarma ‘líon leordhóthanach’ a áirithiú go bhfreastalaítear ar riachtanais na n-íospartach uile, ó thaobh áiteanna in ionaid dídine agus saintacaíochta de araon. Sa Tuarascáil Ghníomhaíochta Deiridh ó mhí Mheán Fómhair 2008 ó Thascfhórsa Chomhairle na hEorpa chun Foréigean in aghaidh na mBan a Chomhrac, lena n-áirítear Foréigean Teaghlaigh, moltar go mbeadh cóiríocht shábháilte ann in ionaid dídine speisialaithe do mhná, ar fáil i ngach réigiún, le háit teaghlaigh amháin in aghaidh gach 10 000 sa daonra. Mar sin féin, ba cheart líon na n-áiteanna in ionaid dídine a bheith ag brath ar mheastachán réalaíoch ar an riachtanas iarbhír. Ba cheart céannacht na n-íospartach atá ag fanacht in ionaid dídine den sórt sin a choinneáil faoi rún chun sábháilteacht na mban a áirithiú. Ba cheart ionaid dídine a fheistiú chun aghaidh a thabhairt ar riachtanais shonracha na mban, lena n-áirítear trí ionaid dídine do mhná amháin a sholáthar. Ba cheart ionaid dídine agus cóiríocht eatramhach iomchuí eile a bheith ar fáil do chleithiúnaithe faoi bhun 18 mbliana d’aois. Mar sin féin, tá sábháilteacht agus folláine na n-íospartach atá ag fanacht in ionaid dídine den sórt sin agus i gcóiríocht den sórt sin fós ar an gcéad tosaíocht, go háirithe i gcás ina roinneann íospartaigh agus cleithiúnaithe atá ar thairseach na haosachta cóiríocht. I gcás nach bhfuil ionaid dídine saor in aisce agus ina n-iarrann na Ballstáit ranníocaíocht ó íospartaigh nuair a dhéantar iad a óstáil in ionaid dídine nó i gcóiríocht eatramhach, ba cheart don ranníocaíocht a bheith inacmhainne agus níor cheart di bac a chur ar íospartaigh rochtain a fháil ar ionaid dídine ná ar chóiríocht eatramhach. Ba cheart d’ionaid dídine a áirithiú go bhfuil foireann oilte speisialaithe ann chun teagmháil a dhéanamh le híospartaigh agus chun tacú leo.

(68)

Chun aghaidh a thabhairt go héifeachtach ar na hiarmhairtí diúltacha do leanaí, ba cheart a áireamh ar bhearta tacaíochta do leanaí comhairleoireacht shíceolaíoch speisialaithe arna cur in oiriúint d’aois, riachtanais forbartha agus staid aonair an linbh, mar aon le cúram péidiatraiceach i gcás inar gá, agus ba cheart iad a sholáthar a luaithe a bheidh forais réasúnacha ag na húdaráis inniúla lena chreidiúint go bhféadfadh sé gur íospartaigh iad leanaí, lena n-áirítear leanaí atá ina bhfinnéithe. Agus tacaíocht á soláthar do leanaí, ba cheart tús áite a thabhairt do chearta an linbh, mar a leagtar síos in Airteagal 24 den Chairt.

(69)

I bhfianaise iarmhairtí fadsaoil an fhoréigin in aghaidh na mban nó an fhoréigin teaghlaigh do leanaí ar maraíodh a dtuismitheoir mar thoradh ar na cionta sin, ba cheart do na Ballstáit a áirithiú gur féidir le leanaí den sórt sin tairbhe iomlán a bhaint as an Treoir seo, go háirithe trí bhearta cosanta agus tacaíochta spriocdhírithe, lena n-áirítear le linn aon imeachtaí breithiúnacha ábhartha.

(70)

Chun sábháilteacht leanaí a áirithiú le linn cuairteanna féideartha le ciontóir nó le duine atá faoi dhrochamhras ar sealbhóir freagrachta tuismitheora é nó í a bhfuil cearta rochtana aige nó aici de réir mar a chinntear iad faoi rialacha náisiúnta an dlí shibhialta is infheidhme, ba cheart do na Ballstáit a áirithiú go ndéantar áiteanna neodracha faoi mhaoirseacht, lena n-áirítear oifigí cosanta leanaí nó leasa, a chur ar fáil ionas gur féidir cuairteanna den sórt sin a dhéanamh chun leas an linbh. Más gá, ba cheart na cuairteanna a thabhairt nuair a bhíonn oifigigh cosanta nó leasa leanaí i láthair. I gcás inar gá foráil a dhéanamh maidir le cóiríocht eatramhach, ba cheart, mar thosaíocht, cóiríocht a thabhairt do leanaí in éineacht le sealbhóir freagrachta tuismitheora nach é nó í an ciontóir nó nach é nó í an duine atá faoi dhrochamhras. Ba cheart leas an linbh a chur san áireamh i gcónaí.

(71)

Tá íospartaigh a ndéantar idirdhealú trasnach orthu i mbaol méadaithe an fhoréigin. D’fhéadfaí a áireamh orthu sin mná faoi mhíchumas, mná a bhfuil stádas cónaithe cleithiúnach nó cead cónaithe cleithiúnach acu, mná imirceacha gan doiciméid, mná ar iarratasóirí ar chosaint idirnáisiúnta iad, mná atá ag teitheadh ó choinbhleacht armtha, mná atá thíos le heaspa dídine, mná a bhfuil cúlra cine nó eitneach mionlaigh acu, mná atá ina gcónaí i gceantair thuaithe, mná atá i mbun striapachais, mná a bhfuil ioncam íseal acu, mná atá faoi choinneáil, daoine leispiacha, aeracha, déghnéasacha, trasinscneacha nó idirghnéasacha, mná scothaosta nó mná a bhfuil neamhoird alcóil nó neamhoird úsáide drugaí acu. Dá bharr sin, ba cheart d’íospartaigh a ndéantar idirdhealú trasnach orthu cosaint agus tacaíocht shonrach a fháil.

(72)

Is ar bhealach díréireach a bhíonn mná faoi mhíchumas thíos le foréigean in aghaidh na mban agus foréigean teaghlaigh agus, mar gheall ar a míchumas, is minic a bhíonn deacracht acu rochtain a fháil ar bhearta cosanta agus tacaíochta. Dá bhrí sin, ba cheart do na Ballstáit a áirithiú gur féidir leo tairbhe iomlán a bhaint as na cearta a leagtar amach sa Treoir seo ar bhonn comhionann le daoine eile, agus aird chuí á tabhairt ag an am céanna ar a leochailí atá íospartaigh den sórt sin agus an deacracht is dócha a bhíonn acu chun cabhair a lorg.

(73)

Ba cheart gníomhaíochtaí chun foréigean in aghaidh na mban agus foréigean teaghlaigh a chosc a bheith bunaithe ar chur chuige cuimsitheach atá comhdhéanta de bhearta coisctheacha príomhúla, tánaisteacha agus treasacha. Ba cheart é a bheith mar aidhm ag bearta coisctheacha príomhúla cosc a chur ar fhoréigean tarlú agus d’fhéadfaí a áireamh leo gníomhaíochtaí amhail feachtais múscailte feasachta agus cláir oideachais spriocdhírithe chun cur le tuiscint i measc an phobail i gcoitinne ar na léirithe éagsúla de gach cineál foréigin agus ar a n-iarmhairtí agus chun cur leis an eolas faoi thoiliú i gcaidreamh idirphearsanta ag aois óg. Ba cheart é a bheith mar aidhm ag bearta coisctheacha tánaisteacha foréigean a bhrath go luath agus cosc a chur ar a dhul chun cinn nó a ghéarú ag céim luath. Ba cheart an cosc treasach a dhíriú ar athchiontú agus athíospairt a chosc agus ar iarmhairtí an fhoréigin a bhainistiú i gceart agus d’fhéadfaí a áireamh leis sin cur chun cinn idirghabháil an tslua, ionad luath-idirghabhála agus clár idirghabhála.

(74)

Ba cheart do na Ballstáit bearta coisctheacha iomchuí a dhéanamh. D’fhéadfaí a áireamh ar bhearta den sórt sin feachtais múscailte feasachta chun an foréigean in aghaidh na mban agus an foréigean teaghlaigh a chomhrac. Is féidir cosc a bheith ina chuid den oideachas foirmiúil freisin, go háirithe trí oideachas gnéasachta, inniúlachtaí soch-mhothúchánacha agus ionbhá a neartú agus trí fhoghlaim conas caidreamh folláin measúil a fhorbairt. Agus na bacainní teanga agus na leibhéil éagsúla litearthachta agus cumais á gcur san áireamh, ba cheart do na Ballstáit bearta spriocdhírithe a dhíriú ar ghrúpaí a bhfuil baol méadaithe rompu, lena n-áirítear leanaí, agus aois agus aibíocht na leanaí sin á gcur san áireamh, daoine faoi mhíchumas, daoine a bhfuil neamhoird alcóil agus neamhoird úsáide drugaí acu, agus daoine leispiacha, aeracha, déghnéasacha, trasinscneacha nó idirghnéasacha.

(75)

Ba cheart do na Ballstáit bearta a dhéanamh chun cosc a chur ar steiréitíopaí díobhálacha inscne a bheith á gcothú chun deireadh a chur leis an gcoincheap faoi ísleacht mná nó faoi róil steiréitíopacha na mban agus na bhfear. D’fhéadfaí a áireamh leis sin freisin bearta arb é is aidhm dóibh a áirithiú nach mbreathnófaí ar an gcultúr, ar ghnáthaimh, ar an reiligiún, ar an traidisiún ná ar an onóir mar údar le cionta foréigin in aghaidh na mban nó le foréigean teaghlaigh ná mar údar le go gcaithfí leis na cionta sin ar bhealach níos boige. Ba cheart do bhearta coisctheacha a bheith ina spreagadh d’fhir agus do bhuachaillí chun bheith ina n-eiseamláirí dearfacha chun tacú leis an gcomhionannas idir fir agus mná, ach ba cheart é a bheith d’aidhm ag na bearta sin freisin steiréitíopaí a shárú lena gcuirtear bac ar fhir cabhair a lorg i gcásanna foréigin atá dírithe orthu. Ós rud é go nochtar leanaí, ó aois an-óg, do róil inscne a mhúnlaíonn a bhféintuairim agus a imríonn tionchar ar a roghanna acadúla agus gairmiúla chomh maith lena róil mar mhná agus fir ar feadh a saoil, tá sé ríthábhachtach aghaidh a thabhairt ar steiréitíopaí inscne ag leibhéal an oideachais luath-óige agus an chúraim luath-óige.

(76)

Chun acmhainní a dhíriú ar na háiteanna is mó a bhfuil gá leo, maidir leis an gceanglas bearta coisctheacha a dhéanamh chun feasacht a ardú maidir le ciorrú ball giniúna ban agus pósadh éigeantais agus méid na mbeart sin, ba cheart don cheanglas sin a bheith i gcomhréir le líon na ndaoine atá i mbaol an chleachtais sin nó a ndéanann an cleachtas sin difear dóibh sa Bhallstát lena mbaineann.

(77)

Chun a áirithiú go ndéantar íospartaigh a shainaithint agus go bhfaigheann siad tacaíocht agus cosaint iomchuí, ba cheart do na Ballstáit a áirithiú go bhfaigheann oifigigh ar dócha go mbeadh teagmháil acu le híospartaigh oiliúint agus faisnéis spriocdhírithe. Níor cheart ceangal a chur ar fhoireann na Cúirte oiliúint den sórt sin a fháil ach amháin más dócha go mbeidh siad i dteagmháil le híospartaigh agus go dtí an leibhéal is iomchuí don teagmháil a dhéanann siad le híospartaigh. Ba cheart oiliúint a chur chun cinn do dhlíodóirí, d’ionchúisitheoirí, do bhreithiúna agus do chleachtóirí a sholáthraíonn seirbhísí tacaíochta d’íospartaigh nó seirbhísí ceartais aisiríoch. Ba cheart a áireamh in oiliúint den sórt sin, de réir mar is iomchuí, oiliúint maidir leis na seirbhísí tacaíochta sonracha ar cheart íospartaigh a atreorú chucu nó sainoiliúint i gcás ina ndíríonn a gcuid oibre ar íospartaigh a bhfuil riachtanais shonracha acu agus oiliúint shíceolaíoch shonrach. Ba cheart a chumhdach leis an oiliúint an baol imeaglaithe, athíospartha agus íospartha tánaistí agus cosc ar imeaglú, athíospairt agus íospairt thánaisteach agus infhaighteacht beart cosanta agus tacaíochta fáil d’íospartaigh. Chun cosc a chur ar chásanna gnéaschiaptha ag an obair agus chun aghaidh a thabhairt orthu go hiomchuí, ba cheart oiliúint a chur ar dhaoine a bhfuil feidhmeanna maoirseachta acu, i gcás ina ndéantar gnéaschiapadh ag an obair a choiriúlú go sonrach faoin dlí náisiúnta. Ba cheart do na daoine sin faisnéis a fháil freisin maidir leis an mbaol a bhaineann le foréigean tríú páirtí. Le ‘foréigean tríú páirtí’, tagraítear d’fhoréigean a d’fhéadfadh an fhoireann a fhulaingt san áit oibre ó dhuine nach comhoibrí é nó í, agus áirítear leis cásanna amhail altraí a bheith ciaptha go gnéasach ag othar.

(78)

Chun cur chuige cuimsitheach a bhunú chun gach cineál foréigin in aghaidh na mban agus gach cineál foréigin teaghlaigh a chosc agus a chomhrac, ba cheart do na Ballstáit a áirithiú go gcuirtear oiliúint ar oifigigh agus gairmithe ábhartha maidir le comhar ildisciplíneach comhordaithe, d’fhonn a áirithiú go ndéanann comhlachtaí agus údaráis ábhartha rialtais atreoruithe cásanna a láimhseáil go pras agus go bhfuil speisialtóirí gairmiúla ábhartha, lena n-áirítear i réimsí na seirbhísí leighis, dlí, oideachais nó sóisialta, rannpháirteach i gcásanna den sórt sin a láimhseáil. Ba cheart gur faoi na Ballstáit a bheadh sé cinneadh a dhéanamh maidir le conas oiliúint den sórt sin a eagrú. Níor cheart na hoibleagáidí sa Treoir seo a léirmhíniú mar chur isteach ar neamhspleáchas na n-institiúidí ardoideachais.

(79)

Chun gníomhú i gcoinne tearcthuairiscithe, ba cheart do na Ballstáit idirchaidreamh a dhéanamh le húdaráis forfheidhmithe dlí chun oiliúint a fhorbairt, go háirithe maidir le steiréitíopaí díobhálacha inscne ach freisin maidir le cionta a chosc, i bhfianaise a ndlúth-theagmhála le grúpaí atá i mbaol foréigin agus le híospartaigh.

(80)

Ba cheart cláir idirghabhála a chur ar bun chun an riosca go ndéanfar cionta foréigin in aghaidh na mban nó foréigean teaghlaigh nó go ndéanfar athchiontú a chosc agus a íoslaghdú. Ba cheart do ghairmithe oilte a bhfuil scileanna acu cláir idirghabhála a stiúradh. Ba cheart é a bheith mar aidhm shonrach ag cláir idirghabhála caidreamh sábháilte a áirithiú agus ciontóirí nó iad siúd atá i mbaol a gcionta a mhúineadh conas iompar neamhfhoréigneach a ghlacadh i gcaidreamh idirphearsanta agus conas cur i gcoinne patrúin iompraíochta fhoréigneacha. D’fhéadfadh na Ballstáit úsáid a bhaint as caighdeáin choiteanna agus treoirlínte coiteanna arna n-ullmhú ag an Institiúid Eorpach um Chomhionannas Inscne le haghaidh cláir idirghabhála.

(81)

Ba cheart faisnéis maidir le cláir idirghabhála atá ar fáil a thabhairt do chiontóir foréigin nó do dhuine atá faoi dhrochamhras maidir le foréigean a chumhdaítear leis an Treoir seo atá faoi réir ordú urchoisc éigeandála, ordú sriantach nó ordú cosanta.

(82)

Maidir leis na cionta ar éigniú iad, ba cheart ciontóirí a spreagadh páirt a ghlacadh i gcláir idirghabhála chun an riosca atitimeachais a mhaolú.

(83)

Ba cheart do na Ballstáit beartais éifeachtacha chuimsitheacha chomhordaithe a ghlacadh agus a chur chun feidhme lena gcuimsítear gach beart ábhartha chun gach cineál foréigin in aghaidh na mban agus gach cineál foréigin teaghlaigh a chosc agus a chomhrac. Leis na beartais sin, ba cheart cearta an íospartaigh a chur i gcroílár na mbeart uile. Ba cheart rogha a bheith ag na Ballstáit a chinneadh cé na húdaráis atá ainmnithe nó bunaithe ina gcomhlachtaí oifigiúla atá freagrach as comhordú, cur chun feidhme, faireachán agus meastóireacht a dhéanamh ar bheartais agus bearta chun gach cineál foréigin a chumhdaítear leis an Treoir seo a chosc agus a chomhrac, i gcomhréir le prionsabal neamhspleáchas nós imeachta na mBallstát, ar choinníoll go bhfuil na hinniúlachtaí is gá ag údaráis den sórt sin chun na cúraimí dá bhforáiltear sa Treoir seo a dhéanamh. Ba cheart do na Ballstáit comhordú beartais íosta a áirithiú ar an leibhéal lárnach agus, i gcás inarb iomchuí, ar an leibhéal réigiúnach nó áitiúil, i gcomhréir leis an dlí náisiúnta agus gan dochar do dháileadh na gcumhachtaí i ngach Ballstát. D’fhéadfadh an comhordú sin a bheith mar chuid de phleananna gníomhaíochta náisiúnta.

(84)

Glacann eagraíochtaí na sochaí sibhialta, lena n-áirítear eagraíochtaí neamhrialtasacha a oibríonn le híospartaigh, le raon leathan gníomhaithe a bhfuil róil agus sainorduithe iomadúla acu. Cuireann eagraíochtaí den sórt sin saineolas luachmhar ar fáil agus d’fhéadfadh a rannpháirtíocht agus a rannchuidiú a bheith tairbhiúil le linn cheapadh, chur chun feidhme agus phróisis faireacháin ghaolmhara bheartais an rialtais.

(85)

Mar chuid de na hiarrachtaí chun foréigean in aghaidh na mban agus foréigean teaghlaigh a chomhrac, ba cheart do na Ballstáit pleananna gníomhaíochta náisiúnta a ghlacadh.

(86)

Chun a áirithiú gur féidir le híospartaigh na gcionta cibearfhoréigin a shainítear sa Treoir seo a gcearta a bhaint amach go héifeachtach maidir le hábhar mídhleathach a bhaineann le cionta den sórt sin a bhaint anuas, ba cheart do na Ballstáit comhar féinrialála idir soláthraithe seirbhísí idirghabhálacha ábhartha a chur chun cinn. Chun a áirithiú go mbraitear ábhar den sórt sin go luath agus go dtéitear i ngleic leis go héifeachtach agus go dtugtar cúnamh agus tacaíocht leordhóthanach d’íospartaigh na gcionta sin, ba cheart do na Ballstáit bunú na mbeart féinrialála atá ann cheana ar de chineál deonach iad, amhail cóid iompair, a éascú nó feasacht a mhúscailt ina leith. Ba cheart a áireamh le héascú den sórt sin bearta féinrialála chun rioscaí córasacha a bhrath, go háirithe chun sásraí atá ceaptha chun dul i ngleic leis an gcibearfhoréigean a threisiú agus chun feabhas a chur ar an oiliúint a chuirtear ar fhostaithe soláthraithe seirbhísí idirghabhálacha den sórt sin a bhíonn ag gabháil do chosc an fhoréigin agus a sholáthraíonn cúnamh agus tacaíocht d’íospartaigh. D’fhéadfadh bearta féinrialála den sórt sin gníomhaíocht ar leibhéal an Aontais a chomhlánú, go háirithe faoi Rialachán (AE) 2022/2065.

(87)

D’fhéadfadh malartú dea-chleachtas agus comhairliúchán i gcásanna aonair, laistigh de shainorduithe Eurojust, an Ghréasáin Bhreithiúnaigh Eorpaigh in ábhair choiriúla agus gníomhaireachtaí ábhartha eile de chuid an Aontais, a bheith an-luachmhar chun gach cineál foréigin in aghaidh na mban agus foréigin teaghlaigh a chosc agus a chomhrac.

(88)

Ní féidir beartais a cheapadh chun dul i ngleic go leordhóthanach le foréigean in aghaidh na mban agus le foréigean teaghlaigh ach amháin ar bhonn sonraí dí-chomhiomlánaithe cuimsitheacha agus inchomparáide. Chun faireachán éifeachtach a dhéanamh ar fhorbairtí sna Ballstáit, iarrtar ar na Ballstáit freisin suirbhéanna a dhéanamh go rialta. D’fhéadfaí é sin a dhéanamh trí úsáid a bhaint as modheolaíocht chomhchuibhithe an Choimisiúin (Eurostat).

(89)

Ba cheart do na Ballstáit a áirithiú go bhfuil na sonraí a bhailítear chun críocha na Treorach seo teoranta don mhéid atá fíor-riachtanach i ndáil le tacú le faireachán ar leitheadúlacht agus treochtaí an fhoréigin in aghaidh na mban agus an fhoréigin teaghlaigh agus i ndáil le straitéisí nua beartais a cheapadh sa réimse sin. Ba cheart do na Ballstáit sonraí riachtanacha a sholáthar don Institiúid Eorpach um Chomhionannas Inscne ionas gur féidir na sonraí sin a chur i gcomparáid agus a anailísiú, agus ionas gur féidir measúnú a dhéanamh orthu, ar leibhéal an Aontais.

(90)

Aon phróiseáil sonraí pearsanta a dhéantar de bhun na Treorach seo, lena n-áirítear malartú nó tarchur sonraí pearsanta ag na húdaráis inniúla, tá sí le déanamh i gcomhréir le Rialachán (AE) 2016/679 agus Treoracha 2002/58/CE (13) agus (AE) 2016/680 ó Pharlaimint na hEorpa agus ón gComhairle. Aon phróiseáil sonraí pearsanta a dhéanann institiúidí, comhlachtaí, oifigí nó gníomhaireachtaí an Aontais, déanfar í i gcomhréir le Rialacháin (AE) 2016/794 (14), (AE) 2018/1725 (15) agus (AE) 2018/1727 (16) ó Pharlaimint na hEorpa agus ón gComhairle, nó aon rialacha eile de chuid an Aontais is infheidhme maidir le cosaint sonraí.

(91)

Leis an Treoir seo, bunaítear rialacha íosta, agus, dá bhrí sin, tá sé de shaoirse ag na Ballstáit rialacha dlí choiriúil níos déine a ghlacadh nó a choinneáil ar bun maidir le sainiú na gcionta coiriúla agus na bpionós i réimse an fhoréigin in aghaidh na mban. Maidir le forálacha na Treorach seo i ndáil le cearta íospartach, is féidir leis na Ballstáit forálacha a thabhairt isteach nó a choinneáil ar bun lena ngabhann caighdeáin níos airde, lena n-áirítear forálacha lena soláthraítear leibhéal níos airde cosanta agus tacaíochta d’íospartaigh.

(92)

Ós rud é nach féidir leis na Ballstáit cuspóir na Treorach seo, eadhon foréigean in aghaidh na mban agus foréigean teaghlaigh a chosc agus a chomhrac ar fud an Aontais ar bhonn rialacha íosta coiteanna, a ghnóthú go leordhóthanach agus, de bharr fhairsinge agus éifeachtaí na mbeart atá beartaithe, gur fearr is féidir é a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Treoir seo thar a bhfuil riachtanach chun an cuspóir sin a ghnóthú.

(93)

I gcomhréir le hAirteagal 3 de Phrótacal Uimh. 21 maidir le seasamh na Ríochta Aontaithe agus na hÉireann i dtaca leis an limistéar saoirse, slándála agus ceartais, atá i gceangal le CAE agus le CFAE, tá fógra tugtha ag Éirinn, le litir an 22 Meitheamh 2022, gur mian léi a bheith rannpháirteach i nglacadh agus i gcur i bhfeidhm na Treorach seo.

(94)

I gcomhréir le hAirteagail 1 agus 2 de Phrótacal Uimh. 22 maidir le seasamh na Danmhairge, atá i gceangal le CAE agus le CFAE, níl an Danmhairg rannpháirteach i nglacadh na Treorach seo agus níl sí faoi cheangal aici ná faoi réir a cur i bhfeidhm.

(95)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 agus thug an Maoirseoir tuairim an 5 Aibreáin 2022,