(1)

Le Rialachán (AE) Uimh. 576/2013 leagtar síos na ceanglais sláinte ainmhithe is infheidhme maidir le gluaiseachtaí neamhthráchtála peataí éin, lena n-áirítear éin dá dtagraítear i gCuid B d’Iarscríbhinn I de (peataí éin), agus foráiltear leis go bhféadfar bearta coisctheacha sláinte a ghlacadh trí bhíthin gníomhartha tarmligthe chun sláinte ainmhithe agus sláinte phoiblí a chosaint ó ghalair nó ó ionfhabhtuithe ar dócha go scaipfear iad de bharr gluaiseachtaí neamhthráchtála peataí éin isteach i mBallstát ó chríoch nó ó thríú tír.

(2)

Le Rialachán (AE) Uimh. 576/2013, foráiltear freisin go bhfuil na bearta coisctheacha le bheith bunaithe ar fhaisnéis eolaíoch atá leordhóthanach, iontaofa agus bailíochtaithe agus go bhfuil siad le cur i bhfeidhm i gcomhréir leis na rioscaí don tsláinte phoiblí nó do shláinte ainmhithe a bhaineann le leathadh na ngalar sin nó na n-ionfhabhtuithe sin trí ghluaiseachtaí trasteorann peataí éin.

(3)

Ar mhaithe le simplíocht agus trédhearcacht rialacha an Aontais, agus le cur i bhfeidhm na rialacha sin a éascú agus le dúbláil a sheachaint, ba cheart na rialacha maidir le gluaiseachtaí neamhthráchtála peataí éin isteach i mBallstát ó chríoch nó ó thríú tír a leagan síos in aon ghníomh amháin seachas i roinnt gníomhartha crostagartha ar leithligh. Tá an cur chuige sin i gcomhréir freisin leis an gcur chuige atá ann faoi láthair i réimse reachtaíocht an Aontais maidir le sláinte ainmhithe, amhail an reachtaíocht a glacadh le Rialachán (AE) 2016/429 ó Pharlaimint na hEorpa agus ón gComhairle (2), ar cur chuig é atá i bhfabhar rialacha an Aontais a chuíchóiriú chun cur i bhfeidhm na rialacha sin a éascú agus chun an t-ualach riaracháin a laghdú.

(4)

Is galar víreasach tógálach é an fliú éanúil a ghabhann d’éin agus d’fhéadfadh sé tionchar diúltach a imirt ar shláinte ainmhithe agus ar an tsláinte phoiblí. Thar aon ní eile, is ionfhabhtuithe le víreas an fhliú éanúil in éanlaith chlóis is cúis le dhá phríomhfhoirm an ghalair sin a bhfuil a nimhneacht mar shaintréith acu. Ní bhíonn ach siomptóim éadroma ag baint leis an bhfoirm lagphataigineach, de ghnáth, ach d’fhéadfadh an fhoirm ardphataigineach a bheith ina cúis le rátaí an-ard mortlaíochta i bhformhór speiceas éanlaithe clóis. Dá bhrí sin, d’fhéadfadh tionchar tromchúiseach a bheith ag an ngalar sin ar bhrabúsacht na feirmeoireachta éanlaithe clóis. Ina theannta sin, cé gur in éin is mó a fheictear an fliú éanúil, is féidir le hionfhabhtuithe tarlú i ndaoine faoi chúinsí áirithe cé go mbíonn an riosca an-íseal de ghnáth.

(5)

In 2005, tar éis an chéad tarlaithe de chás an fhliú éanúil ardphataiginigh (HPAI) d’fhochineál H5N1, in éan i mbraighdeanas a tugadh isteach san Aontas, is le Cinneadh 2005/759/CE ón gCoimisiún (3) a leagadh síos bearta cosanta arb é b’aidhm dóibh cosc a chur ar an víreas HPAI a thabhairt isteach agus a leathadh trí ghluaiseachtaí peataí a bhí in éineacht lena n-úinéirí isteach san Aontas. De bharr na rioscaí leanúnacha do shláinte ainmhithe a bhaineann leis na gluaiseachtaí sin, rinneadh Cinneadh 2005/759/CE a aisghairm agus cuireadh Cinneadh 2007/25/CE ón gCoimisiún (4) ina ionad. De bharr athruithe ar an staid eipidéimeolaíoch san Aontas, rinne Cinneadh 2007/25/CE a leasú tuilleadh agus cuireadh síneadh roinnt uaireanta le dáta a chur i bhfeidhm, an uair dheireanach le Cinneadh Cur Chun Feidhme (AE) 2020/2107 ón gCoimisiún (5). Is an 31 Nollaig 2021 a rachaidh Cinneadh 2007/25/CE i léig.

(6)

Ós rud é go bhfuil méadú tagtha ar bhagairt dhomhanda an fhliú éanúil le blianta beaga anuas, áfach, agus nach meastar go dtiocfaidh feabhas ar an staid eipidéimeolaíoch go luath amach anseo, is iomchuí bearta cosanta buana a shuí faoi chuimsiú Rialachán (AE) Uimh. 576/2013, chun a áirithiú nach mbeidh riosca ag baint le gluaiseachtaí neamhthráchtála peataí éin isteach san Aontas maidir le víreas an fhliú éanúil a thabhairt isteach agus a leathadh.

(7)

Cuireann críocha áirithe agus tríú tíortha áirithe rialacha sláinte ainmhithe i bhfeidhm maidir le gluaiseacht neamhthráchtála peataí éin isteach ina gcríoch, rialacha atá coibhéiseach leis na rialacha a leagtar síos sa Rialachán seo. Dá bhrí sin, féadfar a mheas go bhfuil riosca an-íseal don Aontas maidir le sláinte ainmhithe ag baint le gluaiseachtaí neamhthráchtála peataí éin isteach san Aontas ó na críocha agus ó na tríú tíortha, agus maidir leis na rialacha i dtaca le gluaiseachtaí neamhthráchtála peataí éin a leagtar síos sa Rialachán seo, níor cheart feidhm a bheith ag na rialacha sin maidir le gluaiseachtaí neamhthráchtála peataí éin isteach san Aontas ó na críocha áirithe agus na tríú tíortha áirithe sin.

(8)

Chun cosc a chur ar ghluaiseachtaí tráchtála éan isteach san Aontas a bheith á gceilt go calaoiseach mar ghluaiseachtaí neamhthráchtála, ba cheart an t-uaslíon peataí éin a d’fhéadfadh a bheith in éineacht lena n-úinéir nó le duine údaraithe a theorannú do chúig pheata éin in aon ghluaiseacht neamhthráchtála amháin. Ós rud é go bhfuil riosca níos airde ag baint le líon níos mó éan maidir le víreas an fhliú éanúil a thabhairt isteach agus a leathadh, níor cheart gluaiseachtaí de níos mó ná cúig pheata éin isteach san Aontas a mheas mar aon ghluaiseacht neamhthráchtála amháin peataí éin, agus níor cheart gluaiseachtaí den sórt sin a bheith faoi raon feidhme na rialacha a leagtar síos sa ghníomh seo. Ina ionad sin, ba cheart leanúint de na gluaiseachtaí sin a dhéanamh i gcomhréir leis na ceanglais maidir le teacht isteach éan i mbraighdeanas san Aontas a leagtar síos i Rialachán Tarmligthe (AE) 2020/692 ón gCoimisiún (6), agus ba cheart iad a bheith faoi réir rialuithe oifigiúla ag poist rialaithe teorann mar a leagtar síos i Rialachán (AE) 2017/625 ó Pharlaimint na hEorpa agus ón gComhairle (7).

(9)

Ina theannta sin, ba cheart rialacha a leagan síos sa ghníomh sin maidir leis na modhanna chun peataí éin atá le haistriú isteach i mBallstát ó chríoch nó ó thríú tír a shainaithint, chun a áirithiú gur féidir nasc a dhéanamh idir an peata éin agus an doiciméad sainaitheantais comhfhreagrach.

(10)

I dtuairim eolaíoch ar an bhfliú éanúil de chuid an Údaráis Eorpaigh um Shábháilteacht Bia (EFSA), tuairim a foilsíodh den chéad uair an 16 Deireadh Fómhair 2017 (8), measadh na ceanglais sláinte ainmhithe a leagadh síos i gCinneadh 2007/25/CE a bheith éifeachtach maidir le maolú a dhéanamh ar na rioscaí a bhaineann le víreas an fhliú éanúil a thabhairt isteach san Aontas trí ghluaiseachtaí neamhthráchtála peataí éin isteach i mBallstáit ó chríocha nó ó thríú tíortha. Dá bhrí sin, ba cheart na ceanglais sláinte ainmhithe a leagtar síos sa Chinneadh sin a úsáid mar bhonn do na ceanglais a leagtar síos sa Rialachán seo.

(11)

Leis na bearta coisctheacha sláinte maidir le gluaiseachtaí neamhthráchtála peataí éin isteach san Aontas, ba cheart foráil a dhéanamh maidir le roinnt roghanna maidir le ceanglais dá n-iontráil, lena n-áirítear leithlisiú, roimh na gluaiseachtaí neamhthráchtála sin nó ag an gceann scríbe, agus anuas air sin, tástáil réamhghluaiseachta le haghaidh fhochineálacha H5 agus H7 den víreas HPAI agus vacsaíniú in aghaidh fhochineálacha H5 agus H7 den víreas HPAI.

(12)

Níor cheart, áfach, rogha an leithlisithe a cheadú roimh ghluaiseacht neamhthráchtála isteach san Aontas ach amháin i gcás peataí éin de thionscnamh críoch nó tríú tíortha a ndearnadh measúnú orthu i leith an fhliú éanúil agus galar eile is ábhartha do na speicis éanúla. Dá bhrí sin, ba cheart an rogha sin a theorannú do na tríú tíortha nó do na críocha a liostaítear sa tábla a leagtar amach i gCuid 1 d’Iarscríbhinn V, Iarscríbhinn XIV nó Iarscríbhinn XIX a ghabhann le Rialachán Cur Chun Feidhme (AE) 2021/404 ón gCoimisiún (9) maidir le teacht isteach san Aontas éanlaithe clóis agus táirgí geirmeacha ó éanlaith chlóis, feoil úr éanlaithe clóis agus éin ghéim, nó uibheacha agus táirgí uibheacha, faoi seach.

(13)

Ina theannta sin, a mhéid a bhaineann le rogha an leithlisithe do pheataí éin ag an gceann scríbe, níor cheart é sin a dhéanamh ach i mbunaíocht a d’fhéadfadh stádas sláinte na n-ainmhithe a ráthú. Dá bhrí sin, ba cheart ceanglas a bheith ann faoin rogha sin go gcuirfí peataí éin i mbunaíocht choraintín arna formheas i gcomhréir le hAirteagal 14 de Rialachán Tarmligthe (AE) 2019/2035 ón gCoimisiún (10).

(14)

Maidir leis na rioscaí a bhaineann le víreas an fhliú éanúil a leathadh isteach san Aontas trí ghluaiseachtaí neamhthráchtála peataí éin ó chríocha nó ó thríú tíortha, chun na rioscaí sin a mhaolú tuilleadh ba cheart toirmeasc a chur ar na peataí éin sin a chur isteach i seónna, in aontaí, i dtaispeántais nó i mbailiú eile éan le linn tréimhse ama iomchuí tar éis a dteacht isteach san Aontas. Dá bhrí sin, ba cheart ceanglas a bheith ann go ndéanfaí peataí a leithlisiú faoi rialú oifigiúil le linn na tréimhse ama sin, i gcomhréir leis an rialú oifigiúil dá bhforáiltear in Airteagal 35(1), pointe (b), de Rialachán (AE) Uimh. 576/2013.

(15)

Ba cheart comhlíonadh na gceanglas a leagtar síos sa Rialachán seo a bheith deimhnithe ag tréidlia oifigiúil na críche nó an tríú tír tionscnaimh nó, de rogha air sin, ag tréidlia údaraithe agus é a bheith formhuinithe ina dhiaidh sin ag údarás inniúil na críche sin nó an tríú tír tionscnaimh, i gcomhréir leis an deimhniú tréidliachta a leagtar síos san Iarscríbhinn a ghabhann le Rialachán Cur Chun Feidhme (AE) 2021/1938 ón gCoimisiún (11), rud atá le cur i bhfeidhm in éineacht leis na rialacha a leagtar síos sa Rialachán seo.

(16)

Chun bearna dhlíthiúil sna rialacha maidir le gluaiseacht neamhthráchtála peataí éin isteach i mBallstát ó chríocha nó ó thríú tíortha a sheachaint, ba cheart feidhm a bheith ag an Rialachán seo ón 1 Eanáir 2022, ós rud é go dtiocfaidh na rialacha a leagtar síos anseo in ionad roinnt de na rialacha a leagtar síos faoi láthair i gCinneadh 2007/25/CE, Cinneadh a mbeidh feidhm aige go dtí an 31 Nollaig 2021,