(1)

Chun a áirithiú go dtuigfidh infheisteoirí agus maoirseoirí an chaoi a bhfuil cineál sintéiseach nó teagmhasach coinneála coibhéiseach le ceann de na roghanna coinneála a leagtar amach in Airteagal 6(3) de Rialachán (AE) 2017/2402, ba cheart úsáid an chineáil coinneála sin agus na mionsonraí ina leith a nochtadh sa doiciméad tairisceana deiridh, sa réamheolaire tairisceana deiridh, san achoimre ar na hidirbhearta nó san fhorléargas ar phríomhghnéithe an urrúsaithe.

(2)

Leagtar síos in Airteagal 6(3), pointí (a) go (e), de Rialachán (AE) 2017/2402 módúlachtaí éagsúla chun an ceanglas maidir le coinneáil riosca a leagtar síos in Airteagal 6(1) den Rialachán sin a chomhlíonadh. Chun cur i bhfeidhm an cheanglais maidir le coinneáil riosca a chomhchuibhiú agus chun coinneáil choibhéiseach glanleasa eacnamaíoch ábhartha in urrúsú a bhaint amach, is gá na módúlachtaí sin a shonrú a thuilleadh, lena n-áirítear comhlíonadh trí chineál sintéiseach nó teagmhasach coinneála. I gclár ABCP, maidir le saoráid leachtachta lena gcumhdaítear 100 % de riosca creidmheasa gach ceann de na neamhchosaintí urrúsaithe, nó atá ina suíomh céadchaillteanais i ndáil leis an urrúsú, tá an tsaoráid sin coibhéiseach le glanleas eacnamaíoch a choinneáil san urrúsú. Dá bhrí sin, ba cheart a mheas go gcomhlíonann cláir ABCP den sórt sin an ceanglas maidir le coinneáil riosca i gcomhréir le hAirteagal 6(3), pointí (a) agus (d), de Rialachán (AE) 2017/2402.

(3)

Sainmhínítear barrachas an raoin difríochta shintéisigh in Airteagal 2, pointe (29), de Rialachán (AE) 2017/2402 mar mhéid atá ainmnithe go conarthach ag an tionscnóir chun caillteanais a ionsú. Dá réir sin, eascraíonn luach neamhchosanta as barrachas an raoin difríochta shintéisigh, ar cheart é a chur san áireamh agus an glanleas eacnamaíoch ábhartha tráth an tionscanta á thomhas. Dá bhrí sin, ba cheart barrachas an raoin difríochta shintéisigh a aithint mar bhealach ina bhféadfadh tionscnóir an urrúsaithe shintéisigh an ceanglas maidir le coinneáil riosca a chomhlíonadh i gcás ina gcomhlíonann barrachas sin an raoin difríochta shintéisigh na coinníollacha a leagtar amach in Airteagal 6(1) de Rialachán (AE) 2017/2402 agus i gcás ina bhfuil barrachas sin an raoin difríochta shintéisigh faoi réir ceanglas caipitil i gcomhréir leis an rialáil stuamachta is infheidhme.

(4)

Is féidir raonta difríochta sintéiseacha a ainmniú ar dhá bhealach éagsúla. Bealach amháin is ea feabhsú creidmheasa a sholáthar don tráinse sinsearach nó don tráinse mezzanine. Bealach eile is ea feabhsú creidmheasa a sholáthar do gach tráinse, lena n-áirítear an tráinse céadchaillteanais. I gcás ina soláthraítear le barrachas an raoin difríochta shintéisigh feabhsú creidmheasa don tráinse sinsearach nó don tráinse mezzanine amháin, ní féidir é a láimhseáil mar thráinse céadchaillteanais. Dá bhrí sin, ba cheart don choinneálaí íosmhéid ar a laghad sna tráinsí uile a choinneáil chun Airteagal 6(3), pointe (a), de Rialachán (AE) 2017/2402 a chomhlíonadh. I gcás ina soláthraítear le barrachas an raoin difríochta shintéisigh feabhsú creidmheasa do na tráinsí uile, ba cheart an barrachas sin a bheith coibhéiseach le tráinse céadchaillteanais den urrúsú sintéiseach, agus, dá bhrí sin, measfar go gcomhlíonann sé Airteagal 6(3), pointe (d), de Rialachán (AE) 2017/2402.

(5)

Is gá an leas eacnamaíoch atá le coinneáil a shonrú i gcás ina n-áirítear méideanna urrúsaithe tarraingthe agus neamhtharraingthe leis na neamhchosaintí foluiteacha a bhaineann le hurrúsú. Toisc go gcinntear an riosca creidmheasa ar bhonn na méideanna tarraingthe, níor cheart ach na méideanna sin amháin a chur san áireamh agus an glanleas eacnamaíoch á thomhas.

(6)

Chun a áirithiú go leanfar den cheanglas maidir le coinneáil a chomhlíonadh i gcás ina bhfuil an glanleas eacnamaíoch á choinneáil ag an ngrúpa comhdhlúite agus nach dtagann coinneálaí an ghrúpa faoi raon feidhme na maoirseachta ar bhonn comhdhlúite a thuilleadh, is gá a leagan síos gur cheart do cheann amháin nó níos mó de na heintitis eile a thagann faoi raon feidhme na maoirseachta ar bhonn comhdhlúite neamhchosaint ar an urrúsú a ghlacadh.

(7)

Le hAirteagal 6(1), an chéad fhomhír, de Rialachán (AE) 2017/2402 cuirtear toirmeasc ar fhálú nó díol an leasa eacnamaíoch choinnithe toisc go ndéanfadh sé sin neamhchosaint an choinneálaí ar riosca creidmheasa na suíomhanna nó neamhchosaintí coinnithe urrúsúcháin a bhaint. Dá bhrí sin, níor cheart fálú a cheadú ach amháin i gcás ina ndéanann sé an coinneálaí a fhálú i gcoinne rioscaí seachas riosca creidmheasa na suíomhanna nó neamhchosaintí coinnithe urrúsúcháin. Ba cheart fálú a cheadú freisin, áfach, i gcás ina ndéantar é roimh an urrúsú mar ghné dhlisteanach stuama den deonú creidmheasa nó den bhainistiú riosca, agus nach gcruthaíonn sé idirdhealú chun tairbhe an choinneálaí idir riosca creidmheasa na suíomhanna nó neasmhchosaintí urrúsúcháin coinnithe agus riosca creidmheasa na suíomhanna nó neamhchosaintí urrúsúcháin arna n-aistriú chuig na hinfheisteoirí. Ina theannta sin, i gcás urrúsuithe ina ngeallann an coinneálaí níos mó ná an glanleas eacnamaíoch ábhartha íosta de 5 % a choinneáil, níor cheart fálú a thoirmeasc maidir le haon leas coinnithe de bhreis ar an gcéatadán sin, ar choinníoll go nochtar na himthosca sin sa doiciméad tairisceana deiridh, sa réamheolaire tairisceana deiridh, san achoimre ar na hidirbhearta nó san fhorléargas ar phríomhghnéithe an urrúsaithe.

(8)

Chun a áirithiú go leanfar den ghlanleas eacnamaíoch ábhartha a choinneáil, ba cheart do choinneálaithe a áirithiú nach bhfuil aon sásra leabaithe sa struchtúr urrúsúcháin trína dtiocfaidh laghdú níos tapa ar an nglanleas eacnamaíoch ábhartha coinnithe, arna thomhas tráth an tionscanta, ná ar an leas arna aistriú. Ar an gcúis chéanna, níor cheart tosaíocht a thabhairt don ghlanleas eacnamaíoch ábhartha coinnithe i dtéarmaí sreafaí airgid sa chaoi go dtairbheodh sé go fabhrach de bheith aisíoctha nó amúchta ar bhealach a laghdódh an glanleas eacnamaíoch ábhartha coinnithe sin chuig leibhéal faoi bhun 5 % de luach ainmniúil leanúnach na dtráinsí arna ndíol nó arna n-aistriú chuig na hinfheisteoirí nó de luach ainmniúil leanúnach na neamhchosaintí urrúsaithe, nó chuig leibhéal faoi bhun an ghlanluacha 5 % i gcás neamhchosaintí neamhthuillmheacha a bhaineann le hurrúsuithe traidisiúnta NPE. Thairis sin, an feabhsú creidmheasa a sholáthraítear don infheisteoir a bhfuil neamhchosaint ar shuíomh urrúsúcháin á glacadh aige, níor cheart laghdú a theacht ar an bhfeabhsú creidmheasa sin a bheadh díréireach leis an ráta aisíocaíochta maidir leis na neamhchosaintí foluiteacha. Níor cheart an ceanglas sin cosc a chur ar an gcoinneálaí luach saothair a fháil ar bhonn tosaíochta i leith seirbhísí a thugann sé d’eintiteas sainchuspóireach an urrúsaithe, ar choinníoll go socraítear méid an luacha saothair ar bhonn neamhthuilleamaí agus nach mbaineann struchtúr an luacha saothair sin an bonn den cheanglas maidir le coinneáil.

(9)

I gcás ina bhfuil leas an phríomhoibleagáideora agus an infheisteora ailínithe go hiomlán le chéile, lena n-áirítear an cás go gcuimsíonn an t-urrúsú go heisiach bannaí faoi chumhdach nó ionstraimí fiachais eile arna n-eisiúint go díreach ag an bpríomhoibleagadóir, níor cheart é a bheith d’oibleagáid ar an eintiteas a dhéanann na hionstraimí sin a urrúsú aon bheart eile a dhéanamh chun an ceanglas maidir le coinneáil riosca a chomhlíonadh.

(10)

Déantar foráil in Airteagal 8 de Rialachán (AE) 2017/2402 maidir le heisceachtaí áirithe ón toirmeasc ar ath-urrúsuithe. Toisc go mbaineann na ceanglais maidir le coinneáil le dhá leibhéal na n-idirbheart i dtaca le hath-urrúsú, is gá an bealach a shonrú ina gcomhlíonfaidh na hidirbhearta sin an ceanglas maidir le coinneáil. Mar riail ghinearálta, ba cheart na chéad urrúsuithe neamhchosaintí agus an dara leibhéal ‘athphacáistithe’ den idirbheart a láimhseáil mar urrúsuithe ar leithligh ar mhaithe leis an gceanglas maidir le coinneáil riosca a chomhlíonadh. Ba cheart oibleagáid a bheith ann, dá bhrí sin, glanleas eacnamaíoch ábhartha gach ceann de na leibhéil sin a choinneáil. Ba cheart feidhm a bheith ag an méid sin freisin maidir le hidirbhearta a bhfuil níos mó ná urrúsú foluiteach amháin acu, amhail cláir páipéar tráchtála sócmhainn-bhunaithe (ABCP) seachas na cláir sin dá dtagraítear in Airteagal 8(4) de Rialachán (AE) 2017/2402. D’fhéadfadh sé, áfach, go ndéanfadh tionscnóir an urrúsaithe, agus é ag gníomhú mar choinneálaí, suíomhanna a urrúsú a bhí coinnithe aige de bhreis ar an gceanglas íosta maidir le coinneáil ar an gcéad leibhéal d’urrúsú. Sa chás sin, níor cheart a cheangal ar an tionscnóir sin leas breise a choinneáil ar leibhéal an ath-urrúsaithe, ar choinníoll nach gcuirtear aon neamhchosaint ná suíomh eile le comhthiomsú foluiteach an ath-urrúsaithe. Sna cásanna sin, níor cheart an t-ath-urrúsú a mheas ach amháin mar an dara céim den idirbheart céanna, nach n-athrófaí bonn eacnamaíoch an urrúsaithe go mór dá bharr. Dá bhrí sin, ba cheart gur leor an choinneáil bhunaidh ar leibhéal an urrúsaithe chun cuspóir an cheanglais maidir le coinneáil riosca a chomhlíonadh. Ar deireadh, má dhéanann tionscnóir an urrúsaithe suíomh urrúsaithe a atráinsiú ina dtráinsí tadhlacha, agus an méid sin amháin, níor cheart a mheas gur ath-urrúsú é sin chun críocha an cheanglais maidir le coinneáil.

(11)

Is cuid lárnach den chreat um choinneáil riosca iad na ceanglais maidir le roghnú sócmhainní a leagtar síos in Airteagal 6(2) de Rialachán (AE) 2017/2402. Dá mbeadh tionscnóirí in ann an chuid is fearr de na sócmhainní a roghnú chun punanna ag a bhfuil cáilíocht chreidmheasa níos measa a urrúsú, agus go háirithe i ngan fhios do na hinfheisteoirí nó na hinfheisteoirí ionchasacha, dhéanfaí an bonn a bhaint go géar ó chuspóir agus ó éifeachtacht na coinneála riosca i dtaca le leasanna na dtionscnóirí agus na n-infheisteoirí a ailíniú. Sa chás sin, cé go mbeadh an tionscnóir ag baint úsáid as an urrúsú chun fáil réidh le sócmhainní a bhfuil riosca ag baint leo, is ar míthreoir a bheadh infheisteoirí agus iad ag ceapadh gur fianaise ar ailíniú cuí leasanna é sciar den riosca a bheith coinnithe ag an tionscnóir. Chun cás mar sin a sheachaint agus chun foráil a dhéanamh maidir le deimhneacht dhlíthiúil agus slándáil, is gá critéir a leagan síos a bhféadfaidh tionscnóirí brath orthu chun comhlíonadh Airteagal 6(2) de Rialachán (AE) 2017/2402 a áirithiú. Thairis sin, ba cheart critéir a sholáthar chun ‘sócmhainní inchomparáide’ a chinneadh. I gcás urrúsuithe nach féidir an chomparáid dá dtagraítear in Airteagal 6(2) de Rialachán (AE) 2017/2402 a dhéanamh ina leith toisc gur aistríodh na sócmhainní inchomparáide go léir chuig an eintiteas sainchuspóireach urrúsúcháin (SSPE), ba cheart a mheas go gcomhlíonann siad ceanglais na míre sin, ar choinníoll go nochtar sa doiciméad tairisceana deiridh, sa réamheolaire tairisceana deiridh, san achoimre ar na hidirbhearta nó san fhorléargas ar phríomhghnéithe an urrúsaithe nárbh fhéidir an chomparáid sin a dhéanamh.

(12)

I gcás inar tionscnaíodh imeachtaí dócmhainneachta i leith an choinneálaí, nó i gcás nach féidir leis an gcoinneálaí leanúint de ghníomhú sa cháil sin ar chúiseanna nach bhfuil neart aige orthu ná nach bhfuil neart ag a scairshealbhóirí orthu, ba cheart eintiteas dlíthiúil eile a chomhlíonann Airteagal 6 de Rialachán (AE) 2017/2402 a bheith in ann an glanleas eacnamaíoch ábhartha coinnithe atá fágtha a choinneáil, ionas go mbeidh ailíniú leasanna ann fós.

(13)

De bhun Airteagal 6(1), an ceathrú fomhír, de Rialachán (AE) 2017/2402, seirbhíseoirí atá in ann saineolas a léiriú maidir le neamhchosaintí a sheirbhísiú ar de chineál comhchosúil iad leis na neamhchosaintí urrúsaithe sin, is iad na seirbhíseoirí sin amháin a fhéadfaidh gníomhú mar choinneálaithe in urrúsú traidisiúnta NPE. Is iomchuí, dá bhrí sin, na critéir a leagan amach ar cheart do sheirbhíseoirí iad a chomhlíonadh le go mbeidís in ann a léiriú go bhfuil an saineolas is gá acu maidir le neamhchosaintí a sheirbhísiú atá comhchosúil leis na neamhchosaintí atá urrúsaithe.

(14)

Le Rialachán Tarmligthe (AE) Uimh. 625/2014 (2) ón gCoimisiún, forlíontar na forálacha maidir le coinneáil riosca a leagtar síos in Airteagal 405 de Rialachán (AE) Uimh. 575/2013 ó Pharlaimint na hEorpa agus ón gComhairle (3) i gcomhair institiúidí creidmheasa agus gnólachtaí infheistíochta. Le Rialachán (AE) 2017/2401 ó Pharlaimint na hEorpa agus ón gComhairle (4), leasaíodh Rialachán (AE) Uimh. 575/2013 trí Chuid a Cúig, agus dá bhrí sin, Airteagal 405 den Rialachán sin a scriosadh. Na ceanglais maidir le coinneáil riosca a leagadh síos in Airteagal 405 de Rialachán (AE) Uimh. 575/2013, leagtar síos anois iad in Airteagal 6 de Rialachán (AE) 2017/2402. Is iomchuí, dá bhrí sin, Rialachán Tarmligthe (AE) Uimh. 625/2014 a aisghairm, gan dochar d’Airteagal 43(6) de Rialachán (AE) 2017/2402.

(15)

Tá an Rialachán seo bunaithe ar na dréachtchaighdeáin theicniúla rialála a forbraíodh i ndlúthchomhar leis an Údarás Eorpach um Urrúis agus Margaí agus leis an Údarás Eorpach um Árachas agus Pinsin Cheirde, agus a chuir an tÚdarás Baincéireachta Eorpach faoi bhráid an Choimisiúin.

(16)

Rinne an tÚdarás Baincéireachta Eorpach comhairliúcháin phoiblí oscailte a reáchtáil maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus ar na tairbhí a d’fhéadfadh a bheith ag baint leo agus d’iarr sé comhairle ar an nGrúpa Geallsealbhóirí Baincéireachta arna bhunú i gcomhréir le hAirteagal 37 de Rialachán (AE) Uimh. 1093/2010 ó Pharlaimint na hEorpa agus ón gComhairle (5),

(a)

ciallaíonn ‘cineál sintéiseach coinneála’ glanleas eacnamaíoch ábhartha a choinneáil trí ionstraimí díorthacha a úsáid;

(b)

ciallaíonn ‘cineál teagmhasach coinneála’ glanleas eacnamaíoch ábhartha a choinneáil trí thacaíocht chreidmheasa a úsáid lena n-áiritheofar forfheidhmiú láithreach na coinneála, lena n-áirítear an méid sin a dhéanamh trí ráthaíochtaí, litreacha creidmheasa, nó cineálacha comhchosúla tacaíochta creidmheasa.

(a)

coinneáil nach lú ná 5 % de luach ainmniúil gach ceann de na tráinsí arna ndíol nó arna n-aistriú chuig infheisteoirí;

(b)

neamhchosaint a choinneáil lena nochtar a sealbhóir do riosca creidmheasa gach tráinse eisithe d’idirbheart urrúsaithe ar bhonn pro rata nach lú ná 5 % de luach ainmniúil iomlán gach ceann de na tráinsí eisithe;

(c)

céatadán nach lú ná 5 % de luach ainmniúil gach ceann de na neamhchosaintí urrúsaithe a choinneáil, ar choinníoll go rangaítear an riosca creidmheasa coinnithe ar comhchéim leis an riosca creidmheasa a urrúsaíodh i ndáil leis na neamhchosaintí céanna, nó ar chéim níos ísle ná é;

(d)

saoráid leachtachta a sholáthar, i gcomhthéacs cláir ABCP, ar choinníoll go gcomhlíonfar na coinníollacha uile seo a leanas: