(1)

Leis an Teachtaireacht ón gCoimisiún dar teideal “Compás Digiteach 2030: an modh Eorpach don Deacáid Dhigiteach” (2), leagtar amach cuspóirí nascachta nua le haghaidh an Aontais a bheidh le baint amach trí imscaradh forleathan líonraí fíor-ardacmhainne agus cur in úsáid líonraí fíor-ardacmhainne. Tá sé ar cheann de na cuspóirí go gcumhdófar gach teaghlach san Aontas le líonra Gigighiotáin faoi 2030. Rannchuidítear go mór leis an gcuspóir cumhdaigh sin le córais rochtana gan sreang lena n-áirítear feidhmchláir líonraí achair logánta raidió (WAS/RLANanna).

(2)

Rialaítear an rochtain ar líonraí achair logánta raidió le hAirteagal 56 de Threoir (AE) 2018/1972 ó Pharlaimint na hEorpa agus ón gComhairle (3). Sainmhínítear líonra achair logánta raidió leis an Treoir sin mar chórais ísealchumhachta rochtana gan sreang, a oibríonn thar raon beag, agus a mbaineann riosca íseal leo ó thaobh cur isteach ar chórais eile den sórt sin a bhíonn in úsáid an-ghar dóibh ag úsáideoirí eile, agus ina n-úsáidtear, ar bhonn neamheisiach, speictream raidió comhchuibhithe.

(3)

Le Cinneadh 2005/513/CE ón gCoimisiún (4), comhchuibhíodh úsáid speictrim raidió i mbanda 5 GHz (5 150-5 350 MHz agus 5 470-5 725 MHz) le haghaidh córas rochtana gan sreang lena n-áirítear líonraí achair logánta raidió.

(4)

I gcomhréir le Rialacháin Raidió an Aontais Teileachumarsáide Idirnáisiúnta (ITU) (5), leithdháiltear bandaí minicíochta 5 150-5 350 MHz agus 5 470-5 725 MHz ar an tseirbhís mhóibíleach seachas seirbhís mhóibíleach aerloingseoireachta ar phríomhbhonn i ngach ceann de thrí Réigiún ITU, agus an gá le príomhsheirbhísí eile sna bandaí minicíochta sin a chosaint á chur san áireamh. In 2003, ghlac Comhdháil Radachumarsáide Domhanda ITU (WRC-03) Rún 229 maidir le “Úsáid bhandaí 5 150-5 250, 5 250-5 350 MHz agus 5 470-5 725 MHz ag an tseirbhís mhóibíleach le haghaidh cur chun feidhme Córas Rochtana gan Sreang lena n-áirítear Líonraí Achair Logánta Raidió”. Leis an Rún sin, a ndearnadh athbhreithniú air ag an gComhdháil Radachumarsáide Domhanda in 2019 (WRC-19), leathnaíodh raon feidhme na húsáide laistigh chun traenacha agus feithiclí bóthair a chumhdach, socraíodh an uaschumhacht astaíochta le haghaidh WAS/RLANanna agus banda minicíochta 5 150-5 250 MHz á úsáid i bhfeithiclí bóthair, agus ceadaíodh úsáid lasmuigh theoranta i mbanda 5 150-5 250 MHz trí úsáidí eile a bhí ann cheana sa bhanda sin a chosaint.

(5)

I roinnt Ballstát, tá géarghá le radair mhíleata agus mheitéareolaíocha a oibriú sna bandaí idir 5 250 agus 5 850 MHz a bhfuil gá cosaint shonrach ina leith in aghaidh trasnaíocht dhíobhálach ó WAS/RLANanna. Sa chomhthéacs sin, leis na coinníollacha teicniúla agus oibríochtúla maidir le húsáid WAS/RLANanna, is gá cosaint leasanna poiblí dlisteanacha a bhaineann le seirbhísí raidió eile, lena n-áirítear radair mhíleata agus mheitéareolaíocha, a áirithiú. Córais a bhaineann le seirbhís satailíte um thaiscéalaíocht an Domhain (gníomhach), an tseirbhís um spástaighde (gníomhach) agus naisc fothaire le haghaidh seirbhís satailíte shoghluaiste, go háirithe i mbanda minicíochta 5 150-5 350 MHz, is gá freisin inmharthanacht córas den sórt sin a chosaint.

(6)

Maidir le WRC-19 a rinne athbhreithniú ar Rún 229, chun torthaí na Comhdhála sin a chur chun feidhme, an 14 Aibreán 2020, d’eisigh an Coimisiún sainordú do Chomhdháil Eorpach na Riarachán Poist agus Teileachumarsáide (CEPT), de bhun Airteagal 4(2) de Chinneadh Uimh. 676/2002/CE, chun leasú a dhéanamh ar Chinneadh 2005/513/CE maidir le húsáid chomhchuibhithe speictrim raidió i mbanda minicíochta 5 GHz le haghaidh cur chun feidhme WAS/RLANanna. Faoin sainordú, tugadh dhá thasc do CEPT. Ba é an chéad cheann acu sin coinníollacha teicniúla a mholadh chun leasú a dhéanamh ar Chinneadh 2005/513/CE i bhfianaise thoradh WRC-19 (athbhreithniú ar Rún 229) maidir le banda minicíochta 5 150-5 250 MHz. Ba é an dara tasc nuashonruithe comhfhreagracha na gcoinníollacha teicniúla comhchuibhithe a mholadh maidir le WAS/RLANanna i mbandaí 5 150-5 350 MHz agus 5 470-5 725 MHz, de réir mar is iomchuí. Ba é ba chuspóir do na nuashonruithe féidearthachtaí a mheas maidir le húsáid na WAS/RLANanna sin ar bord feithiclí (aerárthaí, feithiclí bóthair (gluaisteáin, busanna), traenacha, etc.) agus measúnú a dhéanamh ar a indéanta atá sé WAS/RLAN a úsáid le haghaidh naisc raidió córas aerárthaí gan foireann (UAS).

(7)

I gcomhréir leis an sainordú sin, d’fhoilsigh CEPT Tuarascáil 79 maidir le húsáid chomhchuibhithe speictrim raidió i mbanda minicíochta 5 GHz le haghaidh cur chun feidhme WAS/RLANanna i ndiaidh WRC-19. I dTuarascáil 79 CEPT, tá coinníollacha teicniúla athbhreithnithe le haghaidh WAS/RLANanna i mbanda 5 150-5 250 MHz maidir leis na cásanna úsáide laistigh seo a leanas: laistigh d’fhoirgnimh agus de shuiteálacha laistigh d’fheithiclí bóthair, traenacha agus aerárthaí, agus úsáid lasmuigh theoranta. Ní cheadaítear UAS a oibriú i mbanda 5 170-5 250 MHz ach amháin mar chás sonrach úsáide lasmuigh. Leis na coinníollacha teicniúla a mholtar maidir le banda 5 250-5 350 MHz, laistigh d’fhoirgnimh ní cheadaítear ach úsáid laistigh. Is féidir banda 5 470-5 725 MHz a úsáid laistigh agus lasmuigh, ach ní áirítear leis sin suiteálacha i bhfeithiclí bóthair, traenacha agus aerárthaí agus é a úsáid le haghaidh UAS. Baineadh úsáid as torthaí an tsainordaithe i dTuarascáil 79 CEPT mar bhunús leis an gCinneadh seo.

(8)

Ina Thuarascáil 79, dheimhnigh CEPT tuiscint choiteann maidir leis an tábhacht a bhaineann le saincheist na trasnaíochta díobhálaí ar radair mheitéareolaíocha i mbanda 5 600-5 650 MHz a réiteach. Chun rannchuidiú le trasnaíocht dhíobhálach ar radair mheitéareolaíocha a laghdú, leis an gCinneadh seo, ba cheart coinníollacha teicniúla a leagan síos le haghaidh suiteálacha WAS/RLANanna i bhfeithiclí bóthair, traenacha agus aerárthaí agus úsáid WAS/RLANanna i measc córais aerárthaí gan foireann (UAS) agus na ceanglais is infheidhme maidir le roghnúchán minicíochta dinimiciúil (DFS) a shoiléiriú. D’fhéadfaí athbhreithniú a dhéanamh ar an gCinneadh seo amach anseo chun measúnú a dhéanamh ar éifeachtacht na mbeart sin.

(9)

I gcás ina bhfuil teorainn gheografach le húsáid eile seachas WAS/RLANanna agus ina bhfuil na húdaráis rialála náisiúnta ar an eolas faoi úsáid eile, ba cheart na Ballstáit a bheith i dteideal suiteálacha laistigh a údarú ar an leibhéal náisiúnta i dtraenacha a úsáideann bandaí minicíochta 5 250-5 350 MHz agus 5 470-5 725 MHz, i gcás inar féidir úsáid WAS/RLAN a rialáil agus srian geografach a chur uirthi.

(10)

Leis an gCinneadh seo, cuirtear leis na prionsabail agus leis na forálacha a leagtar amach i gCinneadh 2005/513/CE agus déantar forbairt orthu. Ar mhaithe leis an deimhneacht dhlíthiúil, ba cheart Cinneadh 2005/513/CE a aisghairm.

(11)

Tá na bearta dá bhforáiltear sa Chinneadh seo i gcomhréir leis an tuairim ón gCoiste um an Speictream Raidió,

(a)

is córais raidió leathanbhanda “córais rochtana gan sreang lena n-áirítear líonraí achair logánta raidió (WAS/RLANanna)” lena gceadaítear rochtain gan sreang le haghaidh feidhmeanna poiblí agus príobháideacha gan beann ar thoipeolaíocht an bhunlíonra;

(b)

sainmhínítear “úsáid laistigh” mar úsáid laistigh de spás iata lena gcuirfear ar fáil an maolúchán is gá chun an chomhroinnt le seirbhísí eile a éascú. Is féidir úsáid laistigh a aicmiú ina ceithre chás úsáide, mar a shainaithnítear i gcoinníollacha teicniúla na hIarscríbhinne a ghabhann leis an gCinneadh seo lena gcuirtear san áireamh cásanna sonracha: laistigh d’fhoirgnimh, laistigh d’fheithiclí bóthair, laistigh de thraenacha agus laistigh d’aerárthaí;

(c)

ciallaíonn “cumhacht choibhéiseach radaithe go hiseatrópach (‘e.i.r.p.’)” táirge na cumhachta a sholáthraítear don aeróg agus an neartú aeróige i dtreo ar leith i ndáil le haeróg iseatrópach (dearbhneartúchán nó neartúchán iseatrópach);

(d)

ciallaíonn “meánchumhacht choibhéiseach radaithe go hiseatrópach (‘e.i.r.p.’)” e.i.r.p. le linn rabharta tarchuir a chomhfhreagraíonn don chumhacht is airde, má chuirtear rialú cumhachta chun feidhme.