27.3.2015   

GA

Iris Oifigiúill an Aontais Eorpaigh

L 83/11

(1)

Tá Rialachán (CE) Uimh. 452/2003 (2) ón gComhairle leasaithe go substaintiúil (3). Ar mhaithe le soiléire agus le réasúntacht, ba cheart an Rialachán sin a chódú.

(2)

Le Rialachán (CE) Uimh. 1225/2009 (4) ón gComhairle, leagadh rialacha comhchoiteanna síos chun cosaint a thabhairt ar allmhairí dumpáilte ó thíortha nach Ballstáit den Aontas iad.

(3)

Le Rialachán (CE) Uimh. 597/2009 (5) ón gComhairle, leagadh rialacha comhchoiteanna síos chun cosaint a thabhairt ar allmhairí ar tugadh fóirdheontas ina leith, ar allmhairí iad ó thíortha nach Ballstáit den Aontas iad.

(4)

Le Rialachán (CE) Uimh. 260/2009 (6) ón gComhairle agus Rialachán (CE) Uimh. 625/2009 (7) ón gComhairle, leagadh rialacha comhchoiteanna síos chun bearta cosanta i gcoinne allmhairí ó thíortha áirithe nach Ballstáit den Aontas iad a ghlacadh. Féadfaidh bearta cosanta a bheith i bhfoirm bearta taraife is infheidhme maidir le gach allmhaire nó na hallmhairí sin ar mó ná cainníocht réamhchinntithe iad. Cuireann bearta cosanta den sórt sin in iúl go bhfuil na hearraí i dteideal dul isteach i margadh an Aontais tar éis na dleachtanna ábhartha a bheith íoctha.

(5)

Féadfaidh allmhairiú earraí áirithe a bheith faoi réir bearta frithdhumpála nó frith-fhóirdheontais ar thaobh amháin agus faoi réir bearta cosanta taraife ar an taobh eile. Is é is aidhm do na bearta frithdhumpála nó frith-fhóirdheontais an saobhadh margaidh a tháinig as cleachtais trádála mhíchothroma a réiteach, agus is é is aidhm do na bearta cosanta taraife cosaint a thabhairt ar allmhairí atá dulta i méid go mór.

(6)

Mar sin féin, d'fhéadfadh éifeacht níos mó ná mar a bhí beartaithe nó ba inmhianaithe ó thaobh bheartas cosanta trádála agus chuspóirí an Aontais a bheith mar thoradh ar an gcomhcheangal de bhearta frithdhumpála nó frith-fhóirdheontais agus bearta cosanta taraife ar an aon táirge amháin. Go háirithe, d'fhéadfadh comhcheangal beart den sórt sin ualach dochraideach neamh-inmhianaithe a chur ar tháirgeoirí onnmhairiúcháin áirithe atá ag iarraidh earraí a onnmhairiú chuig an Aontas, rud a d'fhéadfadh sé gurb é an eifeacht a bheidh leo go ndiúltófaí rochtain dóibh ar mhargadh an Aontais.

(7)

Mar thoradh air sin, níor cheart táirgeoirí onnmhairiúcháin atá ag iarraidh earraí a onnmhairiú chuig an Aontas a bheith faoi réir ualaí dochraideacha neamh-inmhianaithe agus ba cheart rochtain a bheith acu fós ar mhargadh an Aontais.

(8)

Is inmhianaithe a áirithiú, dá bhrí sin, gur féidir cuspóirí na mbeart cosanta taraife agus na mbeart frithdhumpála agus/nó frith-fhóirdheontais a chomhlíonadh gan rochtain ar mhargadh an Aontais a dhiúltú do na táirgeoirí onnmhairiúcháin sin. Dá bhrí sin, ba cheart forálacha sonracha a leagan síos ionas gur féidir leis an gCoimisiún bearta a dhéanamh, i gcás ina measann sé gurb iomchuí sin a dhéanamh, d'fhonn a áirithiú nach mbeidh éifeacht den sórt sin ag baint le comhcheangal de bhearta frithdhumpála nó frith-fhóirdheontais i agus bearta cosanta taraife ar an táirge céanna.

(9)

Cé go bhféadfar a thuar go bhféadfaidh an dleacht cosanta agus na bearta frithdhumpála nó frith-fhóirdheontais bheith infheidhme go comhuaineach maidir leis an táirge céanna, ní féidir a chinneadh roimhe ré i gcónaí cén uair go díreach a d'fhéadfadh sé sin tarlú. Dá bhrí sin, ba cheart go mbeadh an Coimisiún in ann foráil a dhéanamh maidir le cás den sórt sin ar bhealach lena n-áiritheofar go mbeidh intuarthacht agus deimhneacht dhlíthiúil leordhóthanach ann do gach oibreoir lena mbaineann.

(10)

Féadfaidh an Coimisiún a mheas gurb iomchuí bearta frithdhumpála agus/nó frith-fhóirdheontais a leasú, a fhionraí nó a aisghairm nó foráil a dhéanamh maidir le díolúintí go hiomlán nó go páirteach ó aon dleacht frithdhumpála nó frithchúitimh a bheadh iníoctha murach sin, nó gurb iomchuí aon bhearta speisialta eile a ghlacadh. Maidir le bearta frithdhumpála nó frith-fhóirdheontais, níor cheart aon fhionraí ná aon leasú orthu, ná aon díolmhú uathu a dheonú ach go ceann tréimhse teoranta.

(11)

Ba cheart aon bhearta a dhéantar faoin Rialachán seo a bheith infheidhme ó dháta theacht i bhfeidhm na mbeart sin, seachas má shonraítear a mhalairt iontu, agus níor cheart dóibh, dá bhrí sin, bonn a sholáthar le haisíoc na ndleachtanna arna mbailiú roimh an dáta sin.

(12)

Chun coinníollacha aonfhoirmeacha a áirithiú maidir le cur chun feidhme an Rialacháin seo, ba cheart cumhachtaí cur chun feidhme a thabhairt don Choimisiún. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (8),

(a)

bearta chun bearta frithdhumpála agus/nó frith-fhóirdheontais atá ann cheana a leasú, a chur ar fionraí nó a aisghairm;

(b)

bearta chun allmhairí a dhíolmhú go hiomlán nó go páirteach ó dhleachtanna frithdhumpála nó frithchúitimh a bheadh iníoctha murach sin;

(c)

aon bhearta speisialta eile a mheastar gurb iomchuí iad sa chás lena mbaineann.