(1)

Id-Direttiva tal-Kummissjoni 2007/25/KE (2) inkludiet id-dimetomorf bħala sustanza attiva fl-Anness I tad-Direttiva tal-Kunsill 91/414/KEE (3).

(2)

Is-sustanzi attivi inklużi fl-Anness I tad-Direttiva 91/414/KEE jitqiesu li ġew approvati skont ir-Regolament (KE) Nru 1107/2009 u huma elenkati fil-Parti A tal-Anness tar-Regolament ta’ Implimentazzjoni tal-Kummissjoni (UE) Nru 540/2011 (4).

(3)

Kif stipulat fil-Parti A tal-Anness tar-Regolament ta’ Implimentazzjoni (UE) Nru 540/2011, l-approvazzjoni tas-sustanza attiva dimetomorf tiskadi fil-15 ta’ Frar 2025.

(4)

F’konformità mal-Artikolu 1 tar-Regolament ta’ Implimentazzjoni tal-Kummissjoni (UE) Nru 844/2012 (5) u fil-perjodu ta’ żmien previst f’dak l-Artikolu, ġiet sottomessa applikazzjoni għat-tiġdid tal-approvazzjoni tas-sustanza attiva dimetomorf lin-Netherlands, l-Istat Membru relatur, u lill-Ġermanja, l-Istat Membru korelatur.

(5)

L-applikanti ssottomettew il-fajls supplimentari lill-Istat Membru relatur, lill-Istat Membru korelatur, lill-Kummissjoni u lill-Awtorità Ewropea dwar is-Sigurtà fl-Ikel (“l-Awtorità”) f’konformità mal-Artikolu 6 tar-Regolament ta’ Implimentazzjoni (UE) Nru 844/2012. L-Istat Membru relatur sab li l-applikazzjoni kienet kompluta.

(6)

L-Istat Membru relatur ħejja abbozz tar-rapport ta’ valutazzjoni tat-tiġdid b’konsultazzjoni mal-Istat Membru korelatur u ressqu lill-Awtorità u lill-Kummissjoni fl-1 ta’ Awwissu 2017. Fl-abbozz tar-rapport ta’ valutazzjoni tat-tiġdid tiegħu, l-Istat Membru relatur ippropona li l-approvazzjoni tad-dimetomorf tiġġedded.

(7)

L-Awtorità għamlet id-dossier tas-sommarju supplimentari disponibbli għall-pubbliku. L-Awtorità bagħtet ukoll l-abbozz tar-rapport ta’ valutazzjoni tat-tiġdid lill-applikanti u lill-Istati Membri għall-kummenti tagħhom, u nediet konsultazzjoni pubblika dwaru. L-Awtorità għaddiet il-kummenti li rċeviet lill-Kummissjoni.

(8)

Fis-26 ta’ Mejju 2023, l-Awtorità kkomunikat lill-Kummissjoni l-konklużjoni tagħha (6) dwar jekk jistax ikun mistenni li d-dimetomorf jissodisfa l-kriterji ta’ approvazzjoni previsti fl-Artikolu 4 tar-Regolament (KE) Nru 1107/2009.

(9)

Fil-konklużjoni tagħha, l-Awtorità identifikat diversi punti ta’ tħassib. B’mod partikolari, id-dimetomorf ġie kklassifikat bħala tossiku għar-riproduzzjoni, il-kategorija 1B. Fl-20 ta’ Settembru 2019, il-Kumitat għall-Istima tar-Riskji tal-Aġenzija Ewropea għas-Sustanzi Kimiċi adotta opinjoni (7) f’konformità mal-Artikolu 37(4) tar-Regolament (KE) Nru 1272/2008 tal-Parlament Ewropew u tal-Kunsill (8) fejn ikkonkluda li d-dimetomorf ġie kklassifikat bħala tossiku għar-riproduzzjoni, il-kategorija 1B (H360F “jista’ jagħmel ħsara lill-fertilità”). Ir-Regolament Delegat tal-Kummissjoni (UE) 2021/849 (9) konsegwentement emenda l-Anness VI tar-Regolament (KE) Nru 1272/2008 u kklassifika d-dimetomorf bħala tossiku għar-riproduzzjoni, il-kategorija 1B.

(10)

L-Awtorità kkonkludiet ukoll li d-dimetomorf jissodisfa l-kriterji għall-interferenti endokrinali għall-bnedmin u għall-mammiferi selvaġġi bħala organiżmi mhux fil-mira stabbiliti fil-punti 3.6.5 u 3.8.2 tal-Anness II tar-Regolament (KE) Nru 1107/2009, minħabba l-modalitajiet tal-estroġenu, tal-androġenu u tal-isterojdoġenesi (EAS, Endocrine Active Substances).

(11)

Ma jistax jintwera esponiment negliġibbli għad-dimetomorf peress li huma mistennija li jseħħu residwi ogħla mill-valur prestabbilit ta’ 0,01 mg/kg għall-użi rappreżentattivi kollha u fl-għelejjel tan-newba. Għalhekk, ir-rekwiżiti stabbiliti fil-punti 3.6.4 u 3.6.5 tal-Anness II tar-Regolament (KE) Nru 1107/2009 mhumiex issodisfati.

(12)

L-Awtorità kkonkludiet li d-dimetomorf mhuwiex meħtieġ biex jikkontrolla periklu serju għas-saħħa tal-pjanti li ma jistax jitrażżan b’mezzi disponibbli oħra inklużi metodi mhux kimiċi, f’konformità mal-Artikolu 4(7) tar-Regolament (KE) Nru 1107/2009. Għall-użi rappreżentattivi tat-tiġdid tas-sustanza attiva (il-marda Phytophthora fil-frawli, il-moffa żajbrija fil-ħass u fid-dielja), fil-biċċa l-kbira tal-każijiet huma disponibbli sustanzi attivi alternattivi u deroga tista’ tiġi ġġustifikata xjentifikament fi ftit każijiet biss, eż. fil-każijiet ta’ nuqqas ta’ disponibbiltà u/jew nuqqas ta’ fattibbiltà ta’ metodi alternattivi mhux kimiċi. Barra minn hekk, kombinament ta’ metodi kimiċi u mhux kimiċi jista’ jkun possibbli biex jiġu kkontrollati l-pesti f’xi għelejjel. Apparti minn hekk, ma ġie identifikat l-ebda periklu għas-saħħa tal-pjanti li jeħtieġ l-użu tad-dimetomorf. Għalhekk, il-Kummissjoni hija tal-fehma li l-kundizzjonijiet għall-applikazzjoni tad-deroga fl-Artikolu 4(7) tar-Regolament (KE) Nru 1107/2009 mhumiex issodisfati.

(13)

Fit-12 ta’ Ottubru 2023, il-Kummissjoni ressqet abbozz tar-rapport tat-tiġdid għad-dimetomorf lill-Kumitat Permanenti dwar il-Pjanti, l-Annimali, l-Ikel u l-Għalf.

(14)

Il-Kummissjoni stiednet lill-applikanti jissottomettu l-kummenti tagħhom dwar il-konklużjoni tal-Awtorità. Barra minn hekk, f’konformità mal-Artikolu 14(1), it-tielet subparagrafu, tar-Regolament ta’ Implimentazzjoni (UE) Nru 844/2012, il-Kummissjoni stiednet lill-applikanti biex iressqu l-kummenti tagħhom dwar ir-rapport ta’ tiġdid. L-applikanti ressqu l-kummenti tagħhom, li ġew eżaminati bir-reqqa.

(15)

Minkejja l-argumenti li ressqu l-applikanti, it-tħassib rigward is-sustanza attiva ma setax jiġi eliminat.

(16)

Għaldaqstant, fir-rigward ta’ wieħed jew iktar mill-użi rappreżentattivi ta’ mill-inqas prodott wieħed għall-protezzjoni tal-pjanti ma ġiex stabbilit li l-kriterji għall-approvazzjoni previsti fl-Artikolu 4 tar-Regolament (KE) Nru 1107/2009 ġew issodisfati. Huwa għalhekk xieraq li ma tiġġeddidx l-approvazzjoni tas-sustanza attiva dimetomorf f’konformità mal-Artikolu 20(1)(b) ta’ dak ir-Regolament.

(17)

Għalhekk, jenħtieġ li r-Regolament ta’ Implimentazzjoni (UE) Nru 540/2011 jiġi emendat skont dan.

(18)

Jenħtieġ li l-Istati Membri jingħataw żmien biżżejjed biex jirtiraw l-awtorizzazzjonijiet tal-prodotti għall-protezzjoni tal-pjanti li fihom id-dimetomorf.

(19)

Fir-rigward tal-prodotti għall-protezzjoni tal-pjanti li fihom id-dimetomorf, meta l-Istati Membru jagħtu perjodu ta’ grazzja f’konformità mal-Artikolu 46 tar-Regolament (KE) Nru 1107/2009, dak il-perjodu jenħtieġ li ma jaqbiżx 12-il xahar mid-data tad-dħul fis-seħħ ta’ dan ir-Regolament.

(20)

Ir-Regolament ta’ Implimentazzjoni tal-Kummissjoni (UE) 2023/918 (10) estenda l-perjodu ta’ approvazzjoni tad-dimetomorf sal-15 ta’ Frar 2025 sabiex il-proċess tat-tiġdid ikun jista’ jitlesta qabel ma jiskadi l-perjodu ta’ approvazzjoni ta’ dik is-sustanza. Madankollu, peress li ttieħdet deċiżjoni dwar in-nuqqas ta’ tiġdid tal-approvazzjoni qabel dik id-data ta’ skadenza estiża, jenħtieġ li dan ir-Regolament japplika qabel dik id-data.

(21)

Ir-Regolament ma jipprevjenix is-sottomissjoni ta’ applikazzjoni oħra għall-approvazzjoni tad-dimetomorf skont l-Artikolu 7 tar-Regolament (KE) Nru 1107/2009.

(22)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,