(1)

Socraítear le Rialachán (AE) 2020/123 ón gComhairle (1) le haghaidh 2020 na deiseanna iascaireachta le haghaidh stoic áirithe éisc agus le haghaidh grúpaí de stoic éisc is infheidhme in uiscí an Aontais agus, i gcás soithí iascaireachta an Aontais, in uiscí áirithe nach uiscí de chuid an Aontais iad. Shocraigh an Rialachán sin deiseanna iascaireachta go dtí an 31 Deireadh Fómhair 2020 le haghaidh trosc Ioruach agus foghabhálacha gaolmhara i roinn 3a d’uiscí na Comhairle Idirnáisiúnta um Thaiscéalaíocht na Mara (“ICES”) agus uiscí an Aontais de roinn 2a ICES agus i bhfolimistéar 4 ICES.

(2)

Le Rialachán (AE) 2020/1579 ón gComhairle (2), leasaítear Rialachán (AE) 2020/123 chun deiseanna iascaireachta tosaigh lena gcumhdaítear an tréimhse ón 1 Samhain 2020 go dtí an 31 Nollaig 2020 le haghaidh trosc Ioruach agus foghabhálacha gaolmhara in uiscí i roinn 3a d’uiscí ICES agus uiscí an Aontais de roinn 2a ICES agus i bhfolimistéar 4 ICES a shocrú (“deiseanna iascaireachta tosaigh”).

(3)

De dheasca nach gcumhdaíonn na deiseanna iascaireachta ach 2 mhí den bhliain iascaireachta, a mhaireann ón 1 Samhain go dtí an 31 Deireadh Fómhair, socraíodh iad i bhfad faoi bhun chomhairle bhliantiúil na ngabhálacha arna soláthar ag ICES.

(4)

Is iondúil a mhaireann an séasúr iascaireachta le haghaidh trosc Ioruach ó mhí Mheán Fómhair go dtí mí Eanáir, séasúr a mbíonn buaicphointe aige ó mhí Dheireadh Fómhair go dtí mí na Nollag. Léirítear sna sonraí is déanaí a cuireadh faoi bhráid an Choimisiúin gur gabhadh os cionn 21 000 tona trosc Ioruach i mí Dheireadh Fómhair 2020. Trí na huimhreacha sin a eachtarshuí de réir na bpátrún gabhála stairiúil san iascach trosc Ioruach, léirítear gurb é is dóichí go n-ídeofar na deiseanna iascaireachta agus, dá bhrí sin, nach mbeidh siad leordhóthanach chun an ghníomhaíocht iascaireachta a chumhdach go dtí deireadh na bliana. D’fhonn cur isteach ar ghníomhaíochtaí iascaireachta don stoc seo a sheachaint roimh dheireadh 2020, is iomchuí, dá bhrí sin, na deiseanna iascaireachta tosaigh a choigeartú de réir na meastachán is déanaí, agus fanacht go hiomlán i gcomhréir le comhairle ICES ag an am céanna.

(5)

Dá bhrí sin, ba cheart Rialachán (AE) 2020/123 a leasú dá réir.

(6)

Ba cheart feidhm a bheith ag na deiseanna iascaireachta coigeartaithe tosaigh ón 1 Samhain. Ní dhéanann an cur i bhfeidhm cúlghabhálach sin difear do phrionsabal na deimhneachta dlíthiúla agus don phrionsabal i dtaobh ionchais dhlisteanacha a chosaint mar go bhfuil méadú tagtha ar na deiseanna iascaireachta atá i gceist.

(7)

De bharr go gcumhdaíonn na deiseanna iascaireachta tosaigh an tréimhse ón 1 Samhain go dtí an 31 Nollaig 2020, ba cheart an Rialachán seo a theacht i bhfeidhm láithreach tar éis a fhoilsithe.

(8)

Chuathas i gcomhairle leis an Ríocht Aontaithe i gcomhréir le hAirteagal 130(1) den Chomhaontú maidir le Ríocht Aontaithe na Breataine Móire agus Thuaisceart Éireann a bheith ag tarraingt siar as an Aontas Eorpach agus as an gComhphobal Eorpach do Fhuinneamh Adamhach (3),