(1)

Ir-Regolament tal-Kummissjoni (KE) Nru 1661/1999 tas-27 ta' Lulju 1999 li jistabbilixxi regoli dettaljati għall-applikazzjoni tar-Regolament tal-Kunsill (KEE) Nru 737/90 dwar il-kondizzjonijiet li jirregolaw l-importazzjoni ta' prodotti agrikoli li jorġinaw minn pajjiżi terzi wara l-inċident ta' l-istazzjon ta’ l-enerġija nukleari ta' Chernobyl (2), ġie emendat tliet darbiet. Minħabba li jridu jsiru aktar emendi, huwa xieraq li fl-interess taċ-ċarezza, ir-Regolament jitfassal mill-ġdid, kif previst fil-programm kurrenti ta’ simplifikazzjoni anness mal-Komunikazzjoni tal-Kummissjoni dwar l-istrateġija għas-simplifikazzjoni ta’ l-ambjent regolatorju (3).

(2)

Il-preċipitazzjoni ta' radjuċesju mill-inċident ta' l-impjant ta' Chernobyl fis-26 ta' April 1986 affettwat firxa kbira ta' pajjiżi terzi. Kienu ġew irreġistrati każi ripetuti ta' nuqqas ta' konformità mal-livelli massimi permessi ta' kontaminazzjoni radjoattiva f'kunsinni ta' ċerti tipi ta' faqqiegħ importat minn għadd ta' pajjiżi terzi.

(3)

Preċipitazzjoni simili affetwat ċerti partijiet tat-territorji ta' wħud mill-Istati Membri.

(4)

Ġeneralment il-foresti u l-inħawi bis-siġar huma l-ambjent naturali ta' faqqiegħ mhux ikkultivat u eko-sistemi bħal dawn għandhom tendenza li jżommu r-radjuċesju f'ċiklu ta' skambju bejn il-ħamrija u l-veġetazzjoni.

(5)

B'konsegwenza, il-kontaminazzjoni kontinwa ta' faqqiegħ mhux ikkultivat mir-radjuċesju, matul il-perjodu minn meta seħħ l-inċident imsemmi hawn fuq, ftit li xejn naqset u jista' jkun li din żdiedet fil-każ ta' ċerti speċijiet.

(6)

Fl-1986, il-Kummissjoni wettqet u sussegwentament aġġornat valutazzjoni tar-riskji possibli fuq is-saħħa tal-bniedem minn oġġetti ta' l-ikel kontaminati biċ-ċesju radjoattiv. Dik il-valutazzjoni tar-riskji possibbli għadha valida anke llum; billi tqis il-perjodu fiżiku radjoattiv tal-materjal imsemmi, u, barra minn hekk, il-livell massimu permess jikkonforma fil-qofol mal-livell rakkomandat mill-Kummissjoni Codex Alimentarius.

(7)

Skond l-Artikolu 4 tar-Regolament (KEE) Nru 737/90, l-Istati Membri għandhom iwettqu verifiki fuq prodotti li joriġinaw minn pajjiżi terzi.

(8)

Ir-Regolament tal-Parlament Ewropew u tal-Kunsill (KE) Nru 178/2002 tat-28 ta' Jannar 2002 li jistabilixxi l-prinċipji ġenerali u l-ħtiġijiet tal-liġi dwar l-ikel, li jistabilixxi l-Awtorità Ewropea dwar is-Sigurtà fl-Ikel u jistabbilixxi l-proċeduri fi kwistjonijiet ta' sigurtà ta' l-ikel (4) waqqaf sistema għall-iskambju rapidu ta’ l-informazzjoni.

(9)

Il-miżuri in situ fit-territorji ta' l-Istati Membri ta' l-Unjoni Ewropea joħorġu mill-obbligi legali ta' dawk l-Istati skond l-Artikoli 35 u 36 tat-Trattat Euratom, il-miżuri tal-Komunità li diġà hemm referenza għalihom u l-miżuri nazzjonali u l-kontrolli li, meħuda flimkien, huma, f'termini ta' ekwivalenza ta' riżultat, ugwali għal dawk approvati f'dan ir-Regolament. Il-Kummissjoni qiegħda tieħu l-miżuri kollha meħtieġa biex tiżgura li l-Istati Membri jkunu konformi b'mod effettiv ma’ l-obbligi legali f'dan ir-rigward. Il-Kummissjoni, b’mod partikolari, għamlet rakkomandazzjoni lill-Istati Membri dwar il-ħarsien u l-informazzjoni tal-pubbliku dwar l-esponiment li jirriżulta minn kontaminazzjoni kontinwa miċ-ċesju radjoattiv ta’ ċerti prodotti ta’ ikel selvaġġ bħala konsegwenza ta' l-inċident ta' l-impjant nukleari ta' Chernobyl (5).

(10)

Anke jekk jistħoqqilhom jitqiesu fil-ġejjieni d-dispożizzjonijiet għat-teħid ta' kampjuni u l-analiżi ta' prodotti agrikoli varji, il-ħtieġa immedjata hija li jissaħħu dawk id-dispożizzjonijiet fir-rigward tal-faqqiegħ.

(11)

Sabiex jitħallew kontrolli aktar effettivi, huwa meħtieġ, bħala konsegwenza, li jkun identifikat għadd ristrett ta' uffiċċji doganali minn fejn ċerti prodotti jkunu jistgħu jiġu ddikjarati għaċ-ċirkolazzjoni ħielsa fil-Komunità.

(12)

Il-listi ta' uffiċċji doganali u ta' pajjiżi terzi jistgħu jiġu riveduti kif xieraq, billi jingħata każ inter alia tal-konformità fil-futur mal-livelli massimi permessi u ta' informazzjoni oħra li tippermetti lill-Kummissjoni sabiex tiġġudika jekk ikunx hemm il-ħtieġa li pajjiż terz jinżamm fuq il-lista.

(13)

Għall-istess raġuni huwa xieraq li jiġu pprovduti ċertifikati ta' l-esportazzjoni, bħal ma hemm referenza għalihom f'Artikolu 4 tar-Regolament (KEE) Nru 737/90, għal kull kunsinna ta' prodotti bħal dawn.

(14)

Huwa xieraq li l-awtoritajiet kompetenti ta' l-Istati Membri jkunu awtorizzati, fuq id-diskrezzjoni tagħhom, li jimponu ħlas għat-teħid ta' kampjuni u għall-analiżi u għall-qerda tal-prodott jew ir-ritorn tiegħu dejjem sakemm ikun osservat il-prinċipju ta' proporzjonalità meta tkun eżerċitata l-għażla tal-qerda jew tar-ritorn u sakemm ukoll li, fi kwalunkwe każ, il-ħlasijiet hekk imposti ma jaqbżux l-ispejjeż imġarrba.

(15)

Id-dispożizzjonijiet ta' dan ir-Regolament huma konformi ma’ l-obbligi internazzjonali tal-Komunità, b'mod partikolari dawk li jirriżultaw mill-ftehimiet li jistabbilixxu l-Organizzazzjoni Dinjija tal-Kummerċ, billi jingħata każ tad-dritt tal-Komunità li taddotta u li tapplika miżuri li huma meħtieġa biex jintlaħaq il-livell ta' protezzjoni sanitarja magħżul fit-territorju ta' l-Istati Membri tagħha.

(16)

Il-miżuri pprovduti f'dan ir-Regolament huma bi qbil ma’ l-opinjoni tal-kumitat ad hoc li hemm referenza għalih f'Artikolu 7 tar-Regolament (KEE) Nru 737/90,