(1)

Tháinig Treoir 2012/19/AE ó Pharlaimint na hEorpa agus ón gComhairle (3) i bhfeidhm an 13 Lúnasa 2012, agus tháinig sí in ionad Threoir 2002/96/CE ó Pharlaimint na hEorpa agus ón gComhairle (4).

(2)

Áiríodh painéil fhótavoltacha, nár tháinig faoi raon feidhme Threoir 2002/96/CE, i raon feidhme Threoir 2012/19/AE amhail ón 13 Lúnasa 2012, trí bhíthin iad a áireamh i gcatagóir 4 d’Iarscríbhinní I agus II, dá dtagraítear in Airteagal 2(1), pointe (a), de Threoir 2012/19/AE.

(3)

Foráiltear le hAirteagal 13(1) de Threoir 2012/19/AE go bhfuil na Ballstáit le háirithiú go seasfaidh táirgeoirí trealaimh leictrigh agus leictreonaigh (TLL) na costais a bhaineann le dramhthrealamh leictreach agus leictreonach (DTLL) a bhailiú, a chóireáil, a aisghabháil agus a dhiúscairt ar shlí atá fónta ó thaobh an chomhshaoil de ó úsáideoirí seachas teaghlaigh phríobháideacha a bhíonn ann mar gheall ar tháirgí a cuireadh ar an margadh tar éis an 13 Lúnasa 2005.

(4)

An 25 Eanáir 2022, dhearbhaigh Cúirt Bhreithiúnais an Aontais Eorpaigh (‘an Chúirt’), ina breithiúnas i gCás C-181/20 (5), go raibh Airteagal 13(1) de Threoir 2012/19/AE neamhbhailí a mhéid a bhaineann sé le painéil fhótavoltacha a cuireadh ar an margadh idir an 13 Lúnasa 2005 agus an 13 Lúnasa 2012, mar gheall ar éifeacht chúlghabhálach gan údar maith. Dhearbhaigh an Chúirt, sular glacadh Treoir 2012/19/AE, gur fhág reachtas an Aontais go raibh sé de rogha ag na Ballstáit, na costais a bhaineann le bainistiú dramhaíola ó phainéil fhótavoltacha a bheith le híoc ag sealbhóirí dramhaíola reatha nó sealbhóirí dramhaíola a bhí ann roimhe seo, nó ag táirgeoir nó dáileoir na bpainéal fótavoltach, de bhun Airteagal 14 de Threoir 2008/98/CE ó Pharlaimint na hEorpa agus ón gComhairle (6). Dá éis sin, bhunaigh reachtas an Aontais riail, in Airteagal 13(1) de Threoir 2012/19/AE, faoina bhfuil na costais sin le seasamh ag táirgeoirí i ngach Ballstát, lena n-áirítear i ndáil le táirgí a bhí curtha ar an margadh cheana ag na táirgeoirí tráth a raibh Treoir 2008/98/CE i bhfeidhm. Dhearbhaigh an Chúirt nár mhór a mheas go raibh feidhm chúlghabhálach ag an riail sin, agus go bhféadfadh sí, dá bhrí sin, prionsabal na deimhneachta dlíthiúla a shárú, agus go ndéanann an aisghníomhaíocht sin neamhbhailí é a mhéid a bhaineann le painéil fhótavoltacha a cuireadh ar an margadh roimh theacht i bhfeidhm Threoir 2012/19/AE.

(5)

Dhearbhaigh an Chúirt freisin ina breithiúnas nár shárú ar dhlí an Aontais é reachtaíocht a ghlacadh a bhí contrártha le treoir ón Aontas sular glacadh an treoir sin, ós rud é nach féidir a mheas go bhfuil baint amach an toraidh a fhorordaítear leis an treoir i mbaol tromchúiseach sula bhfuil an treoir ina cuid de dhlíchóras an Aontais.

(6)

Tugtar le tuiscint go díreach le breithiúnas na Cúirte gur cheart Airteagal 13(1) de Threoir 2012/19/AE a leasú ionas nach mbeidh feidhm aige maidir le dramhaíl ó phainéil fhótavoltacha ó úsáideoirí seachas ó theaghlaigh phríobháideacha a cuireadh ar an margadh idir an 13 Lúnasa 2005 agus an 13 Lúnasa 2012. Thairis sin, i bhfianaise na mbreithnithe a leagadh amach i mbreithiúnas na Cúirte, is gá Treoir 2012/19/AE a leasú freisin i ndáil le maoiniú dramhaíola ó phainéil fhótavoltacha ó theaghlaigh phríobháideacha a bhfuil feidhm ag Airteagal 12 de Threoir 2012/19/AE ina leith, agus i ndáil le TLL eile, maidir le dramhaíl ó theaghlaigh phríobháideacha agus ó úsáideoirí seachas teaghlaigh phríobháideacha araon, ar dramhaíl í atá inchomparáide leis an seasamh atá ag painéil fhótavoltacha.

(7)

Le hAirteagal 2(1), pointe (b), de Threoir 2012/19/AE, leathnaítear raon feidhme chur i bhfeidhm na Treorach sin go dtí gach TLL amhail ón 15 Lúnasa 2018. Mar atá i gcás painéil fhótavoltacha, ní dhearnadh TLL nár tháinig faoi raon feidhme Threoir 2012/19/AE de bhun Airteagal 2(1), pointe (a), de ach a tháinig faoina raon feidhme ón 15 Lúnasa 2018 de bhun Airteagal 2(1), pointe (b), de (‘TLL raon feidhme oscailte’) a áireamh roimhe seo chomh maith faoi raon feidhme Threoir 2002/96/CE. Dá bhrí sin, sular glacadh Treoir 2012/19/AE, de bhun Airteagal 14 de Threoir 2008/98/CE, fágadh de rogha ag na Ballstáit na costais a bhaineann le bainistiú dramhaíola ón TLL sin a bheith le híoc ag sealbhóirí dramhaíola reatha nó sealbhóirí dramhaíola a bhí ann roimhe seo nó ag táirgeoir nó dáileoir an trealaimh sin. Dá bhrí sin, dá gcuirfí Airteagal 13(1) de Threoir 2012/19/AE i bhfeidhm maidir le TLL raon feidhme oscailte, ar na cúiseanna a leagtar amach i mbreithiúnas na Cúirte, bheadh sé contrártha le prionsabal na deimhneachta dlíthiúla. Thairis sin, ós rud é nach n-áirítear TLL raon feidhme oscailte i dTreoir 2012/19/AE ach amháin ón 15 Lúnasa 2018, ba cheart Airteagal 13(1) a leasú ionas nach mbeidh feidhm aige maidir le TLL raon feidhme oscailte a cuireadh ar an margadh idir an 13 Lúnasa 2005 agus an 15 Lúnasa 2018.

(8)

Mar fhoráil atá ar aon dul le hAirteagal 13(1) de Threoir 2012/19/AE, a bhfuil feidhm aici i leith úsáideoirí seachas teaghlaigh phríobháideacha, forchuirtear le hAirteagal 12(1) den Treoir sin, arna léamh i gcomhar le hAirteagal 12(3) di, maoiniú na gcostas chun DTLL ó theaghlaigh phríobháideacha a bhailiú, a chóireáil, a aisghabháil agus a dhiúscairt ar shlí atá fónta ó thaobh an chomhshaoil de a chur ar tháirgeoirí maidir le táirgí a chuirtear ar an margadh ar dháta is déanaí ná an 13 Lúnasa 2005. Ar na cúiseanna a leagtar amach i mbreithiúnas na Cúirte, a mhéid atá feidhm ag na forálacha sin maidir le maoiniú na gcostas bainistithe dramhaíola sin do phainéil fhótavoltacha a cuireadh ar an margadh idir an 13 Lúnasa 2005 agus an 13 Lúnasa 2012 agus maidir le TLL raon feidhme oscailte a cuireadh ar an margadh idir an 13 Lúnasa 2005 agus an 15 Lúnasa 2018, bheadh feidhm chúlghabhálach acu freisin ar shlí atá contrártha do phrionsabal na deimhneachta dlíthiúla. Dá bhrí sin, ba cheart Airteagal 12 de Threoir 2012/19/AE a leasú ar shlí nach mbeadh feidhm aige maidir le painéil fhótavoltacha a cuireadh ar an margadh idir an 13 Lúnasa 2005 agus an 13 Lúnasa 2012 ná maidir le TLL raon feidhme oscailte a cuireadh ar an margadh idir an 13 Lúnasa 2005 agus an 15 Lúnasa 2018.

(9)

Le Treoir 2012/19/AE forlíontar Treoir 2008/98/CE, atá ar cheann de na gníomhartha reachtacha ginearálta bainistithe dramhaíola san Aontas. Tá feidhm ag Airteagail 8 agus 14 de Threoir 2008/98/CE dá bhrí sin maidir le bainistiú dramhaíola ó phainéil fhótavoltacha agus bainistiú dramhaíola ó TLL raon feidhme oscailte don tréimhse nuair nach dtagann painéil fhótavoltacha agus TLL raon feidhme oscailte faoi raon feidhme Threoir 2012/19/AE de bhua na leasuithe ar Airteagail 12 agus 13 den Treoir sin leis an Treoir seo.

(10)

Foráiltear le hAirteagal 14(4) agus Airteagal 15(2) de Threoir 2012/19/AE go ndéanfar TLL a chuirtear ar an margadh a mharcáil i gcomhréir, agus gur fearr go ndéanfaí é le caighdeán Eorpach EN 50419, a ghlac Cenelec i mí an Mhárta 2006. Rinneadh athbhreithniú ar an gcaighdeán sin chun na tagairtí atá ann do Threoir 2012/19/AE a thabhairt cothrom le dáta. Dá bhrí sin, ba cheart an tagairt don chaighdeán sna hairteagail sin a thabhairt cothrom le dáta chun tagairt a dhéanamh don leagan athbhreithnithe de chaighdeán Eorpach EN 50419, caighdeán a ghlac Cenelec i mí Iúil 2022.

(11)

Foráiltear le hAirteagal 15(2) de Threoir 2012/19/AE, chun gur féidir an dáta ar ar cuireadh TLL ar an margadh a chinneadh go soiléir, go bhfuil na Ballstáit le háirithiú go sonrófar i marc ar an TLL gur cuireadh an TLL ar an margadh tar éis an 13 Lúnasa 2005. Mar thoradh ar na leasuithe ar Airteagail 12 agus 13, ba cheart Airteagal 15(2) a leasú maidir le painéil fhótavoltacha agus TLL raon feidhme oscailte, ionas go soiléirítear ann nach bhfuil feidhm ag an oibleagáid marcála ach ón 13 Lúnasa 2012 i ndáil le painéil fhótavoltacha agus ón 15 Lúnasa 2018 i ndáil le TLL raon feidhme oscailte.

(12)

Chun prionsabal na deimhneachta dlíthiúla a chaomhnú in athbhreithnithe ar Threoir 2012/19/AE a bheidh ann amach anseo, tá sé tábhachtach aird áirithe a thabhairt ar ghlacadh aon fhorálacha a chosc a bhféadfadh éifeachtaí cúlghabhálacha gan údar maith a bheith acu. Ina theannta sin, tá sé riachtanach soiléireacht agus intuarthacht a thabhairt do tháirgeoirí TLL, maidir leis na dálaí oibriúcháin a bhí i bhfeidhm nuair a cuireadh a dtáirgí ar an margadh. Leis an gcur chuige sin, cuidítear leis an riosca a sheachaint go dtabhófaí costais dhothuartha a bhaineann le bainistiú DTLL sa todhchaí. Thairis sin, tá sé tábhachtach leis na hathbhreithnithe sin go n-urramófaí ord na réiteach dramhaíola mar a leagtar síos in Airteagal 4 de Threoir 2008/98/CE.

(13)

I gcomhréir le Dearbhú Comhpháirteach Polaitiúil an 28 Meán Fómhair 2011 ó na Ballstáit agus ón gCoimisiún maidir le doiciméid mhíniúcháin (7), ghlac na Ballstáit mar chúram orthu féin, i gcásanna a bhfuil údar cuí leo, doiciméad amháin nó níos mó a chur le fógra a mbeart trasuite, ar doiciméid iad lena mínítear an gaol idir codanna de threoir agus páirteanna comhfhreagracha na n-ionstraimí náisiúnta trasuite. Maidir leis an Treoir seo measann an reachtóir go bhfuil údar cuí leis na doiciméid sin a tharchur.

(14)

Bíonn drochthionchair shuntasacha ar an tsláinte agus ar an gcomhshaol ann mar thoradh ar chóireáil lochtach dramhaíola ó phainéil fhótavoltacha agus dramhaíola ó TLL raon feidhme oscailte. Tá sé tábhachtach a áirithiú dá bhrí sin go ndéanfar dramhaíl ó phainéil fhótavoltacha a chóireáil go cuí agus go ndéanfar aisghabháil dramhaíola ó phainéil fhótavoltacha a uasmhéadú. Gan dochar do na hathruithe ar na hoibleagáidí airgeadais is gá chun bailiú agus cóireáil painéal fótavoltach dramhaíola a cuireadh ar an margadh roimh an 13 Lúnasa 2012 agus bailiú agus cóireáil dramhaíola ó gach TLL raon feidhme oscailte a cuireadh ar an margadh roimh an 15 Lúnasa 2018 a tugadh isteach leis an Treoir seo a chumhdach, tá sé tábhachtach do Bhallstáit a áirithiú go ndéantar DTLL gaolmhar a bhainistiú ar shlí atá fónta ó thaobh an chomhshaoil. D’fhéadfadh na Ballstáit táirgeoirí a spreagadh, trína scéimeanna freagrachta táirgeoirí leathnaithe aonair nó comhchoiteanna chun dramhaíl stairiúil ghaolmhar ó na painéil fhótavoltacha agus ó TLL raon feidhme oscailte a bhailiú agus a chóireáil i gceart.

(15)

Agus Treoir 2012/19/AE á hathbhreithniú, agus ag díriú ar a heasnaimh, tá sé ríthábhachtach a áirithiú nach n-aistreofaí na costais a bhaineann le DTLL a bhainistiú go díréireach chuig tomhaltóirí ná saoránaigh. Áirítear leis sin an prionsabal gurb é údar an truaillithe a íocfaidh as a chur san áireamh, prionsabal lena ndírítear ar fhorálacha féideartha a bhaineann le spriocanna bailithe DTLL agus le cloí le hord na réiteach dramhaíola mar a leagtar síos in Airteagal 4 de Threoir 2008/98/CE.

(16)

Ós rud é nach féidir leis na Ballstáit cuspóirí na Treorach seo a ghnóthú go leordhóthanach agus, de bharr a fhairsinge agus a éifeachtaí, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Treoir seo thar a bhfuil riachtanach chun na cuspóirí sin a ghnóthú,

(1)

cuirtear an t-airteagal seo a leanas isteach:

(2)

leasaítear Airteagal 12 mar a leanas:

(3)

in Airteagal 13, cuirtear an méid seo a leanas in ionad mhír 1:

(4)

in Airteagal 14, cuirtear an méid seo a leanas in ionad mhír 4:

(5)

in Airteagal 15, cuirtear an méid seo a leanas in ionad mhír 2: